LV-IMEX
Senglao content (728×90)

ມອບ-ຮັບ ຫໍພິພິທະພັນແຫ່ງຊາດຫຼັງໃໝ່

ໃນວັນທີ 1 ພະຈິກ 2017 ທີ່ຜ່ານມາ, ໄດ້ມີພິທີມອບ-ຮັບ ຫໍພິພິທະພັນແຫ່ງຊາດຫລັງໃໝ່ ລະຫວ່າງບໍລິສັດ ກຸ່ມຄຳໄພຊະນະ ຈຳກັດຜູ້ດຽວ ແລະ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ໂດຍມີ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ທ່ານ ບໍ່ແສງຄຳ ວົງດາລາ ລັດຖະ ມົນຕີ ກະຊວງຖະຫຼງຂ່າວ, ວັດທະນະທຳ ແລະ ທ່ອງທ່ຽວ, ມີບັນດາຫົວໜ້າກົມ, ຮອງກົມ ພ້ອມແຂກຖືກເຊີນ ເຂົ້າຮ່ວມ.

ທ່ານ ບົວເງິນ ຊາພູວົງ ຮອງລັດຖະມົນຕີ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ກ່າວວ່າ: ຫໍພິພິທະພັນແຫ່ງຊາດຫຼັງໃໝ່ ຈະເປັນບ່ອນເຕົ້າໂຮມບູຮານ ວັດຖຸພັນປະເພດຕ່າງໆ ອັນເປັນມູນມໍລະດົກ ທີ່ລ້ຳຄ່າທາງດ້ານ ວັດທະນະທຳ ແລະ ປະຫວັດສາດໃນແຕ່ລະຍຸກສະໄໝ, ທັງເປັນສະຖານທີ່ສຶກສາ, ຄົ້ນຄວ້າ, ຮຽນຮູ້ທາງດ້ານປະຫວັດສາດ, ວັດທະນະທຳ ແລະ ອະລິຍະທຳຂອງຊາດລາວເຮົາ ເພື່ອເປັນຂໍ້ມູນພື້ນຖານ ຕອບສະໜອງຄວາມຮຽກຮ້ອງ ຕ້ອງການຂອງ ນັກຮຽນ, ນັກສຶກສາ, ຊາວໜຸ່ມ, ເຍົາວະຊົນ ແລະ ທ່ານຜູ້ທີ່ມີຄວາມສົນໃຈໃນການສຶກສາຮ່ຳຮຽນ ແລະ ການມາທ່ຽວຊົມຂອງນັກທ່ອງທ່ຽວທັງພາຍໃນ ແລະ ຕ່າງປະເທດ.

ຈາກນັ້ນ ທ່ານ ຄຳໄພ ສົມຊະນະ ປະທານບໍລິສັດ ກຸ່ມຄຳໄພຊະນະ ຈຳກັດຜູ້ດຽວ ກໍໄດ້ຂຶ້ນລາຍງານຜົນສຳເລັດໂຄງການກໍ່ສ້າງດັ່ງກ່າວ, ຫໍພິພິທະພັນແຫ່ງຊາດ ເປັນອາຄານມີຮູບຊົງແບບສະຖາປັດຕິຍະກຳລາວປະຍຸກ ປະສົມປະສານກັບຄວາມ ທັນສະໄໝ, ມີຄວາມໂດດເດັ່ນທາງດ້ານລວດລາຍດອກດວງ, ເປັນອາຄານ 4 ຊັ້ນ ຂະໜາດຂອງອາຄານແມ່ນ 80×56 ແມັດ, ສູງ 29 ແມັດ, ມີເນື້ອທີ່ນຳໃຊ້ທັງໝົດ 7.171,56 ມ2 ເປັນໂຄງສ້າງທີ່ແໜ້ນໜາຖາວອນ, ນຳໃຊ້ເຕັກນິກການກໍ່ສ້າງ ທີ່ທັນສະໄໝ ຄື ນຳໃຊ້ແຜ່ນພື້ນອັດແຮງ ແລະ ຮາກຖານເຮັດດ້ວຍເສົາເຂັມເຈາະເທກັບທີ່, ລວມມູນຄ່າການກໍ່ສ້າງທັງໝົດຕາມສັນຍາ 80 ຕື້ກວ່າກີບ.

ໃນໂອກາດດັ່ງກ່າວ, ທ່ານ ຄຳໄພ ສົມຊະນະ ກໍໄດ້ຂຶ້ນມອບກະແຈໃຫ້ທ່ານ ບໍ່ແສງຄຳ ວົງດາລາ ຫຼັງຈາກນັ້ນ, ກໍໄດ້ມອບຕໍ່ໃຫ້ ທ່ານ ນາງ ເພັດມາໄລວັນ ແກ້ວບຸນມາ ຫົວໜ້າອຳນວຍການຫໍພິພິທະພັນແຫ່ງຊາດ. ພ້ອມດຽວກັນນັ້ນ, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ກໍໄດ້ໃຫ້ກຽດຂຶ້ນປະດັບຫຼຽນໄຊພັດທະນາຊັ້ນ 1 ໃຫ້ບໍລິສັດກຸ່ມ ຄຳໄພ ຊະນະ ຈຳກັດຜູ້ດຽວ ແລະ ບໍລິສັດຈິດຈະເລີນຊັບ ທີ່ມີຜົນງານໃນການປະກອບສ່ວນດ້ານທຶນຮອນ ເຂົ້າໃນການກໍ່ສ້າງຫໍພິພິທະພັນ ແຫ່ງຊາດ, ເຊິ່ງເປັນການປະກອບສ່ວນສຳຄັນ ເຂົ້າໃນການສ້າງສາພັດທະນາປະເທດຊາດ.

ທີ່ມາ: ຂ່າວສານປະເທດລາວ. ຂ່າວ: ກິດຕາ ; ພາບ: ເກດສະໜາ

Comments