LV-IMEX
Senglao content (728×90)

ທ່ອງທ່ຽວບຸນເຂົ້າໄກ່ນ້ອຍ ທີ່ແຂວງຊຽງຂວາງ ກິດຈະກຳໜຶ່ງຕ້ອນຮັບປີທ່ອງທ່ຽວລາວ 2018

ງານບຸນມະໂຫລານເຂົ້າໄກ່ນ້ອຍ ໄດ້ຈັດຂຶ້ນຄັ້ງທຳອິດ ໃນເດືອນທັນວາ ປີ 2014 ທີ່ແຂວງຊຽງຂວາງ. ເຊິ່ງໄດ້ຈັດໃຫ້ເປັນງານບຸນທີ່ສຳຄັນ ເພື່ອເປັນການສົ່ງເສີມການທ່ອງທ່ຽວຂອງແຂວງ, ສົ່ງເສີມ ການປູກເຂົ້າໄກ່ນ້ອຍ ກາຍສິນຄ້າໃຫ້ຫຼາຍຂຶ້ນ ແລະ ເປັນໂອກາດໜຶ່ງໃຫ້ຊາວກະສິກອນ, ນັກທຸລະກິດທັງພາຍໃນ ແລະ ຕ່າງແຂວງ ໄດ້ມີໂອກາດເຂົ້າເຖິງຕະຫຼາດຂອງເຂົ້າໄກ່ນ້ອຍລວມທັງເປັນການຈັດງານຕ້ອນຮັບປີທ່ອງທ່ຽວລາວ 2018 ຕື່ມອີກ.

ເຂົ້າໄກ່ນ້ອຍເປັນເຂົ້າໜຽວພື້ນເມືອງລາວ ທີ່ມີກິ່ນຫອມ ລົດຊາດແຊບ ແລະ ມີລັກສະນະພິເສດກວ່າ ເຂົ້ໜຽວທົ່ວໆ ໄປ ຂອງທາງແຂວງຊຽງຂວາງ ແລະ ຫົວພັນ ມີ 5 ສາຍພັນ ຄື: ເຂົ້າໄກ່ນ້ອຍດໍາ, ແດງ, ຂາວ, ລາຍ ແລະ ເຂົ້າໄກ່ນ້ອຍເຫຼືອງ. ເຊິ່ງໄດ້ຈົດທະບຽນລິຂະສິດແລ້ວ ໃນວັນທີ 21 ເມສາ 2017 ທີ່ຜ່ານມາ. 

ງານເທດສະການບຸນເຂົ້າໄກ່ນ້ອຍ ປີນີ້ເປັນຄັ້ງທີ 4 ຈະຈັດຂຶ້ນໃນວັນທີ 18-20 ພະຈິກ 2017 ເປັນຕົ້ນໄປຕໍ່ດ້ວຍບຸນກິນຈຽງຂອງເຜົ່າມົ້ງ ຈົນເຖິງທ້າຍເດືອນທັນວາ 2017 ເພື່ອເປັນສ່ວນໜຶ່ງຂອງການສົ່ງເສີມຜູ້ຜະລິດ ແລະ ທັງເປັນການດຶງດູດນັກທ່ອງທ່ຽວໃຫ້ເຂົ້າມາທ່ຽວນັບມື້ຫຼາຍຂຶ້ນ ໂດຍຈັດຂຶ້ນທີ່ສວນພູຄໍາ ບ້ານໂພນສະຫວັນໄຊ, ເມືອງແປກ ແຂວງຊຽງ.

ໃນປີຜ່ານມາເຊິ່ງງານເທສະການບຸນເຂົ້າໄກ່ນ້ອຍ ໄດ້ຮັບຄວາມສົນໃຈຈາກມວນຊົນຫຼາຍກວ່າ 1 ແສນ ແລະ ຄາດວ່າປີນີ້ຈະມີສູງເຖິງ 2 ແສນຄົນ. ສຳລັບ 9​ ເດືອນຂອງ​ປີ 2017 ມີມີແຂກມາທ່ຽວຊຽງຂວາງ​ປະມານ 82,000 ຄົນ ​ແລະ ຄາດ​ວ່າໃນ​ປີທ່ອງທ່ຽວລາວ 2018 ຈຳນວນ​ນັກ​ທ່ອງ​ທ່ຽວຈະ​ມີ​ເຖິງ 100,000 ກວ່າ​ຄົນ.
ຊຽງຂວາງໄດ້ຖືເອົາວຽກງານກະສິກຳຕິດພັນກັບການສົ່ງເສີມການທ່ອງທ່ຽວ, ເນື່ອງຈາກແຂວງຊຽງຂວາງມີທ່າແຮງດ້ານການຜະລິດເຂົ້າເປັນສິນຄ້າກໍຄືເຂົ້າໄກ່ນ້ອຍ, ຊຶ່ງເປັນ 1 ໃນ 5 ສິນຄ້າຫຼັກຂອງແຂວງ, ຊຶ່ງປີນີ້ການປູກເຂົ້າໄກ່ນ້ອຍຢູ່ແຂວງຊຽງຂວາງມີທັງໝົດ 19 ພັນກວ່າເຮັກຕາ, ໃນນັ້ນ 10 ເຮັກຕາແມ່ນຢູ່ 4 ເມືອງຄື: ເມືອງແປກ, ຄູນ, ຜາໄຊ ແລະ ເມືອງພູກູດ, ,ສະເລ່ຍແລ້ວແຕ່ລະປີຜົນເກັບກ່ຽວເຂົ້າໄກ່ນ້ອຍຂອງແຂວງຊຽງຂວາງຈະໄດ້ປະມານ 50 ພັນໂຕນ ແລະ ຄາດວ່າປີນີ້ກໍຈະຢູ່ໃນລະດັບດຽວກັນ. ໃນນີ້, ນັບແຕ່ປີ 2014 ເປັນຕົ້ນມາ ບໍລິເບຍລາວ ຈຳກັດ ໄດ້ເຊັ່ນສັນຍາຮັບຊື້ເຂົ້າໄກ່ນ້ອຍ ຈາກແຂວງຊຽງຂວາງ ແລະ ຫົວພັນ ເພື່ອມາຜະລິດເບຍລາວໂກລ  ຈຳນວນ 800 ໂຕນຕໍ່ປີ.

ເຂົ້າໄກ່ນ້ອຍເປັນເຂົ້າຊະນິດໜຶ່ງທີ່ປະຊາຊົນໄດ້ປູກສືບຕໍ່ກັນມາຫຼາຍຮ້ອຍປີ ເຊິ່ງລາຄາເຂົ້າໃນປັດຈຸບັນປະມານ 8 -10 ພັນກີບ/ກິໂລ ເຊິ່ງຍອດຂາຍເຂົ້າຂອງປະຊາຊົນໃນຕະຫຼາດສະເລ່ຍປະມານ 800 ກິໂລ ຫາ 1 ໂຕນ/ມື້. ສຳລັບງານບຸນເຂົ້າໄກ່ນ້ອຍປີນີ້ ຄາດວ່າຈະມີມວນຊົນລວມທັງຜູ້ປະກອບການເຂົ້າຮ່ວມງານຫຼາຍແສນຄົນ ແລະ ຄາດວ່າຈະມີຍອດເງິນໝູນວຽນພາຍໃນງານຫຼາຍຕື້ກີບ ເພາະວ່າເຂົ້າໄກ່ນ້ອຍເປັນທີ່ຮູ້ຈັກກັນດີຂອງບັນດາແຂວງພາກເໜືອ ແລະ ປະເທດເພື່ອນບ້ານ ໂດຍສະເພາະແມ່ນຕະຫຼາດຈີນ ມີຄວາມຕ້ອງ ການຫຼາຍ. ນອກນັ້ນ, ຍັງມີນັກທຸລະກິດຍີ່ປຸ່ນ ແລະ ສິງກະໂປ ຕ້ອງການຊື້ເຂົ້າໄກ່ນ້ອຍຫຼາຍສົມ ຄວນໃນແຕ່ລະປີ.

ສຳລັບ ກິດຈະກຳພາຍໃນງານເທດສະການບຸນເຂົ້າໄກ່ນ້ອຍໃນປີນີ້ ກໍຈະປະກອບໄປດ້ວຍງານວາງສະແດງຜົນຜະລິດຂອງຊາວກະສິກອນໃນແຕ່ລະເມືອງ, ພືດກະສິກຳ, ສິນຄ້າໜຶ່ງເມືອງໜຶ່ງຜະລິດ ຕະພັນຂອງແຂວງ, ພ້ອມກັບສິນຄ້າເຄື່ອງໃຊ້ຂອງສອຍຂອງບັນດາແຂວງອ້ອມຂ້າງ ແລະ ພິເສດໄປກວ່ານັ້ນ ກໍຈະມີຂະບວນການແຮ່ກອງເຂົ້າ, ປະກວດກອງເຂົ້າງາມ, ຊຶ່ງຖືວ່າເປັນກິດຈະກຳຫຼັກ ແລະ ເອກະລັກຂອງງານທີ່ຂາດບໍ່ໄດ້ໃນທຸກໆປີ.

 

 

Comments