Senglao content (728×90)

ວັດອົງຕື້ ມະຫາວິຫານ

ສະບາຍດີ ບັນດາທ່ານຜູ້ອ່ານທີ່ຮັກແພງທັງຫຼາຍ ໃນອາທິດນີ້ ທີມງານເວັບໄຊ ທາເກັດ ຈະບໍ່ໄດ້ມາແນະນໍາສະຖານທີ່ທ່ອງທ່ຽວ ແຕ່ຈະມາແນະນໍາສະຖານທີ່ປະຫວັດສາດທາງພຸດທະສາສະໜາໃຫ້ບັນດາທ່ານຜູ້ອ່ານທ່ານໃດທີ່ມີຈິດໃຈສັດທາ ເຫຼື້ອມໃສ ໃນພຣະພຸດທະສາດສະໜາໄດ້ເຂົ້າໄປສໍາຜັດກັບບັນຍາກາດອັນສະຫງົບ,ຖືເປັນແຫຼ່ງສັງລວມສະຕິອາລົມເພື່ອໃຫ້ຈິດໃຈປອດໃສຂາວສະອາດກໍວ່າໄດ້.


ວັດອົງຕື້ເປັນວັດໜຶ່ງ ໃນຈໍານວນຫຼາຍໆວັດທີ່ເກົ່າແກ່ ແລະ ມີຄວາມສໍາຄັນທາງບູຮານສະຖານ ແລະ ປະຫວັດສາດ ຢູ່ໃນນະຄອນຫຼວງວຽງຈັນ, ທັງເປັນວັດທີ່ປະຊາຊົນທັງພາຍໃນ ແລະ ຕ່າງປະເທດເຄົາລົບ. ນອກຈາກນີ້ວັດອົງຕື້ ຍັງເປັນວັດສໍາລັບປະກອບພິທີ ທີ່ສໍາຄັນຕ່າງໆທາງຣາຊະການ ສະໄໝເກົ່າເຊັ່ນ: ພິທີຖືນໍ້າ ( ສັດຕະຍາບັນ ຫຼື ສາບານ ) ຂອງອາດຍາສິດການປົກຄອງ ແລະ ພິທີເຮັດບຸນສໍາຄັນໆ ທີ່ເປັນທາງການ, ສິ່ງສໍາຄັນທີ່ໄດ້ດຶງດູດເອົາປະຊາຊົນທັງພາຍໃນ ແລະ ຕ່າງປະເທດໃຫ້ເກີດສັດທາ ເຫຼື້ອມໃສນັ້ນກໍຍ້ອນວ່າ ວັດອົງຕື້ ເປັນວັດທີ່ເກົ່າແກ່ ເຊິ່ງມີສິມໃຫຍ່ ແລະ ພຣະເຈົ້າອົງຕື້ ເປັນສັກຂີພິຍານ ທາງປະຫວັດສາດ ວັດອົງຕື້ມີຊື່ເດີມວ່າ: ວັດສີພູມ ຫຼື ໄຊຍະພູມ ຕໍ່ມາຮອດປີ ຄ.ສ 1566 ພະເຈົ້າໄຊຍະເສດຖາທິລາດ ໄດ້ມາສ້າງພຣະເຈົ້າອົງຕື້ຂຶ້ນ ແລ້ວມາປະດິດສະຖານໄວ້ ໃນວັດສີພູມນີ້ ຈຶ່ງໄດ້ຕັ້ງຊື່ວັດໃໝ່ວ່າ: “ວັດອົງຕື້” ຕາມຊື່ຂອງພຣະພຸດທະຮູບໃໝ່ນັ້ນ. ວັດອົງຕື້ໄດ້ປະຕິສັງຂອນເອົາວັດສີພູມ ເຊິ່ງເປັນວັດທີ່ເກົ່າແກ່ມາແຕ່ສະໄໝ ພະຍາຈັນທະບູລີປະສິດທິສັກ ໄດ້ສ້າງຂຶ້ນໃນລະຫວ່າງ 300 ປີກ່ອນ ຄ.ສ ຫຼັງຈາກນັ້ນ ມາເປັນເວລາ 1870 ກວ່າປີ ຈຶ່ງມາຮອດສະໄໝພະເຈົ້າໄຊຍະເສດຖາທິລາດ ໄດ້ເປັນຜູ້ມາສະຖາປະນາ ເອົາເມືອງວຽງຈັນຂຶ້ນເປັນ ນະຄອນຫຼວງຂອງປະເທດໃນປີ ຄ.ສ 1560 ມາຮອດປີ ຄ.ສ 1566 ວັດອົງຕື້ ຈຶ່ງໄດ້ປະຕິສັງຂອນຂຶ້ນ ຈາກວັດສີພູມດັ່ງກ່າວມາແລ້ວ.


ສໍາລັບທ່ານຜູ້ອ່ານທ່ານໃດບໍ່ໄດ້ໄປທ່ຽວທາງໃດກໍລອງຫາເວລາໄປເບິ່ງຄວາມງົດງາມຂອງສິລະປະໃນຍຸກບູຮານທີ່ເພິ່ນບັນຈົງໄວ້ໃນວັດແຫ່ງນີ້ ຫຼື ເຂົ້າໄປກາບໄຫ້ວພຮະເຈົ້າໃຫຍ່ອົງຕື້ເພື່ອຄວາມເປັນສິລິມຸງຄຸນໃຫ້ຊີວິດ. ນອກຈາກນີ້ຢູ່ບໍລິເວນໃກ້ກັບວັບອົງຕື້ຍັງມີ ວັດອິນແປງ, ວັດຫາຍໂສກ , ວັດຈັນ ແລະ ວັດມີໄຊ ເຊິ່ງຢູ່ບໍ່ຫ່າງໄກກັນປານໃດ, ບັນດາທ່ານຜູ້ອ່ານສາມາດຍ່າງໄປຫາວັດຕ່າງໆໄດ້ ທ່ານໃດທີ່ຍັງບໍ່ໄດ້ວາງແຜນໄວ້ວ່າຈະໄປເຮັດບຸນຢູ່ໃສນັ້ນ ຖ້າຍັງບໍ່ທັນໄດ້ວາງແຜນໄວ້ເຮົາຂໍແນະນໍາ 5 ວັດນີ້ເລີຍ.
ທ່ານໃດຢາກໄປຍ່າງເລາະທ່ຽວຊົມ ຫຼື ຊື້ເຄື່ອງ ຫຼື ໄປຊົມອາທິດອັດສະດົງໃນຍາມແລງ ກໍສາມາດໄປໄດ້ທີ່ສວນເຈົ້າອານຸວົງ ( ແຄມຂອງທ່າວັດຈັນ ) ນັ້ນເອງ.
ຂໍ້ມູນວັດອົງຕື້ໂດຍ: ພຣະອາຈານ ມະຫາຜ່ອງ ສະມາເລີກ.

ສະແດງຄຳຄິດເຫັນ