ລາວ-ອິນເດຍ ຮ່ວມປຶກສາຫາລືທາງດ້ານການຄ້າ

ໃນ​ໂອກາດ​ສະ​ເຫຼີ​ມສະຫຼອງ​ຄົບຮອບ 25 ປີ ​ອາ​ຊຽນ-ອິນ​ເດຍ, ຈຶ່ງໄດ້ຈັດກອງປະຊຸມ ຮ່ວມກັນປຶກສາຫາລືທາງດ້ານການຄ້າ. ​ຈັດ​ຂຶ້ນ​ໂດຍ​ສະພາ​ອຸດ​ສະຫະ​ກໍາ​-ການ​ຄ້າ​ລາວ ​ແລະ ສະພາ​ນັກທຸລະກິດ​ອາ​ຊຽນ-ອິນ​ເດຍ ໃນ​ວັນ​ທີ 7 ສິງຫາ 2017 ນີ້​ ທີນະຄອນຫຼວງ​ວຽງ​ຈັນ.

ກອງ​ປະຊຸມ​ດັ່ງກ່າວ, ​ເປັນ​ໂອກາດ​ອັນ​ດີ​ໃຫ້​ແກ່​ບັນດາ​ນັກ​ທຸ​ລະກິດອາ​ຊຽນ ​ແລະ ອິນ​ເດຍ ກໍ​ຄື​ ນັກທຸ​ລະ​ກິດ​ຂອງ ສປປ ລາວ ​ໄດ້​ແລກປ່ຽນ​ຄໍາ​ຄິດ​ຄໍາ​ເຫັນ​ ເພື່ອ​ສົ່ງ​ເສີມ​ ການ​ດໍາ​ເນີນ​ທຸລະ​ກິດ, ການ​ຄ້າ, ການ​ລົງທຶນ ​ແລະ ການທ່ອງທ່ຽວ. ພ້ອມ​ດຽວ​ກັນ ຍັງ​ເປັນ​ການ​ຮັດ​ແໜ້ນ​ສາຍ​ພົວພັນ​ການຮ່ວມ​ມື.
​​​ທ່ານ ສົມ​ຈິດ ອິນ​ທະ​ມິດ ຮອງ​ລັດຖະມົນຕີ​ ກະຊວງ​ອຸດ​ສະຫະ​ກໍາ ​ແລະ ການ​ຄ້າ ​ໃຫ້​ຮູ້​ວ່າ: ​ໃນ​ປີ 2016 ຜ່ານ​ມາ ສປປ ລາວ​ ໄດ້​ມີ​ການ​ສົ່ງ​ອອກສິນຄ້າ​ ຫຼາຍ​ປະ​ເພດ​ໄປ​ອິນ​ເດຍ ​ເປັນ​ຕົ້ນ ແຮ່​ທາດ, ຢາງພາລາ, ​​ເຟີ​ນີ​ເຈີໄມ້ ​ແລະ ອື່ນໆ ​ເຊິ່ງມີ​ມູນ​ຄ່າ​ເຖິງ 100 ກວ່າ​ລ້ານ​​ໂດ​ລາ​ສະຫະລັດ. ຂະນະ​ທີ່ສິນຄ້າ​ນໍາ​ເຂົ້າຈາກ​ອິນ​ເດຍ ມີ​ມູນ​ຄ່າ 30 ກວ່າລ້ານ​ໂດ​ລາສະຫະລັດ. ລວມມີ​ ​ເຄື່ອງ​ກົນ​ຈັກ, ສິນຄ້າ​ກະ​ສີ​ກໍາ, ຜະລິດ​ຕະພັນ​ເຫລັກ ​ແລະ ອື່ນໆ.   ພ້ອມ​ນີ້ອິນ​ເດຍ ຈັດເປັນ​ອັນ​ດັບທີ 8 ຂອງ​ຕ່າງປະ​ເທດ ​ມາ​ລົງທຶນ​ໃນ ສປປ ລາວ. ​
ກອງ​ປະຊຸມ​ຄັ້ງ​ນີ້, ເພື່ອ​ເປັນ​ການທົບ​ທວນຄືນ​​ ສະໜິດ​ແໜ້ນຮ່ວມ​ທຸລະ​ກິດ​ ຊອກ​ຫາ​ຊ່ອງ​ທາງ​ການ​ຄ້າ​ການ​ຮ່ວມ​ທຶນ ​ໃນ​ການສົ່ງ​ເສີມ​ການ​ລົງທຶນ ​ໃນ​ຂອບ​ອາ​ຊຽນ ທັງເປັນ​ໂອ​ກາດ​ສຳ​ຄັນ​ຍິ່ງ ​ສຳ​ລັບ​ຜູ້​ນຳ​, ນັກ​ທຸ​ລະ​ກິດ ແລະ ຫົວ​ໜ່ວຍ​ຜູ້​ປະ​ກອບ​ການ​ຈາກ​ ອາ​ຊຽນ-ອິນ​ເດຍ ແລະ ບັນ​ດາ​ປະ​ເທດ​ຕ່າງໆ ໄດ້​ພົບ​ປະ​ແລກ​ປ່ຽນ​ຄວາມ​ຄິດ​ຄວາມ​ເຫັນ ແລະ ເປີດ​ວິ​​ໄສ​ທັດ ​ທີ່​ໜ້າ​ສົນ​ໃຈ ຮ່ວມກັນ​​ຊຸກ​ຍູ້​ການ​ຮ່ວມ​ມື​ດ້ານ​ການ​ຄ້າ, ການ​ລົງ​ທຶນ, ການ​ທ່ອງ​ທ່ຽວ ແລະ ອື່ນໆ.
ອີງ​ຕາມ​​ຂໍ້​ມູນ​ ຂອງ​ສອງ​ຝ່າ​ຍ​​ໃຫ້​ຮູ້ວ່າ: ກ່ອນໜ້ານີ້ ​ການ​ຮ່ວມ​ມື​ດ້ານ​ການ​ຄ້າ​ອິນ​ເດຍ​ ກັບ​ອາ​ຊຽນ​ ​ໃນ ລະ​ຫວ່າງ​ປີ 2007-2008 ມີ​ພຽງ​ແຕ່ 30 ຕື້ກວ່າ​ໂດ​ລາ​ສະ​ຫະ​ລັດ ແຕ່​ມາ​ເຖິງ​ປັດຈຸບັນ ​ໄດ້ເພີ່ມ​ຂຶ້ນ​ເປັນ 71 ຕື້ກວ່າ​ໂດ​ລາ​ສະ​ຫະ​ລັດ.  ອາ​ຊຽນ​ເປັນ​ຄູ່​ຮ່ວມ​ດ້ານ​ ການ​ຄ້າ​ໃຫຍ່​ອັນ​​ດັບ 4 ຂອງ​ອິນ​ເດຍ ແລະ ເປັນ​ຄູ່​ຮ່ວມ​ດ້ານ​ການ​ຄ້າ​​ໃຫຍ່​ອັນ​ດັບ​ທີ 7 ຂອງ​ອາ​ຊຽນ.

 

 

 

ບົດຄວາມແນະນໍາ

ສະແດງຄວາມຄິດເຫັນ