Senglao content (728×90)

ຫຼວງພະບາງ ຮັບລາງວັນເມືອງສິ່ງແວດລ້ອມຍືນຍົງອາຊຽນ ປະຈຳປີ 2017

ຫຼວງພະບາງເມືອງມໍລະດົກໂລກ ຂອງ ສປປ ລາວ​ ໄດ້​ຮັບ​ລາງວັນ​ເມືອງ​ສິ່ງ​ແວດ​ລ້ອມ​ອາ​ຊຽນຍືນ​ຍົງ​ ປະ​ຈໍາປີ 2017 ຂະນະ​ທີ່ ອໍານາດ​ການ​ປົກ​ ແຂວງ​ຫຼວງ​ພະ​ບາງ​ ພວມ​ຫ້າງ​ຫາ​ກະກຽມ ​ພິທີ​ຕ້ອນຮັບ​ຢ່າງ​ສົມ​ກຽດ​ ໃນ​ວັນ​ທີ 14 ກັນຍາ 2017 ນີ້.

ທ່ານ ສົມດີ ພອນສະຫວັດ ຮອງປະທານອົງການພັດທະນາ ແລະ ບໍລິຫານຕົວເມືອງຫຼວງພະບາງ ໃຫ້ຮູ້ກ່ຽວກັບຈຸດປະສົງ ແລະ ທີ່ມາຂອງລາງວັນດັ່ງກ່າວວ່າ: ລາງວັນເມືອງສິ່ງ ແວດລ້ອມທີ່ຍືນຍົງຂອງ ອາຊຽນ​ເຄີຍ ໄດ້ຮັບມາແລ້ວ 4 ຄັ້ງ ນັບແຕ່ປີ 2008 ​ໃນ​ນັ້ນເມືອງຫຼວງພະບາງ ໄດ້ຮັບ 3 ຄັ້ງ ແລະ ເມືອງຊຳເໜືອ ໄດ້ຮັບ 1 ຄັ້ງ.
ສຳລັບລາງວັນ​ດັ່ງກ່າວ​ນີ້​ ແມ່ນສິ່ງທີ່ບົ່ງບອກວ່າເມືອງສິ່ງແວດລ້ອມ ທີ່ຍືນຍົງປະກອບມີ 3 ເງື່ອນໄຂຄື: ຄຸນນະພາບດິນ, ຄຸນນະພາບນໍ້າ ແລະ ຄຸນນະພາບອາກາດ ໃນນັ້ນແມ່ນໄດ້ເວົ້າເຖິງ ການອານະໄມ ຄວາມສະອາດໃນຕົວເມືອງ, ການສ້າງພື້ນທີ່ສີຂຽວ, ການຄຸ້ມຄອງການບຳບັດນ້ຳເປື້ອນ, ຄຸ້ມຄອງແຫຼ່ງນໍ້າທຳມະຊາດ, ການຄຸ້ມຄອງມົນລະຜິດ ທາງອາກາດ ແລະ ອື່ນໆ.  ສະ​ເພາະລາງວັນປີ 2017 ນີ້ ແມ່ນລາງວັນທີ່ຢັ້ງຢືນ ເຖີງຄຸນນະພາບ ທາງດ້ານສິ່ງແວດລ້ອມ.

OLYMPUS DIGITAL CAMERA

ເພື່ອເປັນການຕ້ອນຮັບລາງວັນ ອັງຊົງກຽດດັ່ງກ່າວ ທີ່ຈະເດີນທາງມາເຖິງ ແຂວງຫຼວງ ພະບາງ ໃນວັນທີ 14 ກັນຍານີ້ ອົງການປົກຄອງເມືອງຫຼວງພະບາງ ຈະໄດ້ຈັດພິທີຕ້ອນຮັບຢ່າງຍິ່ງໃຫຍ່ ໂດຍເລີ່ມຂະບວນແຫ່ ຈາກສະໜາມບິນສາກົນ ຫຼວງພະບາງ ອ້ອມຮອບ ຕົວເມືອງ ແລະ ຈັດພິທີສູດມຸງຄຸນຢູ່ວັດຊຽງທອງ.
ທ່ານ ນາງ ອີນຖາວອນ ພົມມະຈັນ ຮອງເຈົ້າເມືອງຫຼວງພະບາງ ໄດ້ຮຽກຮ້ອງເຖິງພະນັກງານ, ທະຫານ, ຕໍາຫຼວດ ຕະຫຼອດຮອດປະຊາຊົນ ທຸກຊັ້ນຄົນ, ທຸກຊົນເຜົ່າ ຈົ່ງພ້ອມກັນ ເປັນເຈົ້າການ ປະກອບສ່ວນໃນການຊົມເຊີຍ ແລະ ພາກພູມໃຈຮ່ວມກັນ ຕໍ່ລາງວັນດັ່ງກ່າວ ພ້ອມທັງກະກຽມວຽກງານຮອບດ້ານ ເພື່ອຕ້ອນຮັບຂະບວນແຫ່, ສຳລັບລາງວັນ ເມືອງສິ່ງແວດລ້ອມ ທີ່ຍືນຍົງຂອງອາຊຽນ ຈະເດີນທາງຈາກປະເທດ ບລູໄນ ດາລູຊະລັມ ເຖິງສະໜາມບິນສາກົນຫວງພະບາງ ໃນຕອນທ່ຽງຂອງ ວັນພະຫັດ ທີ່ 14 ກັນຍາ ປີ 2017.

ທີ່ມາ: ຂ່າວສານປະເທດລາວ.​

 

ສະແດງຄຳຄິດເຫັນ