Senglao content (728×90)
Senglao content (728×90)

ບິດາລັກ ສີອັກຄະພົມ (ຕຸລີ່) ນັກຮ້ອງ, ພິທີກອນ ແລະ ນັກທຸລະກິດ.

ສາວເໜືອເມືອງມໍລະດົກໂລກ. ນັກຮ້ອງທີ່ມີນໍ້າສຽງເປັນເອກະລັກ ພຽງແຕ່ໄດ້ຍິນ ບໍ່ໄດ້ເຫັນໜ້າຍັງຮູ້ເລີຍວ່າ: ແມ່ນສາວຄົນນີ້  ບິດາລັກ ສີອັກຄະພົມ ຫຼື ທຸກຄົນມັກຈະຮ້ອງວ່າ: ຕຸລີ່ ປັດຈຸບັນນີ້, ນອກຈາກມີຊື່ສຽງໃນອາຊີບສາຍບັນເທີງແລ້ວ ຍັງເຮັດທຸລະກິດຫຼາຍຢ່າງເປັນຂອງຕົນເອງນໍາອີກ.

ຊ່ວຍແນະນໍາຕົນເອງໃຫ້ຮູ້ຈັກແດ່?

ສະບາຍດີ! ຊື່ ວິດາລັກ ສີອັກຄະພົມ (ຕຸລີ່) ອາຍຸ 30 ປີ ເກີດທີ່ຫຼວງພະບາງ, ຈົບການສຶກສາດ້ານບໍລິຫານທຸລະກິດ, ພາສາອັງກິດ ຢູ່ທີ່ບ້ານເກີດ, ນອກຈາກເຮັດວຽກໃນວົງການບັນເທີງ ເຊັ່ນ: ຮ້ອງເພງ, ແຕ່ງເພງ ແລະ ພິທີກອນແລ້ວ ຕຸລີ່ ຍັງເຮັດທຸລະກິດກ່ຽວກັບ ຮ້ານອາຫານ ຊື່ວ່າ: Homemade Café ຢູ່ທີ່ຫຼວງພະບາງ ແລະ ເປັນເຈົ້າຂອງແບຣນນໍ້າຫອມ Bidalack Perfume ໃນນີ້ ຍັງມີໂອກາດໄດ້ຮັບໃຊ້ພາກລັດໃນງານສໍາຄັນຕ່າງ ທັງຮ້ອງເພງ ແລະ ເປັນພິທີກອນ ຜົນງານທີ່ສໍາຄັນອີກຢ່າງໜຶ່ງແມ່ນໄດ້ຖືກເລືອກໃຫ້ເປັນຕົວແທນຂອງສິລະປິນລາວ ນໍາວັດທະນະທໍາຂອງລາວໄປສະແດງຢູ່ປະເທດ ມາເລເຊຍ ຮ່ວມກັບ 11 ປະເທດ ແລະ ໃນປີຜ່ານມາ ພ້ອມນີ້ຍັງໄດ້ຮັບໂອກາດເປັນທູດວັດທະນະທໍາ ຂອງໂຄງການອະນຸຮັກຮັກສາ ເມືອງຫຼວງພະບາງ ໄດ້ເປັນຕົວແທນຂອງສື່ມວນຊົນ ໃນການລົນນະລົງໃຫ້ເມືອງຫຼວງພະບາງເປັນເມືອງປອດຂີ້ເຫຍື້ອ, ຫຼຸດການນໍາໃຊ້    ”ປາສຕິກ” ແລະ ວຽກອື່ນໆອີກຫຼວງຫຼາຍ.

ຍ້ອນຫຍັງຈຶ່ງເຂົ້າມາໃນວົງການບັນເທີງ?

ເປັນຄວາມຝັນຂອງ ຕຸລີ່ ມາແຕ່ຕອນຮຽນຢູ່ ເປັນຄົນມັກຮ້ອງເພງ, ຟັງເພງ ແລະ ສາມາດແຕ່ງເພງໄດ້ ໃສ່ທໍານອງເອງ ໂດຍທີ່ບໍ່ໄດ້ຜ່ານຫຼັກສູດການແຕ່ງເພງຢູ່ໃສມາກ່ອນເລີຍ ມັນເປັນແບບອັດຕະໂນມັດ ອາດເປັນຍ້ອນ ເຮົາຟັງເພງຂອງຄົນອື່ນຫຼາຍ ແລ້ວມັນສ້າງຈິນຕະນາການໃຫ້ເຮົາ ໂດຍຫຼັກການແຕ່ງເພງ ກໍຄືກັບຫຼັກການແຕ່ງກອນ ຊຶ່ງເຮົາສາມາດຈັບຫຍັງມາໃສ່ກໍໄດ້ ມາຈາກຕົວເຮົາເອງ ສະພາບແວດລ້ອມຄົນອ້ອມຂ້າງ ແລະ ມັນເປັນຄວາມໂຊກດີຂອງເຮົາຢ່າງໜຶ່ງຊຶ່ງເຮົາຫຼິ້ນດົນຕີບໍ່ເປັນ ແຕ່ເຮົາສາມາດແຕ່ງເພງໄດ້ ອາດເປັນຍ້ອນພອນສະຫວັນເຮົາຫຼາຍກວ່າ ໂດຍປົກກະຕິແລ້ວ ຕ້ອງຫຼິ້ນດົນຕີເປັນ ຈຶ່ງສາມາດແຕ່ງໄດ້, “ອາລາບໍາ” ທໍາອິດອອກເມື່ອປີ 2008 ຊຶ່ງເພງທີ່ດັງແລະ ທຸກຄົນສາມາດຮ້ອງໄດ້ແມ່ນ: ເຈັບບໍ່ຈໍາ ແລະ “ອາລາບໍາ” ທີ 2 ອອກເມື່ອປີ 2010 ມາຮອດປັດຈຸບັນນີ້ ຜົນງານເພງທີ່ແຕ່ງມີເຖິງ 30 ກວ່າເພງແລ້ວ ແລະ ຍັງຈະມີຜົນງານອອກມາເລື້ອຍໆ.

ປັດຈຸບັນຫຼວງພະບາງມີນັກລົງທຶນເຂົ້າມາຫຼາຍຄິດວ່າ: ມີຜົນດີ ແລະ ເສຍແນວໃດ?

ເວົ້າເຖິງຂໍ້ດີ: ຄືແຕ່ລະປີເມືອງຫຼວງພະບາງແຫ່ງນີ້ ກໍມີນັກທ່ອງທ່ຽວເຂົ້າມາຫຼາຍຢູ່ແລ້ວ ສະນັ້ນ, ສົ່ງຜົນໃຫ້ເສດຖະກິດຂະຫຍາຍຕົວຂຶ້ນເລື້ອຍໆ ເປັນຕົ້ນແມ່ນຮ້ານອາຫານ, ເຮືອນພັກ ແລະ ສະຖານທີ່ທ່ອງທ່ຽວຕ່າງໆ, ປະຊາຊົນມີວຽກເຮັດງານທໍາ.

ເວົ້າເຖິງຂໍ້ເສຍ: ແຕ່ການທີ່ນັກລົງທຶນຕ່າງປະເທດເຂົ້າມາເຊົ່າ ຫຼື ຊື້ ກໍເປັນຜົນເຮັດໃຫ້ປະຊາຊົນຕ້ອງຍ້າຍອອກໄປຢູ່ບ່ອນໃໝ່ ຕົວຢ່າງ: ແຕ່ກ່ອນເຮົາເຄີຍຢູ່ນີ້ ເມື່ອເຮົາຍ້າຍອອກໄປຢູ່ບ່ອນໃໝ່ ກໍເຮັດໃຫ້ບາງຄັ້ງເຮົາຄິດເຖິງບັນຍາກາດແບບເກົ່າໆ ບ່ອນທີ່ເຄີຍເຫັນຜູ້ຄົນອອກມາໃສ່ບາດໃນທຸກໆເຊົ້າ ແຕ່ຕອນນີ້ເລີ່ມເຕັມໄປດ້ວຍນັກທ່ອງທ່ຽວ ຫຼາຍຢ່າງກໍຫັນໄປໃນທາງທຸລະກິດເປັນສ່ວນໃຫຍ່ ຈຸດນີ້ຕາມທັດສະນະສ່ວນຕົວແລ້ວກໍອາດເຮັດໃຫ້ບັນຍາກາດເກົ່າໆເຫຼົ່ານັ້ນໝົດໄປໃນອະນາຄົດ.

ປີທ່ອງທ່ຽວລາວ 2018 ເຮົາຄວນມີການປັບປຸງແນວໃດ? ເພື່ອໃຫ້ບັນລຸເປົ້າໝາຍ 5 ລ້ານຄົນ

ເພື່ອໃຫ້ບັນລຸຕາມເປົ້າໝາຍ 5 ລ້ານຄົນ ສິ່ງທີ່ທໍາອິດແມ່ນ: ປັບປຸງສະຖານທ່ອງທ່ຽວທີ່ຊຸດໂຊມໃຫ້ສວຍງາມ ສະອາດຢູ່ເລື້ອຍໆ, ສ້ອມແປງຖະໜົນຫົນທາງເພື່ອອໍານວຍຄວາມສະດວກ ແລະ ປັບປຸງດ້ານການບໍລິການໃຫ້ປະທັບໃຈຂຶ້ນກ່ອນເກົ່າ ເພື່ອໃຫ້ເຂົາເຈົ້າມີຄວາມເພິ່ງພໍໃຈທີ່ສຸດເວລາກັບຄືນບ້ານເມືອງຂອງເຂົາເຈົ້າແລ້ວມີຮອຍຍິ້ມ ແລະ ຢາກກັບມາທ່ຽວອີກຄັ້ງ. ແຕ່ສະເພາະຫຼວງບາງເລີ່ມແຕ່ເປີດປີທ່ອງທ່ຽວລາວ 2018 ເປັນຕົ້ນມາ ທາງພະແນກກ່ຽວຂ້ອງແມ່ນເຮັດວຽກໜັກສົມຄວນ ມີການໂຄສະນາ ປະຊາສໍາພັນຫຼາຍຂຶ້ນ, ສ້າງເປັນ “ວີດີໂອ” ແນະນໍາສະຖານທີ່ທ່ອງທ່ຽວຕ່າງໆ ເພື່ອເຊີນຊວນໃຫ້ບັນດານັກທ່ອງທ່ຽວທັງພາຍໃນ ແລະ ຕ່າງປະເທດ ເຂົ້າມາທ່ຽວຫຼາຍໆ.

ຝາກທ້າຍ

ກ່ອນອື່ນຂໍຂອບໃຈ ວາລະສານ ທາເກັດ ທີ່ໃຫ້ໂອກາດ ຕຸລີ່ ໃນການຖ່າຍແບບງາມໆໃນເທື່ອນີ້ ແລະ ຢ່າລືມຕິດຕາມຜົນງານເພງໃໝ່ທີ່ຈະອອກມາໄວໆນີ້ ພ້ອມນີ້ ທ່ານໃດໄດ້ໄປຫຼິ້ນເມຶືອງຫຼວງພະບາງກໍຢ່າລືມ ແວ່ຮ້ານ Homemade Café ອຸດໜູນກັນແດ່ເດີ.

Fb: Bidalack Syackhaphom

(ວາລະສານ ທາເກັດ ສະບັບທີ 139 ເດືອນກຸມພາ  2018  ຕາມ M Point Mart, Jeffy Mart ແລະ  U  Express  ຫຼື ສອບຖາມຈອງເປັນ ສະມາຊິກ ໄດ້ທີເບີ 021 216 666)

Comments