Senglao content (728×90)

ເປັນລວດລາຍວິຈິດສິນ ຄືກັບມີໃຜໄປແຕ້ມໄວ້

ສະບາຍດີ ບັນດາທ່ານຜູ້ອ່ານທີ່ຮັກແພງທັງຫຼາຍ ພໍຮອດມື້ວັນພະຫັດ ທີມງານເວັບໄຊທາເກັດ ກໍຈະມາແນະນໍາສະຖານທີ່ທ່ອງທ່ຽວ ໃຫ້ບັນດາທ່ານຜູ້ອ່ານໄດ້ຮູ້ຈັກ ແລະ ມື້ນີ້ ຈະມາແນະນໍາໃຫ້ຮູ້ຈັກກັບ The Painted Cliffs.

  The Painted Cliffs ຄືແຫຼ່ງຂອງໜ້າຜາຫີນຊາຍ (sandstone) ທີ່ມີລວດລາຍສວຍງາມຈາກທໍາມະຊາດ ເປັນສະຖານທີ່ທ່ອງທ່ຽວຍອດນິຍົມຂອງເກາະ ມາເຣຍ (Maria) ໂດຍຕັ້ງຢູ່ໃນຮ່ອມພູຂອງເກາະ ແທສມັນ (Tasman) ເມືອງ ແທສເມເນຍ (Tasmania) ປະເທດ ອົດສະຕຣາລີ ເຊິ່ງກ່ອນໜ້ານີ້ ເກາະແຫ່ງນີ້ເຄີຍເປັນເມືອງສໍາລັບນັກໂທດໃນຍຸກລ່າອານານິຄົມຝຣັ່ງ ແຕ່ໃນປັດຈຸບັນນີ້ທົ່ວເກາະເຕັມໄປດ້ວຍທໍາມະຊາດອັນສວຍງາມ ທີ່ອ້ອມຮອບດ້ວຍທະເລ ແລະ ໜ້າຜາຫີນທີ່ມີສີສັນລວດລາຍງົດງາມຢັ່ງຢາຍຢູ່ທົ່ວເກາະ.

The Painted Cliffs ຕັ້ງຢູ່ສຸດຂອງຫາດຊາຍ Hopground ມີຮູບແບບເປັນໜ້າຜາຫີນຂະໜາດໃຫຍ່ທີ່ຖືກຕັດຜ່ານ ລຽບໄປຕາມແຄມຝັ່ງຂອງທະເລ ໂດຍກໍາເນີດຂຶ້ນຈາກແຫຼ່ງນໍ້າໃຕ້ດິນທີ່ໄຫຼຜ່ານຫີນ-ຂີ້ຊາຍ ແລະ ເຊາະເຈື່ອນເອົາຂີ້ຊາຍອອກໄປໝົດ ຈຶ່ງເຫຼືອແຕ່ຫີນທີ່ມີລວດລາຍ ແລະ ສີສັນທີ່ງົດງາມ ມີທັງເສັ້ນສີແດງ, ສີສົ້ມ ແລະ ສີເຫຼືອງ ທີ່ມີຮູບຊົງເປັນວົງມົນ ແລະ ຕາມຮອຍແຕກຂອງຫີນຕ່າງໆ ເປັນເໝືອນດັ່ງສິລະປະທີ່ຖືກສ້າງຂຶ້ນມາ.

ສໍາລັບການເດີນທາງນັກທ່ອງທ່ຽວສາມາດເດີນປ່າໄຮກິ້ງ (Hiking) ເພື່ອຖ່າຍຮູບພາບລວດລາຍຫີນງາມໄດ້ທັງເກາະ ໂດຍຫີນທີ່ເປັນບ່ອນນິຍົມຂອງນັກທ່ອງທ່ຽວ ຈະຢູ່ບໍລິເວນແຄມໜ້າຜາໃກ້ແຄມທະເລ ເຊິ່ງຈະມີລວດລາຍເປັນວົງມົນ ສີເຫຼືອງສະຫຼັບສີນໍ້າຕານ ແລະ ສີແດງ ຈຶ່ງເຮັດໃຫ້ມີຄວາມງົດງາມເໝືອນກັບຄົນໄປແຕ້ມລວດລາຍໃສ່.

ເມື່ອທ່ານໃດມີໂອກາດໄດ້ໄປທ່ຽວທີ່ ປະເທດອົດສະຕຣາລີ ກໍຢ່າລືມໄປທ່ຽວແຫ່ງນີ້ລອງເບິ່ງ ຮັບຮອງວ່າທ່ານສໍາຜັດກັບອາກາດທີ່ສົດຊື່ນ ແລະ ໄດ້ຮູບພາບທີ່ງົດງາມກັບມາ.

ສະແດງຄຳຄິດເຫັນ