Senglao content (728×90)

ກອງປະຊຸມສະໄໝ ສາມັນ ເທື່ອທີ 4 ຈະມີຂຶ້ນໃນວັນທີ 16 ຕຸລານີ້!

ສະພາ​ແຫ່ງ​ຊາດ ຈະ​ດຳ​ເນີນ​ກອງ​ປະຊຸມ​ສະ​ໄໝ​ສາມັນ​ເທື່ອ​ທີ 4 ຂອງ​ສະພາ​ແຫ່ງ​ຊາດ​ຊຸດ​ທີ VIII ​ຕັ້ງແຕ່​ວັນ​ທີ 16 ຕຸລາ ​ເຖິງ​ວັນ​ທີ 17 ພະຈິກ 2017 ນີ້ ເປັນເວລາ 1 ເດືອນ ​ເພື່ອຮັບ​ຟັງ​ການ​ລາຍ​ງານ, ​ພິຈາລະນາ ​ແລະ ຮັບຮອງ​ເອົາ​ບັນຫາ​ສຳຄັນຕ່າງໆ​ ຂອງ​ຊາດ.
​ ທ່ານ ນາງ​ ສວນ​ສະຫວັນ ວິ​ຍະ​ເກດ ຄະນະ​ປະຈຳ​ສະພາ​ແຫ່ງຊາດ, ​ເລຂາທິການ​ສະພາ​ແຫ່ງ​ຊາດ ​ໄດ້​ຖະ​ແຫຼງຂ່າວ​ຕໍ່​ສື່​ມວນ​ຊົນ ໃນ​ວັນ​ທີ 11 ຕຸລາ 2017 ນີ້ວ່າ: ກອງ​ປະຊຸມ​ສະ​ໄໝ​ສາມັນ​ເທື່ອ​ທີ 4 ຂອງ​ສະພາ​ແຫ່ງ​ຊາດ​ຊຸດ​ທີ VIII ຈະ​ໄຂ​ຂຶ້ນ​ໃນ​ຕອນ​ເຊົ້າ ​ວັນ​ຈັນ ​ທີ 16 ຕຸລາ 2017 ທີ່​ຫໍ​ປະຊຸມ​ສະພາ​ແຫ່ງ​ຊາດ (ຫຼັກ 6) ​ແລະ ຈະ​ດຳ​ເນີນ​ໄປ​ຈົນ​ເຖິງ​ວັນ​ທີ 17 ພະຈິກ 2017 ​ເຊິ່ງກອງ​ປະຊຸມ​ຈະ​ໄດ້​ຮັບ​ຟັງ​ການ​ລາຍ​ງານ​ ກ່ຽວ​ກັບ​ການຈັດ​ຕັ້ງ​ປະຕິບັດ ​ແຜນ​ພັດທະນາ​ເສດຖະກິດ-ສັງຄົມ, ​ແຜນ​ງົບປະມານ​ແຫ່ງ​ລັດ ​ແລະ ​ແຜນ​ເງິນຕາ ປະຈຳ​ປີ 2017 ​ແລະ ​ແຜນການ​ປີ 2018;

– ບົດ​ລາຍ​ງານ​ການຈັດ​ຕັ້ງ​ປະຕິບັດ​ວຽກ​ງານ​ທ່ອງ​ທ່ຽວ ​ໃນ​ຊຸມ​ປີຜ່ານມາ ​ແລະ ທິດ​ທາງ​ແຜນການ​ໃນ​ປີ 2018,

– ບົດ​ລາຍ​ງານ​ການຈັດ​ຕັ້ງ​ປະຕິບັດ​ແຜນການ ​ປະຈຳ​ປີ 2017 ​ແລະ ທິດ​ທາງ​ແຜນການ ປີ 2018 ຂອງ​ສະພາ​ແຫ່ງ​ຊາດ;

– ບົດ​ລາຍ​ງານ​ກາ​ນຈັດ​ຕັ້ງ​ປະຕິບັດ​ ແຜນການ​ເຄື່ອນ​ໄຫວ​ວຽ​ກງານ​ປະຈຳ​ປີ 2017 ​ແລະ ​ແຜນການ ປີ 2018 ຂອງ​ອົງການ​ກວດ​ສອບ​ແຫ່ງ​ລັດ;

– ບົດ​ລາຍ​ງານ​ຜົນ​ການກວດ​ສອບ ​ບົດ​ສະຫລຸບ​ຂາດ​ຕົວ ການຈັດ​ຕັ້ງ​ປະຕິບັດ​ແຜນ​ງົບປະມານ​ແຫ່ງ​ລັດ ສົກ​ປີ 2015-2016;

– ບົດ​ລາຍ​ງານ​ອົງການ​ກວດກາ​ລັດຖະບານ ກ່ຽວ​ກັບ​ຜົນ​ການ​ກວດກາ​ ຕາມ​ຜົນ​ການກວດ​ສອບ ການຈັດ​ຕັ້ງ​ປະຕິບັດ​ແຜນ​ງົບປະມານ​ແຫ່ງ​ລັດ ສົກ​ປີ 2013-2014 ​ແລະ ສົກ​ປີ 2014-2015;

– ບົດ​ລາຍ​ງານ​ການຈັດ​ຕັ້ງ​ປະຕິບັດ ​ແຜນການ​ເຄື່ອນ​ໄຫວ​ວຽກ​ງານ​ ປະຈຳ​ປີ 2017 ​ແລະ ​ແຜນການ​ປີ 2018 ຂອງ​ອົງການ​ໄອ​ຍະ​ການ​ປະຊາຊົນ ​ແລະ ສານ​ປະຊາຊົນ​ສູງ​ສຸດ;

–  ບົດ​ລາຍ​ງານ​ຂອງ​ກະ​ຊວງ​ຍຸຕິ​ທຳ ກ່ຽວ​ກັບ​ການຈັດ​ຕັ້ງ​ປະຕິບັດ​ຄຳ​ຕັດສິນ​ຂອງ​ສານ ​ເຊິ່ງ​​ໃຊ້​ໄດ້​ຢ່າງ​ເດັດຂາດ​ ໃນ​ໄລຍະ​ຜ່ານ​ມາ ​ແລະ ທິດ​ທາງ​ແກ້​ໄຂ​ ໃນ​ຕໍ່ໜ້າ ​ແລະ ບັນຫາ​ສຳຄັນ​ອື່ນໆ ​ຕາມ​ການສະ​ເໜີ​ຂອງ​ສະພາ​ແຫ່ງ​ຊາດ ​ແລະ ລັດຖະບານ.
ພ້ອມ​ນີ້, ກອງ​ປະຊຸມ​ຍັງ​ຈະ​ໄດ້​ພິຈາລະນາ ​ແລະ ຮັບຮອງ​ເອົາ​ຮ່າງ​ກົດໝາຍ ​ຈຳນວນ 16 ສະ ບັບ ​ໃນ​ນັ້ນ, ຮ່າງ​ກົດໝາຍ​ສ້າງ​ໃໝ່ 9 ສະບັບ ​ແລະ ຮ່າງ​ກົດໝາຍ​ປັບປຸງ 7 ສະບັບ, ເຊິ່ງກວມ​ຢູ່​ໃນ​ຂົງ​ເຂດ​ເສດຖະກິດ ມີ 6 ສະບັບ, ການ​ເງິນ 4 ສະບັບ, ວັດທະນະທຳ-ສັງຄົມ 3 ສະບັບ, ຂົງ​ເຂດ​ການ​ປົກຄອງ ​ແລະ ຍຸຕິ​ທຳ 3 ສະບັບ.
​ໃນ​ໄລຍະ​ດຳ​ເນີນ​ກອງ​ປະຊຸມ​ສະພາ​ແຫ່ງ​ຊາດ, ຄະນະ​ເລຂາທິການ ໄດ້​ຈັດ​ຕັ້ງ​ໜ່ວຍ​ງານ​ຮັບຜິດ ຊອບໂທລະສັບ​ສາຍ​ດ່ວນ ​ເພື່ອ​ຮັບ​ຟັງ​ຄຳ​ຄິດ​ຄຳ​ເຫັນ ​ແລະ ຄຳ​ສະ​ເໜີ​ໂດຍ​ກົງ​ ຈາກ​ປະຊາຊົນທີ່​ຈະ​ສົ່ງ​ໄປ​ຍັງ​ກອງ​ປະຊຸມ​, ເຊິ່ງບັນດາ​ທ່ານ​ສາມາດ ​ສົ່ງ​ຄຳ​ຄິດ​ຄຳ​ເຫັນ ​ແລະ ຄຳ​ສະ​ເໜີ ​ໄປ​ຍັງ​ກອງ​ປະຊຸມ​ໄດ້​, ໂດຍ​ຜ່ານ​ໂທລະສັບ​ບໍ່​ເສຍ​ຄ່າ ໝາຍ​ເລກ 156, ​ໂທລະ​ສານ 021 413528, ສົ່ງ​ເປັນ​ຈົດໝາຍ​ທາງ​ໄປສະນີ ຕູ້​ ປນ. 662 ຫຼື ທາງ​ອີ​ເມ​ວ na [email protected]
ທີ່ມາ: ຂ່າວສານປະເທດລາວ. ຂ່າວ: ຈັນທະ​ລອນ; ພາບ: ສະຫວາດ

ສະແດງຄຳຄິດເຫັນ