Senglao content (728×90)

ຄວາມມະຫັດສະຈັນທີ່ຝັງຢູ່ເລິກຈາກໜ້າດິນ 120 ກວ່າແມັດ.

ສະບາຍດີ ບັນດາທ່ານຜູ້ອ່ານທີ່ຮັກແພງ ມື້ນີ້ທີມງານເວັບໄຊທາເກັດ ຈະມາແນະນໍາສະຖານທີ່ທ່ອງທ່ຽວມີຊື່ສຽງແຫ່ງໜຶ່ງ ຊຶ່ງຕັ້ງຢູ່ປະເທດ ຣູມານີ (Roumanie) ນັ້ນກໍຄື: ສວນສະໜຸກ Salina Turda ຕັ້ງຢູ່ໃຕ້ດິນ ໂດຍການປັບປຸງດັດແປງຂຶ້ນມາຈາກບໍ່ເກືອຮ້າງ ມີອາຍຸເກົ່າແກ່ທີ່ສຸດຂອງໂລກ ຢູ່ທີ່ເມືອງ ທູດາ ( Turda ) ພາຍໃນສວນສະໜຸກແຫ່ງນີ້ມີກິດຈະກໍາທີ່ຫຼາກຫຼາຍໄວ້ໃຫ້ນັກທ່ອງທ່ຽວໄດ້ເລືອກຫຼິ້ນຕາມໃຈມັກ.

Salina Turda ( ຊາລີນາ ທູດາ ) ເປັນສວນສະໜຸກແຫ່ງທໍາອິດກໍວ່າໄດ້ ທີ່ຖືກສ້າງຂຶ້ນໃນບໍ່ເກືອຮ້າງມີອາຍຸເກົ່າແກ່ຂະໜາດໃຫຍ່ ເລິກລົງໄປໃຕ້ດິນປະມານ 120 ແມັດ, ສະຖານທີ່ແຫ່ງນີ້ຍັງຖືກຈັດອັນດັບໃຫ້ເປັນໜຶ່ງໃນສະຖານທີ່ໃຕ້ດິນງາມທີ່ສຸດໃນໂລກ ນອກຈາກນີ້ບໍ່ເກືອແຫ່ງນີ້ ກໍມີປະຫວັດມາດົນນານຕັ້ງແຕ່ສະໄໝສົງຄາມໂລກຄັ້ງທີ 2.

 

ຍ້ອນກັບໄປເມື່ອສັດຕະວັດທີ່ 17 ແຕ່ກ່ອນບໍ່ເກືອແຫ່ງນີ້ ເຄີຍມີການຂຸດດິນເພື່ອເອົາມາເຮັດເກືອ ເມື່ອເວລາຜ່ານໄປບໍລິເວນທີ່ຂຸດນັ້ນກໍເລິກລົງໄປຈົນກາຍເປັນເວີນວັງຂະໜາດໃຫຍ່ ເປັນຮູບຊົງຄ້າຍຄືກັບ “ຊາມຂວໍ້າ” ແລະ ໄດ້ຢຸດຂຸດເຈາະໃນປີ 1932 ຈົນມາເຖິງໄລຍະສົງຄາມໂລກຄັ້ງທີ 2 ບໍ່ເກືອແຫ່ງນີ້ກໍຖືກນໍາໃຊ້ເປັນສູນການແພດ ແລະ ສະຖານທີ່ລີ້ໄພສົງຄາມ.

ຫຼັງຈາກສິ້ນສຸດສົງຄາມໂລກຄັ້ງທີ 2 ເວລາຜ່ານເປັນຫຼາຍສິບປີ ບໍ່ເກືອແຫ່ງນີ້ຖືກປະຮ້າງ ທາງແຂວງກໍເລີຍປ່ຽນບ່ອນນີ້ໃຫ້ເປັນ ພິພິທະພັນເກືອ ໃຫ້ຄົນໄດ້ເຂົ້າມາທ່ອງທ່ຽວ ແລະ ຮຽນຮູ້ປະຫວັດສາດ ແລະ ການປ່ຽນແປງຕ່າງໆ ຈົນຫຼ້າສຸດສະຖານທີ່ແຫ່ງນີ້ໄດ້ຖືກຟື້ນຟູໃຫ້ກາຍເປັນ ສວນສະໜຸກໃຕ້ດິນ ແລະ ເປີດໃຫ້ຄົນໄດ້ທ່ອງທ່ຽວຢ່າງເຕັມຮູບແບບ.

ການເຂົ້າໄປໃນສະຖານທີ່ແຫ່ງນີ້ທ່ານຕ້ອງນັ່ງລິຟລົງໄປ 120 ກວ່າແມັດ ດ ເມື່ອທ່ານໄປເຖິງສວນສະໜຸກ Salina Turda ( ຊາລີນາ ທູດາ ) ແຫ່ງນີ້ແລ້ວ ກໍຈະພົບກັບຄວາມສວຍງາມ ມີເຄື່ອງຫຼິ້ນ ແລະ ກິດຈະກໍາໃຫ້ຫຼິ້ນຫຼາຍຢ່າງເຊັ່ນ: ທະເລສາບ ທີ່ເຮົາສາມາດພາຍເຮືອສໍາຫຼວດຖໍ້າ, ນັ່ງຊິງຊ້າສະຫວັນ ເພື່ອສໍາຜັດກັບບັນຍາກາດທີ່ບໍ່ຄືບ່ອນໃດ ລວມເຖິງມີສະໜາມກິລາຂະໜາດນ້ອຍທີ່ສາມາດຫຼິ້ນກ໋ອຟ ແລະ ຕີປິງປ່ອງ ແລະ ອື່ນໆ.

Salina Turda ເຖິງແມ່ນວ່າຈະຖືກຟື້ນຟູມາເປັນແຫຼ່ງທ່ອງທ່ຽວແລ້ວ ແຕ່ກໍຍັງຮັກສາສະພາບເດີມ ຮັກສາຄວາມງາມໄວ້ຄືເກົ່າ Iosif mine ລັກສະນະເປັນຫ້ອງໂຖງໃຫຍ່ ເຮົາສາມາດຍ່າງຊົມຄວາມງາມຂອງບໍ່ເກືອແຫ່ງນີ້ໄດ້ໂດຍຮອບ ແລະ ໃກ້ສິດ ມີການສ້າງທາງຍ່າງອ້ອມຮອບບໍ່ເກືອ ແລະ Iosif mine  ຍັງມີຊື່ຮ້ອງອີກຊື່ວ່າ Echoes Room ເພາະເວລາເຮົາລົມກັນ ຫຼື ຮ້ອງ ມັນຈະມີສຽງສະທ້ອນ, Crivac room ຫຼື ຫ້ອງແປດຫຼ່ຽມ ບ່ອນນີ້ຈະມີແທ່ນທີ່ເຮັດເປັນຖານໄວ້ຍົກຊັ້ນຫີນເກືອ ຖືກສ້າງຂຶ້ນມາຕັ້ງແຕ່ປີ 1881.

ນອກຈາກນີ້ Salina Turda ( ຊາລີນາ ທູດາ ) ກໍຍັງມີ ລິຟ ແບບພາລາໂນມາ ທີ່ນັກທ່ອງທ່ຽວສາມາດເບິ່ງເຫັນພາບລວມຂອງບໍ່ເກືອໄດ້ແບບຄົບຖ້ວນ ແລະ ນັ່ງຊິງຊ້າສະຫວັນເພື່ອເບິ່ງທິວທັດມຸມສູງໄດ້ຢ່າງເຕັມຕາອີກດ້ວຍ.

ຖ້າທ່ານໃດໄດ້ມີໂອກາດໄປປະເທດ “ຣູມານີ” ກໍຢ່າລືມໄປຢ້ຽມຊົມສະຖານທີ່ແຫ່ງນີ້ ຮັບຮອງວ່າທ່ານບໍ່ເຄີຍເຫັນຄວາມງົດງາມແບບນີ້ຢູ່ໃສມາກ່ອນ.

  

ສະແດງຄຳຄິດເຫັນ