Senglao content (728×90)

ແຮມ14ຄໍ່າເດືອນ9 ພົບກັນທີ່ຫຼວງພະບາງ

ສະບາຍດີ ບັນດາທ່ານຜູ້ອ່ານທີ່ຮັກແພງທັງຫຼາຍ ໃນວັນທີ 21 ເດືອນສິງຫານີ້ຕາມປະເພນີລາວເຮົາເພິ່ນຈະຈັດງານບຸນຫໍ່ເຂົ້າປະດັບດິນ ແລະ ມື້ນີ້ ທີມງານເວັບໄຊ ທາເກັດ ຈະມາແນະໃຫ້ທ່ານຜູ້ອ່ານໄປທ່ຽວງານບຸນປະເພນີແຂ່ງຂັນຊ່ວງເຮືອ ທີ່ແຂວງ ຫຼວງພຣະບາງ.

ເມື່ອຮອດເດືອນ 9 ແຮມ 14 ຄໍ່າຂອງທຸກໆປີ ຊາວຫຼວງພຣະບາງ ນອກຈາກປະຕິບັດຮີດຄອງປະເພນີບຸນຫໍ່ເຂົ້າປະດັບດິນແລ້ວ ຍັງມີປະເພນີບຸນຊ່ວງເຮືອນຳອີກ ການຊ່ວງເຮືອຫຼວງພຣະບາງນີ້ ນັບວ່າເປັນສະເໜ່ດຶງດູດຈິດໃຈໃຫ້ປະຊາຊົນທັງພາຍໃນ ແລະ ຕ່າງປະເທດໄດ້ຊົມໄດ້ເຊຍກັນຢ່າງມ່ວນຊື່ນ ແລະ ອີກຢ່າງໜຶ່ງກໍຖືວ່າເປັນເອກະລັກໂດດເດັ່ນສະເພາະຕົວ ເພາະວ່າມີແຕ່ຢູ່ຫຼວງພະບາງແຫ່ງດຽວໃນປະເທດເທົ່ານັ້ນ.

ນັບແຕ່ແຮມ 1 ຄ່ຳ ເດືອນ 9 ບ້ານທີ່ມີເຮືອຊ່ວງ ຫຼື ວັດໃດທີ່ມີເຮືອຊ່ວງ ກໍຈະເອົາເຮືອຊ່ວງລົງຫັດໃນນ້ຳຂອງ ແລະ ນ້ຳຄານ ເພາະໃນໄລຍະນີ້ນ້ຳຈະມີຫຼາຍ. ແຕ່ລະມື້ເຮືອຊ່ວງແຕ່ລະລຳທີ່ເອົາລົງຫັດກໍຈະເລີ່ມເຝິກຊ້ອມ ແຕ່ບ່າຍ 2 ໂມງ ຈົນຮອດ 5-6 ໂມງ ກໍຈະເຊົາຫັດ. ຈົນຮອດມື້ແຮມ 14 ຄ່ຳ ເດືອນ 9 (ມື້ຫໍ່ເຂົ້າປະດັບດິນ ) ເປັນມື້ຊ່ວງແທ້ສອງຝາກຝັ່ງນໍ້າຄານ ຈະມີປະຊາຊົນ ຫຼັ່ງໄຫຼກັນມາຮ່ວມຊົມ ຮ່ວມເຊຍກັນຈົນເຕັມສອງຝັ່ງ ເພາະເຮືອຊ່ວງຫຼວງພຣະບາງຈະມີລັກສະນະພິເສດຄື: ຕ້ອງມີຄົນຫຼົ້ມຫົວເຮືອ, ມີຄົນທັ່ງທ້າຍເຮືອ 4-5 ຄົນ ແລະ ຄົນຂັດທ້າຍເຮືອຊ່ວງ 3-4 ຄົນ. ແຕ່ໃນສະໄໝກ່ອນເວລາຊ່ວງເຮືອກໍຈະມີການຮ້ອງອອກສຽງວ່າ ເອີກໆ… ຮາວໆໆໆໆ… ແບບນີ້ ຄົນທີ່ຍ່າງຢູ່ຖະໜົນສີສະຫວ່າງວົງ ກໍຍັງໄດ້ຍິນສຽງແບບນີ້ມາແຕ່ລຳນ້ຳຄານ ແຕ່ມາປັດຈຸບັນນີ້ ການຊ່ວງເພິ່ນບໍ່ຮ້ອງແບບນັ້ນອີກແລ້ວ ເພິ່ນນັບເລກເອົາ 123….

ເມື່ອທ່ານມາທ່ຽວງານບຸນຊ່ວງເຮືອນີ້ ທ່ານຈະໄດ້ເຫັນການຊ່ວງເຮືອຍາວ, ການແຂ່ງຂັນເຮືອງາມ ແລະ ແຂ່ງຂັນເຮືອເຊີ້ງ ພ້ອມທັງມີການເປີດຕະຫຼາດນັດ, ວາງສະແດງສິນຄ້າຢ່າງຫຼາກຫຼາຍ ເພື່ອໃຫ້ພໍ່ແມ່ປະຊາຊົນ ຈາກຕ່າງເມືອງຕ່າງແຂວງ ແລະ ຕ່າງປະເທດໄດ້ເບິ່ງໄດ້ຊົມພ້ອມ ທັງຊື້ເຄື່ອງຝາກຂອງຕ້ອນເປັນ ແລະ ຂອງທີ່ລະນຶກນໍາອີກ. ແຂວງຫຼວງພຣະບາງ ຍັງມີອາຫານພື້ນເມືອງທີ່ເປັນເອກະລັກ ແລະ ມີຊື່ສຽງໂດ່ງດັງບໍ່ວ່າຈະເປັນເອາະຫຼາມ, ແຈ່ວບ່ອງ, ໄຄແຜ່ນ, ເຂົ້າໜົມຂີ້ໜູ ແລະ ໄສ້ອົ່ວແຊບໆທີ່ບໍ່ວ່າໃຜໆໄດ້ກິນກໍຕ້ອງຕິດໃຈ ແລະ ຊື້ຕິດໄມ້ຕິດມືກັບມານໍາ.

ທ່ານໃດທີ່ສົນໃຈທີ່ຢາກຈະໄປຮ່ວມງານບຸນຊ່ວງເຮືອທີ່ແຂວງຫຼວງພຣະບາງກໍສາມາດໄປໄດ້ເພາະໃນທ້າຍ ເດືອນ ສິງຫາ ກໍຈະມີການຈັດແຂ່ງຂັນຊ່ວງເຮືອຂຶ້ນ ແລະ ນີ້ກໍເປັນອີກເດືອນໜຶ່ງທີ່ມີຊີວິດຊີວາຫຼາຍທີ່ສຸດສໍາລັບແຂວງ ຫຼວງພຣະບາງ ຫຼື ເມືອງມໍລະດົກໂລກແຫ່ງນີ້ ເພາະເດືອນສິງຫາຂອງທຸກປີຈະເປັນເດືອນແຫ່ງການແຂ່ງເຮືອປະເພນີທີ່ສືບທອດກັນມາຍາວນານ ແລະ ແຂວງຫຼວງພຣະບາງນັ້ນຈະຈັດງານບຸນຊ່ວງເຮືອຂຶ້ນໃນວັນປະເພນີທີ່ສໍາຄັນຄື “ ງານບຸນຫໍເຂົ້າປະດັບດິນ ” (ບຸນເດືອນ 9) ຊາວຫຼວງພຣະບາງຈະເຂົ້າວັດກັນທຸກວັນພຣະ ການທ່ອງທ່ຽວທາງວັດທະນະທໍາກໍຈະຄຶກຄັກມ່ວນຊື່ນ ຫຼວງພຣະບາງມີວັດເກົ່າແກ່ທີ່ສວຍງາມເຖິງ 10 ວັດ ນັກທ່ອງທ່ຽວທີ່ເດີນທາງໄປທີ່ນັ້ນສາມາດໄປຊົມຄວາມງົດງາມ ແລະ ຮ່ວມເຮັດບຸນກັບຜູ້ຄົນໃນທ້ອງຖິ່ນໄດ້. ເດືອນສິງຫາ ເປັນເດືອນແຫ່ງການແຂ່ງເຮືອໃນຫຼາຍທ້ອງຖິ່ນຕັ້ງແຕ່ລະດັບຄຸ້ມບ້ານຈົນເຖິງລະດັບເມືອງ ແລະ ບຸນຊ່ວງເຮືອ ເດືອນ 9 ປີນີ້ຖືກວັນທີ່ 21/08/2017 ຖ້າທ່ານໃດຢາກໄປຊົມໄປເຊຍການແຂ່ງຂັນເຮືອພາຍ ທີ່ຫຼວງພຣະບາງກໍກະກຽມວາງແຜນໄວ້ ເສັ້ນທາງການໄປມາກໍສະດວກສະບາຍ ບໍ່ວ່າຈະເປັນທາງລົດ ຫຼື ທາງຍົນກໍສະດວກດີມີຫຼາຍຖ້ຽວຕໍ່ມື້.

ຮູບພາບ: LMI Luang Prabang Moradk

ສະແດງຄຳຄິດເຫັນ