Bike For Her
Senglao content (728×90)

ນະຄອນຫຼວງວຽງຈັນ, ຈັດງານມະໂຫລານເທສະການກຸດຈີນ 2018 ຢ່າງຄຶກຄື້ນມ່ວນຊື່ນ

ໄລຍະນີ້ ກໍເປັນໄລຍະຂອງເທສະການປີໃໝ່ຂອງຈີນ, ໃນວັນທີ 10-11  ກຸມພາ 2018 ທີ່ຜ່ານນີ້ ທີ່ຫໍວັດທະນະທໍາແຫ່ງຊາດ ນະຄອນຫຼວງວຽງຈັນ, ສູນວັດທະນະທໍາຈີນ ປະຈໍາ ສປປ ລາວ ຮ່ວມກັບ ສະມາຄົມຈີນ ນະຄອນຫຼວງວຽງຈັນ ໄດ້ເປີດງານມະໂຫລານເທສະການກຸດຈີນ 2018 ໂດຍເປັນກຽດເຂົ້າຮ່ວມໂດຍທ່ານ ກິແກ້ວ ໄຂຄໍາພິທູນ ຫົວໜ້າຄະນະໂຄສະນາອົບຮົມສູນກາງພັກ, ທ່ານ ຄຳມະນີ ອິນທິລາດ ລັດຖະມົນຕີກະຊວງພະລັງງານ ແລະ ບໍ່ແຮ່ ທັງເປັນປະທານສະມາຄົມມິດຕະພາບລາວ-ຈີນ, ທ່ານ ຫວັງເຫວີນທ່ຽນ ເອກອັກຄະລັດຖະທູດຈີນປະຈຳລາວ ພ້ອມດ້ວຍແຂກຖືກເຊີນ ແລະ ມວນຊົນເຂົ້າຮ່ວມຢ່າງຫຼວງຫຼາຍ.

ການສະແດງໃນຄັ້ງນີ້ ປະກອບມີຫຼາຍລາຍການທີ່ໜ້າຕື່ນຕາຕື່ນໃຈຄື: ການບັນເລງວົງດົນຕີພື້ນເມືອງໃບໜ້າທີ່ຍີ້ມແຍ້ມ, ບົດຟ້ອນຊື່ນຊົມຍິນດີ, ບົດເພງ ມາລາຫອມຫ້າທະວີບ, ບົດຟ້ອນເຜົ່າລື້ ສາວຕວະລີ້, ບົດເພງຈາກສິນລະປິນລາວ ສັກ ວົງເຊວ ໜຶ່ງແລວທາງໜຶ່ງເສັ້ນທາງ ແລະ ລາຍການອື່ນໆ.

ນອກນັ້ນ, ຢູ່ໜ້າງານມະໂຫລານເທສະການກຸດຈີນ 2018 ຍັງມີນາຍຊ່າງຫັດຖະກໍາຈີນມາສາທິດການເຮັດງານສີມືທີ່ປານີດ, ມີການວາງສິລະປະການແຕ້ມຮູບດ້ວຍນໍ້າຕານ, ການປັ້ນຫຸ້ມແປ້ງ, ການຂວັດລາຍໃສ່ໝາກນໍ້າເຕົ້າ ມີເກມການແຂ່ງຂັນຕ່າງໆ ແລະ ກິດຈະກຳອື່ນໆ

ນອກຈາກຈະໄດ້ສະແດງຜົນງານ ແລະ ສະແດງສິລະປະຕ່າງໆແລ້ວ ພາຍໃນງານທັງສອງມື້ (10-11 ກຸມພາ) ຍັງມີການຈົກສະຫຼາກ ສໍາລັບທຸກທ່ານທີ່ເຂົ້າຮ່ວມຊົມມີສິດລຸ້ນຮັບເອົາຂອງລາງວັນ ເຊັ່ນ: ປີ້ຍົນ ຈາກສາຍການບິນໄຊນາອິສເທີນ ແອຣ໌ໄລ, ມີ PAD ແລະ ໂທລະສັບມືຖື ຈາກຫົວເຫວີຍຫຼາກຫຼາຍລາງວັນ.

 

ງານມະໂຫລານເທດສະການກຸດຈີນ ໄດ້ຈັດຂຶ້ນທຸກໆປີນັບແຕ່ປີ 2015 ເປັນຕົ້ນມາ ເຊິ່ງປີນີ້ກໍ່ແມ່ນຈັດຂຶ້ນເປັນຄັ້ງທີ 4 ແລະ ເປັນງານວັດທະນະທໍາເພື່ອສົ່ງເສີມ ແລະ ຊຸກຍູ້ວັດທະນະທຳອັນເປັນມູນເຊື້ອທີ່ງົດງາມຂອງຊາວຈີນໃຫ້ກັບມວນຊົນຊາວນະຄອນຫຼວງວຽງຈັນໄດ້ຮູ້ເຖິງວັດທະນະທໍາອັນດີງາມຂອງ ສປ ຈີນ.

Cr. CRI FM 93 Mh

Comments