Senglao content (728×90)

ລາວ-ຈີນ ຄູ່ຮ່ວມມືແບບຍຸດທະສາດຮອບດ້ານໝັ້ນຄົງຍາວນານ

ລາວ-ຈີນ ຄູ່ຮ່ວມມືແບບຍຸດທະສາດຮອບດ້ານໝັ້ນຄົງຍາວນານ

ດ້ວຍຄວາມພະຍາຍາມຂອງບັນດາການນຳສອງປະເທດ ລາວ-ຈີນ ໃນແຕ່ລະໄລຍະ ໄດ້ເຮັດໃຫ້ສາຍພົວພັນຮ່ວມມືມິດຕະພາບອັນເປັນມູນເຊື້ອນັ້ນ ຍິ່ງນັບມື້ເຕີບໃຫຍ່ຂະຫຍາຍຕົວ ແລະ ເກີດດອກອອກຜົນເປັນກ້າວໆມາ, ທ່າມກາງຂະບວນການວິວັດ ແຫ່ງການຕໍ່ສູ້ເພື່ອຄວາມເປັນເອກະລາດແຫ່ງຊາດ, ປົກປັກຮັກສາ ແລະ ສ້າງສາພັດທະນາປະເທດຊາດ ເຊິ່ງສອງຝ່າຍລ້ວນແຕ່ ໄດ້ໃຫ້ຄວາມສຳຄັນຕໍ່ການສະໜັບສະໜູນອູ້ມຊູຊ່ວຍເຫຼືອເຊິ່ງກັນ ແລະ ກັນ ຕະຫຼອດມາ. ເຫດການສຳຄັນທາງປະຫວັດ ສາດແຫ່ງການພົວພັນ ແມ່ນການສ້າງຕັ້ງສາຍພົວພັນການທູດລະຫວ່າງສອງປະເທດ ໃນວັນທີ 25 ເມສາ 1961 ເຊິ່ງເປັນຈຸດເລີ່ມຕົ້ນແຫ່ງການພົວພັນທີ່ໄປຕາມຫຼັກການຂອງການພົວພັນລະຫວ່າງສອງຊາດ ແລະ ນັບແຕ່ມື້ນັ້ນເປັນຕົ້ນມາ ການພົວພັນ ຂອງສອງປະເທດກໍໄດ້ຮັບການເພີ່ມພູນຄູນສ້າງໂດຍການນຳພັກ, ລັດ ກໍຄືປວງຊົນທັງສອງຊາດ ນັບມື້ເຕີບໃຫຍ່ຂະຫຍາຍ ຕົວຕໍ່ເນື່ອງ ໄປຕາມຍຸກສະໄໝ, ສອງຝ່າຍລ້ວນແຕ່ມີຜົນປະໂຫຍດຮ່ວມກັນ. ເຫດການສຳຄັນທາງປະຫວັດອັນສຳຄັນໜຶ່ງ ແມ່ນໃນວັນທີ 9 ກັນຍາ 2009, ຜູ້ນຳສອງປະເທດ ໄດ້ຕົກລົງຍົກລະດັບການພົວພັນ ມາເປັນການພົວພັນ ຄູ່ຮ່ວມມືຍຸດທະສາດຮອບດ້ານໝັ້ນຄົງຍາວນານ ເຊິ່ງມັນໄດ້ກາຍເປັນຂີດໝາຍໜຶ່ງທີ່ເຮັດໃຫ້ການພົວພັນລະຫວ່າງ ສາທາລະນະລັດ ປະຊາທິປະໄຕ ປະຊາຊົນລາວ ກັບ ສາທາລະນະລັດ ປະຊາຊົນຈີນ ໄດ້ກ້າວເຂົ້າສູ່ລວງເລິກ ແລະ ເກີດດອກອອກຜົນໃນຫຼາຍດ້ານຕື່ມອີກ. ຕະຫຼອດໄລຍະ 55 ປີ ຜ່ານມາ, ການພົວພັນຮ່ວມມືລະຫວ່າງສາທາລະນະລັດ ປະຊາທິປະໄຕ ປະຊາຊົນລາວ ກັບ ສາທາລະນະລັດ ປະຊາຊົນຈີນ ໄດ້ຮັບການເສີມຂະຫຍາຍຢ່າງບໍ່ຢຸດຢັ້ງ ແລະ ເກີດດອກອອກຜົນໃນວຽກງານຕົວຈິງ ຫຼາຍໆ ດ້ານ, ນັບທັງດ້ານການເມືອງ-ຄວາມໝັ້ນຄົງ, ເສດຖະກິດ-ການຄ້າ-ການລົງທຶນ ແລະ ວັດທະນະທຳ-ສັງຄົມ ລ້ວນແຕ່ໄດ້ຮັບ ໝາກຜົນຫລາຍຂຶ້ນ ເຊິ່ງອັນພິເສດ ແລະ ພົ້ນເດັ່ນແມ່ນຜົນສຳເລັດໂຄງການຮ່ວມມື ສົ່ງດາວທຽມລາວ ດວງທຳອິດຂຶ້ນສູ່ວົງໂຄຈອນໂລກ ເມື່ອທ້າຍປີ 2015 ແລະ ໂຄງການກໍ່ສ້າງທາງລົດໄຟ ລາວ-ຈີນ ທີ່ໄດ້ວາງສິລາລຶກເປີດໂຄງການໄປແລ້ວ. ເຫດການປະຫວັດສາດສຳຄັນແຫ່ງການພົວພັນຮ່ວມມືລະຫວ່າງສອງປະເທດ ລາວ-ຈີນ ອັນໃໝ່ໆແມ່ນການເດີນທາງ ໄປຢ້ຽມຢາມສັນຖະວະໄມຕີ ສປ ຈີນ ຢ່າງເປັນທາງການຂອງ ສະຫາຍ ບຸນຍັງ ວໍລະຈິດ ເລຂາທິການໃຫຍ່ຄະນະ ບໍລິຫານ ງານສູນກາງພັກປະຊາຊົນປະຕິວັດລາວ ພ້ອມດ້ວຍຄະນະ ໃນໄລຍະວັນທີ 3-5 ພຶດສະພາ 2016 ເຊິ່ງໄດ້ຮັບການຕ້ອນຮັບຢ່າງອົບອຸ່ນ, ສະໜິດສະໜົມ ແລະ ສົມກຽດ ຈາກສະຫາຍ ສີຈິນຜິງ ເລຂາທິການໃຫຍ່ຄະນະບໍລິຫານງານສູນກາງພັກ ກອມມູນິດຈີນ, ປະທານປະເທດແຫ່ງ ສປ ຈີນ ພ້ອມດ້ວຍຜູ້ນຳພັກ-ລັດ ແລະ ປະຊາຊົນຈີນ. ໃນໂອກາດນີ້ ການນຳຂັ້ນ ສູງຂອງສອງປະເທດໄດ້ຢືນຢັນວ່າ: ລາວ-ຈີນ ໃນຖານະເປັນປະເທດສັງຄົມນິຍົມ ເພື່ອນບ້ານໃກ້ເຮືອນຄຽງທີ່ເປັນຄູ່ຮ່ວມຊະຕາກຳທີ່ມີຄວາມໝາຍຍຸດທະສາດ ຈະສືບຕໍ່ຢຶດໜັ້ນຕາມທິດໜັ້ນຄົງຍາວນານ, ເພື່ອນບ້ານມິດຕະພາບ, ໄວ້ເນື້ອເຊື່ອໃຈກັນ, ຮ່ວມມືຮອບດ້ານບົນຈິດໃຈແຫ່ງການເປັນບ້ານໃກ້ເຮືອນຄຽງທີ່ດີ, ເພື່ອນມິດທີ່ດີ, ສະຫາຍທີ່ດີ ແລະ ຄູ່ຮ່ວມມືທີ່ດີ, ລົງເລິກການຮ່ວມມືແລກປ່ຽນໃນຂົງເຂດຕ່າງໆຢ່າງຮອບດ້ານ, ຊຸກຍູ້ສາຍພົວພັນແບບຄູ່ຮ່ວມຍຸດທະສາດຮອບດ້ານ ລາວ-ຈີນ ທີ່ຕ່າງຝ່າຍຕ່າງມີຜົນປະໂຫຍດ, ຊ່ວຍເຫຼືອກັນ ແລະ ເຊື່ອໜັ້ນກັນໃນລະດັບສູງໃຫ້ກ້າວຂຶ້ນສູ່ລະດັບໃໝ່ຢ່າງບໍ່ຢຸດຢັ້ງ, ປະກອບສ່ວນອັນສໍາຄັນເຂົ້າໃນການປົກປັກຮັກສາສັນຕິພາບ, ຄວາມໜັ້ນຄົງ, ຄວາມຈະເລີນຮຸ່ງເຮືອງ ແລະ ການພັດທະນາພາກພື້ນ ແລະ ໃນໂລກ; ສືບຕໍ່ເສີມຂະຫຍາຍການຮ່ວມມືໃນວຽກງານກໍ່ສ້າງພັກ, ສ້າງສັງຄົມນິຍົມ, ການແລກປ່ຽນທິດສະດີ ແລະ ຈັດກອງປະຊຸມສຳມະນາທິດສະດີປະຈຳປີ ລະຫວ່າງພັກ, ການແລກປ່ຽນຄະນະພະນັກງານໄປທັດສະນະສຶກສາ ແລະ ເຝິກອົບຮົມ, ໃນຂົງເຂດຕ່າງໆ ລະຫວ່າງອົງການຈັດຕັ້ງອ້ອມຂ້າງສູນກາງ, ຂັ້ນທ້ອງຖິ່ນ ແລະ ອົງການຈັດຕັ້ງມະຫາຊົນຂອງສອງພັກ ໃຫ້ກ້າວສູ່ທັງທາງເລິກ ແລະ ທາງກວ້າງ, ຍົກສູງຄຸນນະພາບ ແລະ ລະດັບການຮ່ວມມືຕາມທິດແຫ່ງການເພີ່ມທະວີການຮ່ວມມືຍຸດທະສາດຮອບດ້ານຍາວນານ ແລະ ພົວພັນຕາມທິດ 4 ດີ. ສອງຝ່າຍຕີລາຄາສູງຕໍ່ການຮ່ວມມືຢ່າງມີປະສິດທິຜົນຂອງສອງຝ່າຍໃນວຽກງານພາກພື້ນ ແລະ ສາກົນ, ທັງໄດ້ຢືນຢັນຄືນຈະສືບຕໍ່ເພີ່ມທະວີ ການປະ ສານງານ ແລະ ສົມທົບກັນໃນຂອບກົນໄກພະຫຸພາຄີຕ່າງໆ ເຊັ່ນ : ອົງການສະຫະປະຊາຊາດ, ອົງການການຄ້າໂລກ, ກອງປະຊຸມອາຊີ-ເອີຣົບ, ກອງປະຊຸມສຸດຍອດອາຊີຕາເວັນອອກ, ຈີນ-ອາຊຽນ, ອາຊຽນຍີ່ປຸ່ນ, ເວທີປືກສາຫາລືຂົງເຂດອາຊຽນ, ກົນໄກແມ່ນ້ຳຂອງ-ແມ່ນ້ຳລ້ານຊ້າງ, ການຮ່ວມມືໃນອະນຸພາກພື້ນແມ່ນໍ້າຂອງ ແລະ ກົນໄກຮ່ວມມືອື່ນໆ ເພື່ອປະກອບສ່ວນສຳຄັນໃນການປົກປັກຮັກສາສັນຕິພາບ,ຄວາມໜັ້ນຄົງ ແລະ ການພັດທະນາຂອງພາກພື້ນ ແລະ ສາກົນ. ໃນໂອກາດຢ້ຽມຢາມສປ ຈີນ ຄັ້ງນີ້ ສອງຝ່າຍໄດ້ລົງນາມແຜນການຮ່ວມມືລະຫວ່າງ ພັກປະຊາຊົນປະຕິວັດລາວ ແລະ ພັກກອມມູນິດຈີນ ໄລຍະ 2016-2020, ບົດບັນທຶກຄວາມເຂົ້າໃຈກ່ຽວກັບແຜນແມ່ບົດຂອງແຜນການຮ່ວມມືສອງຝ່າຍ ສຳລັບຂໍ້ລິເລີ່ມໜຶ່ງແລວທາງ, ໜຶ່ງເສັ້ນທາງ, ບົດບັນທຶກຄວາມເຂົ້າ ໃຈກ່ຽວກັບການຊຸກຍູ້ການຮ່ວມມື ໃນຂະແໜງການຜະລິດ, ການລົງທຶນ ແລະ ເອກະສານຮ່ວມມືອື່ນໆ ອີກຈຳນວນໜຶ່ງ. ການຢ້ຽມຢາມສັນຖະວະໄມຕີ ສປ ຈີນ ຢ່າງເປັນທາງການຂອງຄະນະຜູ້ແທນຂັ້ນສູງຂອງ ສປປ ລາວ ນຳໂດຍ ສະຫາຍ ບຸນຍັງ ວໍລະຈິດ ເລຂາທິການໃຫຍ່ຄະນະບໍລິຫານງານສູນກາງປະຊາຊົນພັກປະຕິວັດລາວ, ປະທານປະເທດ ໃນຄັ້ງນີ້ ເປັນການຢັ້ງຢືນຄືນອີກເທື່ອໜຶ່ງໃນການເພີ່ມທະວີ ແລະ ເສີມຂະຫຍາຍສາຍພົວພັນຄູ່ຮ່ວມ ມືແບບຍຸດທະສາດຮອບ ດ້ານໝັ້ນຄົງຍາວນານ ລະຫວ່າງສອງປະເທດ ນັບມື້ເຂົ້າສູ່ລວງເລິກ ແລະ ຈະນຳເອົາຜົນປະໂຫຍດມາສູ່ສອງປະເທດສືບຕໍ່ໄປຢ່າງບໍ່ຢຸດຢັ້ງ.

5

Comments