Senglao content (728×90)

ບໍ່ນໍ້າຮ້ອນເມືອງຮ້ຽມ ແລະ ບໍ່ນໍ້າອຸ່ນນາເມືອງ

ໄລຍະລະດູໜາວແບບນີ້ ເປັນຕົ້ນແມ່ນຢູ່ທາງພາກເໜືອເປັນອາກາດໜາວຫຼາຍແມ່ນບໍ່? ແຕ່ຖ້າເຮົາຈະຊອກຫາສະຖານທີ່ທ່ອງທ່ຽວໃຫ້ເໝາະກັບລະດູໜາວແບບນີ້ເຮົາຈະໄປທ່ຽວໃສດີໃນປະເທດເຮົາ. ໃນອາທິດນີ້ ທາງທີມງານ ວາລະສານທາເກັດ ຈະມາແນະນຳໃຫ້ທຸກທ່ານໄດ້ຮູ້ກ່ຽວກັບສະຖານທີ່ ທີ່ມີຄວາມອົບອຸ່ນນັ້ນກໍຄື: ບໍ່ນໍ້າຮ້ອນເມືອງຮ້ຽມ ແລະ ບໍ່ນໍ້າອຸ່ນນາເມືອງ ເຊິ່ງຫຼາຍທ່ານທີ່ຢູ່ໃກ້ ແລະ ໄກກໍອາດຈະເຄີຍໄປມາແລ້ວ.

ອາກາດເຢັນໆແບບນີ້ລົງແຊ່ນໍ້າອຸ່ນໆກັບບັນຍາກາດທາງທໍາມະຊາດທີ່ສວຍສົດງົດງາມ ເຊິ່ງບໍ່ນໍ້າຮ້ອນທັງສອງແຫ່ງນີ້ແມ່ນເກີດມາຈາກແຮ່ທາດທີ່ຢູ່ພື້ນດິນເຊິ່ງມີສັບພະຄຸນພິເສດໃນການປິ່ນປົວພະຍາດຜິວໜັງ ເປັນຕົ້ນແມ່ນຂີ້ຫິດ ແລະ ຂີ້ກາກ ດ້ວຍເຫດນີ້ ບໍ່ນໍ້າອຸ່ນ ແລະ ບໍ່ນໍ້າຮ້ອນທັງສອງແຫ່ງນີ້ຈຶ່ງເປັນທີ່ນິຍົມຂອງປະຊາຊົນແຂວງຫົວພັນ ແລະ ນັກ​ທ່ອງ​ທ່ຽວທັງພາຍ​ໃນ ​ແລະຕ່າງປະ​ເທດ ​ເປັນຕົ້ນໃນໄລະຍະລະດູໜາວແບບນີ້ນັກທ່ອງທ່ຽວທີ່ໄປທ່ຽວຊົມກໍຍັງສາມາດອາບນໍ້າໄດ້ຢ່າງສະດວກສະບາຍ, ອາບໄດ້ດົນຕາມຄວາມພໍໃຈ ເພາະທາງບໍ່ນໍ້າອຸ່ນ ແລະ ບໍ່ນໍ້າຮ້ອນມີອ່າງອາບໄວ້ຄອຍໃຫ້ບໍລິການແກ່ນັກທ່ອງທ່ຽວ.

ບໍ່ນໍ້າຮ້ອນ​ເມືອງ​ຮ້ຽມ ​ຢູ່ທາງທິດຕາເວັນຕົກຂອງແຂວງ​ຫົວພັນ ​ເຊິ່ງຕັ້ງຢູ່ຫ່າງຈາກເທສະບານ​ເມື​ອງຊໍາເໜືອປະມານ155 ກິໂລແມັດ ແລະມີເສັ້ນທາງເຂົ້າເຖິງສະດວກສະບາຍສິ່ງ​ທີ່​ສໍາຄັນ​ແມ່ນນອນຢູ່ໃນເຂດປ່າສະຫງວນແຫ່ງຊາດນໍ້າແອດ – ພູເລີຍເຊິ່ງເປັນຂົງເຂດທີ່ອ້ອມຮອບໄປດ້ວຍປ່າໄມ້ສີຂຽວສະອຸ້ມຕະຫຼອດປີພ້ອມທັງມີສັດສາວາສິ່ງຫຼາກຫຼາຍຊະນິດທີ່​ເພິ່ນໄດ້ອະນຸລັກຮັກສາໄວ້ໃຫ້ນັກທ່ອງທ່ຽວໄດ້ຊົມ

.

ບໍ່ນໍ້າຮ້ອນແຫ່ງນີ້ເປັນບໍ່ນໍ້າຮ້ອນທີ່ມີອຸນຫະພູມສູງທີ່ສຸດໃນ ສປປ ລາວ ເຊິ່ງມີຄວາມຮ້ອນເຖິງ 100 ອົງສາ ແລະ ທ່ານໃດທີ່ມາທ່ຽວຊົມກໍສາມາດນໍາເອົາອາຫານບາງຢ່າງໄປຕົ້ມຫຼືລວກຈົນສຸກໄດ້ເຊັ່ນວ່າ: ໄຂ່, ໜໍ່, ຜັກຫຼືແມ່ນແຕ່ໄກ່ເປັນໂຕກໍສາມາດຕົ້ມຈົນສຸກໄດ້. ສຳລັບຄ່າບໍລິການ ຄົນທ່ອງຖິ່ນ 2,000 ກີບ, ນັກທ່ອງທ່ຽວພາຍໃນ 5,000 ກີບ ແລະ ນັກທ່ອງທ່ຽວຕ່າງປະເທດ 10,000 ກີບ.

ສໍາລັບບໍ່ນໍ້າອຸ່ນນາເມືອງ ເມືອງຫົວເມືອງ ຕັ້ງຢູ່ຫ່າງຈາກບ້ານນາເມືອງປະມານ 1 ກິໂລແມັດ ແລະ ຫ່າງຈາກຕົວເມືອງຊໍາເໜືອປະມານ 22 ກິໂລແມັດ ບໍ່ນໍ້າອຸ່ນແຫ່ງນີ້ຈະມີອ່າງອາບ – ແຊ່ນໍ້າຮ້ອນ ແລະ ອ່າງອາບກາງແຈ້ງໄວ້ບໍລິການ ບໍ່ນໍ້າອຸ່ນດັ່ງກ່າວເປັນບໍ່ນໍ້າອຸ່ນທໍາມະຊາດ ທີ່ມີຄວາມຮ້ອນຂ້ອນຂ້າງສູງພໍສົມຄວນຈົນສາມາດຕົ້ມໄຂ່ໃຫ້ສຸກໄດ້ເລີຍ. ນອກນີ້ຍັງມີສວນອຸທິຍານຫີນຕັ້ງ ຢູ່ເຂດບ້ານນາຕອກ ເຊິ່ງເປັນສະຖານທີ່ທ່ອງທ່ຽວທໍາມະຊາດຂຶ້ນຊື່ອີກແຫ່ງໜຶ່ງຂອງເມືອງ

ນອກຈາກນີ້ແລ້ວໃນລະດູຮ້ອນກໍຍັງເປັນສະຖານທີ່ສໍາລັບໄປກິນເຂົ້າປ່າຫຼືຫຼິ້ນກິດຈະກໍາຕ່າງໆໄດ້ຢ່າງ​ສະດວກ​ສະບາຍອີກດ້ວຍ ບໍ່ນໍ້າທັງສອງແຫ່ງນີ້ເປີດໃຫ້ບໍລິການຕັ້ງແຕ່ 7:00 – 19:00 ໂມງ. ໃກ້ໆຈະຮອດປີໃໝ່ແລ້ວທ່ານໃດທີ່ວາງແຜນໄວ້ວ່າຈະໄປທ່ຽວທາງພາກເໜືອກໍລອງໄປທ່ຽວສະຖານທີ່ສອງແຫ່ງນີ້ ຮັບຮອງວ່າທ່ານຈະບໍ່ຜິດຫວັງຢ່າງແນ່ນອນ

 

.

.

Comments