Senglao content (728×90)

12 ຕຸລາ ວັນປະກາດເອກະລາດ ຄົບຮອບ 72 ປີ (12 ຕຸລາ 1945-12 ຕຸລາ 2017)

ເນື່ອງ​ໃນ​ໂອກາດຄົບຮອບ 72 ປີ ວັນ​ປະກາດເອກະລາດ 12 ຕຸລາ 1945-12 ຕຸລາ 2017, ແມ່ນ​ວັນທີ່ມີຄວາມໝາຍສຳຄັນທາງປະຫວັດສາດຂອງຊາດລາວເຮົາ ທີ່ເປັນວັນແຫ່ງການປະກາ​ດ​ເອກະລາດຊາດ​ລາວຕໍ່ໂລກ ເພື່ອຮັບຮູ້ວ່າ ​ຜືນແຜ່ນດິນແຫ່ງນີ້​ ແມ່ນປະເທດລາວ ແມ່ນຄົນລາວເປັນເຈົ້າຂອງປະເທດຊາດ, ອຳນາດ​ອະທິປະ​ໄຕ ແລະ ຜືນແຜ່ນອັນຄົບຖ້ວນ. ​

ບັນດາເຫດການສຳຄັນ ຢູ່ພາຍນອກ ແລະ ພາຍໃນ ທີ່ສ້າງເງື່ອນໄຂ ໃຫ້ແກ່ການປະກາດ ເອກະລາດ 12 ຕຸລາ ເຊິ່ງວັນດັ່ງກ່າວ ໄດ້ເປັນຂີດໝາຍແຫ່ງໄຊຊະນະ ຂອງການຕໍ່ສູ້ອັນພິລະອາດຫານ ດ້ວຍຄວາມສາມັກຄີ ແລະ ການເສຍສະຫຼະ ອັນໃຫຍ່ຫຼວງຂອງກອງທັບ ແລະ ປະຊາຊົນເຮົາ ພາຍໃຕ້ການນຳພາ ຂອງພັກປະຊາຊົນ ປະຕິວັດລາວ, ການປະກາດເອກະລາດ 12 ຕຸລາ 1945 ໄດ້ເຮັດໃຫ້ຊາວໂລກໄດ້ຮັບຮູ້ ຄວາມເປັນຊາດລາວຂອງພວກເຮົາ ກໍຄື ຮັບຮູ້ອະທິປະໄຕຂອງຊາດລາວ, ເຂດນ້ຳແດນດິນຂອງປະເທດລາວ, ພ້ອມກັນນັ້ນ ກໍຮັບຮູ້ລັດຖະບານຊົ່ວຄາວຂອງລາວ ແລະ ຮັບຮູ້ວ່າ ຊາດລາວ-ຄົນລາວ ກໍເປັນຄົນທີ່ມີກຽດສັກສີ ເໝືອນກັບຄົນຊາດອື່ນ ແລະ ຢາກມີອິດສະຫຼະພາບ. ຍ້ອນແນວນັ້ນ ພວກເຮົາຈຶ່ງຖືເອົາ ວັນປະກາດເອກະລາດ 12 ຕຸລາ ເປັນວັນປະຫວັດສາດ ທີ່ສຳຄັນຂອງຊາດ ເປັນວັນແຫ່ງຄວາມເອກອ້າງທະນົງໃຈ ຕໍ່ຄວາມອາດຫານຊານໄຊ ໃນການຕໍ່ສູ້ “ຍອມຕາຍດີກວ່າເປັນຂ້ອຍຂ້າ; ຕາຍເພື່ອເອກະລາດ ດີກວ່າຢູ່ພາຍໃຕ້ ແອກປົກຄອງຂອງຕ່າງຊາດ” ຈາກນັ້ນມາ ນ້ຳໃຈວັນທີ 12 ຕຸລາ ຈຶ່ງກາຍເປັນມູນເຊື້ອ ແຫ່ງການຕໍ່ສູ້ມີໄຊ ຂອງຄົນລາວຜູ້ຮັກຊາດ ພາຍໃຕ້ການນຳພາຂອງພັກ, ສາມາດປົດປ່ອຍປະເທດຊາດ ໄດ້ຢ່າງສົມບູນ ແລະ ໄດ້ສະຖາປານາ ສາທາລະນະລັດ ປະຊາທິປະໄຕ ປະຊາຊົນລາວ ໃນວັນທີ 2 ທັນວາ 1975.

ຕະຫຼອດໄລຍະ 72 ປີ ຜ່ານມາ ປະຊາຊົນ​ລາວ​ບັນດາ​ເຜົ່າ ມີ​ຄວາມ​ເອກອ້າງທະນົງໃຈ ຕໍ່​ຜົນສຳ​ເລັດ​ອັນ​ໃຫຍ່​ຫຼວງ ​ທີ່​ ໄດ້ປະກອບສ່ວນອັນສຳຄັນ ແລະ ມີຜົນງານອັນພົ້ນເດັ່ນ​ເຂົ້າ ໃນພາລະກິດ ແຫ່ງການຕໍ່ສູ້ກູ້ຊາດ ກໍ​ຄື​ ໄລຍະ​ແຫ່ງ​ການ​ປົກ​ປັກຮັກສາ ແລະ ສ້າງສາພັດທະນາປະເທດຊາດ, ​ໂດຍພາຍໃຕ້ການຊີ້​ນຳ-ນຳພາ ຂອງພັກປະຊາຊົນ ປະຕິວັດລາວ , ຄຽງ​ຄູ່​ກັບປະຊາຊົນລາວບັນດາເຜົ່າ ແລະ ທຸກຂະແໜງການ ໃນທົ່ວປະເທດ ທັງ​ໃນ​ສູນ​ກາງ ​ແລະ ທ້ອງ​ຖິ່ນ ໄດ້ສາມັກຄີກັນເປັນປຶກແຜ່ນແໜ້ນໜາ ເຂົ້າຮ່ວມໃນຂະບວນການຈັດຕັ້ງປະຕິບັດແນວທາງນະໂຍບາຍ ຂອງພັກ-ລັດເຮົາ ໃນແຕ່ລະໄລຍະ ດ້ວຍ​ຄວາມ​ຕື່ນ​ຕົວ, ​ເປັນ​ເຈົ້າ​ການ, ມີ​ຄວາມ​ຮັບຜິດຊອບ​ຮ່ວມ​ກັນ ​ແລະ ມີ​ຜົນສຳ​ເລັດ​ດີ​ເປັນ​ກ້າວໆ​ມາ.

 

Comments