LV-IMEX
Senglao content (728×90)

ເຊີນທ່ຽວ! ງານບຸນຊ່ວງເຮືອເມືອງລະມາມ ແລະ ບຸນປະເພນີເສົາຫຼັກເມືອງ 10 ຊົນເຜົ່າ ທີ່ແຂວງເຊກອງ

ສະບາຍດີ ມື້ນີເຮົາມີສິ່ງທີ່ດີໆການທ່ອງທ່ຽວມາແນະນຳ ສຳລັບໃຜທີ່ກຽມລົງໃຕ້ ຈະໄປທ່ຽວໃນທ້າຍປີນີ້ກໍຢ່າລືມ ແຂວງເຊກອງເດີ ເພາະເພິ່ນມີບຸນປະເພນີ ທີ່ໄດ້ຈັດຂຶ້ນທຸກປີ ກໍຄືບຸນຊ່ວງເຮືອ ເມືອງລະມາມ ເຊິ່ງຈະຈັດຂຶ້ນ ໃນວັນທີ 3 ທັນວາ 2017 ທີ່ຈະມາເຖິງນີ້  ແລະ ຈະມີງານບຸນປະເພນີເສົາຫຼັກເມືອງ 10 ຊົນເຜົ່າ ພ້ອມກັບການເປີດປີທ່ອງທ່ຽວລາວປີ 2018 ເຊິ່ງເລີ່ມຕັ້ງແຕ່ວັນທີ 26 ທັນວາ ຈົນເຖິງ ວັນທີ່ 2 ມັງກອນ 2018.

ງານບຸນຊ່ວງເຮືອເມືອງລະມາມ ແຂວງເຊກອງປະຈໍາປີນີ້ ແມ່ນຈະໄດ້ຈັດຂຶ້ນທີ່ທ່ານໍ້າເຊກອງບ້ານເພຍໃໝ່ຖືເປັນບຸນປະເພນີ ເພື່ອເປັນການອະນຸລັກ, ຮັກສາຮີດຄອງປະເພນີອັນດີງາມຂອງຊາດ, ຂອງເຜົ່າ ແລະ ເປັນການສ້າງກິດຈະກຳໜຶ່ງແກ່ຂະບວນການເປີດປີທ່ອງທ່ຽວລາວປີ 2018.
ທ່ານ ຄຳໄລ ປັນຍາຄູນ ຮອງເຈົ້າເມືອງໆລະມາມ, ປະທານຈັດງານບຸນຊ່ວງ ເຮືອປະຈໍາປີ 2017 ໃຫ້ຮູ້ວ່າ: ງານບຸນຊ່ວງເຮືອເມືອງລະມາມແຂວງເຊກອງປີນີ້ ແມ່ນໄດ້ກຳນົດເອົາວັນທີ 3 ທັນວາ 2017 ມາຮອດປັດຈຸບັນການຫ້າງຫາກະກຽມຂອງອະນຸກໍາມະການຕ່າງໆເປັນຕົ້ນອະນຸກໍາມະການເນື້ອໃນ, ອະນຸກໍາ ມະການສະຖານທີ່, ອະນຸກຳມະການກີລາໜ້ານ້ຳ ແລະ ອະນຸກຳມະການອື່ນໆແມ່ນມີຄວາມພ້ອມແລ້ວ.


ການຈັດງານດັ່ງກ່າວ ແມ່ນມີຂື້ນທຸກໆປີ ທັງນີ້ ກໍເພື່ອເປັນການສົ່ງເສີມ, ອະນຸລັກ, ຮັກສາຮີດຄອງປະເພນີອັນດີງາມຂອງຊາດ, ຂອງເຜົ່າ ທັງເພື່ອເປັນການສ້າງບັນຍາກາດຄວາມມ່ວນຊື່ນໃຫ້ແກ່ຊາວແຂວງເຊກອງ ກໍຄືປະຊາຊົນລາວ ແລະ ຕ່າງປະເທດທີ່ມາທ່ອງທ່ຽວຊົມໃຫ້ຮູ້ເຖິງວັດທະນະທຳອັນດີງາມ ແລະ ຈຸດປະສົງອີກຢ່າງ ກໍເພື່ອສ້າງກິດຈະກໍາໃຫ້ແກ່ຂະບວນການເປີດປີທ່ອງທ່ຽວລາວປີ 2018 ໃຫ້ເປັນຂະບວນຟົດຟື້ນ.
ສຳລັບເຮືອຊ່ວງທີ່ຈະເຂົ້າຮ່ວມແຂ່ງຂັນມີ 4 ປະເພດຄື:

  • ເຮືອປະເພນີ 19-22 ສີພາຍ (ຊາຍ-ຍິງ);
  • ເຮືອເຄິ່ງສູດ-ເຄິ່ງປະເພນີ 19-22 ສີພາຍ (ຊາຍ-ຍິງ);
  • ເຮືອສູດ 19-22 ສີພາຍ (ຊາຍ-ຍິງ)
  • ເຮືອສູດ 35-40 ສີພາຍ (ຊາຍ-ຍິງ).

ສຳລັບລາງວັນຊະນະເລີດທີ 1 ເຮືອປະເພນີໄດ້ຮັບຂັນ 1 ໜ່ວຍ, ພ້ອມເງິນສົດ 8,5 ລ້ານກີບ;ເຮືອເຄິ່ງສູດ-ເຄິ່ງປະເພນີ ແລະ ເຮືອສູດ 19-22 ສີພາຍໄດ້ຮັບຂັນ 1 ໜ່ວຍ, ພ້ອມເງິນສົດ 8 ລ້ານກີບ ແລະ ເຮືອສູດໃຫຍ່ 35-40 ສີພາຍໄດ້ຮັບຂັນ 1 ໜ່ວຍພ້ອມເງິນສົດ 10 ລ້ານກີບ, ນອກນັ້ນ ຍັງມີລາງວັນຊົມເຊີຍ ແລະ ລາງວັນເຮືອງາມເງິນສົດ 1-1,3 ລ້ານກີບ.

ນອກຈາກບຸນຊ່ວງເຮືອທີ່ເມືອງລະມາມ ແລ້ວ ແຂວງເຊກອງ ຍັງຈະມີກິດຈະກຳໃຫຍ່ຄືງານເປີດປີທ່ອງທ່ຽວປີ 2018 ພ້ອມກັບບຸນປະເພນີເສົາຫຼັກເມືອງຂອງ 10 ຊົນເຜົ່າ ຈະຈັດຂຶ້ນວັນທີ 30 ພະຈິກ 2017  ແລະ ເປີດປີທ່ຽວທ່ຽວຢູ່ແຂວງແມ່ນວັນທີ 31 ພະຈິກ 2017 ຈະໄດ້ມີການສົ່ງທ້າຍປີເກົ່າ ແລະ ຕ້ອນຮັບປີໃໝ່ 2018

ພາຍໃນງານດັ່າງກ່າວແມ່ນຈະມີການຄົບງັນຕັ້ງແຕ່ວັນທີ 26  ທັນວາ  2017 ຫາ ທີ 2 ມັງກອນ 2018  ເຊິ່ງມີຫຼາກຫຼາຍກິດຈະກຳເຊັ່ນ: ງານວາງສະແດງສິນຄ້າ ແລະ ຕະຫຼາດນັດ, ການປະກວດນັກຮ້ອງ ແລະ ລໍາ ສຽງດີຂອງແຂວງ, ມີການສະແດງສິລະປະຈາກທ່ອງຖິ່ນທົ່ວແຂວງ ແລະ ອື່ນໆ….

ເມືອໄດ້ໄປຮ່ວມງານດັ່ງກ່າວແລ້ວ ຢູ່ແຂວງເຊກອງ ກໍຍັງມີສະຖານທີ່ທ່ອງທ່ຽວທາງທຳມະຊາດຫຼາຍໆແຫ່ງທີ່ສວຍສົດງົດງາມ ທີ່ເຮົາໄປຮອດແລ້ວຕ້ອງໄປທ່ຽວໃຫ້ໄດ້ຄື:

ຕາດແຝກ: ຕັ້ງຢູ່ບໍລິເວນເຂດບ້ານດ່ານ ເມືອງລະມາມ ເຊິ່ງເປັນເມືອງເອກຂອງແຂວງເຊກອງ ຢູ່ຫ່າງຈາກເທດສະບານແຂວງໄປປະມານ 18 ກິໂລແມັດ ແລະ ຫ່າງຈາກເສັ້ນທາງເລກທີ 16 ປະມານ 2 ກິໂລແມັດ ແຕ່ກ່ອນຢູ່ເທິ່ງບໍລິເວນຫົວຕາດ ແລະ ກ້ອງຕາດດັ່ງກ່າວມີດອນປົກຄຸມຢູ່ ທີ່ເຕັມໄປດ້ວຍຫຍ້າແຝກ ອັນເປັນທີ່ມາຂອງຊື່ຕາດແຝກ, ແຕ່ພໍມາຮອດປີ 1968 ເກີດມີນໍ້າຖ້ວມຄັ້ງໃຫຍ່ຢູ່ເຂດນີ້ຈຶ່ງເຮັດໃຫ້ຫຍ້າແຝກດັ່ງກ່າວດັບສູນໄປ ນໍ້າຕົກຕາດແຝກສູງປະມານ 10-15 ແມັດ ແລະ ກວ້າງ 250 ແມັດ ມີຄວາມງົດງາມ ແລະ ອຸດົມສົມບູນໄປດ້ວຍປ່າໄມ້ຂຽວອຸ່ມທຸ່ມ, ມີອາກາດປອດໂປ່ງແຈ່ມໃສ ແລະ ມີນໍ້າໄຫລຜ່ານຕະຫຼອດລະດູການ ນໍ້າຕົກຕາດແຝກຖືກຄົ້ນພົບໃນປີ 1999 ແລະ ເລີ່ມເປີດໃຫ້ເຂົ້າທ່ຽວຊົມແຕ່ປີ 2008 ເປັນຕົ້ນມາ.

ຕາດຫົວຄົນ: ໄດ້ຕັ້ງຢູ່ເຊນ້ຳນ້ອຍຕອນເທິງຕາດແຝກ ເຂດບ້ານດ່ານ, ເມືອງລະມາມ, ເປັນແຫຼ່ງທ່ອງທ່ຽວທຳມະຊາດທີ່ສວຍງາມ, ມີຄວາມສູງເຖິງ 8 – 10 ແມັດ, ແລະ ຍາວ 250 ແມັດ, ເປັນເຂດແດນ ລະຫວ່າງ ແຂວງເຊກອງ ກັບແຂວງອັດຕະປື, ຫ່າງຈາກເທດສະບານແຂວງ 19 ກິໂລແມັດ ແລະ ຈາກເສັ້ນທາງເລກທີ 16  ໄປຫາຕາດ 1 ກິໂລແມັດ. ຕາດນີ້ ໄດ້ເປີດການບໍລິການນຳໃຊ້ ໃນປີ 1999. ຕາດຫົວຄົນຕາມການເລົ່າຂານຂອງເຖົ້າແກ່ເຂດບ້ານດ່ານ ແລະ ດອນຈັນວ່າ: ກ່ອນຈະໃສ່ຊື່ຕາດຫົວຄົນນັ້ນ ຍ້ອນສະໄໝ ລະບອບຈັກກະພັດຝລັ່ງ ເຂົ້າມາປົກຄອງຢູ່ລາວໄດ້ມີຫົວຄົນຕາຍ ໄຫຼມາຕົກຄ້າງຢູ່ກ້ອງຕາດດັ່ງກ່າວຢູ່ເລື້ອຍໆ. ສະນັ້ນ ຄົນເຖົ້າຄົນແກ່ໃນຂອບເຂດ ດັ່ງກ່າວ ເລີຍໃສ່ຊື່ຕາດນີ້ວ່າ: ຕາດຫົວຄົນຈົນມາເຖິງປະຈຸບັນນີ້.

ຕາດປະອໍ: ຕາດປະອໍ ແມ່ນຕາດຂອງຫ້ວຍນ້ຳໃສ ເຊິ່ງຕັ້ງຢູ່ເຂດບ້ານແສນໃຕ້, ເມືອງທ່າແຕງ, ແຂວງ ເຊກອງ ຕັ້ງຢູ່ຫ່າງຈາກເທດສະບານເມືອງ ໄປທາງທິດຕາເວັນອອກ 16 ກິໂລແມັດ, ເຊິ່ງມີຄວາມກ້ວາງ 25 ແມັດ ແລະ ສູງເຖິງ 50 ແມັດ, ເສັ້ນທາງສະດວກ ສາມາດໄປໄດ້ທັງລະດູແລ້ງ ແລະ ລະດູຝົນ. ເປັນເຂດສະຫງວນ ເພື່ອການທ່ອງທ່ຽວ, ທາງດ້ານທຳມະຊາດຍັງຄົງເດີມ, ອາກາດກໍ່ປອດໂປ່ງດີ ເໝາະແກ່ການທ່ອງທ່ຽວ ແລະ ພັກຜ່ອນ. (ໄດ້ເປີດບໍລິການນຳໃຊ້ແລ້ວໃນປີ 2008), ກ່ອນ ຈະໃສ່ຊື່ວ່າ: “ຕາດປະອໍ” ກໍ່ຍ້ອນວ່າ: ຢູ່ເທິງຫົວຕາດ ແລະ ກ້ອງຕາດສ່ວນຫຼວງຫຼາຍ ແມ່ນເຕັມໄປດ້ວຍໄມ້ປະອໍ, ດັ່ງນັ້ນ ຊາວບ້ານ ຈິ່ງໄດ້ເອີ້ນຕາດນີ້ວ່າ: ຕາດປະອໍ.

ຕາດໄຟໄໜ້: ແຫຼ່ງທ່ອງທ່ຽວທຳມະຊາດຕາດໄຟໄໝ້​ ແມ່ນ​ນ້ຳຫ້ວຍລະວັນ, ຕັ້ງຢູ່ເຂດ ບ້ານປະແຫຼງໃຕ້, ເມືອງທ່າແຕງ, ​ແຂວງ​ເຊ​ກອງ, ຫ່າງ​ຈາກ​ເທດສະບານ​ເມືອງ​ທ່າ​ແຕງ ໄປ​ທາງທິດ​ເໜືອ 8 ກິ​ໂລ​ແມັດ, ມີ​ຄວາມ​ສູງ 100 ​ແມັດ. ກ້ວາງ 20 ແມັດ ແລະ ເປີດບໍລິການ ນຳໃຊ້ແລ້ວ ໃນປີ 2008. ແຕ່​ກ່ອນ ​ໄດ້​ມີ​ບ່າວ​ສາວ​ຄູ່​ໜຶ່ງ ​ມາ​ຫຼິ້ນ​ນ້ຳ​ຢູ່​ຕາດ​​ແຫ່ງ​ນີ້, ເຄື່ອງນຸ່ງ​ປຽກໜົດ ຈິ່ງ​ໄດ້​ພາກັນ​ດັງ​ໄຟ​ຝີງ ​ແລະ ຕາກ​ເຄື່ອງນຸ່ງ​ປະ​ໄວ້​; ແຕ່​ບັງ​ເອີນ​ມີ​ລົມ​ພັດ​ມາ​ຢ່າ​ງ​ແຮງ ​ແລະ ພັດ​ເອົາ​ເຄື່ອງນຸ່ງ​ຂອງ​ບ່າວ​ສາວ​ທັງ​ໜົດ​ເຂົ້າ​ກອງ​ໄຟ, ໄຟ​ເລີຍ​ໄໝ້​ຈົນ​ໝົດກ້ຽງ. ຈາກ​ນັ້ນ​ຊາວບ້ານ​ ຈິ່ງ​ໄດ້​​ເອີ້ນ​ຊື່​ຕາດ​ນີ້​ວ່າ:   “ຕາດ​ໄຟ​ໄໝ້” ຈົນ​ເຖິງ​ປະຈຸ​ບັນ​ນີ້.

ຕາດໄຟໄໝ້ເມືອງທ່າແຕງ ແຂວງ ເຊກອງ

ທີມງານທ່າແຕງ ຟາມ & ຣີສອດ ໄປລົງສຳຫຼວດ #ນຳ້ຕົກຕາດໄຟໄໝ້ #ເມືອງທ່າແຕງ #ແຂວງເຊກອງ . ງາມຫຼາຍ – ຫ່າງຈາກ ຣີສອດເຮົາໄປ ຫາປາກທາງເຂົ້າປະມານ 7 ກິໂລແມັດGium GiumDada NewChansouda Da@

Thataeng Farm & Resort – ທ່າແຕງຟາມ & ຣີສອດ – ໜອງເຮືອເປັດທ່າແຕງさんの投稿 2017年5月9日(火)

ເຮືອນຊົນເຜົ່າອາລັກ: ຕັ້ງຢູ່ບ້ານກະສັງກາງ ເມືອງລະມາມ ຫ່າງຈາກເທດສະບານເມືອງໄປປະມານ 24 ກິໂລແມັດຕາມເສັ້ນທາງເລກທີ 16 ບີ ໄປຮອດຊາຍແດນຫວຽດນາມ ເຮືອນຊົນເຜົ່າອາລັກເປັນເຮືອນທີ່ເຮັດດ້ວຍໄມ້ເນື້ອແຂງ, ມຸງດ້ວຍໄມ້ເນື້ອແຂງ ແລະ ທາງໜ້າເຮືອນກໍມີຮູບແກະສະຫລັກເປັນລວດລາຍຕ່າງໆທີ່ມີສີສັນເປັນເອກະລັກສະເພາະຂອງຊົນເຜົ່າ ຊົນເຜົ່າອາລັກມີວິຖີການດໍາລົງຊີວິດ, ວັດທະນະທໍາ ແລະ ຮີດຄອງປະເພນີທີ່ເປັນເອກະລັກ ເຊິ່ງແຕ່ລະປີຈະມີການຈັດງານບຸນປະເພນີປະຈໍາປີຂຶ້ນ, ມີການສະແດງສິລະປະພື້ນເມືອງ, ການວາງສະແດງຜະລິດຕະພັນຕໍາແຜ່ນ ແລະ ຈັກສານ ພ້ອມທັງມີພິທີຂ້າຄວາຍເພື່ອຕ້ອນຮັບແຂກທີ່ມາຢ້ຽມຢາມໃນທຸກໆປີ.

 

ທີ່ມາ: ຂ່າວເຊກອງ

Comments