ນ້ຳຕົກເນຍກາຣາ (Niagara Falls) ສາມາດດຶງດູດນັກທ່ອງທ່ຽວໃຫ້ຫຼົງສະເໜໃນຄວາມງາມທີ່ທໍາມະຊາດປັ້ນແຕ່ງ.

ສະບາຍດີ ບັນດາທ່ານຜູ້ອ່ານທີ່ຮັກແພງທັງຫຼາຍ ມື້ນີ້ທີມງານ ເວັບໄຊທາເກັດ ຈະມາແນະນໍາສະຖານທີ່ທ່ອງທ່ຽວອີກແຫ່ງໜຶ່ງ ນັ້ນກໍຄື: ນ້ຳຕົກ​ເນຍ​ກາຣາ (Niagara Falls) ນັ້ນເອງ.

ເມື່ອ​ເວົ້າເຖິງນ້ຳຕົກ​ເນຍກາຣາ (Niagara Falls) ​ຫຼາຍ​ຄົນ​ມັກ​ຈະ​ຄິດ​ເຖິງ​ຄວາມ​ມະຫັດສະຈັນ​ທາງ​ທຳ​ມະ​ຊາດ​ທີ່​ຍິ່ງ​ໃຫຍ່​ຕະການ​ຕາ ເຊິ່ງເປັນ​ນ້ຳຕົກ​ຕາດ​ຂະໜາດໃຫຍ່​ຫຼາຍ​ແຫ່ງ​ປະກອບ​ກັນ ທີ່ຕັ້ງ​ຢູ່​ເທິງ​ແມ່​ນ້ຳ​ເນຍ​ກາຣາ ທາງ​ຕາ​ເວັນ​ອອກ​ຂອງ​ທະວີບອາ​ເມຣິກາ​ເໜືອ ​ຢູ່ລະຫວ່າງຊາຍແດນປະ​ເທດ​ກາ​ນາ​ດາ ກັບ ສະຫະລັດ​ອາ​ເມຣິກາ. ສາ​ເຫດ​ທີ່​ມີ​ຂະໜາດ​ໃຫຍ່​​ ເພາະນ້ຳຕົກຕາດແຫ່ງ​ນີ້​​ ເກີດ​ຈາກ​ນ້ຳ​ໃນ​ທະເລ​ສາບແຫ່ງໜຶ່ງ​ຕົກລົງ​​ສູ່ທະ​ເລ​ສາບອີກແຫ່ງໜຶ່ງ ​ເຊິ່ງປະກອບ​ດ້ວຍ​ນ້ຳຕົກ 3 ສາຍ​ຄື: Horseshoe Falls ຫຼື ນ້ຳຕົກ​ກາ​ນາ​ດາ  ສູງ 48 ແມັດ, ນໍ້າຕົກ​ອາ​ເມຣິກາ ສູງ 51 ແມັດ ​ແລະ ນ້ຳຕົກ​ຂະໜາດ​ນ້ອຍ​ກວ່າທີ່ຢູ່​ຕິດ​ກັນຄື: ນ້ຳຕົກຕາດ Bridal Veil. ສອງ​ຝັ່ງ​ຂອງ​ນ້ຳຕົກຕາດ​ໃນ 2 ປະ​ເທດ​ນັ້ນ​ເປັນ​ເມືອງ​ແຝດ ​ໂດຍ​ຝັ່ງ​ຂອງ​ການາ​ດາ​ຄື: ​ເນຍກາຣາຟຣໍ ອອນຕາຣິ​ໄອ ສ່ວນ​ໃນ​ຝັງ​ຂອງ​ສະຫະລັດ​ອາ​ເມຣິກາ​ຄື: ​ເນຍ​ກາຣາຟຣໍ.

ນ້ຳຕົກ​ເນຍກາຣາ ມີ​ຈຸດ​ຊົມ​ວິວທີ່​ສວຍ​ງາມ ​ແລະ ​ເປັນ​ແຫຼ່ງທ່ອງ​ທ່ຽວ​ທີ່​ສຳຄັນ​ຂອງ​ທັງ 2 ປະ​ເທດ​ຫຼາຍ​ກວ່າ​ທົດ​ສະຕະວັດ ​ເປັນ​ແຫຼ່ງທ່ອງ​ທ່ຽວ​ທີ່ມີຊື່ສຽງ​ໂດ່ງດັງໄປທົ່ວ​ໂລກ. ໃນ​ຕອນກາງຄືນ​ຂອງ​ທຸກໆຄືນ ນ້ຳຕົກ​ເນຍກາຣາຈະ​ຖືກ​ປະດັບ​ດ້ວຍໄຟ​ແສງ​ສີ​ສວຍ​ງາມ ​ໃນ​ບໍລິ​ເວນອ້ອມໆນ້ຳຕົກ ​ຖື​ໄດ້​ວ່າ​ເປັນ​ນ້ຳຕົກຕາດ ​ທີ່​ມີ​ມົນ​ສະ​ເໜຄວາມງົດງາມຂອງທໍາມະຊາດ ທີ່ເປັນຈຸດດຶງດູດເອົານັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າມາທ່ຽວຊົມ. ​ເຊິ່ງ​ໃນ​ແຕ່ລະ​ປີນັກ​ທ່ອງ​ທ່ຽວ​ຈະ​ເດີນທາງ​ໄປ​ທ່ຽວ​ຊົມ​​ເປັນ​ຈຳນວນ​ຫຼາຍ ​ຈຶ່ງເຮັດ​ໃຫ້​ນ້ຳຕົກ​ແຫ່ງນີ້ມີ​ຊື່ສຽງ ​ແລະ ​ເປັນ​ທີ່​ຮູ້ຈັກ​ຂອງ​ຄົນ​ທົ່ວ​ໂລກ, ​ເປັນ​ແຫຼ່ງທ່ອງ​ທ່ຽວ​ທີ່ສາມາດສ້າງລາຍ​ໄດ້ໃຫ້​ກັບປະ​ເທດ​ສະຫະລັດອາ​ເມຣິກາ ​ແລະ ​ການາ​ດາ​ໄດ້​ຢ່າງ​ຫຼວງ​ຫຼາຍ ຈຶ່ງ​ເຮັດ​ໃຫ້ການ​ທ່ອງ​ທ່ຽວ​ຂອງ 2 ປະ​ເທດ​ນີ້​ດີ​ຂຶ້ນ​ເລື້ອຍໆ ​ຍ້ອນວ່າ​ມີ​ນັກ​ທ່​ອງທ່ຽວ​ເຂົ້າ​​ໄປ​ຊົມ​ຕະຫຼອດ​ເວລາ.

ຖ້າທ່ານໃດທີ່ມີໂອກາດໄດ້ໄປທ່ຽວທີ່ປະເທດການາກາ ກັບ ປະເທດສະຫະລັດອາເມຣິກາ ກໍຢ່າລືມໄປທ່ຽວ (Niagara Falls). ນອກຈາກນໍ້າຕົກຕາດແລ້ວທັງສອງປະເທດນີ້ ຍັງມີແຫຼ່ງທ່ອງທ່ຽວອີກຫຼາຍໆແຫ່ງທີ່ມີຊື່ສຽງໂດ່ງດັງໄປທົ່ວໂລກ.

ຮູບພາບ: google.com

ບົດຄວາມແນະນໍາ

ສະແດງຄວາມຄິດເຫັນ

error: Content is protected !!