LV-IMEX
Senglao content (728×90)

ປາກຊັນເລັ່ງກໍ່ສ້າງເສັ້ນທາງເທສະບານເມືອງ

 

 

 

​ປັດຈຸບັນ ເມືອງ​ປາກ​ຊັນ ​ແຂວງ​ບໍລິ​ຄຳ​ໄຊ ​ກຳລັງເລັ່ງກໍ່ສ້າງ​ເສັ້ນທາງ ​ເທສະ​ບານ​ເມືອງ ​ເພື່ອ​ເຮັດ​ໃຫ້ການ​ສັນຈອນ​ໄປມາ​ ມີ​ຄວາມ​ສະດວກ​ສະບາຍ ​ເປັນ​ຕົ້ນ​ແມ່ນ ກໍ່ສ້າງ​ເສັ້ນທາງເຂົ້າ​ຫ້ອງ ​ວ່າການປົກຄອງ​ແຂວງຫລັງ​ໃໝ່ ​ຢູ່​ເຂດ​ປາກ​ຊັນ 3, ເສັ້ນທາງ​ເທສະບານ​ປາກ​ຊັນ 1, ປາກ​ຊັນ 2 ​ແລະ ປາກ​ຊັນ 3 ​ແລະ ​ເສັ້ນທາງ​ອື່ນໆ​ຈຳນວນ​ໜຶ່ງ.

​      ໃນທ້າຍ​ເດືອນ​ພະຈິກ​ຜ່ານ​ມາ, ທ່ານ ກອງ​ແກ້ວ ​ໄຊ​ສົງຄາມ ​ເຈົ້າ​ແຂວງ​ບໍລິ​ຄຳ​ໄຊ ​ໄດ້​ລົງ​ເບິ່ງ​ຄວາມ​ຄຶບໜ້າການ​ກໍ່ສ້າງ​ເສັ້ນທາງ ໃນ​ເທສະບານ​ເມືອງ​ປາກ​ຊັນ ​ໂດຍ​ການ​ນຳພາ​ທາງ​ຂອງ​ ທ່ານ ​ໄກ່​ທອງ ອານຸສິນ ຫົວໜ້າ​ພະ​ແນ​ກ​ໂຍທາ​ທິການ ​ແລະ ຂົນ​ສົ່ງ​ແຂວງ. ​​​ເຊິ່ງການ​ກໍ່ສ້າງ​ເສັ້ນທາງເຂົ້າ​ຫ້ອງ​ວ່າການປົກຄອງ​ແຂວງຫລັງ​ໃໝ່ ​ຢູ່​ເຂດ​ປາກ​ຊັນ 3  ​ແມ່ນ ບໍລິສັດ ສຸກ​ຊະນະກໍ່ສ້າງຂົວ-ທາງ ​ເປັນ​ຜູ້​ຮັບ​ເໝົາ ແລະ ​ໄດ້​ເລີ່​ມກໍ່ສ້າງມາ​ແຕ່​ທ້າຍ​ເດືອນເມສາ 2017  ​​ເປັນ​ເສັ້ນທາງສອງ​ເລັນ​ປູຢາງ​ສອງ​ຊັ້ນ, ຍາວ 1.800 ​ກວ່າ​ແມັດ ​ແລະ ກວ້າງ 20 ​​ແມັດ, ປະກອບ​ດ້ວຍ​ໄຟ​ເຍືອງ​ທາງ, ລວມມູນ​ຄ່າ​ການ​ກໍ່ສ້າງ 16 ຕື້​ກວ່າ​ກີບ ຄາດ​ວ່າ​ຈະ​ໃຫ້​ສຳ​ເລັດ​ ພາຍ​ໃນ​ເດືອນ​ ພຶດສາະພາ 2018  ​ເຊິ່ງມາ​ຮອດປັດຈຸບັນ​ສຳ​ເລັດ​ແລ້ວ 25%.

ສ່ວນ​​ການ​ກໍ່ສ້າງ​ເສັ້ນທາງ​ຢູ່​ເທສະບານເມືອງ​ປາກ​ຊັນ 2 ​ແມ່ນ​ບໍລິສັດ​ຈະ​ເລີ​ນຊັບ ​ເປັນ​ຜູ້​ຮັບ​ເໝົາ ປັດຈຸບັນ​ກຳລັງ​ກໍ່ສ້າງ​ແຕ່​ທາງ​ແຍກ ​ເຂົ້າ​ຫ້ອງການອົງການບໍລິຫານ ​ແລະ ​ພັດທະນາ​​ຕົວ​ເມືອງ ຫາ​ທາງ​ແຍກກົມ 17, ​ເປັນ​ທາງ​ປູຢາງ​ສອງ​ຊັ້ນຍາວ 400 ​​ແມັດ, ​ກວ້າງ 8 ​ແມ້ດ ​ແລະ ການ​ສ້ອມ​ແປງ​ເສັ້ນທາງ ​ແຕ່ທາງ​ແຍກ​ບ້ານໂພນ​ໄຊ ຫາ​ບ້ານສົມ​ສະຫວາດ ​ຍາວ 2,5 ກິ​ໂລ​​ແມັດ, ​ກວ້າງ 5 ​ແມ້ດ ໃນ​ນັ້ນ​ຈະ​ປູຢາງ​ສອງ​ຊັ້ນ 900 ​ແມ້ດ, ​ປັດຈຸບັນ​ສຳ​ເລັດ​ແລ້ວ 35% ດ້ວຍມູນ​ຄ່າ​ການ​ກໍ່ສ້າງ 1 ຕື້​ກວ່າ​​ກີບ, ​ໂດຍ​ແມ່ນ​ລັດ​ວິ​ສາ​ຫະກິດ​ກໍ່ສ້າງ​ ຊົນລະປະທານຂົວ-​ທາງ​ແຂວງ ​ເປັນ​ຜູ້​ຮັບ​ເໝົາ ຄາດ​ວ່າ​ຈະ​ໃຫ້​ສຳ​ເລັດ ​ໃນ​ເດືອນ​ກຸມພາ 2018.

ຂ່າວຈາກ: ປະເທດລາວ

Comments