Senglao content (728×90)

ໄປທ່ຽວພູຄູນ ນອນໃນເຕັ້ນ, ຝີງໄຟ, ຊົມທະເລມອກ, ກິນສະຕໍເບີຣີ ກັບຄົນຮູ້ໃຈ

ໄລຍະນີ້ກ້າວເຂົ້າສູ່ລະດູໜາວ ແລະ ໃກ້ຈະຮອດເທສະການສົ່ງທ້າຍປີເກົ່າ 2017 ຕ້ອນຮັບປີໃໝ່ 2018 ແລ້ວ ທາງທີມງານ ວາລະສານທາເກັດ ຂໍແນະນໍາສະຖານທີ່ທ່ອງທ່ຽວໃຫ້ທຸກທ່ານໄດ້ໄປພັກຜ່ອນໃນໃນມື້ພັກ ແລະ ສະຖານທີ່ທີ່ເຮົາຈະມາແນະນໍາໃຫ້ທຸກທ່ານກໍຄື ສວນ “ສະຕໍເບີຣີ່” ພູຄູນ ແລະ ພູພຽງຟ້າ.

ເມື່ອເອີ່ຍເຖິງສວນ “ສະຕໍເບີຣີ່” ແລະ ພູພຽງຟ້າແລ້ວ ຫຼາຍໆທ່ານກໍຄົງຈະເຄີຍໄດ້ຍິນ ຫຼື ບາງທ່ານກໍອາດໄດ້ໄປທ່ຽວຊົມມາແລ້ວສາມແຍກພູຄູນ ຫຼື ເມືອງພູຄູນ ເປັນເມືອງໜຶ່ງທີ່ເປັນທາງສາມແຍກໄປວຽງຈັນ – ຫຼວງບາງ – ຊຽງຂວາງ ແລະ ເປັນເມືອງທີ່ມີສາມລະດູ ໃນມື້ໜຶ່ງໆຈະມີທັງລະດູຝົນ, ລະໜາວ ແລະ ລະດູຮ້ອນ ຈົນຫຼາຍຄົນທີ່ມາທ່ຽວຊົມໃນສະຖານທີ່ແຫ່ງນີ້ບໍ່ສາມາດປັບຕົວໄດ້ທັນເລີຍ.

ສວນພູຄູນ ”ສະຕໍເບີຣີ່” ຕັ້ງຢູ່ບ້ານ ສາມແຍກພູຄູນ ທາງເຂົ້າຕິດກັບປໍ້ານໍ້າມັນພູຄູນ ຫ່າງຈາກເສັ້ນທາງ 13 ເໝືອ ພຽງ 300 m ເຊິ່ງຫ່າງຈາກນະຄອນຫຼວງວຽງຈັນ 250 km, ຈາກຫຼວງພະບາງ 135 km, ຈາກຊຽງຂວາງ 130 km ແລະ ຈາກວັງວຽງ 100 km.

ສໍາລັບການເດີນທາງມາສວນແຫ່ງນີ້ບໍ່ວ່າຈະມານໍາລົດຮັບສົ່ງຂອງສວນທີ່ມີບໍລິການທຸກວັນເສົາວັນອາທິດ, ມາດ້ວຍລົດສ່ວນຕົວ ແລະ ຂີ່ລົດໂດຍສານປະຈໍາທາງຈາກຄິວລົດສາຍເໜືອທີ່ມີແຕ່ 6 ໂມງເຊົ້າຫາ 11 ໂມງ ເຊິ່ງລາຄາປີ້ລົດກໍພຽງແຕ່ 90.000 ກີບ ສິ່ງທີ່ທ່ານຕ້ອງກຽມມາເມື່ອມາທ່ຽວຊົມສະຖານທີ່ແຫ່ງນີ້ຄື: ເສື້ອແຂນຍາວ, ຜ້າຫົ່ມເອົາມາເຜື່ອໄວ້ໃນມື້ທີ່ໜາວຫຼາຍ, ອາຫານສໍາລັບມາເຮັດກິນເອງ ເຊິ່ງທາງສວນ “ສະຕໍເບີຣີ່” ມີຂາຍແຕ່ເຄື່ອງດື່ມ ແລະ ອຸປະກອນແຕ່ງກິນໃຫ້ເຊົ່າ.ສວນ “ສະຕໍເບີຣີ່” ຈະມີເຕັ້ນ, ຜ້າຫົ່ມ, ໝອນ, ອຸປະກອນແຕ່ງກິນ, ຫ້ອງນໍ້າຫ້ອງອາບໄວ້ໃຫ້ເຊົ່າ. ສໍາລັບຄ່າບໍລິການເຊົ່າເຕັ້ນນ້ອຍລາຄາ 50.000 ກີບ/ເຕັ້ນ( ນອນໄດ້ 1-2 ຄົນ), ເຕັ້ນໃຫຍ່ລາຄາ 100.000 ກີບ/ເຕັ້ນ( ນອນໄດ້ 2-4 ຄົນ), ເອົາເຕັ້ນມາເອງ 30.000 ກີບ/ເຕັ້ນ, ຄ່າບໍລິການຕ່າງໆ 10.000 ກີບ/ຄົນ( ອຸປະກອນເຮັດກິນ ແລະ ອື່ນໆ) ສໍາລັບທ່ານໃດທີ່ເຊົ່າເຕັ້ນຢູ່ທີ່ສວນຈະມີທັງໝອນ ແລະ ຜ້າຫົ່ມໃຫ້ພ້ອມ ທ່ານໃດທີ່ຈະໄປສໍາຜັດກັບອາກາດໜາວຈະຕ້ອງໄດ້ຈອງກ່ອນລ່ວງໜ້າຢ່າງໜ້ອຍສາມມື້.

ສໍາລັບທ່ານໃດທີ່ມີເວລາໃນການທ່ອງທ່ຽວຫຼາຍ ຫຼັງຈາກທ່ຽວຊົມສວນ “ສະຕໍເບີຣີ່” ແລ້ວກໍຢ່າລືມມາແວ່ຖ່າຍຮູບພາບເພື່ອເກັບຮູບພາບບັນຍາກາດງາມໆຂອງທະເລໝອກຢູ່ທີ່ພູພຽງຟ້າ ເຊິ່ງພູພຽງຟ້າ ເປັນພູພຽງແຫ່ງໜຶ່ງຕັ້ງຢູ່ລະຫວ່າງທາງຜ່ານຈາກເສັ້ນທາງນະຄອນຫຼວງວຽງຈັນຫາເມືອງພູຄູນ ( ຫຼວງພະບາງ ) ຕາມສາຍທາງເລກທີ່ 13 ເໜືອ ໄລຍະທາງປະມານ 260 ກິໂລແມັດ ຖ້າອອກມາແຕ່ທາງວຽງຈັນກໍຈະຮອດພູຟ້າກ່ອນເມືອງພູຄູນປະມານ 20 ນາທີ. ພູພຽງຟ້ານີ້ ເປັນຈຸດຊົມທໍາມະຊາດທີ່ສວຍງາມ ແລະ ຖ້າມາແຕ່ທາງວຽງຈັນກໍຈະເປັນຈຸດແວ່ພັກຮັບປະທານອາຫານ ຫຼື ແວ່ເພື່ອເກັບຮູບພາບງາມໆຂອງທະເລໝອກ ທໍາມະຊາດຂອງສະຖານທີ່ແຫ່ງນີ້ຈະມີພູທີ່ຕັ້ງສູງເດັ່ນຢ່າງສະຫງ່າງາມ ແລະ ສາມາດຊົມທິວທັດໄດ້ໂດຍຮອບໆເປັນທະເລໝອກທີ່ກວ້າງຂວາງສຸດສາຍຕາ ມີບັນຍາກາດທີ່ເຢັນສະບາຍ ເໝາະແກ່ການແວ່ພັກຍາມທີ່ເດີນທາງມາເມື່ອຍໆ ຢູ່ທີ່ພູພຽງແຫ່ງນີ້ສາມາດແນມເຫັນພູພະເຈົ້າ ທີ່ຢູ່ເທິງເສັ້ນທາງໄປວັງວຽງ ສາເຫດທີ່ຊື່ພູພະເຈົ້າເປັນເພາະວ່າ: ເປັນພູສາມຫຼ່ຽມຄືກັບພະເຈົ້ານັ້ນເອງ ຖ້າຫາກມາຕອນຕາເວັນໃກ້ຈະຕົກດິນ ບັນຍາກາດທີ່ນີ້ກໍແຮ່ງງາມ ຫຼື ຖ້າແມ່ນໃນລະດູໜາວ ອາກາດທີ່ນີ້ຈະໜາວເຢັນ ມີມອກລອຍປົກຄຸມຈົນຂາວຈຸ່ນພຸ່ນໄປທົ່ວໃນຕອນເຊົ້າ ແຕ່ບາງມື້ກໍອາກາດເຢັນພໍດີ ແລະ ມີແດດອ່ອນໆສາດສ່ອງລົງມາ ເຮັດໃຫ້ສາມາດແນມເຫັນທິວທັດໄດ້ຢ່າງສວຍງາມອະລັງການ. ນອກຈາກຄວາມງົດງາມຂອງທິວທັດທໍາມະຊາດແລ້ວ ເທິງພູພຽງຟ້ານີ້ຍັງມີສະຖານທີ່ກວ້າງຂວາງ ບໍ່ແອອັດ ມີມູມໃຫ້ຖ່າຍຮູບງາມໆ ມີບ່ອນປິກນິກ ແລະ ທີ່ສໍາຄັນຍັງມີຮ້ານອາຫານເອີ້ນວ່າ: ຮ້ານອາຫານພູພຽງຟ້າ ເຊິ່ງເປັນທີ່ພັກຜ່ອນຮັບປະທານອາຫານ, ດື່ມກາເຟຮ້ອນໆ ຫຼື ຈະນັ່ງດື່ມເບຍເຢັນພໍປະມານກໍໄດ້.

ແຖບຖິ່ນພູຄູນແຫ່ງນີ້ ເຖິງຈະເປັນເສັ້ນທາງທີ່ຄົດໂຄ້ງແດ່ກໍຕາມ ແຕ່ເສັ້ນທາງອັນສວຍງາມນີ້ກໍເປັນທີ່ໜ້າສົນໃຈ ແລະ ສາມາດດຶງດູດນັກທ່ອງທ່ຽວ ໂດຍສະເພາະນັກທ່ອງທ່ຽວຊາວຕ່າງປະເທດ ທັງຂີ່ລົດຖີບ, ລົດຈັກ ຈໍາພວກ ບິກໄບຄ໌ ( big bike ) ທີ່ລວມຕົວກັນອອກທ່ອງທ່ຽວແຖບຖິ່ນດິນພາກເໜືອເປັນກຸ່ມໆ ເພື່ອຊົມຄວາມງາມລະຫວ່າງສອງຂ້າງທາງໄດ້ຢ່າງເບີກບານສໍາລານໃຈ.

ໃນເທສະການສົ່ງທ້າຍປີເກົ່າຕ້ອນຮັບປີໃໝ່ນີ້ຖ້າທ່ານໃດທີ່ຍັງບໍ່ເຄີຍໄປສະຖານທີ່ແຫ່ງນີ້ ແລະ ຍັງບໍ່ມີແຜນທີ່ຈະໄປທ່ຽວທາງໃດກໍລອງໄປສໍາຜັດກັບບັນຍາກາດຂອງສອງສະຖານທີ່ແຫ່ງນີ້ລອງເບິ່ງຮັບຮອງທ່ານຈະບໍ່ຜິດຫວັງກັບຄວາມງົດງາມຂອງທະເລໝອກ ແລະ ສວນ “ສະຕໍເບີຣີ່” ຢ່າງແນ່ນອນ ຫຼັງຈາກທ່ຽວຊົມແລ້ວເມື່ອທ່ານເດີນທາງກັບກໍສາມາດແວ່ຊື້ໝາກກ້ຽງຫວານໆແຊບໆຂອງເມືອງວັງວຽງໄດ້ທີ່ມີວາງຂາຍຕາມຮ້ານແຄມທາງມາເປັນຂອງຝາກຂອງຕ້ອນໄດ້.

Comments