Senglao content (728×90)

ບຸນຊ່ວງເຮືອ ບຶງທາດຫຼວງຈະຈັດຂຶ້ນວັນທີ 18-22 ຕຸລານີ້

ນວ ກຽມຈັດການຊ່ວງເຮືອທີ່ບຶງທາດຫລວງຄັ້ງທໍາອິດຂຶ້ນເພື່ອເປັນການອະນຸລັກ, ຮັກສາຮີດຄອງປະເພນີອັນດີງາມຂອງຊາດໄວ້ໃຫ້ຄຽງຄູ່ກັບລູກຫລານຕະຫລອດໄປ ເຊິ່ງຈະຈັດຂຶ້ນໃນ 18-22 ເດືອນຕຸລາ 2017 ທີ່ຈະມາເຖິງນີ້ ໂດຍຊີງຂັນເງິນໜັກ 1 ກິໂລພ້ອມດ້ວຍເງິນສົດຫລາຍລ້ານກີບ.

ຕາມການຖະແຫລງຂ່າວຂອງທ່ານ ຖະໜອມ ທໍາທອງ ເຈົ້າເມືອງໄຊເສດຖາ ນະຄອນຫລວງວຽງຈັນໃນວັນທີ 11 ຕຸລາ 2017 ທີ່ບຶງທາດຫລວງໃຫ້ຮູ້ວ່າ: ພາຍຫລັງສໍາເລັດບຸນຊ່ວງເຮືອອອກພັນສາປະວໍລະນາປະຈໍາ 2560 ແລ້ວ ທາງຄະນະກໍາມະການເມືອງໄຊເສດຖາກໍຄືນະຄອນຫລວງວຽງຈັນ ໄດ້ຕົກລົງຈັດການຊ່ວງເຮືອບຶງທາດຫລວງຂຶ້ນ, ທັງນີ້ເພື່ອເປັນການໂຄສະນາ, ສົ່ງເສີມ, ວາງສະແດງ ແລະ ຂາຍຜະລິດຕະພັນສິນຄ້າລາວໃຫ້ກວ້າງຂວາງພ້ອມທັງສ້າງຄວາມມ່ວນຊື່ນໃຫ້ຊາວນະຄອນຫລວງວຽງຈັນ.

ການແຂ່ງຂັນຄັ້ງນີ້ມີ 4 ປະເພດເຮືອເຊິ່ງປະກອບມີ ເຮືອປະເພນີຊາຍ-ຍິງ 55 ສີພາຍ, ເຮືອສູດຊາຍ 55 ສີພາຍ, ເຮືອກິລາ 12 ສີພາຍ ຊາຍ ແລະ ເຮືອເຈດສະກີ້ຊາຍ; ສໍາລັບລາງວັນປະເພດເຮືອປະເພນີຊາຍ-ຍິງ ແລະ ປະເພດເຮືອສູດຊາຍ ອັນດັບທີ 1 ຈະໄດ້ຮັບຂັນເງິນນໍ້າໜັກ 1 ກິໂລ ພ້ອມດ້ວຍເງິນສົດ 25 ລ້ານກີບ, ອັນດັບທີ 2 ຈະໄດ້ຮັບຂັນເງິນ 0.75 ກິໂລ ພ້ອມເງິນສົດ 15 ລ້ານກີບ, ອັນດັບທີ 3 ຈະໄດ້ຮັບຂັນເງິນ 0.5 ກິໂລພ້ອມເງິນສົດ 10 ລ້ານກີບ, ອັນດັບທີ 4 ຈະໄດ້ຮັບເງິນສົດ 8 ລ້ານກີບ; ຂະນະປະເພດເຮືອກິລາ 12 ສີພາຍ ອັນດັບທີ 1 ຈະໄດ້ຮັບໂລ້ 1ໜ່ວຍພ້ອມເງິນສົດ 8 ລ້ານກີບ, ອັນດັບທີ 2 ຈະໄດ້ຮັບໂລ້ 1 ໜ່ວຍພ້ອມເງິນສົດ 6 ລ້ານກີບ, ອັນດັບທີ 3 ຈະໄດ້ຮັບໂລ້ 1 ໜ່ວຍພ້ອມເງິນສົດ 4 ລ້ານກີບ, ອັນດັບທີ 4 ຈະໄດ້ຮັບເງິນສົດ 3 ລ້ານກີບ.

ມາຮອດປັດຈຸບັນມີເຮືອທີສະໝັກເຂົ້າແຂ່ງຂັນຈໍານວນ 60 ລໍາ ເຊິ່ງປະກອບມີ ເຮືອປະເພນີຊາຍ 9 ລໍາ, ຍິງ 2 ລໍາ, ເຮືອສູດ 6 ລໍາ, ເຮືອກິລາ 12 ສີພາຍ 10 ລໍາ, ເຮືອເຈດສະກີ້ 33 ລໍາ.

Comments