ປີ 2018 ລັດຈະລົງທຶນໃສ່ຂະແໜງການ-ທ້ອງຖິ່ນອີກ 2 ພັນກວ່າໂຄງການ

​ໃນ​ແຜ​ນພັດທະນາ​ເສດຖະກິດ-ສັງຄົມ ​ປະຈຳ​ປີ 2018 ທີ່​ຈະ​ມາ​ເຖິງ​ນີ້, ລັດ​ຈະ​ລົງທຶນ​ເຂົ້າ​ໃສ່​ບັນດາ​ຂະ​ແໜງ​ການ ​ແລະ ທ້ອງ​ຖິ່ນ​ ທັງ​ໝົດ 2.587 ​ໂຄງການ, ລວມມູນ​ຄ່າ 47.021 ຕື້ກວ່າ​ກີບ, ຊຶ່ງຄວາມ​ຕ້ອງການ​ທຶນ ​​ໃນ​ປີ 2018 ​ແມ່ນ 3.506 ຕື້​ກວ່າ​ກີບ. ​ໃນ​ນັ້ນ, ມີ​​ໂຄງການສະ​ເໜີ​ໃໝ່​ 1.168 ​ໂຄງການ, ​ໂຄງການ​ສືບ​ຕໍ່ 892 ​ໂຄງການ, ​ໂຄງການ​ສົມທົບ​ທຶນ 36 ​ໂຄງການ ​ແລະ ​ໂຄງການ​ຊຳລະ​ໜີ້ ມີ 491 ​ໂຄງການ.


ທ່ານ ສຸພັນ ​ແກ້ວ​ມີ​ໄຊ ລັດຖະມົນຕີ​ກະຊວງ ​ແຜນການ ​ແລະ ການ​ລົງທຶນ ​ໄດ້​ລາຍ​ງານ​ໃຫ້​ຮູ້​ໃນ​ກອງ​ປະຊຸມ​ລັດຖະບານ ​ເປີດ​ກວ້າງ ຄັ້ງ​ທີ 1 ປີ 2017 ​ເມື່ອ​ບໍ່​ດົນ​ນີ້​ວ່າ: ​ໂຄງການ​ລົງທຶນ​ດັ່ງກ່າວ, ​ແມ່ນ​ໄດ້​ຈັດ​ແບ່ງ​ຕາມ 5 ປະ​ເພດ ຄື: ​ໂຄງການ​ປະ​ເພດ 1 ທີ່​ມີ​ມູນ​ຄ່າ 400 ຕື້​ຂຶ້ນ​ໄປ ມີ 18 ​ໂຄງການ, ປະ​ເພດ 2 ທີ່ມີ​ມູນ​ຄ່າ​ແຕ່ 200-400 ຕື້​ກີບ ມີ 22 ​ໂຄງການ, ປະ​ເພດ 3 ທີ່ມີມູນ​ຄ່າ 100-200 ຕື້​ກີບ ມີ 138 ​ໂຄງການ, ປະ​ເພດ 4 ທີ່​ມີ​ມູນ​ຄ່າ 20-100 ຕື້​ກີບ ມີ 314 ​ໂຄງການ ​ແລະ ​ໂຄງການ​ປະ​ເພດ 5 ທີ່​ມີ​ມູນ​ຄ່າ 20 ຕື້​ກີບ ​ລົງ​ມາ​ມີ 2.095 ​ໂຄງການ.
ສຳລັບ​ໂຄງການ​ສະ​ເໜີ​ໃໝ່ ປີ 2018 ມາ​ຮອດ​ປັດຈຸບັນ ຍັງ​ມີ​ບາງ​ຂະ​ແໜງ​ການ ​ແລະ ທ້ອງ​ຖິ່ນ​ ຍັງ​ບໍ່​ທັນ​ສົ່ງ​ຄວາມ​ຕ້ອງການ​ຂອງ​ຕົນ​ໃຫ້​ກະຊວງ​​ໄດ້​ໝົດ​ເທື່ອ. ​ແຕ່​ຜ່ານ​ການ​ສັງ​ລວມຕົວ​ຈິງ​ນັ້ນ ​ເຫັນ​ວ່າ​ມີ​ຄວາມ​ຕ້ອງການ​ສູງ​ຫຼາຍ, ສະ​ນັ້ນ ​ເພື່ອ​ບໍ່​ເປັນ​ການ​ສ້າງ​ໜີ້​ໃຫ້​ເພີ່ມ​ຂຶ້ນ. ກະຊວງ​ແຜນການ ​ແລະ ການ​ລົງທຶນ​ ສະ​ເໜີ​ໃຫ້​ພິຈາລະ​ນາ​ໂຄງການ​ທີ່​ເຫັນ​ວ່າ​ມີ​ຄວາມ​ຈຳ​ເປັນ​ເທົ່າ​ນັ້ນ ​ແລະ ບໍ່​ໃຫ້​ສະ​ເລ່ຍຢາຍ​ທຶນ. ສ່ວນ​ໂຄງການ​ກໍ່ສ້າງ​ສຳນັກງານຫ້ອງການ, ​ໂຄງການ​ກໍ່ສ້າງ​ພື້ນຖານ​ໂຄງ​ລ່າງ​, ຖະໜົນ​ຫົນທາງ, ຂົວ, ຊົນລະປະທານ ​ແລະ ​ໂຄງການ​ສາຍ​ສົ່ງ ທີ່​ມີ​ມູນ​ຄ່າ​ສູງ​ໄລຍະ​ຜ່ານ​ມານັ້ນ​ ຄວນ​ສຸມ​ທຶນ​ໃສ່​ໂຄງການ​ສືບ​ຕໍ່​ໃຫ້​ສຳ​ເລັດ. ພ້ອມ​ນີ້, ​ໂຄງການ​ສົ່ງ​ເສີມ​ວິຊາ​ການ ກໍຕ້ອງ​ຈຳ​ແນ​ກ ບໍ່​ໃຫ້​ຂຶ້ນ​ແຜນ​ຊ້ຳ​ຊ້ອນ​ກັບ​ພາກ​ບໍລິຫານ​ປົກກະຕິ.

ທີ່ມາ: ຂ່າວສານປະເທດລາວ. ຂ່າວ: ຈັນທະ​ລອນ

ບົດຄວາມແນະນໍາ

ສະແດງຄວາມຄິດເຫັນ