ນາງ​ສາວ​ປະຕິທິນ​ເບຍ​ລາວ 2014 – Model of Beerlao calendar 2014

Written by  //  December 6, 2013  //  Fashion  //  No comments

01

ນາງ​ສາວ​ປະຕິທິນ​ເບຍ​ລາວ 2014

Model of Beerlao calendar 2014

Subhead:

ນາງ​ສາວ​ປະຕິທິນ​ເບຍ​ລາວ 2014 ທັງ 6 ສາວ​ງາມ ​ເຜີຍ​ຄວາມ​ຮູ້ສຶກ ພາຍຫຼັງ​ທີ່​ໄດ້​ຮັບ​ການ​ຄັດ​​ເລືອກ

ຊື່ ​ແລະ ນາມສະກຸນ: ຄຣີດສະຕີນາ ລາະສີມມາ, ອາຍຸ: 20 ປີ

​ປະຈຸ​ບັນ: ກຳລັງ​ສຶກສາ​ທີ່ ມະຫາວິທະຍາໄລ ແຫ່ງຊາດ ຄະນະວິສະວະກຳສາດ ພາກວິຊາ IT ແລະ ວິທະຍາໄລ ສຸສະກະ

ຄວາມ​ຮູ້ສຶກ​ໄດ້​ຮັບ​ການ​ຄັດ​​ເລືອກ​ເປັນ​ນາງ​ສາວ​ປະຕິ​ທິນ​ເບຍ​ລາວ ​ສຳລັບ​ປີ 2014 ​ເປັນ​ແນວ​ໃດ?

ຮູ້ສຶກດີໃຈ ຫຼາຍທີ່ໄດ້ເປັນໜຶ່ງໃນນາງສາວປະຕິທິນເບຍລາວ ສຳລັບປີ 2014 ເຊິ່ງຖືວ່າເປັນປະຕິທິນທີ່ ຄົນຈຳນວຍຫຼາຍຕ່າງກໍ່ຢາກເບິ່ງ ແລະ ການຖ່າຍພາບຄັ້ງນີ້ ມັນເປັນຄັ້ງທຳອິດສຳລັບ ຂ້ອຍ ພາຍຫຼັງທີ່ໄດ້ຮັບຕຳແໜ່ງຄອງຊະນະເລີດ ນາງສາວລາວ ປະຈຳປີ 2012.

ຄິດ​ວ່າ ສະ​ເໜ່ ​ແລະ ຈຸດ​ເດັ່ນຂອງ​ຕົນ​ເອງ ທີ່​ໄດ້​ຮັບ​ການ​ຄັດ​ເລືອກ​ເປັນ​ນາງ​ສາວ​ປະຕິທິນ​ເບຍ​ລາວ​ໃນ​ຄັ້ງ​ນີ້ ​ແມ່ນ​ຫຍັງ?

ຄິດວ່າ ແມ່ນຮອຍຍິ້ມ ອັນມີສະເໜ່ຂອງຂ້ອຍ  ພ້ອມກັບການວາງໂຕເທິງເວທີ່ ທີ່ເປັນທຳມະຊາດ.

​​ຜ່ານມາແມ່ນ​ຫຍັງ​ທີ່​ເປັນຄວາມ​ຮູ້​ສຶກພາກ​ພູມ​ໃຈ​?

ແມ່ນການໄດ້ຄອບຄອງຕຳແໜ່ງ ນາງສາວລາວ ປະຈຳປີ 2012, ການໄດ້ຮັບກຽດເປັນທູດວັດທະນະທຳ ຂອງ IFAT, Miss Calendar of Beerlao 2014

ສຳລັບ​ປີ 2014 ຢາກ​ໄດ້​ຫຍັງ ຢາກ​ເຮັດ​ຫຍັງ​ໃຫ້​ປະສົບ​ຜົນ​ສຳ​ເລັດ?

ຕົນເອງປາຖະໜາ ຢາກປະສົບຄວາມສຳເລັດທາງດ້ານການສຶກສາ ສາມາດເປັນທີ່ເພິ່ງພາຂອງຄອບຄົວໄດ້ ຢາກມີສ່ວນຮ່ວມໃນການຊ່ວຍເຫຼືອສັງຄົມ ແລະ ໃນຖານະທີ່ເປັນທູດວັດທະນະທຳຂອງ IFAD ຕົນເອງກໍ່ຈະເຮັດບົດບາດໜ້າທີ່ ເຊິ່ງຕົນເອງໄດ້ຮັບມອບໝາຍນັ້ນໃຫ້ດີທີ່ສຸດ

​​ໃນ​ຖານະ​ທີ່​ເປັນ​ແມ່ຍິງ​ລາວ​ຄົນ​ໜຶ່ງ ​ແມ່ນ​ຫຍັງ​ທີ່​ເປັນຄວາມ​ພາກພູມ​ໃຈ​?

ການນຸ່ງຖືຂອງແມ່ຍິງລາວ ເປັນສິ່ງທີ່ບົ່ງບອກເຖິງຄວາມງາມອັນລ້ຳຄ່າ ທີ່ສຸດຂອງຄົນລາວ ສະນັ້ນ ການທີ່ແມ່ຍິງລາວ ສວມໃສ່ສິ້ນ ກໍ່ເປັນເອກະລັກອັນໜຶ່ງທີ່ເປັນຈຸດເດັ່ນແຕກຕ່າງຈາກຊາດອື່ນ ນອກຈາກນັ້ນ ເຮົາຍັງມີວັດທະນະທຳ ຮີດຄອງປະເພນີອັນດີງາມ.

​​ເຮົາ​ຈະຮັກສາ​ວັດທະນະທຳ ປະ​ເພນີ​ອັນ​ດີງາມ ຂອງ​ຄົນ​ລາວ ​ແລະ ປະ​ເທດ​ຊາດ​ແນວ​ໃດ?

​ຄົນລາວເປັນຄົນທີ່ມີຈິດໃຈດີງາມ ມີຄວາມຮັກແພງຊ່ວຍເຫຼືອສາມັກຄີ ເຊິ່ງກັນ ແລະ ກັນ ຄວາມພາກພູມໃຈຂອງຄົນລາວກໍ່ຄື ມີຈິດໃຈອັນອົບອຸ່ນຕໍ່ແຂກຕ່າງດ້າວ ຊາວຕ່າງປະເທດ ຄົນທີ່ມາຢ້ຽມຢາມ. ລາວເຮົາໃນປີນີ້ ເປັນປະເທດທີ່ເປັນໜ້າທ່ອງທ່ຽວທີ່ສຸດສຳລັບປີ 2013 ແລະ ມີການຈັດກອງປະຊຸມຫຼາຍໆຢ່າງ ເມື່ອເຫັນແລ້ວເປັນຄວາມພາກພູມໃຈຂອງເຮົາ. (02 jpg)

 

ຊື່ ​ແລະ ນາມສະກຸນ: ວິ​ໄລ​ລັກ ອຸ່ນ​ນະລາດ  ​ອາຍຸ: 19 ປີ

​ປະຈຸ​ບັນ: ​ເປັນ​ນັກ​ສຶກສາ ທີ່ສະ​ຖາ​ບັນ ທະນາຄານ, ​ເລຂາ​ການ​ທະນາຄານ ປີ1

​ເປັນ​ນາງ​ສາວ​ປະຕິທິນ ສຳລັບ​ເດືອນ ກັນຍາ ​ແລະ ຕຸລາ  

ຄວາມ​ຮູ້ສຶກ​​ໄດ້​ຮັບ​ການ​ຄັດ​​ເລືອກ​ເປັນ​ນາງ​ສາວ​ປະຕິ​ທິນ​ເບຍ​ລາວ ​ສຳລັບ​ປີ 2014 ​ເປັນ​ແນວ​ໃດ?

​ຮູ້ສຶກ ມີ​ກຽດ​ສະຫງ່າ​ງາມ​ຫຼາຍ ​​​ແຕ່​ກ່ອນບໍ່​ຄິດ​ວ່າ​ຕົນ​ເອງ​ຈະ​ໄດ້​ຮັບ​ການ​ຄັດ​ເລືອກ ມາ​ເປັນ​ນາງ​ສາວ​ປະຕິທິນ​ເບຍ​ລາວ ​ເພາະ​ມັນ​ເປັນ​ການ​ປະ​ກວດ​ຄັ້ງ​ທຳ​ອິດ​ຂອງ​ຕົນ​ເອງ ​ແລະ ປີ​ນີ້ ຖື​ວ່າ​ເປັນ​ປີ​ພິ​ເສດ ​ເພາະ​​ເປັນ​ການສະ​ເຫຼີ​ມສະຫຼອງ ບໍລິສັດ ​ເບຍ​ລາວ ຈຳກັດ ຄົບຮອບ 40 ປີ ​ອັນ​ໄດ້​ສ້າງ​ຄວາມ​ຮູ້ສຶກ​ດີ​ໃຈ ​ແລະ ພູມ​ໃຈ​ຂຶ້ນ​ຕື່ມ.

ຄິດ​ວ່າ ສະ​ເໜ່ ​ແລະ ຈຸດ​ເດັ່ນຂອງ​ຕົນ​ເອງ ທີ່​ໄດ້​ຮັບ​ການ​ຄັດ​ເລືອກ​ເປັນ​ນາງ​ສາວ​ປະຕິທິນ​ເບຍ​ລາວ​ໃນ​ຄັ້ງ​ນີ້ ​ແມ່ນ​ຫຍັງ?

​ຄິດ​ວ່າ ຄວາມ​ໝັ້ນ​ໃຈ​ຕົນ​ເອງ ​ຄວາມ​ເປັນ​ສ່ວນ​ຕົວ ​ແລະ ຮອຍ​ຍິ້ມ​ທີ່​ເປັນ​ເອກະລັກ ທີ່​ເປັນ​ສະ​ເໜ່ອັນ​ສຳຄັນ.

​​ຜ່ານມາແມ່ນ​ຫຍັງ​ທີ່​ເປັນຄວາມ​ຮູ້​ສຶກພາກ​ພູມ​ໃຈ​ຂອງ​ເຮົາ​?

​ຄິດ​ວ່າ ມັນ​ແມ່ນ​ການ​ເສັງ​ຈົບ​ຊັ້ນມໍ 7 ​ເຊິ່ງ​ເຮັດ​ໃຫ້ ພໍ່ຂອງ​ນ້ອງ​ເອ​ງມີ​ຄວາມ​ພາກພູມ​ໃຈ​ໃນ​ໂຕ​ນ້ອງ ​ແລະ ນ້​ອງ​​ເອງກໍ່​ລໍຖ້າ​ເວລາ​ນີ້ ມາ​ດົນ​ນານ​ແລ້ວ ​ເວລາ​​ເສັງ ມີ​ຄວາມ​ກົດ​ດັນ​ຫຼາຍ ​ແຕ່​ເມື່ອ​ສອບ​ຜ່ານ​ແລ້ວ ຮູ້ສຶກ​ດີ​ໃຈ​ສຸດໆ.

ໃນ​ຖານະ​ທີ່​ເປັນ​ແມ່ຍິງ​ລາວ​ຄົນ​ໜຶ່ງ ຄິດວ່າ​ແມ່ນ​ຫຍັງ​ທີ່​ເປັນຄວາ​ມພາກພູມ​ໃຈ​?

ຄວາມ​ພາກພູມ​ໃຈ​ຂອງ​ນ້​ອງ​ແມ່ນ​ການ​ທີ່​ຕົນ​ເອງ​ໄດ້​ເກີດ​ມາ​ເປັນ​ພົນລະ​ເມືອງ​ລາວ ​ເປັນ​ປະ​ເທດ​ທີ່​ມີ​ຮີດຄອງ​ປະ​ເພນີ ວັດທະນະທຳ ອັນ​ເກົ່​າ​ແກ່ ​ແລະ ດີງາມ ທີ່​ເປັນ​ເອກະລັກຂອງ​ຊາດ​ລາວ​ເຮົາ.

​​ເຮົາ​ຈະຮັກສາ​ວັດທະນະທຳ ປະ​ເພນີ​ອັນ​ດີງາມ ຂອງ​ຄົນ​ລາວ ​ແລະ ປະ​ເທດ​ຊາດ​ແນວ​ໃດ?

ສຳ​ລັບ​ນ້ອງ​​ແລ້ວ ບໍ່​ວ່າ​ຈະ​ເປັນ​ຍິງ ຫຼື ຊາຍ ​ເມື່ອ​ເຮົາ​​ເກີດ​ມັນ ບົນ​ແຜ່ນດິນ​ລາວ​ແລ້ວ ​ເຮົາ​ຄວນ​ມີ​ນ້ຳ​ໃຈ​ຮັກ​ຊາດ ວັດທະນະທຳ ຮີດຄອງ​ປະ​ເພນີອັນ​ດີງາມ ຂອງ​ລາວ​ເຮົາ​ໄວ້ ບໍ່​ວ່າ​ຈະ​ເປັນ​ການ​ນຸ່ງ​ຖື ການ​ເວົ້າຈາ ການ​ໄປມາ ກິລິຍາ​ມາລະຍາດ ​ໃຫ້​ຖືກ​ຕາມ​ຮີດ 12 ຄອງ 14. (03 jpg)

 

 

ຊື່ ​ແລະ ນາມສະກຸນ: ​ສອນ​ນາລີ ​ແສງ​ພານ​ທອງ ອາຍຸ: 18 ປີ,

ປະຈຸ​ບັນ: ກຳລັງ​ສຶກສາ​ຢູ່​ມໍ​ປາຍ ຈັນທະ​ບູລີ​

ຄວາມ​ຮູ້ສຶກ​​ໄດ້​ຮັບ​ການ​ຄັດ​​ເລືອກ​ເປັນ​ນາງ​ສາວ​ປະຕິ​ທິນ​ເບຍ​ລາວ ​ສຳລັບ​ປີ 2014 ​ເປັນ​ແນວ​ໃດ?

ນ້ອງ​ຮູ້ສຶກ​ດີ​ໃຈ ​ແລະ ມີ​ກຽດ​ຫຼາຍ ມີ​ຄວາມ​ຮູ້ສຶກ​ພາກພູມ​ໃຈ​ຫຼາຍ ທີ່​ໄດ້​ຮັບ​ການ​ຄັດ​ເລືອກ​ໃຫ້​ເປັນ​ນາງ​ສາວ​ປະຕິທິນ​ເບຍ​ລາວ​ໃນ​ຄັ້ງ​ນີ້ ​ເພາະ​ ມັນ​ແມ່ນ​ຄວາມຝັນ​ຂອງ​​ແມ່ຍິງ​ລາວ​ຫຼາຍໆ​ຄົນ.​ ​ເຮົາ​ຈະ​ໄດ້​ເອກອ້າງ ການ​ນຸ່ງ​ຖື​ຊຸ​ດລາວ ສູ່​ສາຍຕາ​ຊາວ​ລາວ ທັງ​ພາຍ​ໃນ​ ​ແລະ ຕ່າງປະ​ເທດ

ຄິດ​ວ່າ ສະ​ເໜ່ ​ແລະ ຈຸດ​ເດັ່ນຂອງ​ຕົນ​ເອງ ທີ່​ໄດ້​ຮັບ​ການ​ຄັດ​ເລືອກ​ເປັນ​ນາງ​ສາວ​ປະຕິທິນ​ເບຍ​ລາວ​ໃນ​ຄັ້ງ​ນີ້ ​ແມ່ນ​ຫຍັງ?

​ຄິດ​ວ່າ ຮອຍ​ຍິ້ມ​ແມ່ນ​ສະ​ເໜ່ ​ແລະ ​ເປັນ​ເອກະລັກ​ອັນ​ສຳຄັນ ຂອງ​ນ້ອ​ງ​ເອງ ​ທີ່​ເຮັດ​ໃຫ້​ໄດ້​ຮັບ​ການ​ຄັດ​ເລືອກ​ໃນ​ຄັ້ງ​ນີ້.

​​ສຳ​ລັບ​ປີ 2014 ປາຖະໜາ​ຫຍັງ ​ແລະ ຢາກ​ເຮັດ​ຫຍັງ​ໃຫ້​ປະສົບ​ຄວາມ​ສຳ​ເລັດ?

ດຽວ​ນີ້ ນ້ອງ​ເອງ​ກຳລັງ​ສຶກສາ ຮ່ຳຮຽນ ​ແລະ ຢາກ​ໃຫ້​ຕົນ​ເອງ​ປະສົບ​ຄວາມ​ສຳ​ເລັດ​ທາງ​ດ້ານ​ການ​ຮຽນ.

ໃນ​ຖານະ​ທີ່​ເປັນ​ແມ່ຍິງ​ລາວ​ຄົນ​ໜຶ່ງ ຄິດວ່າ​ແມ່ນ​ຫຍັງ​ທີ່​ເປັນຄວາ​ມພາກພູມ​ໃຈ​?

​ມີ​ຄວາມ​ພູມ​ໃຈ​ທີ່​ໄດ້​ເກີດ​ມາ​ເປັນ​ຄົນ​ລາວ ອາ​ໃສ​ທີ່​ປະ​ເທດ ສະຫງົບ​ສຸກ ທີ່​ມີ​ຮີດຄອງ​ປະ​ເພນີ​ອັນ​ດີງາມ.

​​ຈະຮັກສາ​ວັດທະນະທຳ ປະ​ເພນີ​ອັນ​ດີງາມ ຂອງ​ຄົນ​ລາວ ​ແລະ ປະ​ເທດ​ຊາດ​ແນວ​ໃດ?

ນ້ອງ​ຄິດ​ວ່າ ​ແມ່​ຍິງ​ລາວ​ຄວນ​ມີ​ຄວາມ​ນອບ​ນ້ອມ ​ໃຫ້​ກຽດ​ຄົນ​ອື່ນ ສຸພາບ​ຮຽບຮ້ອຍ ມີ​ກິລິຍາ ມາລະຍາດ ທີ່​ດີ​ຕໍ່​ສັງຄົມ. (04 jpg)

 

ຊື່ ​ແລະ ນາມສະກຸນ: ອອນ​ນາລີ ສະຫວັດດີ ​ອາຍຸ: 20 ປີ

​ເປັນນາງ​ສາວ​ປະຕິທິນ​ເບຍ​ລາວ​ສຳລັບ​ເດືອນ ກໍ​ລະ​ກົດ ​ແລະ ສິງຫາ

​ປະຈຸ​ບັນ: ​ເປັນ​ນັກ​ສຶກສາ ມະຫາວິທະຍາ​ໄລ​ແຫ່ງ​ຊາດ ຄະນະ​ເສດຖະສາດ​ ປີ3

ຄວາມ​ຮູ້ສຶກ​​ໄດ້​ຮັບ​ການ​ຄັດ​​ເລືອກ​ເປັນ​ນາງ​ສາວ​ປະຕິ​ທິນ​ເບຍ​ລາວ ​ສຳລັບ​ປີ 2014 ​ເປັນ​ແນວ​ໃດ?

​ຮູ້ສຶກ​ຕື່ນ​ເຕັ້ນ ​ແລະ ດີ​ໃຈ​ຫຼາຍ ທີ່​ທາງ​ບໍລິສັດ ​ເບຍ​ລາວ​ ຈຳກັດ ​ໄດ້​ໃຫ້​ໂອກາດ ຮັບ​ເອົາ​ນ້ອງ​ເປັນ​ນາງສາວ​ປະຕິທິນ​​ເບຍ​ລາວ ສຳລັບ​ປີ 2014. ມັນ​ແມ່ນ​ຄວາມ​ພູມພາກພູມ​ໃຈ​ ​ແລະ ຄວາມ​ຝັນ​ຂອງ​ແມ່ຍິງ​ລາວ​ຫຼາຍໆ​ຄົນ ​ທີ່​ຈະ​ມີ​ຮູບ​ຂອງ​ຕົນ​ເອງ​ປາກົດ​​ໃນ​ປະຕິທິນ​ເບຍ​ລາວ. ມັນ​ເປັນ​ໂອກາດ​ອັນ​ດີທີ​ຕົນ​ເອງ​ໄດ້​​ເປັນ​ທີ່​ຮູ້ຈັກ​ຫຼາຍ​ຂຶ້ນ ທັງພາຍ​ໃນ ​ແລະ ຕ່າງປະ​ເທດ.

ຄິດ​ວ່າ ສະ​ເໜ່ ​ແລະ ຈຸດ​ເດັ່ນຂອງ​ຕົນ​ເອງ ທີ່​ໄດ້​ຮັບ​ການ​ຄັດ​ເລືອກ​ເປັນ​ນາງ​ສາວ​ປະຕິທິນ​ເບຍ​ລາວ​ໃນ​ຄັ້ງ​ນີ້ ​ແມ່ນ​ຫຍັງ?

ນ້ອງ​ຄິດ​ວ່າ ​ແມ່ນ​ນິ​ໃສ​ໃຈຄໍ ບວກ​ກັບ​ຮູບ​ຮ່າງ​ໜ້າ​ຕາ ​ແລະ ຮອຍ​ຍິ້ມ​ອັນ​ເປັນ​ສະ​ເໜ່ຂອງ​ຕົນ​ເອງ ທີ່​ໄດ້​ຮັບ​ການ​ຄັດ​ເລືອກ​ໃນ​ຄັ້ງ​ນີ້.

​​​​ສຳ​ລັບ​ປີ 2014 ປາຖະໜາ​ຫຍັງ ​ແລະ ຢາກ​ເຮັດ​ຫຍັງ​ໃຫ້​ປະສົບ​ຄວາມ​ສຳ​ເລັດ?

ນ້ອງ​ເອງປາຖະ​ໜາ ຢາກ​ມີ​ທຸລະ​ກິດ​ເປັນ​ຂອງ​ຕົນ​ເອງ ​ເປີດ​ຮ້ານ​ຂາຍ​ຜ້າ​ໃໝລາວ .

ໃນ​ຖານະ​ທີ່​ເປັນ​ແມ່ຍິງ​ລາວ​ຄົນ​ໜຶ່ງ ຄິດວ່າ​ແມ່ນ​ຫຍັງ​ທີ່​ເປັນຄວາ​ມພາກພູມ​ໃຈ​?

ມີ​ຄວາມ​ພາກພູມ​ໃຈ​ທີ່​ເຫັນ​ປະ​​ເທ​ດລາວ ມີ​ຄວາມ​ອຸດົມສົມບູນ​ທາງ​ດ້ານ​ຊັບ​ພະຍາກອນ​ທຳ​ມະ​ຊາດ ມີ​ຄວາມ​ສວຍ​ງາມ ມີ​ສະຖານ​ທີ່​ທ່ອງ​ທ່ຽວ ວັດວາອາ​ຮາມ ເອກ​ອ້າງ​ຕ່າງ​ປະ​ເທດ… ນີ້​ລະ​ແມ່ນ​ຄວາມ​ພາກພູມ​ໃຈ​ຂອງນ້ອງ​.

​​ເຮົາ​ຈະຮັກສາ​ວັດທະນະທຳ ປະ​ເພນີ​ອັນ​ດີງາມ ຂອງ​ຄົນ​ລາວ ​ແລະ ປະ​ເທດ​ຊາດ​ແນວ​ໃດ?

​​ເປັນ​ຄົນ​ລາວ ຄວນ​ຈະ​ນຸ່ງ​ຖື ​ໃຫ້​ຖືກ​ຕາມກາລະ ​ເທສະ​ ​ແລະ ຮີ​ດຄອງ​ປະ​​ເພນີ​ອັນ​ດີງາມ​ຂອງ​ຕົນ​ເອງ, ​ເວົ້າ​ຈາ​ສຸພາບ​ຮຽບຮ້ອຍ.. (05 jpg)

 

 

ຊື່ ​ແລະ ນາມສະກຸນ: ​ແສງ​ຮັກ ທຳ​ມະ​ວົງ, ອາຍຸ: 17 ປີ, ປະຈຸ​ບັນ: ກຳລັງ​ສຶກສາ​ຢູ່​ມໍ​ປາຍ

ມສ ສັນຕິພາບ ຊັ້ນມໍ 6

ຄວາມ​ຮູ້ສຶກ​ໄດ້​ຮັບ​ການ​ຄັດ​​ເລືອກ​ເປັນ​ນາງ​ສາວ​ປະຕິ​ທິນ​ເບຍ​ລາວ ​ສຳລັບ​ປີ 2014 ​ເປັນ​ແນວ​ໃດ?

​ຮູ້ສຶກດີ​ໃຈ ​ແລະ ພາກພູມ​ໃຈ​ຫຼາຍ ​ທີ່​ຕົນ​ເອງ​ໄດ້​ຮັບ​ການ​ຄັດ​ເລືອກ​ໃຫ້​ເປັນ​ນາງ​ສາວ​ປະຕິທິນ​​ເບຍ​ລາວ ສຳລັບ​ປີ 2014 ນີ້. ມັນ​ແມ່ນ​ຄວາມ​ຝັນ​ຂອງ​ຂ້ອຍ​ທີ່​ກາຍ​ເປັນ​ຈິງ

​ແມ່ຍິງ​ລາວ​ຫຼາຍ​ຄົນ ກໍ່​ມີ​ຄວາມ​ຝັນ​ທີ​ຈະ​ເຫັນ​ຮູບ​ຕົ​ນ​ເອງ ປາກົດ​ຢູ່​ໃນ​ປະຕິທິນ​ລາວ ​ເພາະ​ຖື​ໄດ້​ວ່າ ​ເປັນ​ສິ່ງ​ທີ່​ໂດດ​ເດັ່ນ​ທີ່​ສຸດ.

ໃນ​ຖານະ​ທີ່​ເປັນ​ແມ່ຍິງ​ລາວ​ຄົນ​ໜຶ່ງ ​ສີ່ງໃດ​ທີ່​ເປັນຄວາມ​ພາກພູມ​ໃຈ​?

ຂ້ອຍ​ຄິດ​ວ່າ ວັດທະນະທຳ​ການ​ນຸ່ງ​ຖື​ຂອງ​ແມ່ຍິງ​ລາວ​ເຮົາ​ເປັນສິ່ງ​ທີ່​ໂດດ​ເດັ່ນ​ທີ່​ສຸດ ມັນ​ມີ​ຄວາມເປັນ​ເອກະລັກ​ ທີ່​ບໍ່​ມີ​ຊາດ​ໃດ​ຄື ບໍ່​ມີ​ແມ່ຍິງ​ປະ​ເທດ​ໃດ ​ນຸ່ງ​ສິ້ນ​ແລ້ວ ​ເຮັດ​ໃຫ້​ມີ​ສະ​ເໜ່​ທຽບ​ເທົ່າ​ກັບ​ແມ່ຍິງ​ລາວ​ໄດ້​ເລີຍ.

​​ເຮົາ​ຈະຮັກສາ​ວັດທະນະທຳ ປະ​ເພນີ​ອັນ​ດີງາມ ຂອງ​ຄົນ​ລາວ ​ແລະ ປະ​ເທດ​ຊາດ​ແນວ​ໃດ?

ສິ່ງ​ທຳ​ອິດ​ເລີຍ​ຄິດ​ວ່າ ຕ້ອງ​ນຸ່ງ​ຖື​ເຄື່ອງນຸ່ງ​ໃຫ້​ຖືກຕ້ອງ​ຕາມ ກາ​ລະ ​ເທສະ ​ແລະ ​ໃຫ້​ຖືກຕ້ອງ​ຕາມ​ຮີດຄອງ​ປະ​ເພນີ​ອັນ​ດີງາມ​ຂອງ​ລາວ​ເຮົາ. ສຳລັບ​ນ້ອງ​ເອງ ກໍ່​ຈະ​ໃສ່​​ເຄື່ອງນຸ່ງ​ໃຫ້​ຖືກຕ້ອງ ຕາມ​ກາ​ລະ​ເທສະ​ເຊັ່ນ​ກັນ.(06 jpg).

 

ຊື່ ​ແລະ ນາມສະກຸນ: ນະຄະ​ລີ ພາ​ມີ​ສິດ  ​ ອາຍຸ: 17 ປີ

​ປະຈຸ​ບັນ: ກຳລັງ​ສຶກສາ​ຢູ່​ມໍ​ປາຍ ມສ ວຽງ​ຈັນ ຊັ້ນມໍ7

ຄວາມ​ຮູ້ສຶກ​ໄດ້​ຮັບ​ການ​ຄັດ​​ເລືອກ​ເປັນ​ນາງ​ສາວ​ປະຕິ​ທິນ​ເບຍ​ລາວ ​ສຳລັບ​ປີ 2014 ​ເປັນ​ແນວ​ໃດ?

ມີ​ຄວາມ​ຮູ້ສຶກ​ດີ​ໃຈ​ຫຼາຍ ​​ແລະ ປະ​ທັບ​ໃຈ​ຫຼາຍ ທີ່​ໄດ້​ເປັນ​ນາ​ງສາວ​ປະຕິທິນ​​ເບຍ​ລາວ ສຳລັບ​ປີ 2014 ​ເພາະ​ການ​ໄດ້​ເປັນ​ນາງ​ແບບ​ປະຕິທິນ​ເບ​ຍລາວ​ນີ້ ສຳລັບ​ຄວາມ​ຮູ້ສຶກ​ນ້ອງ​ເອງ ມັນ​ປຽບ​ສະ​ເໝືອນ​ການ​ໄດ້​ເປັນ​ທູດ​ວັດທະນະທຳ ​ເຜີຍ​ແຜ່ ການ​ນຸ່ງ​ຖື ທີ່​ເປັນ​ເອກະລັກ​ຂອງ​ແມ່ຍິງ​ລາວອອກ​ສູ່​ພາຍ​ໃນ ​ແລະ ຕ່າງປະ​ເທດ. ​

ຄິດ​ວ່າ ສະ​ເໜ່ ​ແລະ ຈຸດ​ເດັ່ນຂອງ​ຕົນ​ເອງ ທີ່​ໄດ້​ຮັບ​ການ​ຄັດ​ເລືອກ​ເປັນ​ນາງ​ສາວ​ປະຕິທິນ​ເບຍ​ລາວ​ໃນ​ຄັ້ງ​ນີ້ ​ແມ່ນ​ຫຍັງ?

ຄິດ​ວ່າ ການ​ຕອບ​ຄຳ​ຖາມ ທີ່​ມີ​ຄວາມ​ຄ່​ອງ​ແຄ້ວ, ບຸກຄະ​ລິກ ກິລິຍາ​ທ່າທາງ, ການ​ເວົ້າ​ຈາ ​ແລະ ຮອຍ​ຍິ້ມ ​ເປັນ​ສ່ວນ​ທີ່​ສຳຄັນ​ທີ່​ເຮັດ​ໃຫ້​ຕົນ​ເອງ​ໄດ້​ຮັບ​ການ​ຄັດ​ເລືອກ​ໃນ​ຄັ້ງນີ້.

ສຳລັບ​ປີ 2014 ຢາກ​ໄດ້​ຫຍັງ ຢາກ​ເຮັດ​ຫຍັງ​ໃຫ້​ປະສົບ​ຜົນ​ສຳ​ເລັດ?

ຕົນ​ເອງ​ກຳລັງ​ຈະ​ເສັງ​ຈົບ​ຊັ້ນ​ມໍ 7 ​​ແລະ ​ແນ່ນອນ​ສິ່ງ​ທີ່​ຕົນ​ເອງ​ຢາກ​ຈະ​ປະສົບ​ຜົນສຳ​ເລັດ​ແມ່ນ​ ​ເສັງ​ໃຫ້​ຈົບ​ຊັ້ນ ​ແລະ ຢາກ​ເສັງ​ເຂົ້າ ມະຫາວິທະຍາ​ໄລ​ແຫ່ງ​ຊາດ ​ໄດ້​ສຳ​ເລັດ.

​​ໃນ​ຖານະ​ທີ່​ເປັນ​ແມ່ຍິງ​ລາວ​ຄົນ​ໜຶ່ງ ​ແມ່ນ​ຫຍັງ​ທີ່​ເປັນຄວາມ​ພາກພູມ​ໃຈ​?

ຕົນ​ເອງ​ມີ​ຄວາ​ມພູມ​ໃຈ​ທີ່​ສຸດ​ທີ່​​ໄດ້​ເກີດ​ມາ​ເປັນ​ຄົນ​ລາວ ​ເປັນປະ​ເທດ​ທີ່​ມີ​ມູນ​ເຊື້ອ​ອັນ​ດີງາມ ມີ​ຮີດ 12 ຄອງ 14 ມີ​ສະຖານ​ທີ່​ທ່ອງ​ທ່ຽວ​ອັນ​ສວຍ​ງາມ.

​​ເຮົາ​ຈະຮັກສາ​ວັດທະນະທຳ ປະ​ເພນີ​ອັນ​ດີງາມ ຂອງ​ຄົນ​ລາວ ​ແລະ ປະ​ເທດ​ຊາດ​ແນວ​ໃດ?

​ໃນ​ນາມ​ທີ່​ຕົນ​ເອງ​ເປັນ​ແມ່ຍິງ​ລາວ​ຄົນ​ໜຶ່ງ ຂ້ອຍ​ຈ​ະ​ໃສ່​ສິ້ນ ບ່ຽງ​ແພ ທີ່​ເປັນ​ເອກະລັກ​ຂອງ​ລາວ​ເຮົາ. (07 jpg).

 

 

 

Leave a Comment

You must be logged in to post a comment.