LV-IMEX
Senglao content (728×90)

ນໍ້າຕົກຕາດເເຊປ້ອງໄລ ສະຫວັນເທິງດິນ ຂອງແຂວງອັດຕະປື

ສະບາຍດີທ່ານຜູ້ອ່ານ ແລະ ຕິດຕາມເວັບໄຊ ທາເກັດທຸກໆຄົນ ມື້ນີ້ເຮົາມີສິ່ງດີໆມາຝາກ ຄົນລາວທ່ຽວລາວ ໃນປີທ່ອງທ່ຽວລາວ 2018 ໂອກາດແບບນີ້ ທາງທີມງານເຮົາມີສະຖານທີ່ທ່ອງທ່ຽວທີ່ເອີ້ນວ່າ: ສະຫວັນເທິງດິນຂອງປະເທດລາວມາຝາກ ເປັນສະຖານທີ່ທ່ອງທ່ຽວທີ່ຢູ່ແຂວງໃຕ້ສຸດຂອງປະເທດລາວກໍຄື: “ຕາດແຊປ້ອງໄລ” ແຂວງອັດຕະປື ພຽງເຫັນຮູບພາບກໍງາມອີຫລີ ແອດ ກໍຢາກໄປທ່ອງທ່ຽວສຳຜັດກັບບັນຍາກາດແບບນີ້ແດ່ ຖ້າມີໂອກາດຕ້ອງໄປໃຫ້ໄດ້ ເປັນສິ່ງທີ່ສວຍງາມຫຼາຍໃນປະເທດລາວເຮົາ.

ປັດຈຸບັນ, ອັດຕະປື ເລັ່ງພັດທະນາສະຖານທີ່ທ່ອງທ່ຽວ ແຊພະ – ແຊປ້ອງໄລ ໃຫ້ສະດວກຕໍ່ການເຂົ້າເຖິງ ເພື່ອເປັນການຕ້ອນຮັບປີທ່ອງທ່ຽວລາວ 2018 ທາງແຂວງອັດຕະປື ກໍໄດ້ມີການເລັ່ງພັດທະນາແຫຼ່ງທ່ອງທ່ຽວທີ່ສຳຄັນຂອງແຂວງ ໂດຍສະເພາະແມ່ນສະຖານທີ່ທ່ອງທ່ຽວທາງທໍາມະຊາດທີ່ມີ ຄວາມສວຍງາມຖືເປັນຈຸດເດັ່ນໃນການດຶງດູດຄວາມສົນໃຈໃຫ້ນັກທ່ອງທ່ຽວຕ່າງແຂວງ ແລະ ຕ່າງປະເທດເຂົ້າທ່ຽວອັດຕະປືຫຼາຍຂຶ້ນ.

ການພັດທະນາສະຖານທີ່ດັ່ງກ່າວ ໃຫ້ມີການເຂົ້າງເຖິງຢາງສະດວກສະບາຍແມ່ນ ບໍລິສັດ ວົງວິໄລການຄ້າ ຂາອອກ – ຂາເຂົ້າ ຈຳກັດຜູ້ດຽວ ເປັນຜູ້ສຳປະທານເພື່ອພັດທະນາໃຫ້ເປັນແຫຼ່ງທ່ອງທ່ຽວທຳມະຊາດໃນລະດັບແຂວງ.

ມາຮອດປັດຈຸບັນການປັບປຸງແມ່ນສຳເລັດເປັນສ່ວນໃຫຍ່ ເປັນຕົ້ນແມ່ນໄດ້ມີການສ້ອມແປງເສັ້ນທາງຈາກທາງເຂົ້າຫາສະຖານທີ່ພັກແຮມໄລຍະທາງ 8 ກິໂລແມັດ, ປັບປຸງສ້ອມແປງຂົວ ແລະ ເສັ້ນທາງລະຫວ່າງຈຸດພັກແຮມໄປຫາຕາດແຊປ້ອງໄລ 6 ກວ່າກິໂລແມັດ, ສ້າງຕະຫຼາດຮັບໃຊ້ບໍລິການ ແລະ ສ້າງສະຖານທີ່ພັກແຮມຮອງຮັບແກ່ນັກທ່ອງທ່ຽວ.


ພ້ອມນີ້, ຍັງຈະໄດ້ມີການປັບປຸງບູລະນະສະຖານທີ່ພັກຜ່ອນຕື່ມອີກ ເນັ້ນໃນຮູບແບບຄົບວົງຈອນ ໂດຍຈະຈັດໃຫ້ມີຫຼາຍແບບ ເຊັ່ນ: ປັບປຸງຈຸດພັກຜ່ອນໃນຕູບ, ສະຖານທີ່ນັ່ງຫຼິ້ນຕາມຈຸດພະລານຫີນ, ຈຸດທ່ອງທ່ຽວລ່ອງເຮືອ, ຂີ່ກົງເບັງລ່ອງແກ້ງ, ການຍ່າງປ່າເພື່ອສຶກສາທຳມະຊາດ ແລະ ກິດຈະກຳອື່ນໆໃຫ້ສົມກັບວ່າ: “ ນ້ຳຕົກຕາດແຊພະ – ແຊປ້ອງໄລ ແມ່ນແຫຼ່ງທ່ອງທ່ຽວສະຫວັນແຫ່ງໃໝ່ທີ່ອັດສະຈັນຢູ່ໃນແຂວງອັດຕະປື ”.


ສຳລັບນັກທ່ອງທ່ຽວ ທ່ານໃດສົນໃຈຢາກໄປທ່ຽວຊົມສາມາດໄປສຳຜັດໄດ້ຕາມອັດທະຍາໄສ ເຊິ່ງປັດຈຸບັນມີເສັ້ນທາງເຂົ້າເຖິງສະດວກສະບາຍ, ການເດີນທາງໄປນໍ້າຕົກຕາດແຊປ້ອງໄລຖ້າຫາກທ່ານໄດ້ມາແລ້ວແມ່ນຈະໄດ້ພົບກັບສະຖານທີ່ສວຍງາມ; ແຊປ້ອງໄລ ຫ່າງຈາກ ຕາດແຊພະ 8 ກິໂລແມັດ, ນໍ້າຕົກຕາດແບ່ງເປັນສອງສາຍ ຝັ່ງຊ້າຍສູງ 20 ແມັດ,ຝັ່ງຂວາ ສູງປະມານ 30 – 40 ແມັດ, ທ່ານສາມາດເດີນທາງໄປໄດ້ສອງລະດູດ້ວຍລົດ ເຊິ່ງມີໄລຍະທາງຈາກແຂວງອັດຕະປື ຜ່ານສຳນັກງານເມືອງສະໜາມໄຊ – ບ້ານໃໝ່ ເຖິງຕາດແຊພະ ຕາມສາຍທາງ 18 A ປະມານ 68 ກິໂລແມັດ. ນ້ຳຕົກຕາດແຊພະ ກວ້າງ 120 ແມັດ, ສູງ 23 ແມັດ ເຫັນແລ້ວທ່ານຈະຮູ້ສຶກປະທັບໃຈ ແລະ ຈະຮູ້ວ່າມັນກຸ້ມຄ່າກັບການເດີນທາງທ່ອງທ່ຽວຂອງຕົນ.

ນອກຈາກການເດີນທາງຈາກເທສະບານແຂວງອັດຕະປື ໄປຫາເມືອງສະໜາມໄຊແລ້ວ ທ່ານຍັງສາມາດເດີນທາງໄປທາງເມືອງປະທຸມພອນ ແຂວງຈຳປະສັກ ຜ່ານເສັ້ນທາງເລກທີ 13 ໃຕ້ ທີ່ຫຼັກ 48 ເມືອງປະທຸມພອນ ແຂວງຈຳປາສັກ ລ້ຽວຊ້າຍເຂົ້າສູ່ເສັ້ນທາງເລກທີ 18 A ສູ່ ແຂວງອັດຕະປື ຮອດ 3 ແຍກ ບໍລິເວນບ້ານໃໝ່ ( ປະມານ 60 ກິໂລແມັດ ) ໃຫ້ລ້ຽວຊ້າຍຂີ່ໄປຕາມເສັ້ນທາງຈາກສະໜາມໄຊສູ່ເມືອງປາກຊ່ອງ ປະມານ 10 ກວ່າກິໂລແມັດ ກໍ່ຈະຮອດຕາດແຊພະ.

ຕະຫຼອດການເດີນທາງທ່ານຍັງຈະໄດ້ສໍາຜັດກັບທຳມະຊາດທີ່ສວຍງາມ ແລະ ວິຖີຊີວິດຂອງປະຊາຊົນທີ່ມີເອກະລັກຄູ່ຄວນແກ່ການສຶກສາ ແລະ ທໍາຄວາມເຂົ້າໃຈ

Joey Xaydalaさんの投稿 2017年11月14日(火)

ນອກຈາກນີ້, ແຂວງອັດຕະປື ຍັງກຽມຫຼາຍກິດຈະກໍາເພື່ອສະຫຼອງປີທ່ອງທ່ຽວລາວ 2018 ທີ່ເດັ່ນໆ ໃນນັ້ນມີ 2 ກິດຈະກໍາທີ່ຖືກບັນຈຸເຂົ້າໃນງານສະເຫຼີມສະຫຼອງລະດັບຊາດຄື: ບຸນນະມັດສະການພະເຈົ້າໄຊຍະເສດຖາທິລາດ ທີ່ບ້ານວັດທາດ ເມືອງໄຊເສດຖາ ແລະ ງານຕ້ອນຮັບຂະບວນຄາລາວານລົດ ຈາກນະຄອນຫຼວງວຽງຈັນສູ່ແຂວງພາກາງ ແລະພາກໃຕ້.
​ເຊິ່ງກິດຈະກຳ​ ສະເພາະຂອງແຂວງ ແມ່ນໄດ້ຖືເອົາງານບຸນປະເພນີຂອງແຕ່ລະຊົນເຜົ່າ ທີ່ມີສີສັນ ແລະ ຄວາມຫຼາກຫຼາຍທີ່ແຕກຕ່າງກັນທັງ 11 ຊົນເຜົ່າພາຍໃນແຂວງ, ໃນນັ້ນປະກອບມີ:

  • ບຸນປະເພນີໄຂປະຕູເລົ້າຂອງເຜົ່າໂອຍ ຢູ່ບ້ານອິນທີ ເມືອງສະໜາມໄຊ;
  • ບຸນເຂົ້າບ້ານຂອງເຜົ່າເບຣົາ ຢູ່ບ້ານວັງຍາງ ເມືອງພູວົງ;
  • ບຸນປີໃໝ່ລາວ ພິທີປ່ຽນຜ່າບ່ຽງຢະອົງແສນ ທີ່ວັດສະແຄະ ເມືອງໄຊເສດຖາ;
  • ບຸນບັ້ງໄຟບ້ານວັດຫຼວງ ເມືອງໄຊເສດຖາ;
  • ບຸນອອກພັນສາຊ່ວງເຮືອປະຈໍາປີ ທີ່ເທສະບານແຂວງອັດຕະປື;
  • ບຸນກິນເຂົ້າໃໝ່ເຜົ່າຕະຫລຽງ ຢູ່ເມືອງຊານໄຊ;
  • ບຸນນະມັດສະການພະເຈົ້າໄຊຍະເສດຖາທິລາດ ຢູ່ເມືອງໄຊເສດຖາ;
  • ພິທີກໍາງານຜ່າໜອງ ວິທີຫາປາແບບພື້ນບ້ານ ຢູ່ບ້ານຫີນລາດ ເມືອງສະໜາມໄຊ
  • ພິທີສະຫຼອງສວນຫຼັກເມືອງຂອງແຂວງ.
    ນອກຈາກງານບຸນປະເພນີຕ່າງໆ ຂອງແຕ່ລະຊົນເຜົ່າແລ້ວ​ ແຂວງ​ອັດຕະປື ຍັງມີແຫລ່ງທ່ອງທ່ຽວທາງທໍາມະຊາດ ແລະ ປະຫວັດສາດ ທີ່ໜ້າສົນໃຈເປັນຕົ້ນ ທາງທໍາມະຊາດມີນໍ້າຕົກຕາດແຊພະ ແລະ ນໍ້າຕົກຕາດແຊປອງໄລ ທີ່ສວຍສົດງົດງາມ, ມີຕາດຫົວຄົນ-ລີສອດຕາດແຜດ ແລະ ຕາດຈໍ. ສ່ວນແຫຼ່ງທ່ອງທ່ຽວທາງປະຫວັດສາດ ມີເສັ້ນທາງໂຮ່ຈິມິນຊາກລົດຕັງ ແລະ ລູກສອນໄຟ, ສະຖານທີ່ໝັ້ນການປະຕິວັດເຂດລາວໃຕ້ ແລະ ຮ່ອງຮອຍເມືອງອົງການເກົ່າ, ພ້ອມນີ້​ແຂວງ​ອັດ​ຕະປື ຍັງມີອາຫານພື້ນບ້ານທີ່ເປັນເອກະລັກສະເພາະ ທີ່ແຂວງອື່ນບໍ່ມີເປັນຕົ້ນ: ໝົກໃບໝາກຫຸ່ງ, ຊີ້ນຕະໂນດ, ແຈ່ວປາເຕົ່າ ແລະ ອື່ນໆ ​ໃຫ້​ນັກ​ທ່ອງ​ທ່ຽວ​ທັງ​ພາຍ​ໃນ ​ແລະ ຕ່າງປະ​ເທດ​ໄດ້​ທ່ຽວ​ຊົມ ​ແລະ ຊີ້​ມລົດ​ຊາດ​ອາຫານ​ພື້ນ​ບ້ານ ​ອີກ​ດ້ວຍ.

Comments