Senglao content (728×90)
Senglao content (728×90)

ຈີນປັບປຸງພື້ນຖານໂຄງລ່າງ, ຫ້ອງນໍ້າສາທາລະນະ ເພື່ອດຶງດູດນັກທ່ອງທ່ຽວ

ສປ ຈີນ ຈະດຶງດູດນັກທ່ອງທ່ຽວ ຈາກປະເທດອາຊຽນ ແລະ ໃນທົ່ວໂລກໃຫ້ຫຼາຍເພີ້ມຂຶ້ນ ດ້ວຍການປັບປຸງພື້ນຖານໂຄງລ່າງ ແລະ ສ້າງຫ້ອງນໍ້າສາທາລະນະ ໂດຍເນັ້ນໃຫ້ມີການປະຕິວັດຄັ້ງໃໝ່.

ທ່ານ ຈາງ ຊີຫຼົງ ຫົວໜ້າກົມການທ່ອງທ່ຽວແຫ່ງຊາດຈີນ  ກ່າວວ່າ: ບັນຫາຫ້ອງນໍ້າສາທາລະນະຂອງຈີນ ແມ່ນຈຸດອ່ອນທີ່ຕ້ອງໄດ້ແກ້ໄຂ, ເມື່ອປີຜ່ານມາ ທາງລັດຖະບານຈີນ ໄດ້ສ້າງຫ້ອງນໍ້າສາທາລະນະ 70 ພັນກວ່າແຫ່ງ ແລະ ປີໜ້າກໍ່ສ້າງເພີ່ມຂຶ້ນຫຼາຍກວ່ານີ້ ຕາມແຫຼ່ງທ່ອງທ່ຽວຕ່າງໆ ພິເສດ ນອກຈາກຈະສ້າງຫ້ອງນໍ້າເພດຍິງ, ເພດຊາຍ ແລ້ວ ຍັງມີຫ້ອງນ້ຳເພດທີສາມ ຄື ຫ້ອງແມ່ ແລະ ລູກ. ຖືວ່າເປັນການປະຕິວັດອັນໜຶ່ງ ທີ່ຈະປັບປຸງຫ້ອງ ນໍ້າໃຫ້ດີຂຶ້ນ, ເປັນການປະຕິຮູບຫ້ອງນໍ້າ ທີ່ທາງກົມການທ່ອງທ່ຽວຈີນ ໄດ້ສະເໜີຂຶ້ນເຖິງຂັ້ນສູນກາງສອງຄັ້ງແລ້ວ ເພື່ອໃຫ້ຂັ້ນສູນກາງຮັບຮອງ ແລະ ແກ້ໄຂບັນຫານີ້, ເຊິ່ງທ່ານ ສີ ຈິ້ນຜິງ ປະທານປະເທດ ຈີນ ໄດ້ຊີ້ແຈງລະອຽດ ເພື່ອໃຫ້ບັນລຸຕາມ ເປົ້າໝາຍດັ່ງກ່າວ.

ທ່ານ ຈາງ ຊີຫລົງ ກ່າວຕື່ມວ່າ: ປະເທດຈີນ ໄດ້ມີການສົ່ງເສີມການຮ່ວມມືແລກປ່ຽນວັດທະນະທຳ ກັບບັນດາປະເທດອາຊຽນ. ສະນັ້ນ, ການທ່ອງທ່ຽວ ຈຶ່ງມີການພັດທະນາຂຶ້ນຢ່າງວ່ອງໄວ ໃນປີ 2016 ຈີນ ໄດ້ຕ້ອນຮັບນັກທ່ອງທ່ຽວ ຕ່າງປະເທດ 28 ລ້ານກວ່າຄົນ, ເມື່ອທຽບໃສ່ປີຜ່ານມາເພີ້ມຂຶ້ນ ຫຼາຍກວ່າ 57%. ໃນຈຳນວນດັ່ງກ່າວ, ເປັນນັກທ່ອງທ່ຽວ ຈາກປະເທດອາຊຽນ 10 ລ້ານກວ່າຄົນ, ມີ ຫວຽດ ນາມ 3 ລ້ານກວ່າຄົນ, ມຽນມ້າ 2 ລ້ານກວ່າຄົນ, ມາເລເຊຍ 1 ລ້ານກວ່າຄົນ, ຟີລິບປິນ 1 ລ້ານກວ່າຄົນ,​ ສິງກະໂປ ປະມານ 900.000 ຄົນ,​ ໄທ 750.000 ຄົນ, ອິນໂດເນເຊຍ 630.000 ຄົນ,​ ລາວ 84.000 ຄົນ, ກຳປູເຈຍ 50.000 ຄົນ ແລະ ນັກທ່ອງທ່ຽວຈີນ ໄປທ່ຽວປະເທດອາຊຽນເພີ້ມຂຶ້ນ 6,6%.ປັດຈຸບັນ, ນັກທ່ອງທ່ຽວອາຊຽນ ນິຍົມໄປທ່ຽວຫຼາຍທີ່ສຸດ ມີ ປັກກິ່ງ, ຄຸນໝິງ, ຊຽງໄຮ, ກວາງໂຈ ແລະ ຫາງໂຈ. ປີ 2017 ເປັນປີທີ່ມີການຮ່ວມມືດ້ານການທ່ອງທ່ຽວຈີນ-ອາຊຽນ ແລະ ເປັນປີອາຊຽນຄົບຮອບ 50 ປີ ແຫ່ງການສ້າງຕັ້ງອາຊຽນ, ເຊິ່ງມີການເປີດພິທີ ຢູ່ປະເທດຟິລິບປິນ ດ້ວຍຄວາມສຳເລັດ ຖືເປັນການເປີດສາກປີການທ່ອງທ່ຽວ ທັງເປັນການສົ່ງເສີມ ແລະ ເປັນແຮງຂັບເຄື່ອນທີ່ເຂັ້ມແຂງ ເພື່ອຮ່ວມມືດ້ານການທ່ອງທ່ຽວ ລະຫວ່າງຈີນ ກັບອາຊຽນ ຍຸກໃໝ່.

ສປ ຈີນ ກັບປະເທດອາຊຽນ ເປັນປະເທດບ້ານໃກ້ເຮືອນຄຽງກັນ ວັດທະນະທຳຄ້າຍຄືກັນ ການ ຮ່ວມມືດ້ານການທ່ອງທ່ຽວ ມີພື້ນຖານທີ່ໜາແໜ້ນ ແລະ ເຂັ້ມແຂງຕໍ່ໜ້າສະຖານະການແຫ່ງຍຸກສະໄໜໃໝ່ ທີ່ກິດຈະການທ່ອງທຽ່ວ ເປັນແຮງຂັບເຄື່ອນ ການພັດທະນາເສດຖະກິດ ແລະ ສັງຄົມທົ່ວໂລກ  ຈີນຍິນດີຮ່ວມມືກັບທຸກປະເທດອາຊຽນ ຮ່ວມມືກັນສົ່ງເສີມ ກິດຈະກຳການທ່ອງທ່ຽວສອງຝ່າຍ, ສົ່ງເສີມກິດຈະກໍາທ່ອງທ່ຽວ ຂອງພາກພື້ນອາຊີ-ປາຊີຟິກ ໃຫ້ມີຄວາມຈະເລີນ ຮຸ່ງເຮືອງ ແລະ ພັດທະນາໄປພ້ອມໆກັນ.

ທີ່ມາ: ຂ່າວສານປະເທດລາວ. ຂ່າວ: ວິນາລີ

Comments