Senglao content (728×90)

ທ່ຽວພູອາສາ-ຂີ່ຊ້າງຊົມວິວ-ເບິ່ງຄວາມງາມບຶງກຽດໂງ້ງ

ສະບາຍດີ ບັນດາທ່ານຜູ້ອ່ານທີ່ຮັກແພງທັງຫຼາຍ ມື້ນີ້ທີມງານເວັບໄຊ ທາເກັດ ຈະມາແນະນໍາສະຖານທີ່ທ່ອງທ່ຽວຂອງແຂວງ ຈໍາປາສັກ ເຊິ່ງກໍາລັງເປັນທີ່ນິຍົມ, ສະຖານທີ່ນັ້ນກໍຄື “ພູອາສາ” ນັ້ນເອງ.

ແຂວງ ຈຳປາສັກ ເປັນແຂວງໜຶ່ງທີ່ມີສະຖານທີ່ທ່ອງທ່ຽວທີ່ມີຊື່ສຽງເປັນທີ່ຮູ້ຈັກຂອງນັກທ່ອງທ່ຽວພາຍໃນ ແລະ ຕ່າງປະເທດຫຼາຍແຫ່ງ ເຊັ່ນ: ວັດພູຈຳປາສັກ, ນໍ້າຕົກຕາດ ຄອນພະເພັງ ຖືວ່າໃຫຍ່ທີ່ສຸດໃນອາຊີຕາເວັນອອກສ່ຽງໃຕ້ ແລະ ອື່ນໆ.

ການເດີນທາງໄປທ່ອງທ່ຽວພູອາສາ ແມ່ນມີຄວາມສະດວກສະບາຍພໍສົມຄວນ ອອກຈາກຕົວເມືອງປາກເຊ ໄປຕາມເສັ້ນທາງເລກທີ 13 ໃຕ້ ພໍເຖິງຫຼັກກິໂລແມັດທີ 48  ກໍລ້ຽວຊ້າຍເຂົ້າໄປສູ່ເມືອງສະໜາມໄຊ ປະມານ 10 ກິໂລແມັດ ກໍຈະເຖິງບ້ານກຽດໂງ້ງ.

ວັດພູອາສາຕັ້ງຢູ່ເຂດ ບ້ານກຽດໂງ້ງ ຫ່າງຈາກເທສະບານ ເມືອງປະທຸມພອນ ປະມານ 50 ກິໂລແມັດ ເຊິ່ງຖືວ່າເປັນສະຖານບູຮານທີ່ມີຄຸນຄ່າທາງປະຫວັດສາດ ສະຖາປັດຕະຍະກຳ ແລະ ໃນດ້ານບູຮານວິທະຍາ, ເປັນບ່ອນເຕົ້າໂຮມຄວາມສາມັກຄີຂອງປະຊາຊົນບັນດາເຜົ່າ ທີ່ມີຈິດໃຈລຸກຂຶ້ນຕໍ່ສູ້ ຕ້ານການກົດຂີ່ຂູດຮີດຂອງສັກດີນາຜູ້ປົກຄອງນະຄອນຈຳປາສັກໃນໄລຍະນັ້ນ.

ອີງຕາມພົງສາວະດານລາວ ຂອງ ມະຫາສີລາ ວິລະວົງ ປີ 1966 ໄດ້ກ່າວເຖິງວັດພູອາສາໄວ້ດັ່ງນີ້: ປະຫວັດຄວາມເປັນມາຂອງວັດພູອາສາ ໄດ້ກ່າວເຖິງຊາຍຜູ້ໜຶ່ງຊື່ວ່າ “ທ້າວສາ” ເຊິ່ງໄດ້ບວດເປັນຄູບາ ສຶກສາຮໍ່າຮຽນຢູ່ສະຫຍາມແລ້ວກັບຄືນມາບ້ານ. ໃນເວລາຕໍ່ມາເມື່ອປີ ຄສ 1815 ຄູບາໄດ້ນໍາພາປະຊາຊົນ ສ້າງສະຖານທີ່ສັກສິດຂຶ້ນ ເຊິ່ງແມ່ນວັດພູອາສານັ້ນເອງ ເຊິ່ງສະຖານທີ່ນີ້ຍັງເປັນບ່ອນອົບຮົມວິຊາການຕໍ່ສູ້, ຍຸດທະວິທີຕ່າງໆໃນການສູ້ຮົບ ເຊັ່ນ: ການຕີດາບ, ຂີ່ມ້າ, ຂີ່ຊ້າງເປັນຕົ້ນ.
ວັດທີ່ສ້າງຂຶ້ນນີ້ມີຄວາມແຕກຕ່າງຈາກວັດອື່ນ ຍ້ອນຕັ້ງຢູ່ເທິງພູເຊິ່ງເປັນລານຫີນອັນກວ້າງໃຫຍ່ ມີກຳແພງອ້ອມຮອບວັດທີ່ກໍ່ດວ້ຍຫີນ ມີເສົາທີ່ຄືກັບດອກເຫັດຕັ້ງອ້ອມຮອບ ຢູ່ດ້ານນອກກຳແພງຍັງມີຖໍ້າ ເຊິ່ງເປັນບ່ອນເກັບມ້ຽນພຣະພຸດທະຮູບຫຼາຍອົງ.

ລັດຖະບານແຫ່ງ ສປປ ລາວ ໄດ້ຮັບຮອງ ແລະ ປະກາດເອົາວັດພູອາສາ ເປັນມໍລະດົກແຫ່ງຊາດ ໃນວັນທີ 13 ພະຈິກ ປີ 1993 ພູອາສາ ຈຶ່ງກາຍມາເປັນສະຖານທີ່ທ່ອງທ່ຽວທີ່ໄດ້ຮັບຄວາມນິຍົມຈາກນັກທ່ອງທ່ຽວ ສາມາດສ້າງລາຍຮັບໃຫ້ປະຊາຊົນຢູ່ເຂດນີ້ ແລະ ທຸລະກິດທ່ອງທ່ຽວ ໄດ້ຢ່າງຫຼວງຫຼາຍ.

ນອກຈາກທ່ຽວຊົມວັດ ແລະ ພະລານຫີນ, ເສົາຫີນ ທີ່ຕັ້ງລຽນລາຍຢູ່ເຂດພູອາສາແລ້ວ , ນັກທ່ອງທ່ຽວທີ່ມັກໃນຄວາມເປັນທໍາມະຊາດ ແລະ ຊົມຊີວະນາໆພັນ ທ່ານຍັງສາມາດໄປທ່ຽວ ຫຼື ພັກຜ່ອນຢ່ອນໃຈຢູ່ “ບຶງກຽດໂງ້ງ”. ເຊິ່ງອີງຕາມການບອກເລົ່າຂອງປະຊາຊົນເຂດນີ້ໃຫ້ຮູ້ວ່າຄໍາວ່າ “ກຽດ” ແມ່ນມາ ຈາກ ເກດ ທີ່ມີຄວາມໝາຍວ່າຫົວ ຫຼື ສຽນຂອງພຣະພຸດທະຮູບ ເມື່ອກ່ອນມີຄົນພົບເຫັນສຽນຂອງພຣະພຸດທະຮູບຢູ່ບຶງແຫ່ງນີ້ ສ່ວນ “ໂງ້ງ” ແມ່ນມີຄວາມໝາຍວ່າ: ໂຄ້ງ ຫຼື ຄົດ ບຶງກຽດໂງ້ງເປັນບຶງຂະໜາດໃຫຍ່ທີ່ມີເນື້ຶອທີ່ເຖິງ 6000 ກວ່າເຮັກຕາ ຈັດເປັນເຂດອະນຸລັກ RAMSA ນັບແຕ່ປີ 2010 ເປັນຕົ້ນມາ ເນື່ອງຈາກເປັນດິນບໍລິເວນນ້ຳທີ່ມີຄວາມອຸດົມສົມບູນ ແລະ ມີຄຸນຄ່າຕໍ່ຊີວະນາໆພັນ ເປັນບ່ອນຢູ່ອາໃສ ແລະ ຫາກິນຂອງສັດປ່າ ຫຼາຍຊະນິດ ເຊັ່ນ: ແມວປ່າ, ແມວເສືອດາວ, ນົກ ກວາງ ແລະ ອື່ນໆ.

ສໍາລັບນັກທ່ອງທ່ຽວທ່ານໃດ ທີ່ຢາກໄປທ່ຽວກໍສາມາດໄປ ແລະ ພິເສດຢູ່ໃນບ້ານກຽດໂງ້ງ ຍັງມີຊ້າງໄວ້ຄອຍບໍລິການໃຫ້ນັກທ່ອງທ່ຽວໄດ້ຂີ່ຂຶ້ນໄປທີ່ພູອາສາ ນໍາອີກ ແລະ ຖ້າທ່ານໃດທີ່ໄປຮອດພູອາສາແລ້ວຢາກກາງເຕັ້ນນອນໃນປ່າກໍໄດ້ຄືກັນ ເຊິ່ງຄ່າຂີ່ຊ້າງປະມານ 200.000 ກີບ/ໂຕ, ຄ່າຄົນນໍາທ່ຽວ ປະມານ 100.000 ກີບ/ຄົນ/ມື້.

  ຫມາຍເຫດ: ສຳລັບທ່ານໃດທີ່ຈະໄປນອນປ່າຕ້ອງໄດ້ກຽມມາພ້ອມ ແລະ ເຕັ້ນແມ່ນຕ້ອງໄດ້ກະກຽມໄປເອງ. ການທີ່ຈະໄປຂີ່ຊ້າງ ແລະ ນອນແຮມກາງປ່າ ຕ້ອງໄດ້ໂທໄປຕິດຕໍ່ພົວພັນນໍາຫ້ອງການບ້ານ ລ່ວງຫນ້າ ເພື່ອຈະໄດ້ຈອງຄິວ.

ຂໍ້ມູນ ແລະ ຮູບພາຈາກ: Page: The Journey Alone

ສະແດງຄຳຄິດເຫັນ