LV-IMEX
Senglao content (728×90)

ບຸນນະມັດສະການຜາສາດຫີນວັດພູ ຈະຈັດຂຶ້ນວັນທີ 29-31 ມັງກອນນີ້!

ແຂວງຈໍາປາສັກ ໄດ້ຈັດກອງປະຊຸມປຶກສາຫາລື ເພື່ອກະກຽມຄວາມພ້ອມຮອບດ້ານໃຫ້ແກ່ການຈັດງານບຸນນະມັດສະການຜາສາດຫີນວັດພູ ຕິດພັນກັບກິດຈະກຳເປີດປີທ່ອງທ່ຽວລາວ 2018 ໂດຍໃຫ້ກຽດເຂົ້າຮ່ວມຂອງທ່ານ ບົວລິນ ວົງພະຈັນ ຮອງເຈົ້າແຂວງຈໍາປາສັກ ປະທານຈັດງານ, ທ່ານ ບົວທອງ ສຸວັນນະສານ ຫົວໜ້າພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ແຂວງຈໍາປາສັກ ຮອງປະທານຈັດງານ, ມີຫົວໜ້າ-ຮອງຫົວໜ້າພະແນກການອ້ອມຂ້າງແຂວງ, ເຈົ້າເມືອງ, ຫ້ອງການ ຖວທ ແຕ່ລະເມືອງ ແລະ ກຸ່ມບໍລິສັດກ່ຽວຂ້ອງຈໍານວນໜຶ່ງເຂົ້າຮ່ວມ.

ຈຸດປະສົງຂອງກອງປະຊຸມແມ່ນເປັນການລາຍງານການກະກຽມຄວາມພ້ອມຂອງພາກສ່ວນຕ່າງໆ ເພື່ອແນໃສ່ໃຫ້ແຕ່ລະອະນຸກໍາມະການ, ບັນດາເມືອງ, ບໍລິສັດ ທີ່ມີສ່ວນກ່ຽວຂ້ອງໃນການເປັນເຈົ້າພາບ ຈັດງານບຸນນະມັດສະການມໍລະດົກໂລກຜາສາດຫີນວັດພູ ຕິດພັນກັບກິດຈະກຳເປີດປີທ່ອງທ່ຽວລາວ ຢູ່ແຂວງຈໍາປາສັກ ໄດ້ມີຄວາມເປັນເອກະພາບກັນໃນແຕ່ລະດ້ານ ແລະ ເຮັດໃຫ້ບັນຍາກາດຂອງງານມີຄວາມຄຶກຄື້ນ, ມ່ວນຊື່ນ, ໂດດເດັ່ນເປັນທີ່ເພິ່ງພໍໃຈຂອງສັງຄົມກໍ່ຄືນັກທ່ອງທ່ຽວທີ່ເຂົ້າມາທ່ຽວຊົມພາຍໃນງານ.

ສະນັ້ນ, ຕ້ອງໄດ້ກໍານົດລະອຽດກ່ຽວກັບການກະກຽມຄວາມພ້ອມໃນແຕ່ລະດ້ານເປັນຕົ້ນ: ດ້ານປ້ອງກັນຄວາມສະຫງົບ, ດ້ານຂະບວນແຫ່ຂອງແຕ່ລະພາກສ່ວນ, ດ້ານການຈັດສັນຖະໜົນຫົນທາງໃຫ້ມີຄວາມສະດວກໃນການສັນຈອນໄປ-ມາ, ມີສະຖານທີ່ຈອດລົດພຽງພໍ, ການເປີດຕະຫຼາດນັດ, ຈັດສັນຮ້ານວາງສະແດງສິນຄ້າ, ຈໍາໜ່າຍສິນຄ້າໃຫ້ມີຄວາມເປັນລະບຽບ, ການຄວບຄຸມລາຄາສິນຄ້າໃຫ້ຢູ່ໃນເກນທີ່ເໝາະສົມ.

ສ່ວນດ້ານເຮືອນພັກ, ໂຮງແຮມ, ຮ້ານອາຫານຕອບສະໜອງການບໍລິການແຂກໃຫ້ພຽງພໍ. ສະເພາະເວທີກາງຮັບໃຊ້ພິທີເປີດ, ການສະແດງຕ່າງໆແມ່ນໃຫ້ມີແສງ, ສີ, ສຽງທີ່ທັນສະໄໝ ແລະ ຮັບປະກັນເຮັດໃຫ້ງານດັ່ງກ່າວຮັກສາໄດ້ຄວາມເປັນລະບຽບຮຽບຮ້ອຍ, ຄວາມສະອາດສວຍງາມຮັກສາໄດ້ຮີດຄອງປະເພນີ ອັນດີງາມຂອງຊາດ.

ສໍາລັບງານບຸນຈະເປີດຂຶ້ນຢ່າງເປັນທາງການໃນວັນທີ 29-31 ມັງກອນ 2018 ເຊິ່ງພາຍໃນງານຈະຈັດໃຫ້ມີຫຼາຍກິດຈະກໍາໃຫ້ທ່ຽວຊົມ.

ທີ່ມາ, ຂ່າວເສດຖະກິດ-ການຄ້າ

Comments