Senglao content (728×90)
Senglao content (728×90)

ທ່ອງທ່ຽວເມືອງວຽງໄຊ ​ເໝືອນໄດ້ໄປ ເມືອງລັບແລ

ວຽງໄຊ , ແຂວງຫົວພັນ ເປັນເມືອງນ້ອຍໆ ແຫ່ງໜຶ່ງ ທີ່ອ້ອມຮອບໄປດ້ວຍພູຜາສູງຊັນ ມີຖໍ້ານ້ອຍ ໃຫຍ່ຫຼາຍແຫ່ງເປັນດິນແດນທີ່ເປັນສູນກາງທີ່ເຂັ້ມແຂງຂອງການປະຕິວັດລາວ ​ເປັນ​ສູນ​ບັນຊາ​ການ​ ​ແລະ ຖານ​ທີ່​ໝັ້ນຂອງ​ກອງ​ກຳລັງ​ຮັກ​ຊາດ ​ໄດ້​ສ້າງ​ສູ​ນບັນຊາ​ການ​ຢູ່​ພາຍ​ໃນ​ຖ້ຳ ສະ​ໄໝ​ຕໍ່ສູ້​ກູ້​ຊາດ ​ຊຶ່ງ​ບັນດາ​ທ່ານ​ຜູ້ນຳ​ຂອງ​ຂະ​ບວນການ​ປະຕິວັດ ​ໄດ້​ວາງ​ແຜນ​ ແລະ​ ຊີ້​ນຳນຳພາ​ບັນຊາ​ບັ້ນ​ຮົບ​ຕ່າງໆ ໃນ​ທີ່​ສຸດ​ກໍ​ສາມາດ​ຍາດ​ເອົາ​​ເອກະລາດ​ຢ່າງ​ສົມບູນ​ມາສູ່​ປະ​ເທດ​ຊາດ.

​ປັດຈຸບັນ​, ວຽງ​ໄຊ​ໄດ້​ເປັນ​ທີ່​ຮູ້ຈັກ​ກັນ​ໃນ​ຖານະ​ເປັນ​ຖິ່ນ​ກຳ​ເນີ​ດຂອງ​ສາທາລະນະ​ລັດ ປະຊາທິປະ​ໄຕ ປະຊາຊົນ​ລາວ ແລະ ເປັນແຫຼ່ງທ່ອງທ່ຽວທາງປະຫວັດສາດທີ່ສຳຄັນ ແລະມີຊື່ສຽງກ້ອງຊື່ລືນາມທົ່ວດິນແດນລາວ, ພາກພື້ນ ແລະ ສາກົນອີກແຫ່ງໜຶ່ງ.

 

ບັນດາ​ຖ້ຳ​ປະຫວັດສາດ​ທ່ານ​ຜູ້ນຳ

ບັນດາ​ຖ້ຳ​ປະຫວັດສາດ​ຂອງ​ຜູ້ນຳ​ສ່ວນ​ໃຫ​ຍ່ລ້ວນ​ແຕ່​ຕັ້ງ​ຢູ່​ພາຍ​ໃນ​ຕົວ​ເມືອງ​ວຽງ​ໄຊ​ເຊິ່ງມີ​ຄວາມ​ສະດວກ​ສະບາຍ​ໃນ​ການ​ເຂົ້າທ່ຽວຊົມ​ຢູ່​ບໍລິ​ເວນ​ນີ້​ມີ​ຖ້ຳ​ຂອງ​ອະດີດ​ທ່ານ​ຜູ້ນຳ​ສຳຄັນ​ຂອງ​ລາວ​ຫຼາຍ​ທ່ານເຊັ່ນ: ທ່ານ​ໄກສອນ​ ພົມວິຫານ,ທ່າ​ນ ສຸພາ​ນຸວົງ, ທ່າ​ນ ໜູຮັກ ພູມສະຫວັນ,ທ່ານ ພູມີ ວົງວິຈິດ,ທ່ານຄຳໄຕ ສີພັນດອນ,ທ່ານ ສີສະຫວາດ ແກ້ວບຸນພັນ,ທ່ານ ສີທົນ ກົມມະດຳ,ທ່ານ ໄຟດ່າງ ລຳເບຼຍຢາວ ແລະ ທ່ານ ພູນ ສີປະເສີດ ເປັນຕົ້ນ. ໃນນັ້ນ ບາງຖ້ຳຍັງບໍ່ທັນປັບປຸງດ້ານສະຖານທີ່ ແລະ ສິ່ງອຳນວຍຄວາມສະດວກເພື່ອຮອງຮັບການທ່ອງທ່ຽວເທື່ອ ເຊັ່ນ: ຖໍ້າທ່ານ ພູມີ ວົງວິຈິດ ຖໍ້າທ່ານໄຟດ່າງ ລໍເບຼຍຢາວ ຖໍ້າທ່ານສີທົນ ກົມມະດໍາ, ຖໍ້າທ່ານສີພອນ ລໍວັນໄຊ ຖໍ້າທູດຈີນ ແລະທ່ານຜູ້ນຳອື່ນໆ.

 

 

ຖໍ້າປະຫວັດສາດທ່ານຜູ້ນຳເປີດໃຫ້ທ່ານທ່ຽວຊົມໃນວັນຈັນ-ວັນສຸກ ເວລາ 8:00-16:30ໂມງ.

ຖ້ຳທ່ານ ໄກສອນ ພົມວິຫານ

ຖໍ້າທ່ານໄກສອນ ພົມວິຫານ ຫຼື “ຖ້ຳຜາຫານ” ຕັ້ງຢູ່ໜ້າຜາທີ່ສູງຊັນຢູ່ເທດສະບານເມືອງວຽງໄຊ.ທ່ານໄກສອນ ພົມວິຫານ ແລະຄອບຄົວຂອງເພີ່ນເຄີຍອາ​ໄສຢູ່ໃນຖ້ຳແຫ່ງນີ້ໄນໄລຍະປີ 1964-1937 ໃນເວລານັ້ນ ທ່ານໄກສອນພົມວິຫານ ເປັນເລຂາທິການໃຫຍ່ຂອງພັກປະຊາຊົນປະຕິຫວັດລາວແລະທັງເປັນນາຍົກລັດຖະມົນຕີຄົນທຳອິດຂອງ ສປປ ລາວ ໃນເວລາຕໍ່ມາ. ພາຍໃນຖ້ຳປະກອບມີຫ້ອງນອນ,ຫ້ອງປະຊຸມ,ຫ້ອງພັກຜ່ອນ,ເຮືອນຄົວ,ຫ້ອງກິນເຂົ້າ,ຫ້ອງນ້ຳ,ຫ້ອງປ້ອງກັນເວນຢາມ ແລະ ຫ້ອງສຸກເສີນ ເພື່ອຫຼົບລະເບີດເຄມີ.ຢູ່ບໍລິເວນຕີນຜາ ອັນເປັນທີ່ຕັ້ງຂອງຖ້ຳແມ່ນມີອາຄານ 2 ຫຼັງ ທີ່ສ້າງຂຶ້ນພາຍຫຼັງມີສັນຍາຢຸດຍິງໃນເດືອນມັງກອນປີ 1937 ເພື່ອເປັນບ່ອນອາ​ໄສ ແລະ ຈັດກອງປະຊຸມພ້ອມນັ້ນກໍຍັງມີສວນດອກໄມ້ກ້ວາງຂວາງແລະຮົ່ມເຢັນດ້ວຍຕົ້ນໄມ້ນາໆຊະນິດ.

ຖ້ຳທ່ານສຸພານຸວົງ

ຖ້ຳທ່ານສຸພານຸວົງ ຫຼື “ຖ້ຳປຸ່ງລວກໃຕ້” ຕັ້ງຢູ່ເທສະບານເມືອງວຽງໄຊເຊິ່ງທ່ານເຄີຍອາ​ໄສຢູ່ໃນຖໍ້າແຫ່ງນີ້ ໃນໄລຍະປີ1964-1973 ແລະ​ ໃນເວລານັ້ນທ່ານສຸພານຸວົງໄດ້ດໍາລົງຕໍາແໜ່ງ ເປັນກົມການເມືອງສູນກາງພັກ ແລະ ປະທານແນວລາວຮັກຊາດ. ບໍລິເວນດ້ານຫນ້າຂອງຖ້ຳມີສວນຕົ້ນດອກຈຳປາ,ຕົ້ນໝາກກ້ຽງແລະຕົ້ນດອກໄມ້ທີ່ມີໃບສີແດງເຮື່ອງເຮືອໄປທົ່ວພື້ນດິນ ປຽບສະເໝືອນເລືອດຂອງປະຊາຊົນລາວທີ່ອາບຜືນແຜ່ນດິນລາວ. ທີ່ໂດດເດັ່ນໄປກວ່ານັ້ນກໍຄື ຢູ່ບໍລິເວນຖ້ຳແຫ່ງນີ້ແມ່ນມີຂຸມລະເບີດຂະໜາດໃຫຍ່ ທີ່ຖືກຕົບແຕ່ງເປັນອ່າງຮູບຫົວໃຈ.

ຖ້ຳ​ທ່ານ ໜູ​ຮັກ ພູມ​ສະຫວັນ

ຖ້ຳ​ທ່ານ ໜູ​ຮັກ ພູມ​ສະຫວັນ ຕັ້ງ​ຢູ່​ເທສະບານ​ເມືອງ​ວຽງ​ໄຊ​ ໂດຍ​ທ່ານ​ອາ​​ໄສ​ຢູ່​ໃນ​ຖ້ຳ​ແຫ່ງ​ນີ້​ໃນ ​ໄລຍະ​ປີ 1964-1937 ​ແລະ ​ໄດ້​ດຳລົງ​ຕຳ​ແໜ່​ງ​ເປັນ​ກົມ​ການ​ເມືອງ​ສູນ​ກາງ​ພັກ ​ແລະ ​ລັດ​ຖະ​ມົນຕີ​ກະຊວງ​ການ​ເງິນ.

ຖ້ຳ​ທ່າ​ນ ພູມິ ວົງ​ວິຈິດ

ຖ້ຳທ່ານ ພູມີ ວົງ​ວິຈິດ ມີ​ຊື່ວ່າ “ຖ້ຳ​ລວກ​ຟາດ” ຕັ້ງ​ຢູ່​ຫ່າງ​ຈາກ​ເທສະບານ​ເມືອງ​ວຽງ​ໄຊ​ປະມານ 200 ​ແມັດ.ທ່ານ​ພູມີ ວົງ​ວິຈິດ​ເຄີຍ​ອາ​​ໄສ​ຢູ່​ໃນ​ຖ້ຳ​ແຫ່ງ​ນີ້​ໄນ​ໄລຍະ​ປີ1964-1973 ​ເຊີ່ງ ​ແມ່ນ​ໄລຍະ​ທີ່​ທ່ານ​ໄດ້​ດຳລົງຕຳແໜ່ງເປັນກົມການເມືອງສູນພັກ, ລັດຖະມົນຕີກະຊວງສຶກສາແລະສາທາລະນະສຸກຢູ່ປາກຖ້ຳດັ່ງກ່າວມີກຳແພງເບຕົງທີ່ໜາແໜ້ນ ແລະ ສູງຊັນ ເພື່ອ​ໃຊ້ເປັນສິ່ງກຳບັງລູກຈະຫຼວດຈາກການຍິງທຳລາຍຂອງເຮືອບິນອາເມລິກາ.

ຖ້ຳ​ທ່ານ ​ຄຳ​ໄຕ ​ສີ​ພັນ​ດອນ

ຖ້ຳ​ທ່ານ​ຄຳ​ໄຕ​ສີ​ພັນ​ດອນ​ມີ​ຊື່ວ່າ “ຖ້ຳ​ຜາ​ບ່ອງ” ຕັ້ງ​ຢູ່​ເທສະບານ​ເມືອງ​ວຽງ​ໄຊ ​ເຊິ່ງທ່ານ​ເຄີຍ​ອາ​​ໄສ​ຢູ່​ໃນ​ຖ້ຳ​ແຫ່ງ​ນີ້​​ໃນ​ໄລ​ຍະປີ 1964-1973 ​ແລະ​ເວລາ​ນັ້ນ ທ່າ​ນ​ໄດ້​ດຳລົງ​ຕຳ​ແໜ່ງ ​ເປັນ​ກົມ​ການ​ເມືອງ​ສູນກາງ​ພັກ ​ແລະ ລັດ​ຖະ​ມົນຕີ​ກະຊວງ​ປ້ອງ​ກັນ​ປະ​ເທດ.

ຖ້ຳ​ທ່ານ ​ສີສະ​ຫວາດ ​ແກ້ວ​ບຸນ​ພັນ

ຖໍ້າທ່ານສີສະຫວາດ ແກ້ວບຸນພັນ ມີຊື່ວ່າ “ຖ້ຳກໍຄາຍ” ເຊິ່ງເພິ່ນເຄີຍອາ​ໄສຢູ່ໃນຖ້ຳແຫ່ງນີ້ໃນໄລຍະປີ1964-1973 ໂດຍໃນເວລານັ້ນທ່ານໄດ້ດໍາລົງຕໍາແໜ່ງ ເປັນຮອງລັດຖະມົນຕີກະຊວງປ້ອງກັນປະເທດ.

ຖ້ຳທ່ານສີທົນກົມມະດຳ

ຖໍ້າທ່ານສີທົນ ກົມມະດຳ ຕັ້ງຢູ່ດ້ານຫຼັງຂອງຖ້ຳທ່ານພູມີ ວົງວິຈິດ ຫ່າງຈາກເທສະບານເມືອງວຽງໄຊປະມານ 200 ແມັດ.

ຖ້ຳທ່ານໄຟດ່າງ ລໍເບຼຍຢາວ

ຖ້ຳທ່ານໄຟດ່າງ ລໍເບຼຍຢາວ ມີຊື່ວ່າ ຖ້ຳເງິນ ຕັ້ງຢູ່ຫ່າງຈາກເທສະບານເມືອງວຽງໄຊ ປະມານ 2 ກິໂລແມັດໂດຍມີທາງລົດຜ່ານຢູ່ໜ້າຖໍ້າ. ທ່ານໄຟດ່າງ ລໍເບຼຍຢາວ ເຄີຍອາໄສຢູ່ໃນຖ້ຳດັ່ງກ່າວໄນໄລຍະປີ 1964-1973 ເຊິ່ງທ່ານໄດ້ດຳລົງຕຳແໜ່ງເປັນກຳມະການແນວລາວຮັກຊາດ.

ຖ້ຳທ່ານພູນ ສີປະເສີດ

ຖ້ຳທ່ານພູນ ສີປະເສີດມີຊື່ວ່າ “ຖ້ຳຍ່ອງຊ່ອງ” ຕັ້ງຢູ່ເທສະບານເມຶອງວຽງໄຊ ເຊິ່ງສາມາດຍ່າງທ່ຽວຊົມໄດ້ໃນໄລຍະປີ 1964-973 ທ່ານພູນ ສີປະເສີດ ເຄີຍອາໄສຢູ່ໃນຖໍ້າແຫ່ງນີ້ ແລະ​ໃນເວລານັ້ນ ທ່ານໄດ້ດຳລົງຕຳແໜ່ງເປັນກົມການເມືອງສູນກາງພັກ.

ນອກຈາກທ່ຽວຊົມຖໍ້າທ່ານຜູ້ນໍາແລ້ວ ເມືອງວຽງໄຊ ຍັງມີສະຖານທີ່ໃຫ້ທ່ຽວຊົມອີກຫຼາກຫຼາຍບໍ່ວ່າຈະເປັນທາງດ້ານວັດທະນະທໍາທ້ອງຖິ່ນ, ທ່ອງທ່ຽວທໍາມະຊາດເຊັ່ນ: ຖໍ້ານົກແອ່ນ, ຕາດນໍ້ານົ່ວ , ເຄືື່ອງຫັດຖະກໍາຕໍ່າແຜ່ນ ແລະ ອື່ນໆ.

Comments