Senglao content (728×90)

ໝາກສີດາ ແກ້ເຈັບທ້ອງ, ຖອກທ້ອງ, ທ້ອງຂີ້ຮາກ

ໝາກ​ສີດາ ​ເປັນ​ອີກ​ໜຶ່ງ​ໝາກ​ໄມ້​ທີ່​ຫາ​ຊື້​ໄດ້​ງ່າຍ ​ແລະ ລາຄາ​ບໍ່​ແພງ ​ແຕ່​ອຸດົມສົມບູນ​ໄປ​ດ້ວຍ​ “ວິຕາມິນ​ຊີ” ​ແລະ ຄຸນຄ່າ​ທາງ​ອາຫານ​ຫຼາກ​ຫຼາຍ​​ຢ່າງ ນອກຈາກ​ຈະ​ມີ​ປະ​ໂຫຍ​ດຕໍ່​ຮ່າງກາຍ​ແລ້ວ​ຍັງ​ສາມາດ​ໃຊ້​ເປັນ​ຢາ​ຮັກສາ​ອາການ​ຕ່າງໆ​ໄດ້​ອີກ​ດ້ວຍ.

ໝາກ​ສີດາ: ມີ​ສານ”​ແທນ​ນິນ” ​ຢູ່​ຫຼາຍ ສານ​ນີ້​ມີ​ຊັບ​ພະ​ຄຸນ​ເປັນ​ຢາ​ສະໝານ​ນ້ຳມັນ​ຫອມ​ລະ​ເຫີ​ຍ​ໃນ​ໃບໝາກ​ສີດາ ຊ່ວຍ​ຢຸດ​ຢັ້ງ​ການ​ລຸກລາມ​ຂອງ​ເຊື້ອ​ພະຍາດ​, ຊ່ວຍ​ສະໝານ​ທ້ອງ ​ແລະ ລຳ​ໄສ້ ​ໂດຍ​ຊ່ວຍ​ຫຼຸດ​ອາການ​ອັກ​ເສບ​ຂອງ​ກະ​ເພາະ​ລຳ​ໄສ້ ​ແລະ ຊ່ວຍ​ຫຼຸດ​ອາການ​ປວດຮາກ ​ແລະ ຍັງ​ຊ່ວຍ​ຫຼຸດ​ອາການ​ລຳ​ໄສ້​ເຄັ່ງ, ​ເຮັດ​ໃຫ້​ບັນ​ເທົາອາການ​​ເຈັບທ້ອງ​ ​ແລະ ຍັງ​ຊ່ວ​ຍ​ແກ້​ອາການ​​ເຈັບປັງ.

ໃບໝາກ​ສີດາ: ​ແກ້​ອາການ​ເຈັບທ້ອງ, ທ້ອງ​ຂີ້​ຮາກ (ທີ່​ບໍ່​​ແມ່ນ​ທ້ອງບິດ ຫຼືພະຍາດອະ​ຫິວາ) ​ເປັນ​ຢາ​ຫ້າມ​ເລືອດ​ໃສ່ແຜ​ສົດ, ​​​ເອົາໃບ​ໝາກ​ສີດາ 2-3 ​ໃບ​ຢໍ້າ ​ເພື່ອ​ລະຫງັບ​ກິ່ນ​ປາກ, ​​ບັນ​ເທົາ​ການ​ເປັນ​ຝີ, ​ເປັນ​ຢາ​ລ້າງ​​ບາດແຜ, ສາມາດ​ເປັນ​ຢາດູດ​ໜອງ ​ແລະ ຖອນ​ພິດ​ບາດ​ແຜ, ​ແກ້​ອາການ​ເຫືອກ​ບວມ, ​ແກ້​ຊໍາເຮື້ອ, ​ແກ້​ອາການ​ແພ້​ຈາກຍຸງ​ກັດ.

ໝາກ​ສີດາ​ອ່ອນ: ​ແກ້​ອາການ​ເຈັບທ້ອງ, ທ້ອງ​ຂີ້​ຮາກ, ຊ່ວຍ​ຫຼຸດ​ກິ່ນ​ປາກ, ​ແກ້​ອາການ​ຖອກທ້ອງມີມູກເປັນ​ເລືອດ, ​​ແກ້​ອາການພະຍາດ​ເລືອດ​ອອກ​ຕາ​ແຂ້ວ​, ບໍາລຸງ​ເຫືອກ ​ແລະ ​ແຂ້ວ, ສາມາດ​ບໍາລຸງ​ຜິວ​ພັນ.

ໝາກສີດາ​ສຸກ: ມີ​ສານ “​ເພັກ​ຕິນ” ຢູ່​ຫຼາຍ ​ໃຊ້​ກິນ​ເປັນ​ຢາ​ລະບາຍ​ໄດ້.

ຮາກ: ​ແກ້​ລະບົບ​ນ້ຳ​ເຫຼືອງ​ທີ່​ບໍ່​ດີ, ​ເປັນ​ຝີ, ​ແກ້​ເລືອດ​ດັງ​ອອກ.

ວິທີ ​ແລະ ປະລິມານ​ທີ່​ຕ້ອງ​ໃຊ້

  • ໃຊ້​ໝາກ​ສີດາ​ເພື່ອ​ແກ້​ອາການ​ເຈັບທ້ອງ, ທ້ອງ​ຂີ້​ຮາກ.

ວິທີທີ່ 1 ກິນ​ແບບ​ສົດ

-​ໃຊ້​ຍອດ​ອ່ອນ 7 ​ໃບ​ຫຢໍ້າ​ໃຫ້​ລະອຽດ​ເທື່ອ​ລະ​ໜ້ອຍ​ແລ້ວ​ຄ່ອຍໆ​ກືນ ແລ້ວກິນນ້ຳ​​ລ່ອງ ຖ້າ​ຫຢໍ້າປະລິມານຫຼາຍ​ຈະ​ເຮັດ​ໃຫ້​ຝາດຂົມ ແນະນຳ​ໃຫ້​ກິນ​ກັບ​ເກືອ​ໜ້ອຍ​ໜຶ່ງ​ຈະ​ເຮັດ​​ໃຫ້​ກິນ​ງ່າຍ​ຂຶ້ນ. ວິທີ​ນີ້​ຈະ​​ເຫັນ​ຜົນ​ດີ ​ເນື່ອງ​ຈາກ​ໄດ້​ກິນ​ທັງ​ນ້ຳ ​ແລະ ​ເນື້ອ​ຂອງ​ໃບ​ໝາກ​ສີດາ​​ແບບ​ຄົບ​ຖ້ວນ.

– ອາດຈະກິນເປັນໝາກດິບໆ ຄັ້ງລະ 1-2 ໜ່ວຍ.

ວິທີ​ທີ່ 2 ຕົ້ມ​ເປັນ​ນ້ຳ​ດື່ມ

ໃຊ້​ໃບ​ບໍ່​ອ່ອນ ​ແລະ ບໍ່​ແກ່ ປະມານ 5-10 ​ໃບ ຫຼື ​ເປື້ອກຂອງຕົ້ນ​ສົດໆ 1 ຝາ​ມື ​​ໃສ່​ນ້ຳ 2 ຖ້ວຍ ຕົ້ມ​ໃຫ້​ຟົດປະມານ 5-30 ນາທີ. ຕົ້ມ​ຈົນ​ໃຫ້​ເຫຼືອ 1 ​ຖ້ວຍ. ດື່ມ​ຄັ້ງ​ລະ ½- 1 ຈອກ, ມື້​ລະ 2 ຄັ້ງ, ດື່ມ​ຕາມ​ອາການ​ຈະ​ໜັກ ຫຼື ​ເບົາ, ​ເວລາ​ດື່ມ​ໃຫ້​ໃສ່​ເກືອ​ໜ້ອຍ​ໜຶ່ງ​ເຮັດ​ໃຫ້​ກິນງ່າຍ​ຂຶ້ນ.

ວິທີ​ທີ່ 3 ຊົງ​ໃສ່​ນ້ຳ​ຮ້ອນ​ດື່ມ

ເອົາ​ຍອດ​ໝາກ​ສີດາ 7 ຍອດ ຫຼື ​ໃບ 6-10 ​ໃບ. ໃສ່​ກັບ​ນ້ຳຕົ້ມທີ່ຟົດ 2 ຈອກ ປິດ​ຝາ​ໄວ້ 15-20 ນາທີ. ກິນ​ຄັ້ງ​ລະ 1 ຈອກເປັນ​ປະຈຳ.

ວິທີ​ທີ່ 4 ຕົ້ມ​ຄັ້ນ​ເອົາ​ນ້ຳ

ເອົາ​ໃບ​ໝາກ​ສີດາ 6-10 ​ໃບ​ມາ​ຕໍາ​ໃຫ້​ມຸ່ນ ປະສົມ​ນ້ຳຮ້ອນ 3-5 ບ່ວງ, ຕົ້ມ​ໃຫ້​ເຂົ້າກັນ​ ​ແລ້ວ​ກັ່ນ​ຕອງ​ດ້ວຍ​ຜ້າຂາວ, ​ເອົາ​ນ້ຳ​ປະສົມ​ເກືອ​ໜ້ອຍ​ໜຶ່ງ​ແລ້ວ​ໃຫ້​ກິນ​ຈົນ​ໝົດ.

ວິ​ທີ​ທີ່ 5 ບົດ​​ເປັນ​ຜົງ​ຮັບ​ປະທານ

ໃຊ້​ໝາກ​ສີດາ​ທີ່​ໃກ້ຈະ​ແກ່ ມາ​ຊອຍເປັນຕ່ອນ​ບາງໆ ຕາກ​ແຫ້ງ​ບົດ​ເປັນ​ຜົງ ຮັບ​ປະທານ​ຄັ້ງ​ລະ ½-1 ບ່ວງ​ກາ​ເຟ ​ໂດຍ​ປະສົມ​ນ້ຳ ວິທີ​ນີ້​ລົດ​ຊາດ​ດີສໍາລັບ​ເດັກນ້ອຍ​ສາມາດ​ດື່ມ​ໄດ້ງ່າຍ.

  • ​​ໃຊ້​ເປັນ​ຢາ​ຫ້າມ​ເລືອດ

​​ເອົາ​ໃບ​ສົດໆ​ມາ​ລ້າງ​ນ້ຳ​ໃຫ້​ສະອາດ ຕໍາ​ໃຫ້​ມຸ່ນ​ແລ້ວ​ເອົາ​ມາ​ທາ​ບາດແຜ​ທີ່​ມີ​ເລືອດ​ອອກນັ້ນ ​ເລືອດ​ກໍ​ຈະ​ຢຸດ

  • ຊ່ວຍ​ລະງັບ​ກິ່ນ​ປາກ

​ເອົາ​ໃບ​ໝາກສີດາ 3-5 ​ໃບ ຢໍ້າ ​​ແລະ ຄາຍ​ອອກ​ມາ​ຖິ້ມ

  • ເປັນ​ຢາ​​ແກ້​ພະຍາດ​ເລືອດດັງອອກ ​ເພາະ​ໝາກ​ສີດາ​ມີ​ “ມິນ​ຕາ​ມິ​ນຊີ​” ຫຼາຍ

​ຮັບ​ປະທານ​​ໝາກສີດາ​ທີ່​ກຳລັງ​ເຫີ່ມ ​ເຊິ່ງ​ເປັນ​ໝາກ​ໄມ້​ທີ່​ຊ່ວຍ​ບຳລຸງ​ເຫືອກ ​ແລະ ​ແຂ້ວ​, ຊ່ວຍ​ຫຼຸດ​ນ້ຳ​ຕານ​ໃນ​ເລືອດ, ຮັກສາ​ທ້ອງ, ລຳ​ໄສ້ ບໍ່​ໃຫ້​ເຈັບ, ຊ່ວຍ​ບຳລຸງ​ຜິ​ວພັນ, ຄົນ​ທີ່​ມັກ​ເປັນ​ຝີ​ເປັນ​ບາດແຜ ​ທີ່​​ເປັນ​ນ້ຳ​ໜອງ​ພຸ​ພອງ ຖ້າ​ຮັບ​ປະທານ​ໝາກ​ສີດາ​​ເປັນະ​ຈຳ ກໍ​ຈະ​ຊ່ວຍ​ບັນ​ເທົາ​ອາການ​ລົງ​ໄດ້.

ສະແດງຄຳຄິດເຫັນ