LV-IMEX
Senglao content (728×90)

ສຸດຍອດ! ຈີນສຳເລັດການກໍ່ສ້າງຂົວຂ້າມທະເລຍາວທີ່ສຸດໃນໂລກ ຮົງກົງ-ຈູໄຫ່-ມາເກົາ ກຽມເປີດນຳໃຊ້ຢ່າງເປັນທາງການ

China Xinhua News ໄດ້ລາຍງານວ່າ: ລັດຖະບານຈີນ ໄດ້ມອບຂອງຂວັນຕ້ອນຮັບປີໃໝ່ 2018 ໃຫ້ກັບປະຊາຊົນນັ້ນກໍຄື: ຂົວ ຈາກຮົງກົງ ໄປ ຈູໄຫ່ ແລະ ມາເກົາ ເປັນຂົວຂ້າມທະເລທີ່ຍາວທີ່ສຸດໃນໂລກ ເຊິ່ງຖືເປັນຄວາມສຳເລັດອີກອັນໜຶ່ງ ແລະ ເປັນໃບໜ້າໃບຕາໃໝ່ຂອງໂຄງການວິສະວະກຳຂະໜາດໃຫຍ່ຂອງຈີນ ເພາະວ່າ ຂົວຮົງກົງ – ຈູໄຫ່-ມາເກົາ ນັບເປັນທາງຂ້າມທະເລທີ່ກໍ່ສ້າງດ້ວຍຝີມືມະນຸດທີ່ມີຄວາມຍາວທີ່ສຸດໃນໂລກ 55 ກິໂລແມັດ ໄດ້ກໍ່ສ້າງສຳເລັດຕາມແຜນທີ່ວາງໄວ້ ໃນວັນທີ 31 ທັນວາ 2017 ທີ່ຜ່ານມາ.

 

ຂົວຮົງກົງ-ຈູໄຫ່-ມາເກົາ ໃຊ້ເວລາ 6 ປີ ໃນການກຽມກໍ່ສ້າງ ແລະ ໃຊ້ເວລາ 8 ປີໃນການລົງມືກໍ່ສ້າງຂົວທີ່ມີຄວາມຍາວ 55 ກິໂລແມັດ ເຊື່ອມເກາະຮົງກົງ ເມືອງຈູໄຫ່ ຂອງມົນທົນກວາງຕຸງ ແລະ ເກາະມາເກົາ ໂດຍຂັ້ນຕອນສຳຄັນຢູ່ທີ່ຂົວຫຼັກ ຍາວ 22,9 ກິໂລແມັດ ແລະ ອຸໂມງຍາວ 6,7 ກິໂລແມັດ, ຂົວເປັນຮູບຕົວ Y (Y-shape) ແລະ ສາມາດປະຢັດເວລາການເດີນທາງລະຫວ່າງຮົງກົງ ກັບ ເກາະຈູ່ໄຫ່ຈາກແຕ່ກ່ອນ 3 ຊົ່ວໂມງ ເຫຼືອພຽງ 30 ນາທີ່ເທົ່ານັ້ນ ນັບວ່າໄດ້ຊ່ວຍບູລະນາການຄົມມະນາຄົມຂົນສົ່ງລະຫວ່າງເມືອງໃຫຍ່ເຂດເສດຖະກິດສາມຫຼຽມປາກແມ່ນໍ້າຈູຈຽງ ໃຫ້ມີຄວາມສະດວກສະບາຍຫຼາຍຂຶ້ນ.

ທັງນີ້, ທີມວິສະວະກຳ ແລະ ຜູ້ກໍ່ສ້າງກໍຈະເລີ່ມດຳເນີນການທົດທອງການເຮັດວຽກຮ່ວມກັນຂອງລະບົບ ແລະ ອຸປະກອນຕ່າງໆ ຂອງຂົວ ລວມເຖິງການກວດສອບ ແລະ ອະນາໄມຄວາມສະອາດໃນເດືອນກຸມພານີ້. ແລະ ກໍຈະໄດ້ເປີດໃຫ້ນຳໃຊ້ຢ່າງເປັນທາງການໃນໄວໆນີ້.

ຂໍ້ມູນ ແລະ ພາບ: XinhuaNewsAgency

Comments