Senglao content (728×90)

ຄໍາກ່າວສົມມາພໍ່-ແມ່-ຜູ້ມີພະຄຸນ

ສະບາຍດີບັນດາທ່ານຜູ້ອ່ານທີ່ຮັກແພງ ມື້ນີ້ທາງເວັບໄຊທາເກັດຂອງພວກເຮົາຈະມານໍາສະເໜີບັນດາທ່ານກ່ຽວກັບ ຄໍາກ່າວການສົມມາ ທີ່ໃຊ້ເນື່ອງໃນໂອກາດຕ່າງໆເພື່ອເປັນການສະແດງເຖິງຄວາມເຄົາລົບນັບຖືຕໍ່ຍາດຜູ້ໃຫຍ່ ທີ່ເພິ່ນໄດ້ລ້ຽງດູເບິ່ງແຍງເຮົາມາແຕ່ນ້ອຍຈົນໃຫຍ່ ຖ້າເຮັດຫຍັງທີ່ບໍ່ຖືກບໍ່ຕ້ອງກໍຂໍໃຫ້ເພິ່ນອະໂຫສິກໍາຫຼຸດຜ່ອນໂທດໃຫ້ ເຊິ່ງຈະເວົ້າດັ່ງນີ້:

ກ່ອນອື່ນຕ້ອງແຕ່ງຂັນ 5 ຖ້າເປັນໂອກາດວັນຂຶ້ນປີໃໝ່ລາວກໍຕ້ອງມີຂັນນໍ້າຫອມເພື່ອໄວ້ຫົດສົງ.

ຕັ້ງນະໂມ (​ 3 ເທື່ອ)

ມາຕາ ຄາຣະວະຕາ ປິຕາ ຄາຣະວະຕາ ຍາຕິກາ ຄາຣະວະຕາ.

ກາຍຍະກໍາມັງ ວະຈີກໍາມັງ ມະໂນກໍາມັງ ສັບພະປາປັງ ອະໂຫສິ.

  • ຂັນສົມບັດຍົກຂຶ້ນພຽງຕາ ຂັນສົມມາຍົກຂຶ້ນພຽງເກົ້າ ຂໍສົມມາພໍ່ແມ່ເຈົ້າ ທັງເຈົ້າໂຄດລຸງຕາ ສອງກໍ້າສອງຝ່າຍ ລູກ-ຫຼານໄດ້ສະລັ້ງພັ້ງພາດ ດ້ວຍກາຍ ວາຈາ ແລະ ໃຈ ເປັນຕົ້ນວ່າ ໄດ້ຖິ້ມບຸງກາຍໜ້າ ໄດ້ຖິ້ມຊ້າກາຍຕາ ທັງໄດ້ໃຊ້ວາຈາຖຽງຄໍາດ່າປ້ອຍ ໃຈຫາກຄິດຄ້ອຍໆ ທີ່ບໍ່ແມ່ນຄອງທັມ ຂໍໃຫ້ພໍ່ແມ່ ເຖົ້າແກ່ ຍາດຕິພີ່ນ້ອງ ຈົ່ງອະໂຫສິກໍາ ຫຼຸດບາບຫຼຸດໂທດ ໃຫ້ແກ່ລູກ-ເຕົ້າ-ຫຼານເຫຼັນ ແດ່ກໍຂ້າເທີ້ນ…
  • ສາທຸ ສາທຸ ສາທຸ.

ຂໍຂອບໃຈທີ່ມາ: ປຶ້ມ ຄໍາສອນ ຄໍາອວຍພອນ ແລະ ຮິບໂຮມ ໂດຍ ອາຈານ ບຸນເຕີມ ສີບຸນເຮືອງ.

 

ສະແດງຄຳຄິດເຫັນ