LV-IMEX
Senglao content (728×90)

ລາວ-ຫວຽດນາມ ຈັດຕັ້ງໂຄງການປູກຢາງພາລາ ແລະ ສ້າງຕັ້ງໂຮງງານປຸງແຕ່ງ

ພິທີ​ເຊັນ​ສັນຍາ ສຳ​ປະທານ​ໂຄງການ​ປູກ​ຢາງພາລາ ​ແລະ ສ້າງ​ຕັ້ງ​ໂຮງງານ​ປຸງ​ແຕ່ງຢາງ ພາລາ ຢູ່​​ເຂດ​ເມືອງ​ສະໝ້ວຍ ​ແຂວງ​ສາລະ​ວັນ ລະຫວ່າງ ລັດຖະບານ​ ແຫ່ງ ສປປ ລາວ​ ກັບ ບໍລິສັດ ກາວ​ຊູກວາງ​ຈິ ຈຳກັດ ​ແຫ່ງ ສສ ຫວຽດນາມ ​ໄດ້ຈັດ​ຂຶ້ນ ​ໃນ​ວັນ​ທີ 29 ພະຈິກ ທີ່​ກະຊວງ​ແຜນການ ແລະ ການ​ລົງທຶນ, ​ເຊິ່ງຕາງໜ້າລັດຖະບານ​ລາວລົງ​ນາມ​ໂດຍ​ທ່ານ ຄຳ​ລຽນ ພົນ​ເສນາ ຮອງ​ລັດຖະມົນຕີ ກະຊວງ​ແຜນການ ​ແລະ ການ​ລົງທຶນ ​ແລະ ທ່ານ Van Luu ຜູ້ອຳນວຍການ​ບໍລິສັດ ກາວ​ຊູກວາງ​ຈິ ຈຳກັດ, ​ໂດຍ​ມີ​ ທ່ານ ຄຳ​ພັນ ​ເໜືອນສິດທິ​ດາ ຫົວໜ້າຫ້ອງການ ກະຊວງ​ກະສິກຳ ​ແລະ ປ່າ​ໄມ້, ທ່ານ ​ໄຊ​ຍະ​ເດດ ວົງສາ​ລະ​ວັນ ຫົວໜ້າພະ​ແນ​ກ​ແຜນການ ​ແລະ ການ​ລົງ​ທຶນ ​ແຂວງ​ສາລະ​ວັນ, ທ່ານ Nguyen Huu Hanh ປະທານ​ບໍລິສັດ ກາວ​ຊູກວາງ​ຈິ ຈຳກັດ ​ເຂົ້າ​ຮ່ວມ​ເປັນ​ສັກຂີ​ພິຍານ.

​ໂຄງການ​ດັ່ງກ່າວ, ມີ​ເນື້ອ​ທີ່​ດິນ​ຈຳ​ນວນ 500 ​ເຮັກຕາ, ຢູ່​ເຂດ​ເມືອງ​ສະໝ້ວຍ ​ແຂວງ​ສາລະ​ວັນ, ​ມູນ​ຄ່າການ​ລົງທຶນ​ ໃນ​ເບື້ອງຕົ້ນ 6.500.000 ​ໂດ​ລາ​ສະຫະລັດ ຫຼັງ​ຈາກ​ໂຄງການ​ມີ​ການ​ຂະຫຍາຍຕົວ ຈະ​ເພີ່ມ​ມູນ​ຄ່າ​ການ​ລົງທຶນ​ເປັນ 9.671.430 ​ໂດ​ລາ​ສະຫະລັດ, ​ໂດຍ​ມີ​ອາຍຸ​ສຳປະທານ 30 ປີ ສາມາດ​ຕໍ່​ໄດ້​ຕາມ​ການ​ຕົກລົງ​ເຫັນ​ດີ​ ຂອງ​ລັດຖະບານ, ສຳລັບ​ການ​ກໍ່​ສ້າງ​ ແມ່ນ​ໃຫ້​ສຳ​ເລັດ​ພາຍ​ໃນ 7 ປີ ນັບ​ຕັ້ງ​ແຕ່​ມື້​ປູກ​ຢາງ​ພາລາ. ສາມາດ​ສ້າງ​ວຽກ​ເຮັດ​ງານ​ທຳ​ ໃຫ້​ແກ່ປະຊາຊົນຫຼາຍ​ກວ່າ 500 ຄົນ ​ແລະ ​ແຮງ​ງານ​ຕ່າງປະ​ເທດ 100 ກວ່າ​ຄົນ. ນອກ​ນັ້ນ​, ທາງ​ບໍລິສັດ ຍັງ​ຕ້ອງ​ປະຕິບັດ​ຕາມ​ສັນຍາຟື້ນ​ຟູ​ສິ່ງ​ແວດ​ລ້ອມ​ໃນ ພື້ນ​ທີ່​ໂຄງການ ​ແລະ ​ແຜນ​ພື້ນ​ຟູ​ສິ່ງ​ແວດ​ລ້ອມ ​ເພື່ອ​ພັດທະນາຕາມທິດສີຂຽວ.

ບໍລິສັດ ກາວ​ຊູກວາງ​ຈິ ຈຳກັດ ​ໄດ້​ເຊັນ​ບົດ​ບັນ​ທຶກ​ຄວາມ​ເຂົ້າ​ໃຈ ກັບ​ລັດຖະບານ​ລາວ ​ໃນ​ວັນ​ທີ 20 ທັນວາ 2011 ​ເພື່ອ​ສຳ​ຫຼວດ ​ແລະ ສຶກສາ​ຄວາມ​ເປັນ​ໄປ​ໄດ້ ຂອງ​ໂຄງການ​ປູກ​ຢາງພາລາ​ ​ແລະ ສ້າງ​ຕັ້ງ​ໂຮງງານ​ປຸງ​ແຕ່ງ​ຢາງພາລາ​ ​ໃນ​ເນື້ອ​ທີ່ 947 ​ເຮັກຕາ ຢູ່​ເຂດ​ເມືອງ​ສະໝ້ວຍ ​ແຂວງ​ສາລະ​ວັນ ພາຍຫຼັງ​ສຳ​ຫຼວດ ສາມາດ​ຄັດ​ໄດ້​ເນື້ອ​ທີ່ ​ຈຳ​ນວນ 500 ​ເຮັກ​ຕາ ​ທີ່​ສາມາດ​ປູກ​ຢາງພາລາ​​ໄດ້ ລັດຖະບານ ຈຶ່ງ​ເຫັນ​ດີ​ອະນຸມັດ​ໃຫ້ ​ເຊັນ​ສັນຍາສຳ​ປະທານ​ໂຄງການ​ດັ່ງກ່າວ, ປັດຈຸບັນ​ໂຄງການ ​ໄດ້​ຜ່ານ​ການ​ຮັບ ຮອງບົດ​ວິພາ​ກ​ເສດຖະກິດ-​ເຕັກນິກ ຈາກ​ກະຊວງ​ກະສິກຳ ​ແລະ ປ່າ​ໄມ້ ສະບັບ​ເລກທີ 1506/ກປມ, ລົງ​ວັນ​ທີ 19/6/2017 ​ແລະ ບົດ​ປະ​ເມີນ​ຜົນ​ກະທົບ​ຕໍ່​ສິ່ງ​ແວດ​ລ້ອມ ​ແລະ ສັງຄົມ ຈາກ​ກະຊວງ​ຊັບພະຍາກອນ ​ແລະ ສິ່ງ​ແວດ​ລ້ອມ ສະບັບ​ເລກທີ 949/ພຊສສວ, ລົງ​ວັນ​ທີ 19/6/2017. ​ໂຄງການ​ດັ່ງກ່າວ ​ແມ່ນ​ເປັນ​ໂຄງການ​ທີ່​ໄດ້​ຮັບ​ອະນຸຍາດກ່ອນ​ມີ​ຄຳ​ສັ່ງ ຂອງ​ ທ່ານນາຍົກລັດຖະມົນຕີ ສະບັບ​ເລກທີ 13/ນຍ, ລົງ​ວັນ​ທີ 1/6/2012 ກ່ຽວກັບ​ການ​ໂຈະ ການ​ໃຫ້​ສຳ​ປະທານ​ໂຄງການ​ໄມ້​ວິກ ​ແລະ ຢາງພາລາ.

ທີ່ມາ: ຂ່າວສານປະເທດລາວ. ຂ່າວ:ກິດ​ຕາ. ພາບ: ​ເກດສະໜາ

Comments