ສທຍລ ສະຫຼຸບວຽກງານ ໄຕມາດ I

ໃນຕອນແລງວັນທີ 6 ເມສາ 2015 ທີ່ ອາຄານ K&C, ບ້ານ ສີສະຫວາດ, ນະຄອນຫຼວງວຽງຈັນ ສະມາຄົມນັກທຸລະກິດແມ່ຍິງລາວ (ສທຍລ) ໄດ້ຈັດພິທີສະຫຼຸບການເຄື່ອນໄຫວໄຕມາດ I (ເດືອນ 1-2-3/2015) ແລະ ວາງແຜນການໄຕມາດ II (ເດືອນ 4-5-6/2015), ພາຍໃຕ້ການເປັນປະທານຂອງ ທ່ານ ນາງ ຈັນທະຈອນ ວົງໄຊ ປະທານ ສທຍລ, ໂດຍການເຂົ້າຮ່ວມເປັນກຽດຂອງທ່ານ ນາງ ຈັນເທົາ ປະຖົມມະວົງ ປະທານ ກິຕິມະສັກ ສທຍລ, ພ້ອມດ້ວຍຄະນະ ສທລຍ ແລະ ສະມາຊິກທັງເກົ່າ ແລະ ໃໝ່ເຂົ້າຮ່ວມ.

ຈຸດປະສົງຂອງການຈັດງານໃນມື້ນີ້ ແມ່ນເພື່ອເປັນການ ເຜີຍແຜ່ກົດລະບຽບ, ປະກາດແຕ່ງຕັ້ງ ແບ່ງໜ້າຮັບຜິດຊອບໃຫ້ຄະນະ, ສະມາຊິກ ຂອງ ສທຍລ ແລະ ຮັບສະມາຊິກໃໝ່ ຈຳນວນ 10 ທ່ານ, ພ້ອມທັງລາຍງານການເຄື່ອນໄຫວຂອງ ສທລຍ ຢູ່ພາຍໃນ ແລະ ຕ່າງປະເທດ, ສະຫຼຸບຖອນຖອນບົດຮຽນ ການຈັດງານເທດສະການອາຫານລາວ ຄັ້ງທີ 10 ປີ 2015, ສະຫຼຸບສັງລວມການເຄື່ອນໄຫວຂອງ ສທຍລ ໄຕມາດ I ໃນວຽກງານດ້ານຕ່າງໆຂອງສະມາຄົມ ແລະ ມີການວາງແຜນວຽກງານໃນໄຕມາດ II ໃນ 3 ເດືອນຕໍ່ໜ້າຄື ໃຫ້ກຽມພ້ອມເຂົ້າຮ່ວມຂະບວນການຕ່າງໆຕາມການຊີ້ນໍາຂອງຂັ້ນເທິງ ແລະ ຕາມການເຊີນຂອງຂະແໜງການກ່ຽວຂ້ອງຕາມເງື່ອນໄຂຄວາມສາມາດຕົວຈິງ, ການກະກຽມເຂົ້າຮ່ວມສະເຫຼີມສະຫຼອງວັນສ້າງຕັ້ງສະຫະພັນແມ່ຍິງລາວ ຄົບຮອບ 60 ປີ ທີ່ຈະມາເຖິງນີ້. ນອກຈາກນີ້, ພາຍໃນງານ ຍັງມີການແນະນໍາໃຫ້ຄວາມຮູ້ທາງດ້ານການຊ່ວຍເຫຼືອ ນັກທຸລະກິດຍິງເພື່ອເຂົ້າເຖິງແຫຼ່ງທຶນກູ້ຢືມ ຈາກທະນາຄານລາວ-ຝຣັ່ງ.

ບົດຄວາມແນະນໍາ

ສະແດງຄວາມຄິດເຫັນ