Senglao content (728×90)

ລັດຖະບານຈະໃຊ້ທຶນ 80 ລ້ານກວ່າໂດລາ ພັດທະນາເຂື່ອນໄຟຟ້າ ເຊປຽນ-ເຊນ້ຳນ້ອຍ

ລັດຖະບານ​ແຫ່ງ ສປປ ລາວ​ໄດ້​ຕົກລົງ​ກູ້​ຢືມ​ເງິນ​ນໍາ​ກອງ​ທຶນ ​ເພື່ອ​ການ​ຮ່ວມ​ມື ​ແລະ ພັດທະນາ​ເສດຖະ ກິດ​ ສ ​ເກົາຫລີ​ ຈໍານວນ 80,8 ລ້ານ​ໂດ​ລາ​ສະຫະລັດ ​ເພື່ອ​ນໍາ​ມາ​ພັດທະນາ​ເຂື່ອນ​ໄຟຟ້າ​ເຊ​ປຽນ-​ເຊ​ນ້ຳ​ນ້ອຍ ​​ເຊິ່ງ​​ໂຄງການດັ່ງກ່າວ ​ເປັນ​ໂຄງການ​ໜຶ່ງ​ທີ່​ສໍາຄັນ​ຂອງລັດຖະບານ ໃນ​ການ​ພັດທະນາ​ຂະ​ແໜງ​ພະລັງ​ງານ ​​​ເພື່ອ​ປະກອບສ່ວນ​ໃຫ້​ແກ່​ການ​ພັດທະນາ​ເສດຖະກິດ-ສັງຄົມ​ຂອງ ສປປ ລາວ ​ໃຫ້​ຂະຫຍາຍຕົວ​ຢ່າງ​ຕໍ່​ເນື່ອງ ​ແລະ ຈະ​ເປັນ​ການ​ສ້າງ​ລາຍຮັບ​ທີ່​​ໜັກ​ແໜ້ນ ​ແລະ ​ເປັນ​ປັດ​​ໄຈ​ໃຫ້ ສປປ ລາວ ​ຫຼຸດ​ພົ້ນອອກ​ຈາກ​ການ​ເປັນ​ປະ​ເທດ​ດ້ອຍ​ພັດທະນາ​ເທື່ອ​ລະ​ກ້າວ.

ພິທີ​ເຊັນສັນຍາ​ກູ້​ຢືມ​ເງິນ​ດັ່ງກ່າວ​ ໄດ້​ຈັດ​ຂຶ້ນ​ໃນ​ວັນ​ທີ 27 ຕຸລາ 2015 ນີ້ ຢູ່​ກະຊວງ​ການ​ເງິນ ຕ່າງ​ໜ້າ​ລັດຖະບານ​ລາວ​ໂດຍ​ທ່ານ ດຣ. ລຽນ ທິ​ແກ້ວ ລັດຖະມົນຕີ​ວ່າການ​ກະຊວງ​ການ​ເງິນ ​ແລະ ທ່ານ ຊອງ ​ເຮ ຢິມ ຮອງ​ປະທານ​ກອງ​ທຶນ ​ເພື່ອ​ການ​ຮ່ວມ​ມື ​ແລະ ພັດທະນາ​ເສດຖະກິດ ສ ​ເກົາຫລີ, ມີ​ບັນດາ​ພະນັກງານ​ທັງສອງ​ຝ່າຍ​ເຂົ້າ​ຮ່ວມ.

​​ໂຄງການ​​ເຂື່ອນ​ໄຟຟ້າ​ເຊ​ປຽນ​-​ເຊ​ນ້ຳ​ນ້ອຍ​ ຕັ້ງ​ຢູ່​ແຂວງ​ຈໍາປາ​ສັກ ​ມີ​ກໍາລັງ​ຕິດ​ຕັ້ງ​ທັງ​ໝົດ 410 ​ເມ​ກາ​ວັດ ເຊິ່ງ ຈະ​ຂາຍ​ໄຟຟ້າ​ໃຫ້​ແກ່ຣາຊະ​ອານາຈັກ​​ໄທ 90% ​ແລະ ລັດ​ວິ​ສາ​ຫະກິດ​ໄຟຟ້າ​ລາວ 10% ​ໂຄງການ​ດັ່ງກ່າວ​​ເລີ່​ມ ກະກຽມ​ນັບ​ແຕ່​ປີ 2008 ​ແລະ ​ໄດ້​ສໍາ​ເລັດ​ການ​ເຊັນ​ສັນຍາ​ພັດທະນາ​ໂຄງການ​ໃນ​ເດືອນ 11 ປີ 2008  ລະຫວ່າງ​ລັດຖະບານ​ແຫ່ງ ສປປ ລາວ ​ແລະ ບັນດາ​ຜູ້​ພັດທະນາ​ໂຄງການ​ໃນ​ຮູບ​ແບບ​ກໍ່ສ້າງ, ດໍາ​ເນີນ​ງານ ​ແລະ ມອບ​ໂອນ​ມີ​ມູນ​ຄ່າ​ທັງ​ໝົດ 1.020 ລ້ານ​ໂດ​ລາ​ສະຫະລັດ ​ແລະ ສໍາ​ເລັດ​ການ​ເຊັນ​ສັນຍາ​ຊື້-ຂາຍ​ໄຟຟ້າ​ຮ່ວມ​ກັບ​ການ​ໄຟຟ້າ​ຝ່າຍ​ຜະລິດ​ແຫ່ງ​ປະ​ເທດ​ໄທ ​ໃນ​ເດືອນ 2 ປີ 2013 ​ເຊິ່ງລັດ​ວິ​ສາ​ຫະກິ​ດຖື​ຫຸ້ນ​ລາວ​ເປັນ​ຜູ້ຕາງໜ້າ​ລັດຖະບານ​ຖື​ຫຸ້ນ​ໃນ​ໂຄງການ​ໃນ​ອັນ​ຕາ​ສ່ວນ 24% ຂອງ​ບ້ວງ​ການ​ປະກອບ​ຫຸ້ນ​ໃນ​ໂຄງການ ​ແລະ ມີ​ບັນດາ​ຜູ້​ພັດທະນາ​ຈາກ ສ ​ເກົາຫລີ ​ເຂົ້າ​ຮ່ວມ​ລົງທຶນ​ນໍາ.

 

12179555_1659081384368186_452981801_n 12188655_1659081404368184_891506659_n

ສະແດງຄຳຄິດເຫັນ