ໜຶ່ງໃນສະຖານທີ່ມີຄວາມອັດສະຈັນທາງສິລະປະແຫ່ງຊາວພຸດ.

ສະບາຍດີ ບັນດາທ່ານຜູ້ອ່ານທີ່ຮັກແພງທັງຫຼາຍ ອາທິດນີ້ກໍກ້າວເຂົ້າໄລຍະເຂົ້າພັນສາ ຫຼື ໄລຍະພະຈໍາສິນແລ້ວ ທີມງານເວັບໄຊທາເກັດ ກໍເລີຍຈະມາແນະນໍາສະຖານທີ່ທ່ອງທ່ຽວ ແຫ່ງໜຶ່ງຂອງປະເທດຈີນ ນັ້ນກໍຄື: ຖໍ້າຫຼົງເໝິນ ( Longmen Grottoes ) ນັ້ນເອງ.

ຖໍ້າຜາຫຼົງເໝິນ ເປັນສະຖານທີ່ທ່ອງທ່ຽວ ທາງປະຕິມະກໍາບູຮານທີ່ມີອາຍຸຫຼາຍກວ່າພັນປີ ທີ່ໄດ້ອະທິບາຍເຖິງສິລະປະ ພຣະພຸດທະຮູບແບບຈີນໄດ້ດີທີ່ສຸດ ມີອີກຊື່ໜຶ່ງຄື: “ຖໍ້າປະຕູມັງກອນ” ຕັ້ງຢູ່ທີ່ມົນທົນເຫີໜານ ( Henan ) ປະເທດຈີນ. ຫ່າງຈາກທາງພາກໃຕ້ຂອງເມືອງ ລົ່ວຫຍາງ ( Luoyang ) ປະມານ 12 ກິໂລແມັດ ໂດຍມີລັກສະນະເປັນກຸ່ມຖໍ້າເທິງໜ້າຜາ ປິ່ນໜ້າອອກມາສູ່ແຄມຝັ່ງແມ່ນໍ້າອີ້.

 

ຖໍ້າແຫ່ງນີ້ສ້າງຈາກການຂຸດ ແລະ ສະຫຼັກຫີນປູນຂອງພູ “ຫຼົງເໝິນຊານ” ( Longmen Shan ) ນອກຈາກມີພຣະພຸດທະຮູບຂະໜາດໃຫຍ່ຢູ່ພາຍນອກແລ້ວ ຍັງມີອີກຫຼາຍໆອົງຕັ້ງຢູ່ທາງໃນຖໍ້າອີກດ້ວຍ ລວມທັງໝົດປະມານ 100.000 ອົງ ມີຄວາມສູງຕັ້ງແຕ່ 1 ນິ້ວ ໄປຈົນເຖິງຂະໜາດໃຫຍ່ 17 ແມັດ, ພາຍໃນຍັງມີຖໍ້າຂະໜາດນ້ອຍໃຫຍ່ຢູ່ປະມານ 2.100 ອຸໂມງ, ມີຫີນສີລາຈາລຶກເປັນພາສາຈີນປະມານ 3.600 ແຜ່ນ ແລະ ເຈດີພຣະພຸດທະເຈົ້າອີກກວ່າ 50 ແຫ່ງ ຈາກຕົວເລກໄດ້ສະແດງເຖິງຄວາມຍິ່ງໃຫຍ່ ຂອງປະຕິມະກໍາທີ່ລໍ້າຄ່າຢູ່ແຫ່ງນີ້ແທ້ໆ.

ປະຫວັດການກໍ່ສ້າງນັ້ນເລີ່ມຈາກລາຊະວົງ ”ເຫວີຍ” ຕ້ອງການຂະຫຍາຍຖິ່ນຖານອານາຈັກຈາກ “ຕ້າຖັງ” ສູ່ເມືອງລົ່ວຫຍາງນັ້ນເອງ ແລະ ໄດ້ສ້າງຕໍ່ໃນລາຊະວົງ “ສຸ່ຍ” ລາດຊະວົງ”ຖັງ” ໂດຍໃຊ້ເວລາກໍ່ສ້າງປະມານ 400 ປີ ເຊິ່ງຖືໄດ້ວ່າຖໍ້າແຫ່ງນີ້ເປັນຫຼັກຖານທີ່ສະແດງເຖິງ ຍຸກທໍາອິດທີ່ສາສະໜາພຸດເຂົ້າມາເຜີຍແຜ່ໃນປະເທດຈີນອີກດ້ວຍ.

ຖ້າທ່ານໃດມີໂອກາດໄດ້ໄປທ່ຽວທີ່ປະເທດຈີນກໍຢ່າລືມໄປ ທ່ຽວສະຖານທີ່ແຫ່ງນີ້ເດີ້ ນອກຈາກນີ້ແລ້ວ ປະເທດຈີນຍັງມີແຫຼ່ງທ່ອງທ່ຽວອີກຫຼາຍໆສະຖານທີ່ ທີ່ມີຊື່ສຽງ ບໍ່ວ່າຈະເປັນທາງປະຫວັດສາດ, ທາງທໍາມະຊາດ ທີ່ຫຼາກຫຼາຍ.

ບົດຄວາມແນະນໍາ

ສະແດງຄວາມຄິດເຫັນ