LV-IMEX
Senglao content (728×90)

ຫຼວງພະບາງ ກຽມຫຼາຍກິດຈະກຳຕ້ອນຮັບ ວັນສໍາຄັນຂອງຊາດ ໃນເດືອນທັນວາ

ພະ​ແນ​ກຖະ​ແລງຂ່າວ, ວັດທະນະທຳ ​ແລະ ທ່ອງ​ທ່ຽວ​ແຂວງ ​ແຂວງ​ຫລວງ​ພະ​ບາງ  ​ໄດ້​ກະກຽມ​ຫຼາຍ​ກິດຈະກຳ ​ເພື່ອ​ຕ້ອນຮັບ​ວັນ​ສຳຄັນ​ຂອງ​ຊາດ ​ໃນ​ເດືອນ​ທັນວາ 2017  ​ເປັນ​ຕົ້ນ​ແມ່ນ ວັນສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ວັນທີ 2 ທັນວາ 1975–2 ທັນວາ 2017 ຄົບຮອບ 42 ປີ, ວັນເກີດຂອງປະທານ ໄກສອນ ພົມວິຫານ ຜູ້ນໍາທີ່ແສນເຄົາລົບຮັກຂອງປະຊາຊົນລາວ ແລະ ເປັນເດືອນທີ່ອົງການ ອຸ່ຍແນັສໂກ ໄດ້ຮັບຮອງເອົາເມືອງຫຼວງພະບາງ ເຂົ້າໃນບັນຊີເປັນເມືອງມໍລະດົກໂລກ.

ທ່ານ ສົມອົກ ພັນທະວົງ ຮອງຫົວໜ້າພະແນກ ຖວທ ແຂວງ​ຫຼວງ​ພະ​ບາງ ​ໄດ້​ໃຫ້ຮູ້ໃນ​ວັນ​ທີ 29 ພະຈິກ ຜ່ານ​ມາ​ນີ້​ວ່າ: ​ເພື່ອ​ຕ້ອນຮັບ​ວັນ​ສຳຄັນ​ດັ່ງກ່າວ ພະ​ແນ​ກ ຖວທ ​ແຂວງ​ໄດ້​ມີ​ການ​ກະກຽມ​ຫຼາຍ​ກິດຈະກຳ ​ເປັນ​ຕົ້ນ:

  • ການສາຍຮູບເງົາມິດຕະພາບລະຫວ່າງລາວ-ຈີນ ຢູ່​ບັນດາ​ເມືອງ
  • ຈັດມະຫາກໍາຮູບເງົາ ອາຊີຕາເວັນອອກສ່ຽງໃຕ້ ຄັ້ງທີ 8
  • ຈັດບຸນຜ້າປ່າສາມັກຄີ ຂອງປວງຊົນຊາວຫຼວງພະບາງ ​
  • ງານສະເຫຼີມສະຫຼອງ ສົ່ງທ້າຍປີເກົ່າ 2017 ​ແລະ ຕ້ອນຮັບປີໃໝ່ສາກົນ 2018. ​

ຈຸດປະສົງຂອງການຈັດງານດັ່ງກ່າວ ແມ່ນເພື່ອດຶງດູດເອົານັກທ່ອງທ່ຽວເຂົ້າມາທ່ຽວຊົມວັດທະນະທໍາ, ທໍາມະຊາດ ແລະ ປະຫວັດສາດຂອງ ແຂວງຫຼວງພະບາງ ໃຫ້ຫຼາຍຂຶ້ນ.

​ໂອກາດ​ນີ້, ທ່ານ ສົມອົກ ພັນທະວົງ ຍັງໄດ້ຮຽກຮ້ອງມາຍັງບັນດາພໍ່ແມ່ພີ່ນ້ອງ ແລະ ມວນຊົນທົ່ວຫຼວງພະບາງ ຈົ່ງເຂົ້າຮ່ວມເປັນເຈົ້າການໃນການຈັດກິດຈະກໍາຕ່າງໆ ແລະ ຖືເອົາວັນສໍາຄັນຂອງຊາດ ເປັນການລະນຶກ ເຖິງຄຸນງາມຄວາມດີຂອງບັນດານັກຮົບປະຕິວັດ ແລະ ບັນດາການນໍາທີ່ໄດ້ອຸທິດເລືອດເນື້ອເຮື່ອແຮງ, ສະຕິປັນຍາເຂົ້າໃນການຕໍ່ສູ້ ເພື່ອຍາດເອົາເອກະລາດ, ອິດສະຫຼະພາບ ແລະ ປະຊາທິປະໄຕ ມາໃຫ້ປະເທດຊາດ ໄດ້ຢ່າງສົມບູນ, ພ້ອມກັນນັ້ນຈົ່ງຮໍ່າຮຽນເອົາຄຸນສົມບັດສິນທໍາປະຕິວັດ, ຄວາມເສຍສະຫລະຂອງນັກຮົບປະຕິວັດ ໂດຍສະເພາະແມ່ນສິນທໍາປະຕິວັດຂອງ ປະທານໄກສອນ ພົມວິ ຫານ ຜູ້ນໍາທີ່ແສນເຄົາລົບ ຮັກຂອງປະຊາຊົນລາວ.

ທີ່ມາ: ຂ່າວສານປະເທດລາວ. ຂ່າວ: ເພັດສາຄອນ ສິມມະວົງ

Comments