Bike For Her
Senglao content (728×90)

ແຂວງຫົວພັນ ສັ່ງໂຈະການຮຽນ 1 ອາທິດ ເພາະອາກາດໜາວ

ຈາກສະພາບອາກາດທີ່ໜາວເຢັນຕິດຕໍ່ກັນຫຼາຍວັນ ເຮັດໃຫ້ອຳນາດການປົກຄອງໃນແຂວງຫົວພັນເປັນຫ່ວງສຸຂະພາບຮ່າງກາຍຂອງນ້ອງນັກຮຽນ ຈິ່ງຕັດສິນໃຈພັກການຮຽນການສອນ 1 ອາທິດ ຫວັງອາກາດອຸ່ນຂຶ້ນໃນໄວໆນີ້.

ໂດຍແຂວງຫົວພັນໄດ້ປະກາດໂຈະການຮຽນທົ່ວແຂວງ ນັບແຕ່ວັນທີ 5 – 9 ກຸມພາ ເນື່ອງຈາກອຸນຫະພູມບາງມື້ລົງເຖິງ 3 ອົງສາ ເພື່ອຫຼີກລ່ຽງຜົນກະທົບຈາກດິນຟ້າອາກາດທີ່ອາດ ທີ່ອາດສົ່ງຜົນເຖິງສຸຂະພາບຂອງນັກຮຽນ ແລະຄູອາຈານ, ອີກທັງການໄປ – ມາກໍບໍ່ສະດວກ.

ທ່ານ ມົນທອງ ລຽນຕິຄຸນ ຫົວໜ້າພະແນກສຶກສາທິການ ແລະ ກິລາ ແຂວງຫົວພັນ ກ່າວວ່າ: ການພັກການຮຽນ – ພັກສອນຄັ້ງນີ້ ຖືເປັນຄັ້ງທໍາອິດຂອງປີ 2018 ເນື່ອງຈາກສະພາບອາກາດໜາວເຢັນຫຼາຍ ຢ້ານຈະສົ່ງຜົນກະທົບຕໍ່ການໄປ – ມາຂອງນັກຮຽນ ແລະ ສຸຂະພາບຂອງເດັກ, ເພື່ອຮັບມືຕໍ່ກັບສະພາບອາກາດຈຶ່ງຕ້ອງມີການໂຈະການຮຽນ – ການສອນຊົ່ວຄາວ.

ດ້ານ ທ່ານ ກອງມະນີ ພົມມະລີ ຫົວໜ້າໜ່ວຍງານອຸທົກກະສາດ ພະແນກຊັບພະຍາກອນທຳມະຊາດ ແລະ ສິ່ງແວດລ້ອມແຂວງຫົວພັນ ລາຍງານວ່າ: ຄວາມໜາວເຢັນຂອງສະພາບອາກາດ ໃນປີ 2018 ນີ້ຖ້າທຽບໃສ່ປີ 2016 ຍັງມີຄວາມຫ່າງພໍສົມຄວນ ເພາະປີ 2016 ທີ່ຜ່ານມາ ອຸນຫະພູມຕໍ່າສຸດ 0.0 ອົງສາ ໃນເດືອນມັງກອນ. ສ່ວນເຫດການໜາວເຢັນລະຫວ່າງວັນທີ 5 – 6 ຜ່ານມາ ສະເລ່ຍຕອນເຊົ້າຢູ່ທີ່ 5,2 ອົງສາ, ຕອນສວາຍຢູ່ທີ່ 10,1 ອົງສາ. ຢ່າງໃດກໍຕາມ, ເບື້ອງຕົ້ນຍັງບໍ່ພົບເຫັນຄວາມເສຍຫາຍ, ການລົ້ມຕາຍຂອງສັດລ້ຽງ ແລະ ເຄື່ອງປູກຂອງຝັງຂອງປະຊາຊົນ.

ສຳລັບສະພາບອາກາດມື້ນີ້ຢູ່ແຂວງຫົວພັນອາກາດໜາວສຸດວັດອຸນຫະພູມໄດ້ 6 ອົງສາ ແລະສູງສຸດ 16 ອົງສາ ໝາຍຄວາມວ່າ ອາກາດໄດ້ອຸ່ນຂຶ້ນມາເລັກນ້ອຍ ແນວໃດກໍຕາມຈາກການຄາດຄະເນຂອງກົມອຸຕຸນິຍົມ ແລະອຸທົກກະສາດລະບຸວ່າ ສຳລັບແຂວງຫົວພັນແລ້ວອາກາດຍັງຈະສືບຕໍ່ໜາວໄປຮອດທ້າຍເດືອນກຸມພາ.

ທີ່ມາ: ຂ່າວເສດຖະກິດ-ການຄ້າ

Comments