LV-IMEX
Senglao content (728×90)

ລາວ-ຈີນ ຮ່ວມກັນເປີດ ສະຖາບັນການສຶກສາ ສປ ຈີນ ປະຈຳລາວ

ໃນ​ວັນ​ທີ 12 ພະຈິກ 2017, ຢູ່​ມະຫາວິທະຍາ​ໄລ ​ເຕັກນິກ​ປາກ​ປ່າ​ສັກ, ໄດ້ຈັດພິທີ​ເປີດ​ປ້າຍ ສາຂາ​ຂອງ​ມະຫາວິທະຍາ​ໄລ​ ຫາຍ​ໝານ ສປ ຈີນ ​ແລະ ສູນ​ຮ່ວມ​ມື​ການ​ສຶກສາ ວິທະຍາ​ໄລ​ເຕັກນິກ​ກິ່ງ  ​ແຂວງ ສິບ​ສອງ​ພັນ​ນາ ສປ ຈີນ​ ປະຈຳ​ລາວ​. ​ ໂດຍ​ໃຫ້​ກຽດ​ເຂົ້າ​ຮ່ວມ​ ຂອງ​ທ່ານ ສາຍ​ຄຳ ພັນທະ​ວົງ ​ຜູ້ອຳນວຍການ​ ວິທະຍາ​ໄລ​ເຕັກນິກ​ ປາກ​ປ່າ​ສັກ ຮ່ວມ​ກັບ​ ທ່ານ ນາງ​ ຫານ​ຊູ​ເມີຍ ຫົວໜ້າ​ພະ​ແນ​ກຈັດ​ຕັ້ງ​ໜ່ວຍ​ພັກ ​ມະຫາວິທະຍາ​ໄລ​ຫາຍ​ໝານ ພ້ອມ​ທັງ ທ່ານ​ ໜູ​ພັນ ອຸດສາ ຫົວໜ້າ​ກົ​ມອາ​ຊິ​ວະ​ສຶກສາ ພ້ອມ​ດ້ວຍ​ຄະນະ​ນຳ.

ການ​ເປີດ​ສະ​ຖາ​ບັນ​ ການ​ສຶກສາ​ນີ້​, ກໍເພື່ອ​ປະຕິ​ບັດຕາມ​ແນວທາງ ​ຍຸດ​ທະ​ສາດ​ໜຶ່ງ​ແລວ​ທາງ​ໜຶ່ງ​ເສັ້ນທາງ ​ທີ່ ສະຫາຍ ສີ​ຈິ້ນ​ຜິ​ງ ​ເລຂາທິການ​ໃຫ່ຍ ຄະນະ​ກຳມະການ ​ສູນ​ກາງ​ພັກ​ກອມ​ມູນິດ​ຈີນ, ປະທານ​ປະ​ເທດ ​ແຫ່ງ ສາທາລະນະ​ລັດ ປະຊາຊົນ​ຈີນ​ ວາງ​ອອກ, ​ໃນ​ການ​ສ້າງ​ໃຫ້​ມີ​ ການ​ເຊື່ອມ​ຕໍ່​ນະ​ໂຍບາຍ,​ ເຊື່ອມ​ຕໍ່​ສິ່ງ​ອຳນວຍ​ຄວາມ​ສະດວກ, ​ເຊື່ອມ​ຕໍ່​ການ​ຄ້າ, ​ເຊື່ອມ​ຕໍ່​ເສດຖະກິດ​ການ​ເງິນ, ​ເຊື່ອມ​ຕໍ່​ສາຍ​ໃຈ​ປະຊາຊົນ ​ເຊິ່ງກັນ ​ແລະ ກັນ. ດັ່ງ​ນັ້ນ, ການ​ເຊື່ອມ​ຕໍ່​ສາຍ​ໃຈ​ປະຊາຊົນ ຈຶ່ງ​ເປັນ​ວຽກ​ງານ​ຕົ້ນຕໍ​ຂອງ 5 ​ເຊື່ອມ​ທີ່​ກ່າວ​ມາ​ນັ້ນ ຈະ​ເຮັດ​ໃຫ້​ວຽກ​ງານ​ເຊື່ອມ​ຕໍ່​ສາຍ​ໃຈ ​ຂອງ​ປະຊາຊົນ​ສອງ​ຊາດ ​ລາວ​-ຈີນ ​ໄດ້​ສຳ​ເລັດ​ຜົນ​ນັ້ນ, ຈະ​ຕ້ອງ​ໄດ້​ເສີມ​ສ້າງ​ໂອກາດ ​ໃນ​ການ​ໄປມາຫາສູ່​ ໃຫ້​ແກ່​ປະຊາຊົນ​ສອງ​ຊາດ.

​ເພື່ອ​ເປັນ​ການ​ສົ່ງ​ເສີມ ​ມິດຕະພາບ​ ລະຫວ່າງ​ສອງ​ຊາດ​ ລາວ-ຈີນ, ຮັດ​ແໜ້ນ​ການ​ຮ່ວມ​ມື​ລະຫວ່າງ ນະຄອນຫຼວງ​ວຽງ​ຈັນ ​ແລະ​ ​ແຂວງ​ຫາຍໝານ, ​ເສີມ​ຂະຫຍາຍ​ການ​ຮ່ວມ​ມື​ ດ້ານ​ການ​ສຶກສາ​ໃຫ້​ເລິກ​ເຊິ່ງກວ່າ​ເກົ່າ, ສ້າງ​ຄວາມ​ນຳ​ໜ້າ​ປະຕິບັດ ​ວຽກ​ງານ​ສຶກສາ​ຕາມ​ແນວທາງ ​ຍຸດ​ທະ​ສາດ ໜຶ່ງ​ແລວ​ທາງໜຶ່ງ​ເສັ້ນທາງ​ໜຶ່ງ, ມະຫາວິທະຍາ​ໄລ​ຫາຍ​ໝານ​ ໄດ້​ສຶກສາ​ຄວາມ​ຮຽກຮ້ອງຕ້ອງການ​ ໃນການ​ພັດທະນາ​ ເສດຖະກິດ-ສັງຄົມ​ຂອງ​ລາວ, ຈຶ່ງ​ນຳ​ເອົາ​ຄວາມ​ໂດດ​ເດັ່ນ​ ທາງ​ດ້ານ​ການ​ສຶກສາ ການ​ບໍລິຫານ ​ເສດຖະກິດ ​ແລະ ບໍລິຫານ​ ການທ່ອງ​ທ່ຽວ​ຂອງ​ຕົນ, ມາ​ຮ່ວມ​ມື​ກັບ ​ວິທະຍາ​ໄລ​ເຕັກນິກ ​ປາກ​ປ່າ​ສັກ ຂອງ ສປປ ລາວ ​ໂດຍ​ຈະ​ຮ່ວມ​ກັນ​ສ້າງ​ຕັ້ງ ສາຂາ​ຂອງ​ມະຫາວິທະຍາ​ໄລ​ ຫາຍ​ໝານ​ປະຈຳ​ລາວ; ຈັດ​ເຝິກ​ອົບຮົມ​ໃຫ້​ແກ່​ ຄູ-ອາຈານ,  ​ແລກປ່ຽນ​ຄູ ​ແລະ ນັກ​ສຶກສາ, ຄົ້ນ​ຄວ້າ-​ແລກປ່ຽນ​ ດ້ານ​ວຽກ​ງານ​ວິຊາ​ການ ​ແລະ ອື່ນໆ, ພ້ອມ​ດຽວ​ກັນ​ນີ້​ ກໍ່​ຍັງ​ໄດ້​ເຊັນ​ບົດ​ບັນທຶກ​ ຄວາມ​ເຂົ້າ​ໃຈ​ ວ່າ​ດ້ວຍການ​ພົວພັນ ​ມິດຕະພາບ​ ລະຫວ່າງ​ ວິທະຍາ​ໄລ​ເຕັກນິກ​ ປາກ​ປ່າ​ສັກ ​ແລະ ມະຫາວິທະຍາ​ໄລ​ ຫາຍ​ໝານ; ​ແລະ ຮ່ວມ​ການ​ເປີດ​ປ້າຍ​ ຢ່າງ​ເປັນ​ທາງ​ການ; ສາຂາ​ມະຫາວິທະຍາ​ໄລ ​ເຕັກນິກ​ປາກ​ປ່າ​ສັກ ​ແລະ ມະຫາວິທະຍາ​ໄລ​ຫາຍ​ໝານ ປະຈຳ​ລາວ​ອິກດ້ວຍ.

ອິງ​ຕາມ​ບົດ​ບັນທຶກ​ ຄວາມ​ເຂົ້າ​ໃຈ, ທັງ​ສອງ​ຝ່າຍ​ຈະ​ຮ່ວມ​ກັນ ສ້າງ​ໃຫ້​ສາຂາ​ດັ່ງກ່າວ ​ເປັນ​ເວທີ​ໃນ​ການ​ແລກປ່ຽນ​ ເຊິ່ງກັນ ​ແລະ ກັນ. ​ໂດຍ​ໃນ 5 ປີ ​ຕໍ່ໜ້າ ຄື:

1 ມະຫາວິທະຍາ​ໄລ​ຫາຍ​ໝານ ຈະ​ສະ​ໜັບສະ​ໜູນ​ ຫຼັກສູດ​ແບບຮຽນ ​ແລະ ທີມງານຄູ​ອາຈານ​ ໃນ​ການ​ສ້າງ​ລະບົບ​ການ​ສຶກສາ ​ປະລິ​ຍາ​ຕີ-ປະລິຍາ​ໂທ-​ເອກ​ ຢູ່​ສາຂາ​ດັ່ງກ່າວ ​ເຊິ່ງຈະ​ໄດ້​ຮັບ​ວຸດ​ທິການ​ສຶກສາ ​ຂອງ​ມະຫາວິທະຍາ​ໄລ​ ຫາຍ​ໝານ.

2 ມະຫາວິທະຍາ​ໄລ​ ຫາຍ​ໝານ​ ຈະ​ສະ​ເໜີ​ຂໍ​ທຶນ​ຊ່ວຍ​ເຫຼືອ ​ຈາກ​ກະຊວງ​ສຶກສາ​ທິການ ຫຼື ກະຊວງ​ການ​ຄ້າ​ຂອງ​ຈີນ ​ເພື່ອ​ຈັດ​ເຝິກ​ອົບຮົມ ​​ໃຫ້​ແກ່​ພະນັກງານ​ວິຊາ​ການ​ ເຕັກນິກ​ຊຳນານ​ການ ​ແລະ ພະນັກງານ ​ຂັ້ນ​ສູງ​ຂອງ​ລັດ ຫຼື ​ວິ​ສະຫະ​ກິດ ຈຳນວນ 1000 ຄົນ.

3 ສະໜອງ​ທຶນ​ການ​ສຶກສາ​ ໃນ​ທຸກ​ລະດັບ​ວຸດ​ທິ ບໍ່​ວ່າ​ຈະ​ເປັນ​ທຶນ​ ລັດຖະບານ, ທຶນ​ແຂວງ ຫຼື ທຶນ​ມະຫາວິທະຍາ​ໄລ​ ຈຳນວນ 100 ທຶນ ໃຫ້ ສປປ ລາວ.

4 ຈະ​ຊ່ວຍ​ສະໜອງ​ທຶນ​ຊ່ວຍ​ເຫຼືອ ​ໃນ​ການ​ທັດສະນະ​ສຶກສາ ພາກ​ລະດູ​ແລ້ງ ​ໃຫ້​ນັກ​ສຶກສາລາ​ວ ຈຳນວນ 200 ຄົນ.

ທີ່ມາ: ຂ່າວສານປະເທດລາວ. ຂ່າວ​: ມາລີ​ດາ.

Comments