Senglao content (728×90)

ສະມາຄົມນັກທຸລະກິດແມ່ຍິງລາວ ສະຫຼຸບຜົນງານ 1 ປີ

ວັນທີ 14 ພະຈິກ 2015 ທີ່ບ້ານ K&C, ບ້ານນາໄຊ,ເມືອງໄຊເສດຖາ,ນະຄອນຫຼວງວຽງຈັນ ສະມາຄົມນັກທຸລະກິດແມ່ຍິງລາວ (ສທຍລ)ໄດ້ຈັດພິທີສະຫຼຸບຜົນງານ 1 ປີ (ສົກປີ 2014-2015) ພາຍໃຕ້ການເປັນປະທານຂອງທ່ານນາງ ຈັນທະຈອນ ວົງໄຊ ປະທານ ສທຍລ, ໂດຍມີທ່ານນາງ ຈັນເທົາ ປະຖັມມະວົງປະທານກິດຕິມາສັກ ສທຍລ, ມີຮອງປະທານ ​ແລະ ສະມາຊິກ ເຂົ້າຮ່ວມ. ຈຸ​ດປະສົງ​ໃນ​ການຈັດ​ງານ​ຄັ້ງ​ນີ້ ກໍ​ເພື່ອ​ເປັນ​ການ​ຊົມ​ເຊີຍ ​ແລະ ສະຫຼຸບຜົນງານ, ລາຍ​ງານ​ການ​ເຄື່ອນ​ໄຫວ​ຕ່າງໆ​ໃນໄລຍະ 1 ປີ ຜ່ານມາ ຂອງ ສທຍລ ​ໃຫ້​ກັບ​ຄະນະ​ບໍລິຫານ ​ແລະ ສະມາຊິກ​ທຸກ​ຄົນ​ໄດ້​ຮັບ​ຮູ້, ສະ​ເໜີ​ບາງ​ວຽກ​ງານ​ຮີບ​ດ່ວນ ​ເຊັ່ນ: ວຽກ​ງານ​ເທສະ​ກາ​ນອາຫານ​ລາວ, ສະຫຼຸບ​ສັງ​ລວມວຽກ​ງານ​ຂອງ​ສະມາຊິກ​ແຕ່​ລະ​ກຸ່ມ, ມີ​ການ​ຕີ​ລາຄາຜົນ​ທີ່​ໄດ້​ຮັບ​ດ້ານ​ດີ, ສະ​ເໜີ​ຈຸດ​ອ່ອນ ​ແລະ ຂໍ້ຄົງ​ຂ້າງ, ຖອດ​ຖອນ​ບົດຮຽນ​ເພື່ອ​​ໃຫ້ມີ​ການ​ປັບປຸງ ​ແລະ ​​ເອົາ​ໃຈ​​ໃສ່​ພັດທະນາ​ວຽກ​ງານ​ຂອງ​ສະມາຄົມ​ໃຫ້​ດີ​​ຂຶ້ນ​ເລື້ອຍໆ. ພ້ອມ​ນີ້, ຍັງ​ໄດ້​ຈັດ​ຕັ້ງ​ປະຕິບັດ​ແຜນການ​ຕໍ່ໜ້າ​ສົກ​ປີ 2015-2016 ​ສືບ​ຕໍ່​ປະຕິບັດ​ຕາມ​ພາລະ​ບົດບາດ, ສິດ ​ແລະ ໜ້າ​ທີ່ ຂອງສະມາຄົມ ພາຍ​ໃຕ້​ການ​ຊີ້​ນຳ ​ແລະ ການ​ມອບ​ໝາຍວຽກ​ງານ​ຂອງ​ການຈັດ​ຕັ້ງ​ຂັ້ນ​ເທິງທັງ​ສາຍ​ຕັ້ງ ​ແລະ ສາຍ​ຂວາງ ​ເຊິ່ງ​ແມ່ນ ສູນ​ກາງ​ສະຫະພັນ​ແມ່​ຍິງ ​ແລະ ສະພາ​ການ​ຄ້າ ​ແລະ ອຸດສາຫະກຳ​ແຫ່ງ​ຊາດ​ລາວ. ສຶບຕໍ່ຂົນຂວາຍຊຸກຍູ້​ສົ່ງ​ເສີມ​ໃຫ້​ນັກທຸລະກິດ​ແມ່​ຍິງລາວ​​​ໃຫ້ເຂົ້າ​ເປັນ​ສະມາຊິກ ເພື່ອຂະຫຍາຍ​​ໃຫ້ໄດ້​ທົ່ວ​ນະຄອນຫຼວງ ​ລົງ​ຮອດທ້ອງ​ຖິ່ນ​.

Comments