LV-IMEX
Senglao content (728×90)

42 ປີ ສປປ ລາວ ມີ​ເຂື່ອນ​ໄຟ​ຟ້າ​ເພີ່ມ​ຂຶ້ນ 50 ແຫ່ງ

42 ປີແຫ່ງການເຕີບໃຫຍ່ ຂະຫຍາຍຕົວໃນດ້ານ ຂະແໜງພະລັງງານໄຟຟ້າ ກັບວິໄສທັດເປັນໝໍ້ໄຟອາຊຽນ ແລະ ການບັນລຸເປົ້າໝາຍຫຼຸດພົ້ນ ອອກຈາກສະຖານະພາບ ປະເທດດ້ອຍພັດທະນາ ພາຍໃນປີ 2020 ໄດ້ສະທ້ອນໃຫ້ເຫັນ ໝາກຜົນ ແລະ ຄວາມ ສໍາເລັດຕົວຈິງທີ່ ພັກ-ລັດຖະບານ ແລະ ປວງຊົນລາວ ທັງຊາດຍາດມາໄດ້ນັ້ນ ຈາກອະດີດ ຈົນເຖິງປັດຈຸບັນ  ສະນັ້ນ, ຖ້າຫວນ ຄືນກ່ອນປີ 1975 ພົບວ່າ ສປປ ລາວ ມີເຂື່ອນໄຟຟ້າພຽງ 2 ແຫ່ງ ເທົ່ານັ້ນຄື: ເຂື່ອນໄຟຟ້າເຊລະບໍາ ຢູ່ເມືອງຊະນະສົມບູນ ແຂວງ ຈໍາປາສັກ ໄດ້ກໍ່ສ້າງລະຫວ່າງປີ 1966-1970 ແລະ ເຂື່ອນໄຟຟ້ານໍ້າງື່ມ ແຫ່ງທີ 1 ໃນປີ 1668-1971 ໃນເວລານັ້ນ ສາມາດສະໜອງ ກະແສໄຟຟ້າໄດ້ພຽງ ແຕ່ບາງເຂດໃນເທສະບານ ສ່ວນຢູ່ເຂດຊານເມືອງ, ຊົນນະບົດ ແລະ ເຂດຜະລິດອື່ນໆ ບໍ່ສາມາດເຂົ້າເຖິງ ແຫຼ່ງພະລັງງານໄຟຟ້າ.


ແນວໃດກໍດີ ທ່ານ ຄຳມະນີ ອິນທິລາດ ລັດຖະມົນຕີກະຊວງ ພະລັງງານ ແລະ ບໍ່ແຮ່ ໄດ້ເປີດເຜີຍ ຫວ່າງບໍ່ດົນມານີ້ວ່າ: ຍ້ອນມີແນວ ທາງນະໂຍບາຍ ອັນຖືກຕ້ອງຂອງ ພັກ-ລັດ, ອີງຕາມແນວທາງແຜນ ຍຸດທະສາດການຫັນ ເປັນອຸດສາຫະກຳ ທັນສະໄໝ ທີ່ໄດ້ ກຳນົດໄວ້ ໃນມະຕິກອງປະຊຸມໃຫຍ່ ຄັ້ງທີ X ຂອງພັກ ແລະ ແຜນພັດທະນາ ເສດຖະກິດ-ສັງຄົມແຫ່ງຊາດ ຄັ້ງທີ VIII ເຊິ່ງໄດ້ແນໃສ່ຂຸດຄົ້ນທ່າແຮງ, ຄວາມສາມາດບົ່ມຊ້ອນ ແລະ ສ້າງເງື່ອນໄຂ ເພື່ອເຮັດໃຫ້ການ ພັດທະນາຂະແໜງ ໄຟຟ້າໄດ້ຮັບການ ຈັດຕັ້ງປະ ຕິບັດດ້ວຍ ຈັງຫວະທີ່ຕໍ່ເນື່ອງ ແລະ ໝັ້ນທ່ຽງກາຍເປັນ ກຳລັງແຮງທາງດ້ານ ເສດຖະກິດແຫ່ງຊາດ.

ປັດຈຸບັນ ສປປ ລາວ ມີ ເຂື່ອນໄຟຟ້າ ທັງໝົດ 50 ແຫ່ງ, ມີກຳລັງຕິດຕັ້ງ ທັງໝົດ 6.000 ກວ່າເມກາວັດ, ພວມກະກຽມ ແລະ ດຳເນີນການກໍ່ສ້າງ ຈໍານວນຫຼາຍໂຄງການ ກັບ ກໍາລັງຕິດຕິດຕັ້ງ 8.000 ເມກາວັດ ຄາດວ່າຈະສຳເລັດພາຍ ໃນປີ 2020 ສະນັ້ນ ພວກເຮົາຈະມີ ເຂື່ອນໄຟຟ້າ ທັງໝົດ 90 ກວ່າແຫ່ງ ຢູ່ ໃນການຄຸ້ມຄອງ, ມີກຳລັງຕິດຕັ້ງ ທັງໝົດເກືອບ 14.000 ເມກາວັດ ໃນອະນາຄົດ ເຊິ່ງຈະສະໜອງໄຟຟ້າ ໃຫ້ແຂວງພາກເໜືອ, ພາກກາງ ແລະ ພາກໃຕ້ທົ່ວປະເທດຜ່ານລະ ບົບສາຍສົ່ງໄຟຟ້າທີ່ມີມາດຕະຖານ ສູງ.

ພ້ອມນັ້ນ, ຍັງມີລະບົບ ສົ່ງໄຟຟ້າ ທີ່ເຊື່ອມໂຍງກັບ ປະເທດເພື່ອນມິດອ້ອມຂ້າງ ເຊັ່ນ: ໄທ, ຫວຽດນາມ, ກຳປູເຈຍ ແລະ ມຽນມາ ພາຍໃຕ້ແຜນງານ ສະໜອງໄຟຟ້າຂອງ ອາຊຽນ ແລະ ນໍາເອົາເງິນຕາ ເຂົ້າປະເທດ.
ປັດຈຸບັນ ເມືອງທີ່ໄດ້ໃຊ້ໄຟຟ້າ ແລ້ວ 148 ເມືອງເທົ່າກັບ 100% ໃນຈໍານວນ  8.544  ບ້ານ, ມີໄຟຟ້າ ໃຊ້ຖາວອນ 7.554 ບ້ານ ເທົ່າກັບ 88.41%, ມີໄຟຟ້າໃຊ້ແລ້ວ 1.074.789 ຄອບຄົວ ເທົ່າກັບ 92.05%.

ທີ່ມາ:  ຂ່າວສານປະເທດລາວ

Comments