Senglao content (728×90)

ທາງຍ່າງຊົມວີວທີ່ງາມທີ່ສຸດໃນໂລກ

ສະບາຍດີ ບັນດາທ່ານຜູ້ອ່ານທີ່ຮັກແພງທັງຫຼາຍ ໃນອາທິດນີ້ ທີມງາມເວັບໄຊທາເກັດ ຈະມາແນະນໍາໃຫ້ທຸກທ່ານໄດ້ຮູ້ຈັກແຫຼ່ງທ່ອງທ່ຽວອີກແຫ່ງໜຶ່ງ ທີ່ຂຶ້ນຊື່ວ່າເປັນແຫຼ່ງທ່ອງທ່ຽວງາມທີ່ສຸດໃນໂລກ ນັ້ນກໍຄື: Via Krupp ທາງຍ່າງງາມທີ່ສຸດໃນໂລກ.

    Via Krupp ເປັນໜຶ່ງໃນເສັ້ນທາງຍ່າງຊົມວິວທີ່ມີຊື່ສຽງຂອງເກາະ Capri ໃນປະເທດອີຕາລີ ເຊິ່ງຖືວ່າເປັນໜຶ່ງໃນສະຖານທີ່ທ່ອງທ່ຽວທາງປະຫວັດສາດຂອງ ອີຕາລີ ທີ່ມີຄວາມສວຍງາມຫຼາຍ, ເກາະ Capri ຫຼື ຮ້ອງອີກຊື່ໜຶ່ງວ່າ: ເກາະ Capri Island ນັ້ນຕັ້ງຢູ່ໃນທະເລຕີເຣນຽມ ທາງດ້ານທິດໃຕ້ຂອງອ່າວເນເປິນ (Naples) ແຄ້ວນປາເນຍ (Pania) ຂອງປະເທດອີຕາລີ ເກາະແຫ່ງນີ້ເປັນສະຖານທີ່ຕາກອາກາດທີ່ມີຊື່ສຽງຫຼາຍ.

 Via Krupp  ແຫ່ງນີ້ຖືກສ້າງຂຶ້ນໃນໄລຍະປີ 1900 – 1902 ໂດຍຄໍາສັ່ງຂອງ Friedrich Alfred Krupp ໃຊ້ໃນການເຊື່ອມຕໍ່ລະຫວ່າງ Charterhouse of San Giacomo ກັບພື້ນທີ່ຂອງ Augustus ໄປເຖິງເຂດທ່າເຮືອນ້ອຍໆທີ່ຊື່ວ່າ Marina Piccola  ເທິງຝັ່ງຕອນໃຕ້ຂອງເກາະ. ທາງຍ່າງສາຍບູຮານແຫ່ງນີ້ຢູ່ລຽບກັບໜ້າຜາຄົດໂຄ້ງ ໂດຍນັບຕັ້ງແຕ່ປີ 1976 ເປັນຕົ້ນມາ ເສັ້ນທາງແຫ່ງນີ້ບໍ່ໄດ້ຮັບການໃຊ້ງານ ເນື່ອງຈາກອັນຕະລາຍທີ່ເກີດຈາກມີຫີນຍຸບຕົວທີ່ເກີດຂຶ້ນເລື້ອຍໆ, ແຕ່ໃນປັດຈຸບັນເສັ້ນທາງແຫ່ງນີ້ໄດ້ຮັບການປັບປຸງ ແລະ ມີຄວາມສວຍງາມຫຼາຍ ນັກທ່ອງທ່ຽວທີ່ໄດ້ໄປຍ່າງຊົມວິວລຽບທາງຍ່າງເສັ້ນນີ້ ຈະຕ້ອງຫຼົງໄຫຼໃນຄວາມງົດງາມຂອງທິວທັດອັນສວຍງາມ ດັ່ງນັ້ນຈຶ່ງບໍ່ແປກທີ່ຈະມີຄົນຍົກຍ້ອງໃຫ້ເປັນທາງຍ່າງງາມທີ່ສຸດໃນໂລກ.

ຖ້າທ່ານໃດທີ່ມີໂອກາດໄດ້ໄປທ່ຽວປະເທດອີຕາລີ ກໍຢ່າລືມໄປຍ່າງຊົມທິວທັດຄວາມງົດງາມຂອງສະຖານທີ່ແຫ່ງນີ້ລອງເບິ່ງ ຮັບຮອງວ່າທ່ານໃດທີ່ໄດ້ໄປທ່ຽວທີ່ນີ້ຕ້ອງຕິດໃຈກັບຄວາມງົດງາມຂອງສະຖານທີ່ແຫ່ງນີ້ຢ່າງແນ່ນອນເລີຍ ແລະ ມື້ນີ້ເຮົາກໍໄດ້ນໍາເອົາຮູບພາບບັນຍາກາດຂອງຄວາມງົດງາມແຫ່ງນີ້ມາໃຫ້ທ່ານຜູ້ອ່ານໄດ້ຊົມວ່າສະຖານທີ່ແຫ່ງນີ້ຈະງົດງາມສົມຊື່ແທ້ຫຼືບໍ່.

ສະແດງຄຳຄິດເຫັນ