ຫ້ອງວາງສະແດງສິນຄ້າ ຈາກຮົງກາລີ ເປີດປະຕູສູ່ໂອກາດທາງທຸລະກິດ

ພິທີ​ເປີດຫ້ອງ​ວາງສະ​ແດງ​ສິນຄ້າ ຂອງ ຫ້ອງການ ການ​ຄ້າ​ແຫ່ງ​ຊາດ ຮົງ​ກາລີ ​ໄດ້​ເປີດ​ຢ່າງ​ເປັນ​ທາງ​ການ ​ໃນ​ວັນ​ທີ 8 ​ພຶດ​ສະພາ​ ທີ່​ບ້ານ ວັດ​ນາກ, ​ເມືອງ ສີ​ສັດຕະ​ນາກ, ນະ​ຄອນ​ຫຼວງວຽງ​ຈັນ ​ເພື່ອ​ເປັນ​ການ​ເຊື່ອມ​ຕໍ່ ທຸລະ​ກິດ ​ແລະ ການ​ຄ້າ ລະ​ຫ່ວາງ​ລາວ ​ແລະ ຮົງ​ກາລີ ​ໂດຍ ທ່ານ​ວິລະ​ວັນ ​ພົມ​ເຄ​, ລັດຖະມົນຕີ​ກະຊວງ ກະສິກໍາ ​ແລະ ປ່າ​ໄມ້, ດຣ ລາ​ສ​ໂລ ວາຣາດິ,ກົງ​ສູນ ກິ​ຕິ​ມະ​ສັກລາວ ປະ​ຈໍາ​ ຮົງ​ກາລີ, ທ່ານ ນາງ ​ແມງ​ຍີ ລີ, ຜູ້​ຈັດການ​ຝ່າຍ​ຂາຍ​ເຂດ​ອາ​ເຊຍ ຂອງ ຫ້ອງການ ການ​ຄ້າ​ແຫ່ງ​ຊາດ ຮົງກາລີ, ທ່ານ ຂວັນ​ໃຈ ສີ​ພາກັນ​ລະ​ຍາ, ປະທານ ບໍລິສັດ​ ສະຫະ​ມິດ ແລະ ນັກ​ທຸລະ​ກິດ ​ແລະ ​ແຂກ​ທີ່ຖືກເຊີນ​ໄດ້​ຮ່ວມ​ເປີດ​ພິທີ​.

ຫ້ອງການ ການ​ຄ້າ​ແຫ່ງ​ຊາດ ຮົງ​ກາລີ ​ໄດ້​ຖືກ​ສ້າງ​ຂື້ນ ​ໃນ​ປີ 2013 ​ໂດຍ​ລັດຖະບານ ຮົງ​ກາລີ ​ແລະ ສະພາ ອຸດ​ສະຫະ​ກໍາ ​ແລະ ການ​ຄ້າ ຮົງ​ກາລີ, ​ເຊິ່ງ​ເປັນ​ຍຸດ​ທະ​ສາດ ການ​ຄ້າ​ກັບ​ຕ່າງປະ​ເທດໜຶ່ງ ​ເອີ້ນ​ວ່າ “ການ​ເປີດ​ປະ​ຕູ​ສູ່​ຕາ​ເວັນ​ອອກ”. ຫ້ອງການ ການ​ຄ້າ​ແຫ່ງ​ຊາດ ຮົງ​ກາລີ ​ແມ່ນຈະ​ຊອກ​ຫາ​ຕະຫຼາດ ​ແລະ ​ໂອ​ກາດ​ໃໝ່​ສໍາລັບ ບັນດາ​ບໍລິ​ສັດ ຮົງ​ກາລີ. ​ເນັ້ນ​ໃສ່​ສອງສິ່ງ​ທີ່​ເປັນຫຼັກການ​ຄັດ​ເລືອກ ​ແລະ ການຄົ້ນຫາ ບໍລິສັດ ຮົງ​ກາລີ ທີ່​ມີ​ສິນຄ້າ ​ແລະ ການ​ບໍລິການ ​ແບບ​ຂາຍຍົກ ທີ່​ມີ​ຄວາມ​ສາມາດ​ແຂ່ງຂັນ​ໃນ​ຕະຫຼາດຕ່າງປະ​ເທດ ພ້ອມ​ປະ​ເມີນ​ຄວາມ​ຕ້ອງການ​ຂອງ​ຕະຫຼາດຜ່ານ ຫ້ອງການ ການ​ຄ້າ ຄາດ​ວ່າ: ຈະ​ເປັນ​ການ​ສົ່ງ​ເສີມ​ ການ​ເຊື່ອມ​ຕໍ່ທຸລະ​ກິດ ​ເນື່ອງ​ຈາກ​ວ່າ ສິນຄ້າ​ຫຼາກຫຼາຍ ຂອງ ຮົງ​ກາລີ ​​ໄດ້​ຖືກ​ວາງສະ​ແດງ ​ໃຫ້ນັກທຸລະ​ກິດ​ພາຍ​ໃນ ​ໄດ້​ສໍາ​ຫຼວດ​ເບິ່ງ​ ​ໂອ​ກາດ​ທາງ​ທຸລະ​ກິດ ເພື່ອ​ເປັນ​ການ​ເຊື່ອມ​ຕໍ່ທຸ​ລະ​ກິດ ລະຫວ່າງ​ບໍລິສັດ​ລາວ ​ແລະ ຮົງ​ກາລີ ​ທັງເປັນ​ການ​ສົ່ງ​ເສີມ​ການ​ຄ້າ ​ແລະ ທຸລະ​ກິດ ລະຫວ່າງ​ສອງ​ປະ​ເທດ.

ບົດຄວາມແນະນໍາ

ສະແດງຄວາມຄິດເຫັນ