Senglao content (728×90)

ໃບເຕີຍມີປະໂຫຍດຫຼາຍຢ່າງ

ປະ​ໂຫຍ​ດຂອງ​ໃບ​ເຕີຍນອກຈາກ​ຈະ​ມີ​ສີ​ທີ່​ໜ້າ​ກິນ ​ແລະ ກິ່ນ​ທີ່​ຫອມ​ແລ້ວ ​ໃບ​ເຕີຍຍັງ​ສາມາດ​ຊ່ວຍ​ຟື້ນ​ຟູ​ສຸຂະພາບ​ໃນ​ຫຼາຍດ້ານ. ​ເຊິ່ງທາງ​ວາລະສານ​ທາ​ເກັດ​ສະບັບ​ນີ້​​ໄດ້​ຊອກ​ປະ​ໂຫຍ​ດດີໆມາ​ໃຫ້​ທ່ານ​ຜູ້​ອ່ານ​ໄດ້​ຮູ້​ເຖິງ​ຄຸນ​ປະ​ໂຫຍ​ດຂອງ​ໃບ​ເຕີຍ​ດັ່ງ​ນີ້:

  1. ບຳລຸງ​ປະສາດ, ​ແກ້​ອາການ​ອ່ອນ​ເພຍ.

​ດື່ມ​ນໍ້າ​ໃບ​ເຕີຍ​ມື້​ລະ ສອງ​ຈອກ ​ເຊົ້າ ​ແລະ ສວາຍ ຈະ​ຊ່ວຍ​ໃຫ້​ອາການ​ອ່ອນ​ເພຍ​ທີ່​ມີ​ນັ້ນ​ຫາຍ​ດີ ​ເນື່ອງຈາກ​ໃບ​ເຕີຍ​ຊ່ວຍ​ບຳລຸງ​ກຳລັງ ​ແລະ ລະບົບ​ປະສາດ ​ເຮັດ​ໃຫ້​ຮູ້​ສຶກ​ເບົາ​ຕົວ​ຂຶ້ນ.

  1. ບຳລຸງ​ຫົວ​ໃຈ ຫຼຸດຄວາມດັນ​ເລືອດ.

ໃບ​ເຕີຍ​ເປັນຢາພື້ນເມືອງ​ທີ່​ມີ​ຄຸນ​ປະ​ໂຫຍ​ດ​ໃນ​ການ​ບຳລຸງ​ຫົວ​ໃຈ ​ແລະ ຫຼອດ​ເລືອດ ສະ​ນັ້ນ​ໃຜ​ທີ່​ເປັນຄວາມ​ດັນ​ເລືອດ​ສູງ ຈິ່ງ​ສາມາດ​ຕົ້ມ​ນໍ້າ​ໃບ​ເຕີຍດື່ມ ​ເຊົ້າ-​ແລງ ​ເພື່ອ​ໃຫ້​ໃບ​ເຕີຍ​ຊ່ວຍ​ປັບ​ລະດັບ​ຄວາມດັນ​ເລືອດ​ໃຫ້​ຢູ່​ໃນ​ລະດັບ​ປົກກະຕິ.

  1. ຊ່ວຍ​ຮັກສາ​ພະຍາດ​ເບົາຫວານ.

ຕົ້ນ ​ແລະ ຮາກຂອງ​ໃບ​ເຕີຍ​ມີ​ຄຸນ​ປະ​ໂຫຍ​ດຊ່ວຍ​ຂັບ​ນໍ້າ​ຍ່ຽວ ຮັກສາ​ພະຍາດ​ເບົາຫວານ, ຫຼຸດລະດັບ​ນໍ້າຕານ​ໃນ​ເລືອດ ​ໂດຍ​ນຳ​ເອົາ​ຮາກ 1 ກໍາມື ​ໄປ​ຕົ້ມ​ເປັນ​ນໍ້າ​ດື່ມ​ທຸກໆ​ເຊົ້າ ​ແລະ​​ ແລງ.

  1. ຊ່ວຍຮັກສາພະຍາດຜິວໜັງ.

ສາມາດຮັກສາພະຍາດຜິວໜັງໄດ້ພຽງແຕ່ທ່ານນຳເອົາໃບເຕີຍມາຕໍາ ຫຼັງຈາກນັ້ນກໍເອົາພອກຜິວ ໃບເຕີຍຈະຊ່ວຍລ້າງສານພິດ, ເຊື້ອລາ ແລະ ໄວຣັດທີ່ຢູ່ຜິວໜັງໄດ້.

  1. ບັນ​ເທົາ​ພະຍາດ​ຂໍ້​ເຊື່ອມ.

ຄຸນ​ປະ​ໂຫຍ​ດຂອງ​ໃບ​ເຕີຍ​ສາມາດ​ບັນ​ເທົາ​ອາການ​ເຈັບ​ຂໍ້ ​ແລະ ກະດູກ ​ໂດຍການນຳເອົາໃບເຕີຍສົດມາ 3 ໃບແລ້ວລ້າງ, ເຊັດໃຫ້ມັນໝາດໆ ຫຼັງຈາກນັ້ນກໍຊອຍໃຫ້ໝຸ່ນໆ ແລ້ວເອົາມາປະສົມກັບນໍ້າໝາກພ້າວ ຄົນໃຫ້ເຂົ້າກັນ, ໝັກໄວ້ໃຊ້ເປັນຢາທາບັນເທົາອາການເຈັບ ຫຼື ອັກເສບຂອງກະດູກ.

ຄຸນ​ປະ​ໂຫຍ​ດຂອງ​ໃບ​ເຕີຍ​ນອກຈາກ​ຈະຊ່ວຍ​ຟື້ນ​ຟູ​ທາງ​ດ້ານ​ສຸຂະພາບ​ແລ້ວ ​ໃບ​ເຕີຍ​ຍັງ​ມີ​ຄຸນ​ປະ​ໂຫຍ​ດ​ໃນ​ດ້ານ​ບຳລຸງ​ຄວາມ​ງາມ​ຕື່ມ​ອີກ​ຄື:ຊ່ວຍ​ບໍ່​ໃຫ້​ກໍ່​ເກີດ​ຂີ້ຫົວ ​ໂດຍ​ການ​ນຳ​ເອົາ​ໃບ​ເຕີຍ​ມາ​ບົດ​ໃຫ້​ໝຸ່ນໆ ຈາກ​ນັ້ນ​ກໍ​ເອົາ​ມານ​ວດໜັງ​ຫົວ​ເປັນ​ປະຈຳ ​ເພື່ອຫຼຸດຜ່ອນ​ບໍ່​ໃຫ້​ມີ​ຂີ້ຫົວ. ນອກຈາກ​ນັ້ນ​, ຍັງ​ຊ່ວຍ​ໃຫ້​ຜົມ​ດຳ​ຕື່ມ​ອີກ ​ໂດຍ​ການ​ນຳ​ເອົາ​ໃບ​ເຕີຍ​ມາ​ຕົ້ມ​ຈົນ​ເປັນ​ສີຂຽວ​ແລ້ວ​ປະສົມ​ກັບນໍ້າໝາກຍໍ ພຽງ​ເທົ່າ​ນີ້​ທ່ານ​ກໍ​ໄດ້​ນໍ້າ​ຍ້ອມ​ຜົມ​ທີ່​​ເຮັດ​ໃຫ້​ຜົມ​ຂອງ​ທ່ານ​ດຳ​ເງົາ​ງາມ​ແບບ​ບໍ່​ຕ້ອງ​ສ່ຽງ​ຈາກ​ສານ​ເຄມີ ​ແລະ​ອີກ​ຢ່າງ​ໜຶ່ງ​ຄື​ໃບ​ເຕີຍ​ຍັງ​ສາມາດບຳລຸງ​ຜິວ​ໃຫ້​ຜ່ອງ​ໃສ ຈາກ​ຄຸນ​ປະ​ໂຫຍ​ດທາງ​ຢາ​ຂອງ​ໃບ​ເຕີຍ​ທີ່​ຊ່ວຍ​ຮັກສາ​ພະຍາດ​ຜິວໜັງ​ໄດ້ ດັ່ງ​ນັ້ນ​ຈຶ່ງ​ມີ​ການ​ນຳ​ເອົາ​ໃບ​ເຕີຍ​ມາ​ປັ່ນ​ແລ້ວ​ພອກ​ໜ້າ ​ເພື່ອ​ບຳລຸງ​ຜິວ​ພັນ​ໃຫ້​ຜ່ອງ​ໃສ​ໄດ້​ເຊັ່ນ​ກັນ.

ສະແດງຄຳຄິດເຫັນ