ການຕົບແຕ່ງຮ້ານແບບອະນຸຮັກປະເພນີຂອງຊາວທ້ອງຖິ່ນ

ສະບາຍດີ ບັນດາທ່ານຜູ້ທີ່ຮັກແພງທັງຫຼາຍ ກັບມາພົບກັນອີກແລ້ວໃນທຸກຕອນເຊົ້າຂອງວັນ ພະຫັດ ແລະ ມື້ນີ້ ທີມງານເວັບໄຊທາເກັດ ຈະມາແນະນໍາໃຫ້ບັນດາທ່ານຜູ້ອ່ານໄດ້ຮູ້ຈັກກັບຮ້ານອາຫານ ທີ່ຕັ້ງຢູ່ເທິງເກາະ ແຊນຊິບາ (Zanzibar) ໂດຍຮ້ານນີ້ມີຊື່ວ່າ: ຮ້ານ The Rock ນັ້ນເອງ.

“The Rock” ຄືຊື່ຮ້ານອາຫານທີ່ມີຄວາມແປກ ແລະ ໜ້າຄົ້ນຫາທີ່ສຸດແຫ່ງໜຶ່ງ ເພາະສະຖານທີ່ຕັ້ງຂອງຮ້ານນັ້ນມີຄວາມຕື່ນຕາຕື່ນໃຈຫຼາຍ ຄືຮ້ານ The Rock ຕັ້ງຢູ່ເທິງເກາະຫີນຂະໜາດນ້ອຍແຄມຫາດຊາຍ ເປັນຮ້ານອາຫານທີ່ໂດດດ່ຽວໃນມະຫາສະໝຸດອິນເດຍ ຈຶ່ງເປັນທີ່ດຶງດູດໃຈແກ່ນັກທ່ອງທ່ຽວຫຼາຍໆຄົນ ທີ່ຕ້ອງການດື່ມ, ກິນອາຫານ ເພື່ອສໍາຜັດກັບບັນຍາກາດທີ່ສົດຊື່ນ ອາກາດເຢັນໆທີ່ພັດຜ່ານທະເລມາ ແລະ ຍັງໄດ້ໃກ້ຊິດກັບທໍາມະຊາດອີກດ້ວຍ.

ຮ້ານ The Rock ຕັ້ງຢູ່ໃນໝູ່ເກາະ ແຊນຊິບາ (Zanzibar) ຂອງປະເທດແທນຊາເນຍ ໂດຍຝັ່ງຂອງຮ້ານອາຫານຈະຕັ້ງຢູ່ດ້ານໜ້າຂອງຫາດຊາຍ Michanwi Pingwe ໃນມະຫາສະໝຸດ ເຊິ່ງຮ້ານອາຫານນັ້ນມີລັກສະນະເປັນຕູບທີ່ມີຕົນໄມ້ປົກຄຸມ ມີຂັນໄດສໍາລັບຂຶ້ນລົງ ເບິ່ງໄປລວມໆແລ້ວຮ້ານຈະມີລັກສະນະຄ້າຍຄືກັບເຮືອນຂອງຊາວປະມົງ ຫຼື ຄົນໃນພື້ນທີ່. ຮ້ານນີ້ຍັງໄດ້ຮັບເລືອກໃຫ້ເປັນໜຶ່ງໃນມໍລະດົກໂລກອີກດ້ວຍ ຮ້ານ The Rock ຈຶ່ງກາຍເປັນສັນຍາລັກ ແລະ ແລນມາກ ສໍາຄັນຂອງເກາະ.

ຜູ້ທີ່ເລີ່ມສ້າງຮ້ານ The Rock ຂຶ້ນມາ ຈາກກຸ່ມຮັກອະນຸຮັກໜຶ່ງທີ່ມີຄວາມຫຼົງໄຫຼໃນເກາະແຫ່ງນີ້ ໄດ້ຮ່ວມໃຈກັນສ້າງຮ້ານອາຫານຂຶ້ນ ພວກເຂົາມີແນວຄິດໃນການສ້າງສະຖານທີ່ໃໝ່ ໂດຍຍັງຮັກສາຮູບແບບທີ່ລຽບງ່າຍຈາກອາຄານບ້ານເຮືອນໃນທ້ອງຖິ່ນໄວ້ ໂດຍຕູບເທິ່ງເກາະຈຶ່ງໃຫ້ຄວາມຮູ້ສຶກຄ້າຍຄຸ້ມບ້ານຊາວປະມົງ ແຕ່ພາຍໃນນັ້ນຄືຮ້ານອາຫານທີ່ມີບັນຍາກາດດີແຫ່ງໜຶ່ງ ໃຫ້ບໍລິການໄດ້ທັງໝົດພຽງ 12 ໂຕະ ສາມາດຮັບແຂກໄດ້ທັງໝົດ 50 ຄົນ ມີທັງວິວພາຍໃນຮ້ານ ແລະ ວິວແຄມລະບຽງ ທີ່ໃກ້ຊິດກັບທໍາມະຊາດ ພ້ອມເມນູອາຫານທະເລສົດໃໝ່ຈາກທະເລເລີຍ.

ຖ້າທ່ານໃດຢາກສໍາຜັດກັບອາກາດເຢັນໆ ກໍລອງວາງແຜນໄປທ່ຽວສະຖານທີ່ແຫ່ງນີ້ລອງເບິ່ງເດີ້ ແລ້ວທ່ານຈະຕິດໃຈໃນຄວາມເປັນທໍາມະຊາດ ແລະ ບັນຍາກາດຂອງສະຖານທີ່ແຫ່ງນີ້.

ບົດຄວາມແນະນໍາ

ສະແດງຄວາມຄິດເຫັນ