ສຳພາດ​ນາງ​ ສິລິພອນ ສຸທໍາມະວົງ (ນົກ) ເຈົ້າຂອງກິດຈະການໂຮງແຮມນິວໂຣສ “ເອອີຊີ ປຽບດັ່ງດາບສອງຄົມ”

ສຳພາດ​ນາງ​ ສິລິພອນ ສຸທໍາມະວົງ (ນົກ) ເຈົ້າຂອງກິດຈະການໂຮງແຮມນິວໂຣສ

“ເອອີຊີ ປຽບດັ່ງດາບສອງຄົມ”

ໃນ​ທັດສະນະ​ສ່ວນ​ຕົວ AEC ມັນ​ໃຫ້​ຫຍັງ​ແດ່​ກ່ຽວ​ກັບ​ຜົນ​ປະ​ໂຫຍ​ດລວມ

ສຳລັບ​ທັດສະນະ​ຂອງ​ຕົນເອງ ແລະ ໄດ້​ເຮັດ​ວຽກຮ່ວມກັບບັນດາ​ປະ​ເທດ​ອາ​ຊຽນຫຼາຍປະ​ເທດ ​ເຫັນ​ວ່າ​ປະ​ເທດ​ລາວ​ເຮົາ​ຈະ​ໄດ້ຮັບຜົນ​ປະ​ໂຫຍ​ດຫຼາຍ​ສົມຄວນ ​ເພາະວ່າ​ປະ​ເທດ​ເຮົາ​ກໍາລັງ​ເປັນ​ປະ​ເທດ​ທີ່​ກຳລັງ​ພັດທະນາ​ຈະ​ເລີ​ນ​ເຕີບ​ໂຕ ​ແລະ ​ມີ​ທ່າ​ແຮງຫຼາຍ​ ໂດຍ​ສະ​ເພາະ​ແມ່ນ​ທາງ​ດ້ານການ​ກໍ່ສ້າງ​ຄື​ເຮົາ​ເຫັນ​ໃນປັດຈຸບັນກໍແມ່ນ ຕືກ​ໃໝ່ໆບ່ອນ​ຊອບ​ປິງ ເກີດ​ຂຶ້ນຫຼາຍ​ ແລະ ກໍມີ​ 3-4 ບ່ອນ​ແລ້ວທີ່ມີຂະໜາດໃຫ່ຍຫຼາຍ ​ແລະ ​ແນ່​ນ່ອນ​ໃນ​ອະນາ​ຄົດ​ທຸລະ​ກິດ​ຈາກ​ຕ່າງປະ​ເທດ​ເພິ່ນຈະ​ຕ້ອງ​ມາລົງທຶນ​​ໃນບັນໂຄງການດັ່ງກ່າວ.                                                     ​ ອີກ​ອັນ​ໜຶ່ງ​ທາງ​ດ້ານ​ການ​ກໍ່​ສ້າງ​ຕ່າງໆ ເຊັ່ນ: ຂົວ​ ,​ເຂື່ອນໄຟຟ້າ ຫຼືວ່າ​ໂຮງ​ແຮມ​,ອາພາດ​ເມັນ ​ກະ​ຂຶ້ນຫຼາຍ ສິ່ງດັ່ງກ່າວມັນໄດ້ສະແດງໃຫ້ເຫັນວ່າຫຼາຍໆຄົນ​ແມ່ນມີຄວາມ​ຕື່ນ​ໂຕ​ໄປ​ກັບ AEC ​ເພາະ​ມີ​ການ​ກໍ່ສ້າງ​ຂຶ້ນຫຼາຍ​ເພື່ອ​ຮອງ​ຮັບ AEC ​ໃນ​ອະນາ​ຄົດ ​ໃນນາມສ່ວນຕົວ​ຄິດ​ວ່າ​ໃນ​ປະ​ເທດ​ລາວ​ເຮົາ​ຈະໄດ້ຮັບຜົນ​ປະ​ໂຫຍ​ດຫຼາຍຂຶ້ນ.​                                                    ​ ແນ່ນ​ອນຢູ່​ແລ້ວ​ຖ້າ​ເຮົາ​ເປີດ ​ເອອີ​ຊີ ​ຕ່າງປະ​ເທດ​ຕ້ອ​ງ​ເຂົ້າ​ມາຫຼາຍ ​ເພາະສະ​ນັ້ນ​ຄົນລາວ​​ເຮົາ​ກໍ່​ຕ້ອງ​ມີ​ການ​ຮຽນ​ຮູ້​ຈາກ​ເຂົາ​ເຈົ້າ​ແດ່ ​​ເພາະ​ມີຫຼາຍຢ່າງ​ທີ່​ພວກ​ເຮົາ​ຕ້ອງ​ໄດ້​ຮຽນ​ຮູ້​ ເພື່ອໃຫ້ສາມາດເຮັດວຽກງານຮ່ວມກັນໄດ້ຮັບໝາກຜົນທີ່ດີ.

​           ​ນອກຈາກ​ການ​ຮຽນ​ຮູ້​ແລ້ວ ທ່ານຄິດວ່າຍັງມີ​ສິ່ງ​ທ້າ​ທາຍ​ອື່ນ​ອີກ​ບໍ່?

ມັນ​ປຽບໄດ້ດັ່ງເປັນ​ດາບ​ສອງ​ຄົມ ​ເພາະວ່າ​ສິ່ງ​ທີ່​ເຮົາຈະ​ໄດ້​ກະມີ , ສິ່ງ​ທີ່​ເປັນຄວາມ​ທ້າ​ທາຍ​ສໍາລັບປະ​ເທດ​ເຮົາ​ກະ​ມີ ເຊິ່ງຂ້າພະເຈົ້າຈະຂໍຍົກໃຫ້ເຫັນວ່າ:​ ​ຄື ພາຍຫຼັງເປີດເອອີຊີ ພວກເຮົາຈະເປັນປະຊາຄົມດຽວກັນ ການໄປມາຫາສູ່ກັນ ການຄ້າຂາຍ ຈະບໍ່ມີພົມແດນ ຈະສະດວກສະບາຍຂຶ້ນ​ດັ່ງ​ນັ້ນ​ຄົນ​ຕ່າງປະ​ເທດ​ ແນ່ນອນ​ຕ້ອງ​ມາ​ເຮັດ​ວຽກ​ຢູ່​​ໃນ​ເມືອງ​ລາວ​ ເພາະ​ມັນ​ມີ​ໂອກາດຫຼາຍ ​ແລະ​ ໂຕ​ນີ້​ມັນ​ຈະ​ເຮັດ​ໃຫ້​ຄົນ​ລາວ​ຫາ​ວຽກ​ໄດ້​ຍາກ​ຂຶ້ນ​ ແຕ່​ມັນ​ກະ​ເປັນ​ຈຸດ​ດີຈຸດໜຶ່ງ​ທີ່​ເຮັດ​ໃຫ້​ຄົນ​ລາວ​ຕ້ອງປັບຕົວຕ້ອງໄດ້ບຸກບືນຕົວເອງ ພັດທະນາຕົວເອງຂຶ້ນ ເພາະມີການ​ແຂ່ງ​ຂັນ​ຄວາມ​ສາດ​ມາດ​ຫຼາຍຂຶ້ນ ເວົ້າແບບ​ລວມໆ ກະ​ຄື​ມັນ​ຈະ​ເປັນ​ດາບສອງ​ຄົມ ​ແລະ ​ຖ້າເຮົາບໍ່ກຽມພ້ອມ ​ໂອກ​າດທີ່​ຈະ​ເສຍ​ວຽກ​ກໍ່​ມີຫຼາຍ​ຂຶ້ນ ​ເພາະວ່າ​ເຮົາ​ເບິ່ງ​ຈາກຕ່າງ​ປະ​ເທດເຂົາ​ເຈົ້າ​ໄດ້​ພາສາລາວ ບາງຄົນເກັ່ງເວົ້າໄດ້ຂຽນໄດ້ກະມີຫຼາຍ ​ແຕ່​ວ່າ​ເຮົາ​ກໍ​ຕ້ອງ​ພະຍາຍາມ​ເຮັດ​ໃຫ້​ມັນ​ໄດ້​ຄື​ເຂົາ ​ໂດຍ​ສະ​ເພະ​ພາສາ​ອັງກິດ​ເປັນ​ພາສາ​ກາງ ຢ່າງ​ໜ້ອຍ​ສຸດ​ເຮົາ​ຕ້ອງ​ໄດ້​ພື້ນຖານ ​ເຮົາ​ຈະ​ຫາ​ວຽກ​ໄດ້​ງ່າຍ​ຂຶ້ນ.

ທ່ານ​ສັງ​ເກດ​ເຫັນ​ປະ​ເທດ​ອ້ອມ​ຂ້າງ​​ ​ມີ​ຈຸດ​ໃດ​​ແດ່​ທີ່​ເຫັນ​ວ່າ​ເຂົາ​ເຈົ້າ​ໄປ​ໄກ​ກວ່າ​ເຮົາ

ຂໍຍົກຕົວຢ່າງ​ປະ​ເທດ​ໜຶ່ງ​ຄື​ເມື່ອບໍ່​ດົນ​ມາ​ນີ້​ກໍ​ໄດ້​ມີໂອກາດໄປ​ຢ້ຽມຢາມ​ປະ​ເທດ​ມຽນມ້າ​ ເຊິ່ງໃນ​ເມື່ອ​ກ່ອນ​ປະ​ເທດ​ນີ້​ຈະ​ເປັນ​ປະ​ເທດ​ປິດ ​ຫຼາຍຄົນ​ຈະ​ມີ​ທັດສະນະ​ວ່າ:​ຄື​ຈະ​ບໍ່​ພັດທະ​ນາ​ເທື່ອ ກຳລັງ   ​ເລີ່​ມພັດທະນາ…..ແຕ່ຈາກ​ການ​ໄດ້​ໄປ​ສຳ​ຜັດ​ຕົວ​ຈິ່ງ​​ແລ້ວຖື​ວ່າ ​​ເຂົາ​ເຈົ້າ​ໄດ້​ໄປ​ໄກ ​ກວ່າ​ພວກ​ເຮົາຫຼາຍ​ເພາະວ່າ​ເຫັນຫຼາຍໆສິ່ງຫຼາຍໆຢ່າງ​ທີ່​ເຂົາເຈົ້າ​ກະກຽມ​ໃສ່ ​ເອອີ​ຊີ​ ໂດຍ​ສະ​ເພາະ​ແມ່ນ​ໂຮງ​ແຮມ​ ​ແລະ​ການ​ວາງ​ແຜນ​ຜັງ​ຂອງ​ຕົວ​ເມືອງໃໝ່ ເນປີດໍ ​ທີ່​ມີ​ການຈັດ​ສັນຢ່າງເປັນລະບົບ​ ມັນ​ຈະ​ເປັນ​ເຂດທີ່ທັນສະໄໝເວລາ​ເຮົາ​ແນມຢູ່​ເທິງ​ຍົນ ​ເຮົາ​ຈະ​ເຫັນ​ໄດ້​ເລີຍ​ວ່າ​ແຜນ​ຜັງຂອງ​ເຂົາເຈົ້າຈັດແບ່ງ​ເປັນ​ເຂດ ​ເຫັນ​ໄດ້​ຊັດ​ເຈນ , ສ່ວນ​ດ້ານ​ພາສາ​ຖື​ວ່າດີ​ ແຕ່​ມັນ​ກະ​ຍັງ​ມີ​ບາງອັນທີ່​​ເຂົາ​ເຈົ້າຍັງຮັກສາເອກະລັກໄວ້ຢູ່​ເຊັ່ນ: ​ການນຸ່ງເຄື່ອງ ​ແຕ່​ດ້ານ​ພາສາ ​ແລະ​ ການ​ບໍລິການ​ຖື​ວ່າ​ດີຫຼາຍ.                             ​ຢູ່ບ້ານເຮົາລັດຖະບານກໍໄດ້ມີການຈັດສັນເຂດເມືອງໃໝ່ເຊັ່ນກັນ ແຕ່ເຮົາຍັງເລີ່ມຊ້າຖ້າທຽບໃສ່ເຂົາເຈົ້າ.

​ທຸລະ​ກິດ​ໂຮງແຮມ ​ແລະ ​​ກໍ່ສ້າງທີ່ເຮົາເຮັດ ຄິດ​ວ່າ​ເອອີ​ຊີ​ມັນ​ໃຫ້​ໂອກາດຫຼືສິ່ງ​ທ້າ​ທາຍ

ມັນ​ຈະ​ໃຫ້​ທັງ​ສອງດ້ານ, ຄື​ປະ​ເທດ​ລາວ​ເຮົາ ​ມີເມືອງ​ມໍລະດົກ​​ໂລກຫຼວງພະບາງທີ່ຂຶ້ນຊື່ ,​ມີ​ບ່ອນ​ທ່ອງ​ທ່ຽວ​ເປັນ​ທຳ​ມະ​ຊາດຫຼາຍ ​​ນັກ​ທ່ອງ​ທ່ຽວ​​ເຂົ້າ​ມາຫຼາຍ ສະ​ນັ້ນ​ໂຮງ​ແຮມ​ຕ່າງໆ ກໍຕ້ອງໄດ້ປັບຕົວຮອງຮັບຈໍານວນນັກທ່ອງທ່ຽວ.​ ສິ່ງ​ທ້າ​ທາຍ​ຂອງ​ໂຮງ​ແຮມ​ນິວໂຣດ ​ແມ່ນ​ຢູ່​ໃນຕົວ​ເມືອງ​ ແລະ​ ແຖວ​ອ້ອມ​ຂ້າງ​ກໍ​ມີ​ໂຮງ​ແຮມຫຼາຍລະດັບ ​ແຕ່​ແນວ​ໃດ​ກໍ​ຕາມ​ພວກ​ເຮົາ​ກໍ​ຕ້ອງ​ພະຍາຍາມ​ເຮັດ​ການ​ບໍລິການ​ໃຫ້​ມັນ​ດີ​ທີ່​ສຸດ​ເທົ່າ​ທີ່​ເຮົາ​ເຮັດ​ໄດ້​ ສ້າງຄວາມເປັນ​ກັນ​ເອງ​ທີ່​ສຸດ​ໃຫ້​ລູກ​ຄ້າ​ຮູ້​ສື​ກຄື​ກັບ​ວ່າ​ຢູ່​ບ້ານ​ຕົນ​ເອງ ​ເພາະໂຮງແຮມ​ຂອງ​ເຮົາ​ເປັນ ບູຕິກ ​ເຮົາ​ຕ້ອງ​ເຮັດ​ແນວ​ໃດ​ໃຫ້​ລຸກ​ຄ້າ​ຕິດ​ໃຈ​ໂຮງ​ແຮມ​ເຮົາ​ມາແລ້ວຮູ້ສຶກອົບອຸ່ນ ເຊິ່ງສິ່ງນີ້ມັນກໍທ້າທາຍສົມຄວນ. ສຳລັບ​ການ​ກໍ່​ສ້າງ​​ນັ້ນ​ຈະ​ເປັນ​​ໂອກາດ​​ໄດ້​ຕິດ​ຕໍ່​ພົວພັນ​ບໍລິ​ສັດ​ກໍ່ສ້າງ​ອື່ນໆ ທີ່ຢູ່​ໃນ​ປະ​ເທດ​ເພື່​ອນບ້ານ ​ເຮົາ​ສາມາດ​ນຳ​ເຄື່ອງ​ເຂົ້າ​ມາ​ໄດ້​ຖື​ວ່າ​ເປັນ​ທ່າ​ແຮງ​ ສໍາລັບ​ທຸລະ​ກີດ​ກໍ່ສ້າງ​ຖື​ວ່າ​ເປັນ​ບວກ ​ແລະ​ ໂຮງ​ແຮມ​ກໍ​ຖື​ວ່າ​ເປັນ​ໂອກາດ​ຄື​ກັນ​.

ທ້າຍນີ້ຂ້າພະເຈົ້າກໍຂໍຝາກເຖິງປະຊາຊົນບັນດາເຜົ່າໂດຍສະເພາະຜູ້ທີ່ຢູ່ເຂດຫ່າງໄກ ຂໍໃຫ້ຊອກຮູ້ຂໍ້ມູນກ່ຽວກັບ ໂອກາດ ແລະ ສິ່ງທ້າທາຍຂອງການເຂົ້າ ເອອີຊີ ວ່າເຮົາຈະໄດ້ຫຍັງ ເຮົາຈະຕ້ອງກຽມພ້ອມແນວໃດ ເພາະອີກບໍ່ເທົ່າໃດເດືອນຂ້າງໜ້າປະເທດພວກເຮົາກໍຈະໄດ້ຮ່ວມກັບບັນດາປະເທດສະມາຊິກອາຊຽນ ພ້ອມກັນກ້າວເຂົ້າສູ່ປະຊາຄົມເສດຖະກິດ ອາຊຽນແລ້ວ .

ບົດຄວາມແນະນໍາ

ສະແດງຄວາມຄິດເຫັນ