ສື່ມວນຊົນ ແລະ ການພິມຈຳໜ່າຍ ເປັນເຄື່ອງມື ເປັນປາກກະບອກສຽງ ທີ່ແຫຼມຄົມ.

ພິທີໂຮມຊຸມນຸມສະເຫຼີມສະຫຼອງ​ວັນ​ສື່​ມວນ​ຊົນ ​ແລະ ການ​ພິມ​ຈໍາໜ່າຍ​ຄົບຮອບ 65 ປີ​ໄດ້​​ຈັດ​ຂຶ້ນ​ຢ່າງ​ຍິ່ງໃຫ່ຍ​ໃນ​ວັນທີ 13 ສິງຫາ 2015 ​ທີ່​ສູນ​ການ​ຄ້າ​ລາວໄອ​ເຕັກ ນະຄອນຫຼວງ​ວຽງ​ຈັນ, ​ໂດຍ​ການເປັນ​ກຽດ​ເຂົ້າ​ຮ່ວມ ​ຂອງ ທ່ານ ຈັນ​ສີ ​ໂພ​ສີຄຳ ​ເລຂາທິການ​ສູນ​ກາງ​ພັກ, ຫົວໜ້າ​ຄະນະ​ຈັດຕັ້ງສູນ​ກາງ​ພັກ, ພ້ອມ​ດ້ວຍ​ບັນດາ​ກຳມະການ​ສູນ​ກາງ​ພັກ, ລັດຖະມົນຕີ​ວ່າການ, ຊ່ວຍ​ວ່າການ ພ້ອມ​ພະນັກງານ​ອາວຸ​ໂສ​​, ບັນນາທິການຂະແໜງການສື່ ແລະ ພາກສ່ວນ​ກ່ຽວຂ້ອງ​ເຂົ້າຮ່ວມຢ່າງ​ຫຼວງຫຼາຍ.

​ໃນ​ພິທີ​ ທ່ານ ສຈ. ດຣ ບໍ່​ແສງ​ຄຳ ວົງ​ດາລາ ກຳມະການ​ສູນ​ກາງ​ພັກ, ລັດຖະມົນຕີ​ວ່າການ​ກະຊວງ​ຖະ​ແຫຼ​ງຂ່າວ ວັດທະນະທຳ ​ແລະ ທ່ອງ​ທ່ຽວ ​ໄດ້​ຍົກ​ໃຫ້​ເຫັນ​ການກຳ​ເນີ​ດ, ການ​ເຕີບ​ໃຫຍ່​ຂະຫຍາຍຕົວ​ທາງ​ດ້ານ​ປະລິມານ ​ແລະ ຄຸນ​ນະພາ​ບຂອງ​ວຽກ​ງານ​ສື່​ມວນ​ຊົນ ​ແລະ ການ​ພິມ​ຈຳໜ່າຍຕະຫຼອດ 65 ປີ ຜ່ານ​ມາ ​ໃນ​ນັ້ນ​​​​ການ​ພັດທະນາ​ວຽກ​ງານ​ສື່​ມວນ​ຊົນ ​ແລະ ການ​ພິມ​ຈຳໜ່າຍ ມີ​ບາດກ້າວ​ຂະຫຍາຍຕົວ​ຢ່າງ​ວ່ອງ​ໄວ ເຊິ່ງສະ​ແດງ​ອອກ​​​ໃນ​ປັດຈຸບັນ​ພວກ​ເຮົາ​ມີ​ສື່ສິ່ງ​ພິມ​ທັງ​ໝົດ 127 ສະບັບ, ​ໃນ​ນັ້ນມີ​ໜັງສືພິມ 27 ສະບັບ, ​ເປັນ​ລາຍ​ວັນ 11 ສະບັບ, ມີ​ວາລະສານ​ທັງ​ໝົດ 100 ສະບັບ ນັບ​ທັງ​ພາກລັດ ​ແລະ ​ເອກະ​ຊົນ; ວິທະຍຸ​ກະຈາຍສຽງ​ມີ​ທັງ​ໝົດ 63 ສະຖານີ ເພີ່ມ​ຂຶ້ນ 11 ສະຖານີ ຖ້າທຽບ​ໃສ່​ປີ 2011, ​ໂທລະພາບ​ມີ​ທັງ​ໝົດ 37 ສະຖານີ ​ເພີ່ມ​ຂຶ້ນ 5 ສະຖານີ ຖ້າທຽບ​ໃສ່​ປີ 2011, ຢູ່​ສູນ​ກາງ​ມີ 9 ສະຖານີ, ​ໃນ​ນັ້ນສະຖານີ​ເອກະ​ຊົນ 3 ສະຖານີ, ສາມາດ​ແຜ່​ພາບ​ທາງພາກ​ພື້ນ​ດິນ​ກວມ 80%.

ສ່ວນ​ວຽກ​ງານການ​ພິມ​ແລະ ຈຳໜ່າຍ​ກໍ​ມີ​ການ​ພັດທະນາ ​ແລະ ​ເຕີບ​ໃຫຍ່​ຂະຫຍາຍຕົວ​ເຊັ່ນ​ດຽວ​ກັນ ປັດຈຸບັນ ທົ່ວ​ປະ​ເທດ​ມີ​ໂຮງພິມ, ຮ້ານ​ພິມ ​ແລະ ຮ້ານ​ອອກ​ແບບ​ພິມ​ທັງ​ໝົດ 100 ກວ່າ​ແຫ່ງ ​ໃນ​ນັ້ນ ມີ​​ໂຮງພິມ​ລັດ​ເກືອບ 10 ​ແຫ່ງ ​ພ້ອມ​ນີ້ ຜົນງານ​ການ​ປະພັນ ຂອງ​ບັນດາ​ນັກ​ຂຽນ ກໍ​ໄດ້​ຮັບການ​ພັດທະນາ ​ແລະ ​ເຕີບ​ໃຫຍ່ຂະຫຍາຍຕົວ​ຂຶ້ນ​ໄປ​ເລື້ອຍໆ.

ໃນໂອກາດນີ້ ທ່ານ ຈັນ​ສີ​ ໂພ​ສີຄຳ ຍັງ​ໃຫ້​ທິດ​ຊີ້​​ນຳ​ໃນ​ການ​ພັດທະນາ​ວຽກ​ງານ​ສື່​ມວນ​ຊົນ ​ແລະ ການ​ພິມ​ຈຳໜ່າຍ ເຊິ່ງທ່ານໄດ້ຍົກໃຫ້ເຫັນວ່າ: ວຽກງານ ຖະແຫຼງຂ່າວສື່ມວນຊົນ ແລະ ການພິມຈຳໜ່າຍ ແມ່ນວຽກງານສຳຄັນອັນໜຶ່ງ ຊຶ່ງໄດ້ເຮັດບົດບາດ ເປັນເຄື່ອງມື ເປັນປາກກະບອກສຽງ ທີ່ແຫຼມຄົມ ໃນການເຜີຍແຜ່ແນວທາງນະໂຍບາຍຂອງພັກ ແລະ ລັດເຮົາ, ເຮັດໜ້າທີ່ໂຄສະນາສຶກສາອົບຮົມນ້ຳໃຈຮັກຊາດ, ຮັກລະບອບໃໝ່, ລະບອບປະຊາທິປະໄຕ ແລະ ສ້າງສະຕິ ເຄົາລົບກົດກົດໝາຍໃຫ້ປະຊາຊົນ, ສົ່ງເສີມໃຫ້ປະຊາຊົນ ຮູ້ອະນຸລັກຮັກສາ ແລະ ເສີມຂະຫຍາຍວັດທະນະທຳອັນດີງາມຂອງຊາດ ແລະ ບັນດາເຜົ່າ.

ໃນໄລຍະຜ່ານມາໄດ້ປະກອບສ່ວນເຂົ້າໃນການຕໍ່ສູ້ຕ້ານບັນດາຖ້ອຍທຳນອງ ໃສ່ຮ້າຍປ້າຍສີ ແລະ ທັດສະນະທີ່ຜິດພາດ, ຕ້ານການສໍ້ລາດບັງຫຼວງ,​ ສິ່ງຫຍໍ້ທໍ້ຕ່າງໆໃນສັງຄົມ, ປຸກລະດົມນ້ຳໃຈຮັກຊາດຮັກລະບອບໃໝ່ຂອງປະຊາຊົນບັນດາຊັ້ນຄົນ, ເປັນເຈົ້າການສຸມໃສ່ກໍ່ສ້າງ ແລະ ປົກປັກຮັກສາປະເທດຊາດ, ດຳເນີນພາລະກິດ ປ່ຽນແປງໃໝ່ ເພື່ອຈຸດໝາຍ ປະເທດຊາດເຂັ້ມແຂງ, ປະຊາຊົນຮັ່ງມີຜາສຸກ, ສັງຄົມມີປະຊາທິປະໄຕ, ຍຸຕິທຳ ແລະ ສີວິໄລຕາມທິດສັງຄົມນິຍົມ.

ພ້ອມກັນນັ້ນວົງການສື່ມວນຊົນ ແລະ ການພິມຈຳໜ່າຍຍັງໄດ້ມີການພັດທະນາຕົນເອງທັງ ດ້ານປະລິມານ ແລະ ຄຸນນະພາບ, ບັນດາພາຫະນະສື່ມວນຊົນໄດ້ນຳໃຊ້ວິທະຍາສາດທີ່ກ້າວໜ້າ, ເຕັກໂນໂລຊີຂ່າວສານທັນສະໄໝ ພ້ອມກັນນີ້ ສື່ມວນຊົນ ຈຳນວນໜຶ່ງໄດ້ບືນຕົວຊອກແຫຼ່ງລາຍຮັບກຸ້ມຕົນເອງ ເພື່ອຫຼຸດຜ່ອນການແບກຫາບດ້ານງົບປະມານຂອງລັດ.

ທ່ານ ຈັນສີ ໂພສີຄໍາ ຍັງຍົກໃຫ້ເຫັນຕື່ມອີກວ່າ: ເຖິງຢ່າງໃດກໍຕາມຄຽງຄູ່ກັບ ຜົນງານດ້ານດີທີ່ກ່າວມານັ້ນກໍເຫັນວ່າສື່ມວນຊົນ ແລະ ວຽກງານພິມຈຳໜ່າຍຂອງພວກເຮົາກໍຍັງມີຈຸດອ່ອນຄົງຄ້າງ ແລະ ຂໍ້ຈຳກັດຈຳນວນໜຶ່ງ ເຊັ່ນ: ການຕອບໂຕ້ຖ້ອຍທຳນອງການໂຄສະນາບິດເບືອນຂອງກຳລັງປໍລະປັກ,ການກຳແໜ້ນແນວທາງນະໂຍບາຍ ຂອງພັກຍັງບໍ່ທັນວ່ອງໄວທັນການ,​ ການວິເຄາະຂ່າວຍັງບໍ່ທັນເລິກ. ການອອກຂ່າວບາງຄັ້ງຄາວຍັງຊັກຊ້າເຮັດໃຫ້ຄຸນປະໂຫຍດການນຳພາແນວຄິດໃນທົ່ວສັງຄົມບໍ່ທັນໜັກແໜ້ນເຂັ້ມແຂງ.ເວົ້າລວມແລ້ວ ຄຸນນະພາບຂອງວຽກງານຖະແຫຼງຂ່າວຍັງບໍ່ທັນດີເທົ່າທີ່ຄວນ ຫຼື ເວົ້າແນວໜຶ່ງແມ່ນບໍ່ທັນໄດ້ຮັບການຍົກລະດັບໃຫ້ທ່ວງທັນກັບຄວາມຮຽກຮ້ອງ ຕ້ອງການຕົວຈິງ ຂອງຍຸກສະໄໝ ເປັນຕົ້ນແມ່ນດ້ານເຕັກນິກເນື້ອໃນ ແລະ ການດຶງດູດ ຄວາມສົນໃຈ ​ການສ່ອງແສງ ສະພາບຄວາມເປັນຈິງທາງດ້ານເສດຖະກິດ ແລະ ຊີວິດ ສັງຄົມບໍ່ທັນເລິກເຊິ່ງ ການໂຄສະນາຕົວແບບ ແລະ ບົດຮຽນ ທີ່ເປັນປະໂຫຍດທີ່ເກີດຂຶ້ນໃນສະພາບວຽກງານຕົວຈິງຂອງສັງຄົມຍັງເຮັດໄດ້ໜ້ອຍ.ການຄົ້ນຄວ້ານະໂຍບາຍ, ການເຊື່ອມຊຶມ ແລະ ການຈັດຕັ້ງປະຕິບັດກົດໝາຍ,ນິຕິກຳຕ່າງໆໃນການຄຸ້ມຄອງພັດທະນາວຽກງານສື່ມວນຊົນຍັງເຮັດບໍ່ທັນໄດ້ດີເທົ່າທີ່ຄວນ ການປັບປຸງລະດັບ ພື້ນຖານວັດຖຸເຕັກນິກ ແລະ ການກໍ່ສ້າງຖັນແຖວພະນັກງານວິຊາການກໍຍັງບໍ່ທັນສາມາດຕອບສະໜອງໄດ້ກັບການຂະຫຍາຍຕົວຂອງວຽກງານດັ່ງກ່າວ.

ໃນ​​ໂອກາດ​ນີ້ ຍັງ​ໄດ້​ເປີດ​ງານ​ວາງສະ​ແດງ​ຜົນງານ​ຂອງ​ບັນດາ​ສື່​ມວນ​ຊົນ ​ແລະ ການ​ພິມ​ຈຳໜ່າຍ ​ເຊິ່ງ​ໃນ​ນັ້ນ ມີ​ 7 ພາກສ່ວນ, ລວມມີ 100 ຮ້ານ ​ໄດ້​ນຳ​ເອົາ​ຜົນງານ ​ແລະ ຜະລິດຕະພັນ​ຂອງ​ຕົນ​ມາ​ວາງສະ​ແດງ, ແຈກ​ຢາຍ​ໃຫ້​​ແຂກ ​ແລະ ມວນ​ຊົນ​ທີ່​ເຂົ້າຮ່ວມ​ງານແຕ່ວັນທີ 08-16 ສິງຫາ.

ບົດຄວາມແນະນໍາ

ສະແດງຄວາມຄິດເຫັນ