LV-IMEX
Senglao content (728×90)

ສປປ ລາວ ຮັບກຽດເປັນເຈົ້າພາບຮ່ວມກອງປະຊຸມຂອບການຮ່ວມມືແມ່ນ້ຳຂອງ-ແມ່ນ້ຳລ້ານຊ້າງ ຄັ້ງທີ 3

ໃນໂອກາດການເຂົ້າຮ່ວມກອງປະຊຸມຜູ້ນຳຂອບການຮ່ວມມືແມ່ນ້ຳຂອງ-ແມ່ນ້ຳລ້ານຊ້າງ ຄັ້ງທີ 2 ໃນວັນທີ 10 ມັງກອນນີ້ ທ່ານ ນາຍົກ ລັດຖະມົນຕີ ທອງລຸນ ສີສຸລິດ ໄດ້ຂຶ້ນຮັບສິດໃນການເປັນເຈົ້າພາບຮ່ວມຈັດກອງປະຊຸມຂອບການຮ່ວມມື ແມ່ນ້ຳຂອງ-ແມ່ນ້ຳລ້ານຊ້າງ ຮ່ວມກັບ ສປ ຈີນ ສຳລັບສົກປີ 2018-2020 ຈາກ ນາຍົກລັດຖະມົນຕີ ກໍາປູເຈຍສົມເດັດ ອັກຄະມະຫາ ເສນາບໍດີ ເຕໂຈ ຮຸນແຊນ.


ໃນໂອກາດດັ່ງກ່າວ, ທ່ານ ທອງລຸນ ສີສຸລິດ ໄດ້ສະແດງຄວາມຊົມເຊີຍ ຕໍ່ຜົນສໍາເລັດຢ່າງຈົບງາມໃນການເປັນປະທານຮ່ວມຂອງ ສປ ຈີນ ແລະ ກໍາປູເຈຍ ໃນສົກປີ 2015-2017 ຜ່ານມາ ແລະ ຊົມເຊີຍຜົນສໍາເລັດຂອງກອງປະຊຸມຜູ້ນໍາແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 2 ໃນຄັ້ງນີ້.
ພ້ອມກັນນັ້ນ, ຍັງໄດ້ແຈ້ງໜ້າວຽກບຸລິມະສິດ ການເປັນປະທານຮ່ວມຂອງ ສປປ ລາວ ຄື: ການສ້າງ ແລະ ພັດທະນາພື້ນຖານໂຄງບົນ ແລະ ພື້ນຖານໂຄງລ່າງໃນການເຊື່ອມຈອດ ລະຫວ່າງ ບັນດາປະເທດສະມາຊິກ. ພ້ອມດຽວກັນນັ້ນກໍ່ເອົາໃຈໃສ່ຈັດຕັ້ງປະຕິບັດບັນດາມາດຕະການຕ່າງໆ ເພື່ອອໍານວຍຄວາມສະດວກ ແລະ ສົ່ງເສີມການຄ້າ, ການລົງທຶນ ແລະ ການທ່ອງທ່ຽວ ຢູ່ໃນບັນດາອະນຸພາກພື້ນ 6 ປະເທດ ສະມາຊິກ.


ກອງປະຊຸມແມ່ຂອງ – ແມ່ນ້ຳລ້ານຊ້າງໄດ້ຈັດຕັ້ງທຸກໆ 2 ປີ ດ້ວຍການຜັດປ່ຽນກັນລະຫວ່າງບັນດາປະເທດສະມາຊິກ. ກອງປະຊຸມປີນີ້ໂດຍ ກຳປູເຈຍ ແລະ ຈີນ ເປັນເຈົ້າພາບຈັດຕັ້ງຂຶ້ນ. ການຮ່ວມມືແມ່ນ້ຳຂອງ – ແມ່ນ້ຳລ້ານຊ້າງແມ່ນໃຫ້ຄວາມສຳຄັນຕໍ່ ການຄຸ້ມຄອງຊັບພະຍາກອນນ້ຳ, ການເຊື່ອມຕໍ່, ການຮ່ວມມືດ້ານກຳລັງຄວາມສາມາດໃນການຜະລິດ, ການຮ່ວມມືເສດຖະກິດຜ່ານຊາຍແດນ, ກະສິກຳ ແລະ ລົບລ້າງຄວາມອຶດຫິວຫລຸດຜ່ອນຄວາມທຸກຍາກ.
ດ້ວຍຫົວຂໍ້ “ແມ່ນ້ຳສັນຕິພາບ ແລະ ການພັດທະນາແບບຍືນຍົງຂອງພວກເຮົາ”, ກອງປະຊຸມສຸດຍອດ MLC ຄັ້ງທີ 2 ໄດ້ສຳຫຼວດກວດຄືນສະພາບການຮ່ວມມືນັບແຕ່ພາຍຫຼັງກອງປະຊຸມສຸດຍອດການຮ່ວມມື ແມ່ຂອງ – ແມ່ນ້ຳລ້ານຊ້າງຄັ້ງທີ1, ປຶກສາຫາລືວິທີການຮ່ວມມືໃນໄລຍະຈະມາເຖິງ, ຮັບຮອງເອົາບັນດາເອກະສານ, ໃນນັ້ນມີຖະແຫຼງການ ພະນົມເປັນ, ແຜນການເຄື່ອນໄຫວຮ່ວມມື ແມ່ຂອງ – ແມ່ນ້ຳລ້ານຊ້າງໄລຍະ 2018 – 2020 ແລະ ອື່ນໆ.

ທີ່ມາ: ຂ່າວສານປະເທດລາວ.

Comments