Bike For Her
Senglao content (728×90)

ດີໃຈນຳປະຊາຊົນແຂວງເຊກອງ ໄດ້ມີຂົວຂາມງາມໆ ເດີນທາງຢ່າງສະດວກແລ້ວ

ພິທີມອບ-ຮັບໂຄງການກໍ່ສ້າງຂົວມິດຕະພາບລາວ-ຍີ່ປຸ່ນແຂວງ ເຊກອງ ແລະ ເປີດການນຳໃຊ້ຢ່າງເປັນທາງການໄດ້ມີຂຶ້ນໃນຕອນເຊົ້າຂອງວັນທີ 12 ກຸມພາ 2018 ທີ່ຜ່ານມານີ້. ເປັນຂົວຂ້າມ ນໍ້າເຊກອງ ແຕ່ເມືອງລະມາມ ຫາ ເມືອງ ດາກຈຶງ ແຂວງ ເຊກອງ, ໂດຍມີ ທ່ານ ບຸນ​ທອງ ຈິດ​ມະນີ ກໍາມະການ ​ກົມ​ການ​ເມືອງ​ສູນ​ກາງ​ພັກ, ​ເລຂາທິການ​ສູນ​ກາງ​ພັກ, ຮອງ​ນາຍົກລັດຖະມົນຕີ, ປະທານ​ ຄະນະ​ກວດກາ​ສູນ​ກາງ​ພັກ-ປະທານ ​ອົງ​ການ​ກວດ​ກາ​ລັດຖະບານ, ທ່ານ ທາເຄຊິ ຮິຄິຮາຣະ ເອກອັກຄະລັດຖະທູດຍີ່ປຸ່ນປະຈໍາ ສປປ ລາວ, ທ່ານ ບຸນ​ຈັນສິນ​ທະ​ວົງ ລັດຖະມົນຕີ ກະຊວງ​ໂຍທາ​ທິການ​ ແລະ ຂົນ​ສົ່ງ, ທ່ານ ຄໍາເຜີຍ ບຸດດາວຽງ ເຈົ້າ​ແຂວງເຊ​ກອງ, ມີບັນດາ ແຂກຖືກເຊີນ ແລະ ມວນຊົນຊາວແຂວງເຊກອງ ເຂົ້າຮ່ວມ.

​ໂຄງການ​ກໍ່ສ້າງ​ຂົວ ນໍ້າເຊກອງ​ມິດຕະພາບ ລາວ-ຍີ່ປຸ່ນ ​ແມ່ນໄດ້ສ້າງ ມາແຕ່ຕົ້ນປີ 2015, ເຊິ່ງໃຊ້ເວລາກໍ່ສ້າງ 39 ເດືອນ, ຂົວມີຄວາມຍາວ 300 ແມັດ, ອອກແບບກໍ່ສ້າງ ຕາມມາດຖານເຕັກນິກຂອງສາກົນ, ເປັນຂົວເບຕົງເສີມເຫຼັກ ອັດແຮງແບບປະສົມ ລະຫວ່າງ ສາຍກາບຖ່ວງດຶງ ແລະ ຂາງ ແບບຮູບກັບ 4 ຫຼ່ຽມ, ສາມາດ ຮັບນໍ້າໜັກໄດ້ 800 ໂຕນ. ມີ 3 ເສົາກາງນໍ້າ ແລະ ເສົາຫົວຂົວ 2 ເສົາ, ລະບົບຮາກຖານຈໍານວນໜຶ່ງ ຕອກເສົາເຂັມ, ມີຈໍານວນ 17 ຕົ້ນ, ມີ 4 ໄລຍະ, ໄລຍະກາງນໍ້າທີ່ກວ້າງທີ່ສຸດ 110 ແມັດ, ຄວາມກວ້າງ ຂອງໜ້າຂົວ 11 ແມັດ, ໜ້າທາງລົດແລ່ນ 8 ແມັດ, ທາງຍ່າງເບື້ອງລະ 1,5 ແມັດ, ປູດ້ວຍຢາງຂົ້ວ, ໜາ 8 ຊັງຕີແມັດ, ມີທາງເຂົ້າຂົວ 2 ເບື້ອງ, ຍາວ 528 ແມັດ, ກວ້າງ 10 ແມັດ, ປູດ້ວຍຢາງຂົ້ວ, ໜາ 10 ຊັງຕີແມັດ, ມີລະບົບໄຟເຍືອງທາງ ເພື່ອຮັບປະກັນຄວາມປອດໄພ ໃນເວ ລາການສັນຈອນ.

ທ່ານ ບຸນຈັນ ສິນທະວົງ ກ່າວວ່າ:  ໂຄງການ ຂ້າມຂົວນໍ້າເຊກອງ ແຕ່ເມືອງ ລະມາມ ຫາເມືອງ ດາກຈຶງ ​ແຂວງ​ເຊ​ກອງ ແມ່ນໄດ້ຮັບການຊ່ວຍເຫຼືອລ້າ ຈາກລັດຖະບານ ແລະ ປະຊາຊົນຍີ່ປຸ່ນ ໃນມູນຄ່າທັງໝົດ 1,62 ຕື້ເຢັນ ຫຼື ປະມານ 16,20 ລ້ານໂດລາສະຫະລັດ, ໂດຍຜ່ານ ອົງການໄຈກາ. ພິເສດ ແມ່ນ ທ່ານ ເອກອັກຄະລັດຖະທູດຍີ່ປຸ່ນປະຈໍາ ສປປ ລາວ ທີ່ໄດ້ໃຫ້ການ ສະໜັບສະໜູນ ຊ່ວຍເຫຼືອ ລັດຖະບານລາວ, ຕາງໜ້າໃຫ້ລັດຖະບານແຫ່ງ ສປປ ລາວ ຂໍຂອບໃຈ ຕໍ່ລັດຖະບານ ແລະ ປະຊາຊົນຍີ່ປຸ່ນ ແລະ ອົງການໃຈກາ. ໂອກາດນີ້, ຂ້າພະເຂົ້າຂໍຮັບ ເອົາໂຄງການ ຈາກ ທ່ານ ເອກອັກຄະລັດຖະທູດຍີ່ປຸ່ນປະຈໍາ ສປປ ລາວ, ຊຶ່ງເປັນຂອງຂວັນ ອັນລໍ້າຄ່າຈາກລັດຖະບານ ແລະ ປະຊາຊົນຍີ່ປຸ່ນ ທີ່ມອບໃຫ້ລັດຖະບານ ແລະ ປະຊາຊົນລາວ. ພ້ອມດຽວກັນນີ້, ຂ້າພະເຈົ້າ ຂໍມອບຂົວນີ້ໃຫ້ທ່ານ ເຈົ້າແຂວງໆເຊກອງ ເພື່ອສືບຕໍ່ຄຸ້ມຄອງປົກປັກຮັກສາ ນໍາໃຊ້ໃຫ້ຍາວນານ ແລະ ມີປະໂຫຍດສູງສຸດ.

ທ່ານ ເຈົ້າແຂວງເຊກອງ ກ່າວວ່າ: ການເປີດນໍາໃຊ້ຂົວ ຂ້າມນໍ້າເຊກອງໃນມື້ນີ້, ນອກຈາກສ້າງຄວາມສະດວກ ໃຫ້ແກ່ການຄົມມະນາຄົມຂົນສົ່ງ, ການໄປມາ ຫາສູ່ຄ້າຂາຍ ແລະ ການເຂົ້າເຖິງ ການບໍລິການດ້ານ ການສຶກສາ, ສາທາລະນະສຸກ ຂອງປະຊາຊົນ ທີ່ອາໃສຢູ່ 2 ຝາກຝັ່ງແມ່ນໍ້າເຊກອງແລ້ວ, ຍັງເປັນການເປີດເສັ້ນທາງ ໃຫ້ແກ່ການເຊື່ອມໂຍງ ດ້ານເສດຖະກິດ, ການຄ້າ, ການລົງທຶນ ແລະ ການທ່ອງທ່ຽວ ທີ່ອັດຕັນມາດົນນານ ລະຫວ່າງພາກພື້ນ ແລະ ອະນຸພາກພື້ນ, ການເຊື່ອມໂຍງລະຫວ່າງ ສປປ ລາວ, ສສ ຫວຽດນາມ, ກໍາປູເຈຍ ແລະ ຣາຊະອານາຈັກໄທ. ຈາກການເຊື່ອມໂຍງດັ່ງກ່າວ, ຈະເຮັດໃຫ້ມູນຄ່າ ດ້ານການຄ້າ, ການລົງທຶນ ແລະ ການຂົນສົ່ງສິນຄ້າ ຂະຫຍາຍໄປເຖິງຊາຍແດນຈີນ, ໂດຍຜ່ານ ສສ ຫວຽດນາມ ອີກດ້ວຍ

ຂ່າວ: ສຸກ​ສະຫວັນ

ຮູບ: Tom Laoin

 

Comments