LV-IMEX
Senglao content (728×90)

ສະຫະລັດ ອຸນຫະພູມເກືອບຕິດລົບ 40 ອົງສາ

ພາກຕາເວັນອອກຂອງສະຫະລັດອາເມລິກາ ໄດ້ຮັບອິດທິພົນຈາກພາຍຸຖະດູໜາວຢ່າງຮ້າຍແຮງ ຫຼື  Bomb Cyclone ສົ່ງຜົນໃຫ້ອຸນຫະພູມຫຼຸດລົງຢ່າງຕໍ່ເນື່ອງໃກ້ຈະຕິດລົບ 40 ອົງສາໃນບາງພື້ນທີ່.

ສຳນັກງານອຸຕຸນິຍົມວິທະຍາແຫ່ງຊາດຂອງສະຫະລັດອາເມລິກາ (NWS) ປະກາດໃນວັນເສົາທີ່ຜ່ານມານີ້ວ່າ ອາກາດບໍລິເວນຕອນເໜືອຂອງປະເທດໂດຍສະເພາະໃນພາກຕາເວັນອອກສ່ຽງເໜືອ ຍັງຢູ່ພາຍໃຕ້ອິດທິພົນຂອງປາກົດການອາກາດໜາວຢ່າງຮຸນແຮງ ຕະຫຼອດທັງອາທິດ ແລະ ພະຍາກອນວ່າ ສະພາບອາກາດໜາວນີ້ຈະເລີ່ມຫຼຸດຜ່ອນລົງຕັ້ງແຕ່ວັນຈັນ ວັນທີ 8 ມັງກອນນີ້ ເປັນຕົ້ນໄປ.

ທັງນີ້, ປະຊາຊົນສະຫະລັດປະມານ 100 ລ້ານຄົນໃນພາກຕາເວັນອອກຂອງສະຫະລັດ ກຳລັງພົບກັບສະພາບອາກາດໜາວທີ່ສຸດຫຼາຍກວ່າເກົ່າຕັ້ງແຕ່ທ້າຍອາທິດທີ່ຜ່ານມາ ໂດຍອຸນຫະພູມສະເລ່ຍໃນບາງພື້ນທີ່ຫຼຸດຕໍ່າລົງອີກໃກ້ຕິດລົບ 40 ອົງສາ ແລະ ຈະໜາວເພີ່ມຂຶ້ນເມືອມີກະແສລົມພັດແຮງ.

ອຸນຫະພູມສະເລ່ຍໃນພາກເໜືອຂອງສະຫະລັດຫຼຸດລົງຈາກຈຸດໜາວເຢັນຢ່າງຕໍ່ເນື່ອງຕັ້ງແຕ່ໄລຍະເທສະການຄຣິດສະມາດທີ່ຜ່ານມາ ເປັນເຫດໃຫ້ເສຍຊີວິດແລ້ວ 19 ຄົນ ແລະ ທາງການອອກແຈ້ງເຕືອນປະຊາຊົນບໍ່ໃຫ້ອອກຈາກເຮືອນ ສະຖານທີ່ໂລງແຈ້ງຖ້າບໍ່ຈຳເປັນ ແລະ ຮັກສາສຸຂະະພາບເດັກ ແລະ ຜູ້ອາຍຸສູງ.

 

Comments