ເສັ້ນທາງລົດໄຟສາຍ ”ໂຣແມນຕິກ” ງາມທີ່ສຸດໃນເອີຣົບ

ສະບາຍດີ ບັນດາທ່ານຜູ້ອ່ານທີ່ຮັກແພງທັງຫຼາຍ ໃນອາທິດນີ້ ທີມງານເວັບໄຊ ທາເກັດ ຈະນໍາເອົາຂໍ້ມູນບາງສ່ວນ ຂອງສະຖານທີ່ທ່ອງທ່ຽວຕ່າງປະເທດແຫ່ງໜຶ່ງ ມາແນະນໍາໃຫ້ບັນດາທ່ານຜູ້ອ່ານໄດ້ຮູ້ຈັກ ແລະ ອາທິດນີ້ ເຮົາຈະມາແນະນໍາ ສະຖານທີ່ທ່ອງທ່ຽວ ທີ່ຢູ່ໃນປະເທດສະວິດເຊີແລນ (Switzerland) ມາໃຫ້ບັນດາທ່ານໄດ້ຮູ້ຈັກນັ້ນກໍຄື: Bernina Express ເສັ້ນທາງລົດໄຟສາຍ”ໂຣແມນຕິກ” ຂອງປະເທດສະວິດເຊີແລນ (Switzerland) ເຊິ່ງເປັນເມືອງທີ່ເຕັມໄປດ້ວຍທໍາມະຊາດທີ່ສວຍສົດງົດງາມ ບໍ່ວ່າຈະເປັນລະດູໃດໆ ກໍມີຄວາມສວຍງາມຢູ່ທຸກລະດູການ.

Bernina Express ໄດ້ຊື່ວ່າເປັນເມືອງໜຶ່ງໃນເສັ້ນທາງລົດໄຟງາມທີ່ສຸດ, ສູງທີ່ສຸດໃນເອີຣົບ ແລະ ເປັນເສັ້ນທາງລົດໄຟສາຍເກົ່າແກ່ທີ່ສຸດຂອງ ປະເທດສະວິດເຊີແລນ (Switzerland) ເຊິ່ງມີອາຍຸປະມານ 100 ປີ. ເລີ່ມໃຫ້ບໍລິການຕັ້ງແຕ່ປີ ຄ.ສ 1910 ຈົນເຖິງປັດຈຸບັນ ແລະ ຍັງເປັນ 1 ໃນ 3 ເສັ້ນທາງລົດໄຟ ທີ່ໄດ້ຮັບການຍົກຍ້ອງຈາກ UNESCO ໃຫ້ເປັນເສັ້ນທາງສາຍມໍລະດົກໂລກ ແລະ ເສັ້ນທາງລົດໄຟຍັງວຽນອ້ອມຂົວ Brusio Spiral Viaduct ແບບ 360 ອົງສາ ເຊິ່ງຂົວແຫ່ງນີ້ໄດ້ຂຶ້ນທະບຽນເປັນມໍລະດົກໂລກອີກດ້ວຍ.

ນອກຈາກຈະເປັນເສັ້ນທາງລົດໄຟງາມທີ່ສຸດແລ້ວ Bernina Express ຍັງເປັນເສັ້ນທາງລົດໄຟສູງທີ່ສຸດໃນເອີຣົບອີກ ມີລະດັບຄວາມສູງຈາກລະດັບໜ້ານໍ້າທະເລປະມານ 2.253 ແມັດ, ໄລຍະທາງຍາວປະມານ 121 ກິໂລແມັດ ແລະ ເສັ້ນທາງລົດໄຟຍັງລອດຜ່ານອຸໂມງເຖິງ 55 ແຫ່ງ, ຂົວອີກຫຼາຍກວ່າ 196 ຂົວ, ລົດໄຟຈະແລ່ນໄຕ່ລະດັບສູງຂຶ້ນໄປຈຸດສູງສຸດຄື Ospizio Bernina ສູງຈາກລະດັບໜ້ານໍ້າທະເລ 2.553 ແມັດ.

Bernina Express ເປັນເສັ້ນທາງລົດໄຟທີ່ແລ່ນຈາກເມືອງ Chur ປະເທດສະວິດເຊີແລນ (Switzerland) ໄປຫາເມືອງ Tirano ປະເທດອີຕາລີ. ຕະຫຼອດເສັ້ນທາງທີ່ລົດໄຟແລ່ນຜ່ານນັ້ນ ບັນດາທ່ານຈະເຫັນບັນຍາກາດ ທັດສະນີຍະພາບທີ່ອ້ອມຮອບໄປດ້ວຍທໍາມະຊາດ ທ່ານຈະສາມາດຊົມຄວາມງາມເຫຼົ່ານັ້ນຜ່ານປະຕູຂ້າງລົດໄດ້ແບບ 360 ອົງສາ ເຊັ່ນ: ພູ Swiss Alps ທີ່ຂຶ້ນຊື່, ທະເລ ແລະ ຫິມະທີ່ປົກຄຸມຈອມພູເປັນຕົ້ນ.

ສໍາລັບທ່ານໃດທີ່ຈະໄປທ່ຽວໃນລະດູຮ້ອນ ທ່ານກໍຈະໄດ້ເຫັນຄວາມງົດງາມຂອງປ່າຂຽວ, ທະເລສີຟ້າໃສ ແລະ ພູງາມໆ. ຖ້າທ່ານໃດຢາກໄປທ່ຽວໃນໄລຍະລະດູໜາວ ທ່ານກໍຈະໄດ້ຊົມຄວາມງົດງາມຂອງຫິມະທີ່ປົກຄຸມຈອມພູ ແລະ ທົ່ວທຸກພື້ນທີ່ ບໍ່ວ່າຈະໄປທ່ຽວໃນລະດູໃດກໍຕາມ ຢູ່ສະຖານທີ່ແຫ່ງນີ້ມີຄວາມສວຍສົດງົດງາມຢູ່ຕະຫຼອດລະດູການ ແລະ ຈະມີຄວາມງົດງາມທີ່ປ່ຽນໄປຕາມແຕ່ລະ ລະດູການນັ້ນເອງ ຖ້າທ່ານໃດມີໂອກາດໄດ້ໄປທ່ຽວທີ່ປະເທດສະວິດເຊີແລນ (Switzerland) ກໍຢ່າລືມໄປທ່ຽວສະຖານທີ່ແຫ່ງນີ້ລອງເບິ່ງຮັບຮອງວ່າທ່ານຈະບໍ່ຜິດຫວັງຢ່າງແນ່ນອນເລີຍ.

ຮູບພາບ: google.com

ບົດຄວາມແນະນໍາ

ສະແດງຄວາມຄິດເຫັນ

error: Content is protected !!