Senglao content (728×90)

ລ່ອງເຮືອເບິ່ງສັດປ່າໃນຍາມກາງຄືນແບບພະຈົນໄພ-ຕື່ນຕາ-ຕື່ນໃຈ… ເປັນທີ່ຢູ່ອາໄສຂອງສັດປ່າຫຼາຍກວ່າ 200 ຊະນິດ…

ສະບາຍດີ ບັນດາທ່ານຜູ້ອ່ານທີ່ຮັກແພງທັງຫຼາຍ ໃນມື້ນີ້ທີມງານ ເວັບໄຊທາເກັດ ຈະມາແນະນໍາແຫຼ່ງທ່ອງອີກແຫ່ງໜຶ່ງ ທີ່ຕັ້ງຢູ່ແຂວງຫົວພັນ ນັ້ນເອງ ເຊິ່ງເປັນສະຖານທີ່ທ່ອງທ່ຽວແບບພະຈົນໄພ ແລະ ສະຖານທີ່ນັ້ນກໍຄື: ປ່າ​ສະຫງວນ​ແຫ່ງ​ຊາດ​ນ້ຳ​ແອດ-ພູ​ເລີຍ.

ປ່າ​ສະຫງວນ​ແຫ່ງ​ຊາດ​ນ້ຳ​ແອດ-ພູ​ເລີຍ ຕັ້ງຢູ່ເຂດເມືອງຮ້ຽມ ຫ່າງຈາກເທສະບານເມືອງຊໍ້າເໜືອປະມານ 155 ກິໂລແມັດ ເນື້ອທີ່ປ່າທັງໝົດມີ 3.380 ກິໂລແມັດ ໃນນັ້ນມີຈອມພູສູງເຖິງ 2.257 ແມັດ ແລະ ຈຸດເດັ່ນຂອງປ່າສະຫງວນແຫ່ງນີ້ແມ່ນ ເປັນປ່າທີ່ມີຄວາມອຸດົມສົມບູນ, ຂຽວງາມ, ດົກໜາ ແລະ ຊຸ່ມຊື່ນຕະຫຼອດປີ ພ້ອມທັງເປັນທີ່ຢູ່ອາໄສຂອງສັດປ່ານານາຊະນິດເຊັ່ນ: ເສືອດາວ, ເສືອໂຄ່ງ, ເສືອແມວ, ກວາງ, ຟານ, ລີງ ແລະ ສັດປ່າປະເພດອື່ນຫຼາຍກວ່າ 200 ຊະນິດ. ສະນັ້ນປ່າສະຫງວນ​ແຫ່ງ​ຊາດ​ນ້ຳ​ແອດ-ພູ​ເລີຍ ແຫ່ງນີ້ຈຶ່ງໄດ້ຖືກພັດທະນາໃຫ້ກາຍເປັນ ແຫຼ່ງທ່ອງທ່ຽວອີກແຫ່ງໜຶ່ງຂອງແຂວງຫົວພັນ ທີ່ມີລາຍການທ່ອງທ່ຽວທີ່ໜ້າສົນໃຈ ແລະ ປະທັບໃຈເປັນຕົ້ນແມ່ນ: ການຂີ່ເຮືອຊົມສັດປ່າ ແລະ ການຍ່າງປ່າ ​ ເຊິ່ງ​ແຫຼ່ງທ່ອງ​ທ່ຽວແຫ່ງນີ້​ໄດ້​ຮັບ​ລາງວັນ​ກຽດຕິຍົດ ຈາກ​ສາກົນ​ທີ່​ສະໜັບສະໜູນ​ການທ່ອງທ່ຽວ​ທີ່ມີ​ຄວາມ​ຮັບຜິດ​ຊອບ​​, ລາງວັນປະ​ເພດ​​ທາງ​ເລືອກ​ຂອງ​ນັກ​ທ່ອງ​ທ່ຽວ ຫຼື People’s Choice Award ​ເຊິ່ງ​ໄດ້​ຮັບຈາກ​ອົງການ​ອະນຸຮັກ​ສັດປ່າ ຢູ່​ທີ່ສູນ​ການ​ຄ້າ​ສາກົນ, ນະຄອນຫຼວງລອນ​ດອນ​ ປະ​ເທດ​ອັງກິດ ​​ປີ 2014 ​ເຊິ່ງ​ໄດ້​ຮັບ​ລາງວັນ​ນີ້ 2 ປີ​ຕິດ​ຕໍ່​ກັນ. ​

ຖ້າຫາກທ່ານໃດທີ່ມັກການພະຈົນໄພແບບຕື່ນເຕັ້ນຕ້ອງບໍ່ພາດທີ່ຈະມາທ່ຽວ ປ່າສະຫງວນນໍ້າແອດ​-ພູເລີຍ ເພາະຈະມີກິດຈະກຳອີກຫຼາຍຢ່າງເຊັ່ນ: ການຍ່າງປ່າ, ຂີ່ເຮືອລ່ອງເບິ່ງຄວາມງາມຂອງທໍາມະຊາດ, ກິນເຂົ້າປ່າ, ນອນໃນປ່າ ສູດດົມອາກາດບໍລິສຸດ ເຊິ່ງຊີວິດແບບນີ້ຫາບໍ່ໄດ້ໃນເມືອງຫຼວງ.  ປ່າ​ສະຫງວນ​ແຫ່ງ​ຊາດ​ນ້ຳ​ແອດ-ພູ​ເລີຍ ຍັງອຸດົມໄປດ້ວຍຊັບພະຍາກອນທໍາມະຊາດ ມີຕົ້ນໄມ້ໃຫຍ່, ສາຍນໍ້າໃສໄຫຼເຢັນຕະຫຼອດປີ.

ສໍາລັບທ່ານໃດທີ່ມັກການທ່ອງທ່ຽວແບບພະຈົນໄພຢ່າລືມຫາໂອກາດໄປທ່ຽວທີ່ນີ້ໃຫ້ໄດ້ ນອກຈາກທ່ານຈະໄດ້ຊົມຄວາມງົດງາມຂອງປ່າ ແລະ ສັດປ່າທີ່ຫາເບິ່ງໄດ້ຍາກແລ້ວ ທ່ານໃດທີ່ໄດ້ໄປທ່ຽວທີ່ແຂວງຫົວພັນ ກໍຢ່າລືມຊີມອາຫານພື້ນເມືອງທີ່ຂຶ້ນຊື່ລືຊາຂອງແຂວງເຊັ່ນ: ແຈ່ວປາບໍ້າ, ແກງໜໍ່ລັນ, ແກງໜໍ່ຂົມ ແລະ ອີກຫຼາຍຢ່າງ ແລະ ທ່ານໃດທີ່ມັກໃນດ້ານຫັດຖະກຳກໍຢ່າລືມຊື້ສິ້ນໄໝມ້ອນຕິດໄມ້ຕິດມືມາພ້ອມ.

ຮູບພາບ: google.com

ສະແດງຄຳຄິດເຫັນ