ການແຂ່ງຂັນ Lao Golf Challenge 2017

ວາລະສານ​ທາ​ເກັດຮ່ວມ​ກັບ ສະຫະພັນ​ກິລາ​ກ໊ອຟ​ແຫ່ງ​ຊາດ​ລາວ ​ໄດ້​ຈັດ​ການ​ແຂ່ງຂັນ​ “Lao Golf Challenge 2017” ຄັ້ງ​ທີ 5 ​ຂຶ້ນ​ໃນ​ວັນ​ທີ 18 ກຸມພາ 2017  ຢູ່​ທີ່​ສະໜາມ ກ໊ອຟ ລອງ​ວຽນ, ​ນະຄອນຫຼວງວຽງ​ຈັນ. ​ໂດຍ​ການ​ເຂົ້າ​ຮ່ວມ​ຂອງ​ທ່ານ ດຣ.ກອງສີ ແສງມະນີ ຮອງລັດຖະມົນຕີກະຊວງສຶກສາທິການ ແລະ ກິລາ, ທ່ານ ​ໄຊ​ຍະ​ສອນ ປັນຍາ​ທິບ ຜູ້ອຳນວຍການ​ສ້າງ​ວາລະສານ​ທາ​ເກັດ​, ທ່ານ ສູນ​ທອນ ສິຣິສັກ ປະທານ​ສະຫະພັນ​ກ໊ອຟ​ ແຫ່ງ​ຊາດ​ລາວ, ທ່ານ ກິດສະໜາ​ ວົງ​​ໄຊ ປະທານກຸ່ມບໍລິສັດເຄແອນຊີ, ມີ​ບັນດາ​ຜູ້ໃຫ້ການສະໜັບສະໜູນ, ບັນດາ​ແຂກ​ທີ່​ມີ​ກຽດ, ນັກ​ກິລາ ​ແລະ ສື່​ມວນ​ຊົນ​ເຂົ້າ​ຮ່ວມຢ່າງ​ຫຼວງຫຼາຍ.

ການແຂ່ງຂັນໃນປີນີ້ມີນັກກິລາເຂົ້າຮ່ວມແຂ່ງຂັນທັງໝົດ 182 ຄົນ ໃນນີ້ສາຍ​ກາລະ​ເວ (Gallaway) ມີນັກກິລາເຂົ້າຮ່ວມແຂ່ງຂັນ 145 ຄົນ, ສາຍ​ຊາ​ເລັນ (Challenge) ມີນັກກິລາເຂົ້າຮ່ວມແຂ່ງຂັນ 37 ຄົນ.ພາຍໃຕ້ການສະ​ໜັບສະ​ໜູນຫຼັກ​ໂດຍ Carlsberg (ບໍລິສັດເບຍລາວຈໍາກັດ), ຮ່ວມ​ສະໜັບສະໜູນ​ໂດ​ຍ ແລນໂຣເວີ (Rand Rover),ຈາກົວ (Jaquar),ລາວ​ຟອດ ຊີ​ຕີ້ (Lao ford city), ມາ​ເຈ​ສຕີ (Majesty), Pepper stone, ​ໂຮງ​ແຮມ​ລັດສະໝີ ພລາຊາ (Rashmi’s Plaza hotel), ປັນຍາ​ທິບ ​ໂຄສະນາ (Panyathip Advertising), ມີໄອເດຍ(Meidea),Digitalmonkey, ແລະ ສະໜາມກ໊ອຟລອງວຽນ (Longvien Golf Club).

ທ່ານ ໄຊຍະສອນ ປັນຍາທິບ ຜູ້ອໍານວຍການສ້າງວາລະສານທາເກັດໄດ້ກ່າວວ່າ: ໃນໄລຍະ4 ປີທີ່ຜ່ານມາຖືວ່າໄດ້ຮັບການຕອບຮັບດ້ວຍດີມາຕະຫຼອດ ພິເສດປີນີ້ເປັນປີທີ 5 ຫຼັງຈາກຖະແຫຼງຂ່າວ ແລະ ເປີດຮັບລົງທະບຽນ ພາຍໃນເວລາ 1 ອາທິດ ນັກກິລາເຂົ້າມາສະໝັກແມ່ນເຕັມ ເຊິ່ງບໍ່ສາມາດຮັບໄດ້ເພີ່ມ ແຕ່ຍັງມີນັກກິລາອີກຫຼາຍຄົນທີ່ຍັງບໍ່ໄດ້ເຂົ້າຮ່ວມ ເຮົາກໍຕ້ອງຂໍອະໄພນຳເນື່ອງຈາກໄດ້ຈຳກັດນັກກິລາເຂົ້າແຂ່ງຂັນ ເພື່ອໃຫ້ໄດ້ມາດຕະຖານ ແຕ່ສຳລັບປີໜ້າ ຈະໄດ້ມີການປຶກສາທາງສະຫະພັນກ໊ອຟອີກເທື່ອໜຶ່ງ ເພື່ອຂໍເພີ່ມມື້ແຂ່ງຂັນກິລາຂຶ້ນຕື່ມ, ສ່ວນນັກກິລາຜູ້ທີ່ຢາກຮ່ວມແຂ່ງຂັນ Lao Golf Challenge ໃນປີໜ້າ 2018ກໍຕ້ອງກຽມຄວາມພ້ອມໄວ້ໃຫ້ດີ.

ທ່ານ ສູນທອນ ສິຣິສັກ ປະທານສະຫະພັນກ໊ອຟ ແຫ່ງຊາດລາວ ກ່າວວ່າ: ໜຶ່ງໃນຈຸດປະສົງຂອງການແຂ່ງຂັນໃນມື້ນີ້ ແມ່ນຈະຄັດເລືອກສາຍຜູ້ທີ່ມີພອນສະຫວັນ ປະມານ 5 ຄົນເຂົ້າໄປຄັດເລືອກເພື່ອເປັນທີມຊາດລາວ ໄປແຂ່ງຂັນກິລາ ຊີແກມ ຄັ້ງທີ 29 ປະເທດມາເລເຊຍ. ກ່ຽວກັບເລື່ອງຄຸນນະພາບຂອງນັກກິລາກ໊ອຟໃນລາວ ປະມານ 5.000 ຄົນ ແມ່ນມີການພັດທະນາສີມືຂຶ້ນເລື້ອຍໆສັງເກດການນັບຄະແນນແມ່ນຈະດີຂຶ້ນທຸກໆປີ ແຕ່ເມື່ອທຽບກັບອາຊຽນແລ້ວ ພວກເຮົາຈະຕ້ອງໄດ້ປັບປຸງຂຶ້ນອີກຫຼາຍດ້ານ ແລະ ເຊື່ອໝັ້ນວ່າ ໃນອະນາຄົດການນັກກິລາກ໊ອຟຂອງລາວເຮົາຈະດີຂຶ້ນທຽບເທົ່າສາກົນ.

ທ່ານ ສຸລິເດດ ໄຊຍະເດດ ໜຶ່ງໃນນັກກິລາ ທີ່ເຂົ້າຮ່ວມແຂ່ງຂັນ ໄດ້ໃຫ້ສຳພາດວ່າ: ດີໃຈຫຼາຍທີ່ໄດ້ເຂົ້າຮ່ວມແຂ່ງຂັນປີນີ້ ເປັນປີທີ 3 ແລ້ວ ສຳລັບປີນີ້ ຮູ້ສຶກວ່າຄຶກຄື້ນກວ່າຫຼາຍປີຜ່ານມາ ເພາະເຫັນນັກກິລາມາແຂ່ງຂັນຫຼາຍຂຶ້ນພ້ອມທັງມີໃບໜ້າຍິ້ມແຍ້ມແຈ່ມໃສ ພ້ອມພຽງກັນມາແຂ່ງຂັນ ເພື່ອຊິງລາງວັນໃຫຍ່ຂອງງານບາງທ່ານກໍມາແຂ່ງແບບມືອາຊີບ ແລະ ບາງຄົນກໍມາຫຼິ້ນເພື່ອສຸຂະພາບ. ພິເສດປີນີ້ ການຕົບແຕ່ງ”ບູດໂຊ” ຜູ້ສະໜັບສະໜູນແມ່ນຫຼາຍຂຶ້ນກວ່າທຸກໆປີ ຮູ້ສຶກວ່າ ເຂົ້າມາໃນນີ້ແລ້ວມີສີສັນຄຶກຄື້ນມ່ວນຊື່ນເປັນພິເສດ.

ທ່ານ ເຢນ ລັດຕະນະວົງ ປະທານໂຮງງານໂພນຕ້ອງກວດເພັດ ສາມາດຄອບຄອງລາງວັນລູກກ໊ອຟຄໍາ ຈາກບໍລິສັດ ເບຍລາວ ຈໍາກັດ ມູນຄ່າ 105 ລ້ານກີບ ໄດ້ສໍາເລັດຈາກການຕີ Hole in one ຂຸມທີ 5 ພາ 3 ເຊິ່ງລາງວັນດັ່ງກ່າວບໍ່ມີໃຜສາມາດເຮັດໄດ້ມາ 4 ປີແລ້ວ. ທ່ານ ເຢນ ລັດຕະນະວົງ ໄດ້ສະແດງຄວາມຮູ້ສຶກວ່າ:ເຂົ້າມາແຂ່ງທຸກໆປີ ປີນີ້ ຖືວ່າໂຊກດີໄດ້ຮັບລາງວັນໃຫຍ່ເປັນໂຊກທີ່ບໍ່ຄິດຝັນວ່າຈະໄດ້. ເວລາທີ່ຕີໄປຄິດວ່າຈະບໍ່ເຂົ້າເລີຍປິ່ນຫຼັງແລ້ວ ຫຼັງຈາກນັ້ນໝູ່ໃນ”ກ້ວນ”ເພິ່ນວ່າເຂົ້າແລ້ວໆ ຄິດວ່າໝູ່ເວົ້າຢອກ ແຕ່ຫຼັງຈາກທ່ານ ອຳນວຍບໍລິສັດເບຍລາວບອກອີກຕື່ມວ່າ:“ເຂົ້າແລ້ວ” ຈຶ່ງເຊື່ອໝັ້ນລະກໍພາກັນດີໃຈ ຮ້ອງໂຮ່ ຊົມເຊີຍ. ສໍາລັບຄັ້ງຕໍ່ໄປເປັນປີທີ 6 ປີ 2018 ຂໍເຊີນຊວນນັກກິລາກ໊ອຟ ຜູ້ທີ່ມີຄວາມສົນໃຈໃຫ້ມາແຂ່ງຂັນສ້າງບັນຍາກາດມ່ວນຊື່ນນຳກັນ ແລະ ຄິດວ່າລາງວັນຈະໃຫຍ່ ແລະ ຫຼາຍກວ່າເກົ່າ ຖ້າທ່ານຄິດວ່າ ທ່ານມີສີມືດີ ບາງເທື່ອທ່ານອາດເປັນຜູ້ໂຊກດີໄດ້ຮັບລາງວັນຄືກັບຂ້າພະເຈົ້າ.

ບົດຄວາມແນະນໍາ

ສະແດງຄວາມຄິດເຫັນ

error: Content is protected !!